حقل ظهر .. ايقونة غاز المتوسط ..!

31 Jan 2018

حقل ظهر .. ايقونة غاز المتوسط ..!

 Zohr Gas Field . The Mediterranean Treasure

—————————————————————–

فيلم تسجيلى من 7 دقائق يجسد إنجاز المصريين ، فى تحطيم حاجز المستحيل .. و يستعرض جهود الدولة بحقل ظهر العملاق ، وما قامت به فرق العمل ، وكل المعنيين بتحقيق هذا الإنجاز الضخم الذى وضع مصر كبداية فى مصاف الدول كبرى المنتجة للغاز .. ويكفى أن نقول أن هذا الحقل وحده قام بجذب استثمارات تعدت 12 مليار دولار .. وها هى مصر الأن بدأ فى جني ثمار سياستها الإقتصادية الواعية من أجل مستقبل أفضل لكل المصريين .. والذى سيبدأ بأن تتوقف مصر عن إستيراد الغاز المسال بنهاية يونيو القادم

عظمة المشروع مش حقل ظهر والحفر والكشف الغازى وبس .. لكن عظمته فى المعجزة اللى قام بها المصريين فى إنهاء الأرصفة البحرية ، والبنية التحتية ، ومنصات الغاز المسال ، ومد مواسير خطوط التصدير ، وخطوط الإنتاج ، وتوسعة الموانئ ، وإنشاء موانئ جديدة ، وتوفير فرص عمل لأعداد كبيرة من ابناء مصر من كافة التخصصات .. وتحويل الموضوع بأكمله إلى منظومة عمل ونجاح متكاملة ستجعل مصر بإذن الله فى خلال سنتين مركزاً إقليمياً ، بل و دولياً لإسالة وضخ ونقل وتوصيل الغاز … وكل ده فى وقت قياسى .. وبشهادة رئيس شركة إينى نفسه ، و اللى قال النهاردة فى مؤتمر الإفتتاح إن شركته عمرها ما إشتغلت قبل كدة بهذا المستوى من معدلات الإنتاج ، فى اى حتة فى العالم ..

وإحنا مش محتاجين نفكركم إن مشروع إستخراج الغاز كان أحد الفناكيش اللى إتكلم عنها كل أولاد الإييه بمنتهى السخرية والإستهزاء زى كل مشروعات مصر القومية اللى بتقوم بيها الدولة .. وهو أيضا واحد من المشروعات اللى تم الإتفاق على البروتوكول الخاص بها فى مؤتمر شرم الشيخ الإقتصادى 2015 .. والمعروف عند النشطاء والسبوبجية والمراهقين سياسيا بــ مؤتمر الفنكوش 🙂

لكن اللى إحنا عايزين نفكر حضراتكم به ، هو حالة العواء والسعار والتباكى اللى صاحبت موضوع ترسيم الحدود البحرية مع قبرص .. وكل الكلام اللى إتقال عن تفريط مصر فى حقوقها ، وتضييع ثروات المصريين .. والغاز المصرى اللى ضاع .. واللى إحنا إتكلمنا عنه وقتها فى حينه ، وأفردنا له عدة مقالات ..

وهو ده اللى إحنا عايزين نلفت نظر اصدقائنا له .. إنكم دايما تخلوا البوصلة بتاعتكم هى حالة العواء والهجوم الشديد على الدولة من جانب اللى بيسموهم النشطاء والمعارضة والمراهقين سياسياً .. يعنى تشوفوا هم ماشيين فى أى إتجاه .. وكونوا متأكدين إن العكس تماماً هو اللى فيه مصلحة الدولة المصرية …. وكل ما زاد العواء منهم .. تزدادوا يقين إن الخير من وراء الموضوع ده أكبر بكتير من المتوقع .. لأنهم كلهم مجرد واجهات لجهات أخرى شايفيين كويس مصلحة مصر وعارفينها بما لهم من مجال رؤية اوسع مننا .. وبـــ يستخدموا النماذج والرموز دوول كأدوات لمحاولة إجهاض الخير اللى ممكن ييجى لمصر 😉 🙂

و قيسوا على كدة بقى كل حاجة حصلت على مدار الكام سنة اللى فاتوا .. وكمان الكام سنة الجايين ..

مبروك لمصر والمصريين .. وبإذن الله دايما من نصر لنصر .. وربنا يكثر فناكيش المصريين ، لو كلها من النوعية دى

إفرحوا يامصريين .. وقولوا من قلبكم تحيا مصر … وتأكدوا أن هناك من ينظرون إليكم الأن .. وهم يتألمون 🙂 🙂

ملحوظة: برجاء مراجعة المقالات التالية من على موقع صفحتكم الأرشيفى

لمشاهدة الفيديو و تعليقاتكم