مشروعات الفنكوش .. مشروعات أمن قومى !!

22 Dec 2018

مشروعات الفنكوش .. مشروعات أمن قومى !!

———————————————–

النهاردة قام الرئيس السيسى بافتتاح المرحلة الأولى من مشروع الصوب الزراعية .. أحد المشروعات القومية الجديدة .. اللى بتندرج تحت نطاق الأمن القومى المصرى .. واللى بيحلو لبعض المنفسنين والمرضى النفسيين انهم يسموها مشروعات الفنكوش … ويارب يكثر فناكيشنا 😊

طب لييه مشروع الصوب الزراعية يندرج تحت نطاق الأمن القومى المصرى !؟ .. ببساطة خالص ، لأن الأمن الغذائى هو أحد أهم أعمدة الأمن القومى .. مش لمصر فقط ولكن لكل دول العالم … وهو ده إللى معظم دول العالم النهاردة بتتسابق وتتصارع عليه ايمانا بمقولة “لا حرية لشعب يأكل من وراء البحر” .. و أااااه لو تعرفوا مين صاحب هذه المقولة 😊 .. ماعلينا .. المهم خلينا فى المفيد ..

المستهدف هو الوصول الى 100 الف فدان صوب زراعية .. وأهمية المشروع ده هو فى حجم العائد الانتاجى فى مواجهة الزيادة المطردة فى الزيادة السكانية لمصر مع ارتفاع الطلب على الغذاء فى مواجهة الانتاج .. وعلشان كدة بنلاقى دايما الرئيس السيسى بيحث الشعب والدولة على زيادة الإنتاج .. لأن وفرة المنتجات سيؤدى إلى انخفاض الأسعار .. و دى قاعدة اقتصادية معروفة وثابتة و غير قابلة للتغيير (سعر المنتج مرتبط بالطلب عليه فيما لا يتعارض مع تكلفة الانتاج) … ويكفى اننا نقول ان فدان الصوب الزراعية بينتج فى المتوسط بما يعادل من 2.5 فدان إلى 12 فدان من المنتجات الزراعية فى الأرض العادية والمفتوحة … وعلشان كدة الرئيس لما بدأ مشروع الأمن الغذائي من 4 سنوات ، قال انه هيعمل مشروع المليون ونص المليون فدان .. وبعدين رفع سقف التطلعات إلى 2.5 مليون فدان منهم مليون فدان من إنتاج ال 100 الف صورة زراعية

الرئيس قال خلال افتتاح المشروع النهاردة ، موجها حديثه للمصريين: “هل المشروع ده مايخليكمش دايمًا تشعروا بالفخر والسعادة ..، كل القائمين على المشروع مصريين … يا ترى ده مايحسسناش إننا بنتحرك بخطى جيدة؟”.

وقال كمان : “يا ترى مشروع ال35 ألف فدان صوب اتكلف كام !!؟، لازم تبقوا سعداء وفخورين جدا يا مصريين، لما يكون حاجة أنجزناها مع بعضنا وتدينا أمل، وإذا كان 35 ألف فدان بيشغلوا 75 ألف عامل، طب لما نكمل الـ 100 الف فدان، هايوصل لـ 250 ألف عامل شغل حقيقى”.

ودعا الرئيس القائمين على المشروع إلى الاهتمام بالتدريب وتأهيل العمال، علشان يفضل العمل مستمر بنفس مستوى الاداء ده … وقال :”إحنا اتكلمنا على مشروع الـ 35 ألف فدان، لكن مشروع المليون ونصف فدان مستمر .. ولسة شغالين فيه”.

وتابع الرئيس فى جملة .. احنا شايفين إنها من اجمل وأهم ما قاله الرئيس منذ توليه المسئولية .. جملة تحسسك ان الراجل ده فعلا شايل حمل كبير … حمل المصريين الغلابة .. إللى الآخرين مافيش وراهم غير المتاجرة بمعاناتهم و ألامهم فقط بدون أى عمل يخففوا بيه المعاناة دى عنهم .. لأنهم فى الحقيقة مش بيعملوا كدة غير خدمة للى بيمولوهم و بيشغلوهم وبس !! 😏😤 …

الجملة إللى قالها الرئيس السيسى: “بنعمل كتير لينا ولشغلنا وحياتنا ومستقبلنا وبنعمل الحاجة زى ما انتو شوفتوا بشكل متكامل يعنى بنوفر كل المنظومة على بعض، وكان دايمًا يقولك فى السوبر ماركت الكبير ده “أورجانيك”، يعنى الناس تاكل أورجانيك وباقى المصريين ماياكلوش أورجانيك ولا إييه !؟، … يعنى اللى معاه فلوس ياكل أورجانيك والباقى ماياكلوش !!؟، .. لا.. إن شاء الله كله هايبقى كده، بس إجروا معانا علشان اللى تحقق النهاردة أمر يسعد ويشرف المصريين”..

و مع كل خطوة بتخطيها مصر لقدام ، بنعرف ونتأكد ان المهيصاتية والمعارضة إللى مش معارضة ، والمتاجرين بالشعارات السياسية بدون أى خطة أو جهد حقيقى ، واللى ما وراهمش غير نشر الطاقة السلبية والاحباط ورسم ظلال الفشل على كل إنجاز ، أو حتى محاولة إنجاز بتقوم بيها الدولة .. و وصف كل شئ بإنه كذب أو فنكوش أو إطلاق النكات والكوميكس … كل الناس دى ثبت بالدليل ، و مع كل يوم بيعدى ، انهم فعلا هم الكاذبين ، وأن هدفهم الحقيقى عمره ما كان مصلحة مصر … وعلشان كدة تلاقيهم زى الغربان و الضباع ، إللى مش بتجتمع وتتراقص ويعلو صوتهم و صيحاتهم غير على أجساد الجيف و روائح النتانة .. لأنهم فعلا مابيقدروش يعيشوا غير فى الأجواء دى 🙄 !

مشروعات قومية يعنى فرص عمل .. يعنى مرتبات و دخل جديد .. يعنى زيادة القدرة الشرائية .. يعنى تسريع فى دورة رأس المال .. يعنى حالة رواج اقتصادى .. يعنى اقتصاد صحى .. يعنى ارتفاع مستوى المعيشة .. يعنى زيادة دخل من تانى … يعنى ….. و ارجع بقى كرر المتوالية البسيطة إللى فى السطرين إللى فاتوا دوول من تانى وتالت ورابع … و هلم جرة …. وخصوصا لما تعرف ان المشاريع القومية دى سحبت ٥ مليون عامل من السوق … يعنى فيه ٥ مليون اسرة عايشة على المشاريع دى …. و الشركات الوطنية بتدور على عمالة و شباب يشتغل بايده و بدخل كويس جدا

عرفت بقى لييه كان بيتم التكسير فيك و فى اى مشروع قومى كنت بتعمله على مدار السنين إللى فاتت … لان الدنيا لو قامت .. و المتوالية الاقتصادية اشتغلت .. ماحدش هيعرف يوقفها .. أو يقف قصادها …. و مش معنى كلامنا اننا كشعب هنتحول لمجموعة من المليونيرات … لأ … لكن الصعوبات هتقل .. والوضع الاقتصادى هيتحسن .. و لو قدرنا نوصل لمعادلة نمو اقتصادى مضطرد مع انخفاض معدل النمو السكاني.. هيظهر بسرعة تأثير المتوالية الاقتصادية للاقتصاد الإنتاجي بسرعة أكبر .. وكلنا هنشعر بتغيير كبير جدا

مصر قادمة بإذن الله … وخليك دايما واثق فى الخطوات إللى بلدك بتخطيها .. و حط فى اعتبارك انها بتخطى الخطوات دى بيك انت مش بحد تانى .. وعمرها ما هتتقدم غير بيك .. يعنى بينا كلنا احنا المصريين 😊💚💚

لمتابعة تعليقاتكم