بداية الحصاد .. !!

31 Mar 2019

بداية الحصاد .. !!

—————–

بدون مبالغات أو مزايدات .. و من غير أى إفراط أو تفريط .. نقدر نقول بلا أدنى تردد ، بعد القرارات اللى اصدرها الرئيس السيسى إمبارح فى كلمته اللى قالها خلال احتفالية المجلس القومى للمرأة لتكريم المرأة المصرية والأم المثالية، .. إن مصر هــ تبدأ واحدة واحدة تجنى ثمار الإصلاح الإقتصادى.

الرئيس السيسى أصدر قرارات إقتصادية تخص المرتبات والدخول برفع الحد الأدنى لأجور جميع العاملين المدنيين بالدولة من 1200 جنيه شهريا إلى 2000 جنيه ، ومنح العاملين بالدولة جميع العلاوات الدورية ، وتنفيذ علاوة إضافية 150 جنيه ، وإطلاق أكبر حركة ترقيات ، و رفع الحد الأدنى للمعاش إلى 900 جنيه ، مع إقرار نسبة زيادة على المعاشات 15% بما لا يقل عن 150 جنيه ….. و مش كدة وبس .. لكن كمان إضافة 100 ألف أسرة لمعاش تكافل وكرامة …

طبعا أكيد القرارات دى مش هــ تعدى من غير ما شوية المزايدين والمراهقين سياسياً يحاولوا يشوهوا الكلام ده ، ويقولوا هو 800 جنيه زيادة يعملوا إييه ، و 150 جنيه قييمتهم قد إييه ، و 900 جنيه معاش يجيبوا إييه !!؟؟ و كل الكلام اللذيذ ده … لكن ياترى شوية القرارات دى بالفلوس اللى مالهاش لازمة دى ، هــ تزود موازنة الدولة كام !!؟؟ ..

زيادات المرتبات والمعاشات فقط هــ تزود الموازنة العامة للدولة فى السنة حوالى 60 مليار جنيه … أيوة … 60 مليار … زى بالضبط الــ 3 جنيه بتوع زيادة التموين اللى البهوات إتريقوا عليها .. لكن لو حسبوها على مستوى الدولة هــ يلاقوها زودت موازنة الدعم 240 مليون جنيه فى الشهر .. يعنى حوالى 3 مليار جنيه فى السنة … ياااااااه .. كل ده !!؟؟ … أيوة حرررررتك … دى الــ 3 جنيه اللى كنت بتتريأ عليها …. يعنى أى قرار بــ يتم إتخاذه على مستوى الدولة فيما يخص الدعم أو المرتبات ، لازم يتحسب كويس .. لأنك قبل ما تاخده ، لازم تبقى عارف إنت هــ تجيب التمويل بتاعه منين …. دى دولة فيها 100 مليون مواطن ، مش زى ما أيقونات النخبة بيعملوا ، و اللى مش بيعرفوا يقولوا غير كلام مزوق وبس ، يضحكوا بيه على عقول الغلابة ، ويوعدوهم إنهم لو مسكوا الدولة ، هــ يدوا كل مصرى ألاف الجنيهات وفيلا فى الساحل الشمالى … زى ما واحد من اللى رشحوا نفسهم للرئاسة لما وعد فى حالة فوزه إنه هــ يمنح كل شاب 10 ألاف جنيه و فدان أرض … يعنى حوالى نص تريليون جنيه ، وأكثر من مساحة الأرض الخالية الصالحة للإستخدام .. كان هــ يجيبهم منين !!؟؟ …. أى كلام وضحك على الذقون وخلاص .. وللأسف .. الناس بتصدق

لكن ما علينا … طب هل الكلام ده معناه إن كدة تمام و 100 فل وعشرة … طبعا لأ … وأكيد وقطعاً لسة فيه إجراءا تانية ، هــ يتم إتخاذها على فترات ، ترفع دخل المواطن أكثر …. طب الكلام ده جاى منين !!؟؟؟ … جاى من أكثر من حاجة .. الإرتفاع المضطرد فى الناتج المحلى وزيادة الإنتاج .. و توفير الدعم اللى كان بــ يتم إهداره فى ما لا طائل من ورائه ، وماكانش المواطن بــ يشعر بيه … والبدء فى تسعير الخدمات بأسعار تكلفتها الحقيقية مع مراعاه هامش دعم معقول يصب فى صالح المستخدمين للخدمات دى ، بما يسمح بتطويرها وزيادة جودتها مع الوقت لتتناسب مع تطلعات المواطن المصرى.

طب نيجى بقى للسؤال المهم .. أو الأهم على الإطلاق ، واللى كل الناس بتسأله !! …. ياترى هــ ييجى علينا وقت الأسعار ترخص وترجع زى زمان تانى … و فى خلال قد إييه هــ يحصل الكلام ده !!

والإجابة ببساطة خالص … لو إنت تقصد معدلات الأسعار فيما قبل يناير 2011 .. فــ الإجابة هى قولاً واحداً .. لأ مش هــ يحصل … ولا حتى معدلات أسعار ما قبل نوفمبر 2016 .. أى ما قبل التعويم … لييه !!؟ … لعدة أسباب:

أولا .. إن معدلات الأسعار وتكلفة السلع والخدمات والمواد التكميلية إرتفعت بشكل كبير ، مش فى مصر بس .. لكن فى العالم كله .. حتى فى الدول الغنية والدول الصناعية الكبرى ، والدول البترولية ، السلع والخدمات فيه إرتفعت ، وكمان أصبحوا بيرفعوا الدعم عن كاهل الدولة.

ثانيا .. إجراءات الإصلاح الإقتصادى اللى بــ تتم ، و إعادة هيكلة منظومة الدعم ، وخطوات رفع الدعم بشكل كامل عن كل شئ ، وتوجيه أموال الدعم للفئات المستحقة فعليا للدعم

ثالثا .. إجراءات تعويم العملة بشكل كامل .. و ده كشف الكذبة اللى كثير مننا كنا عايشين فيها ، وإحنا بــ نتمتع بدعم بأكثر من 70% من قيمة السلع والخدمات ، واللى كانت بتتحمله الدولة بالكامل .. و كان بــ يأثر على ملفات تانية كثير زى الصحة والتعليم وغيرها .. وياريته كان عاجب !!

طب هل ده معناه إننا هــ نفضل عايشين كدة والأسعار نار كدة … لأ طبعا .. فيه إجراءات حمائية بتاخدها الدولة للسلع الأساسية وبتعرضها فى منافذ بيع الدولة والمجمعات الإستهلاكية بأسعار تقل عن سعر السوق بمستوى 40% و 50% كمان ..

و زى وا قولنا قبل كدة .. و بدأ كلامنا يتحقق .. إن الأسعار مش هــ تنخفض بشكل دراماتيكى .. لكن معدلات الدخول هى اللى هــ تزيد … وإذا كنا عايزين مزيد من ثبات الأسعار أو إنخقاضها يبقى لازم نعمل حاجتين مهمين .. الحاجة الأولى هو زيادة الإنتاج وإحداث وفرة فى السلع الأساسية لأن وفرة المنتج بتأثر على سعره … والحاجة الثانية ، هو تقليل معدل الزيادة السكانية ، علشان نقدر نحس بالفعل بالنمو الإقتصادى ، لأن أى نمو إقتصادى بيتأكل مع الزيادة السكانية ، .. و هى دى المعادلة اللى أدركتها شعوب الدول الكبرى والمتقدمة.

و تانى وثالث وعاشر .. الدول مش بــ ترتقى إقتصاديا غير بزيادة معدلات الإنتاج .. و لو إحنا بدأنا نشوف طاقة نور ، وبدأنا نحس بشئ إيجابى .. فــ لازم نبقى عارفين ومتأكدين .. إننا إحنا اللى عملنا كدة .. بكفاحنا وصبرنا وخوفنا على بلدنا وقبولنا لكل التحديات اللى إتفرضت علينا ، وإنتصرنا عليها … إحنا المصريين .. مش حد تانى …

مبروك لكل المصريين .. ومازلنا فى إنتظار المزيد من الدولة المصرية .. و من المصريين

والقادم أفضل بإذن الله

لمتابعة تعليقاتكم