المؤشرات الإيجابية .. بشهادات عالمية !!

10 Nov 2019

المؤشرات الإيجابية .. بشهادات عالمية !!
—————————————-

كرة الثلج بدأت تتعاظم .. ونتائج الإصلاح الإقتصادى بدأت تظهر وتبان … وبدأ ده ينعكس على أرض الواقع والناس بدأت تحس بيه من خلال مجموعة من المؤشرات الرسمية … والجميل إن الكلام ده مش بس صادر عن المصادر الرسمية المصرية .. لكن كمان تناقلتها مصادر دولية ومنصات إقتصادية كبيرة .. زى بلومبرج و جلوبال فاينانس اللى كرمت طارق عامر محافظ البنك المركزى المصرى فى أكتوبر الماضى كرابع محافظ ضمن أفضل 21 محافظ بنك مركزى على مستوى العالم .. وطبعا ناهينا عن البنك الدولى اللى مش مصدق مستوى النجاح اللى حققه برنامج الإصلاح الإقتصادى فى مصر

رسمياً معدل التضخم بينخفض لأدنى مستوياته منذ 9 سنوات بعد ما وصل لمستوى 2.4% بعد ما كان وصل إلى 32% فى أكتوبر 2017 .. وإنخفض إلى 17% فى أكتوبر 2018 ثم وصل للمستوى اللى إحنا فيه دلوقتى …. و ده مش كدة وبس .. لكن كمان أسعار سلع كثيرة من السلع الإستهلاكية إنخفضت زي الخضروات والفاكهة واللحوم والدجاج وحتى بعض أنواع الأسماك .. بالإضافة لبعض السلع الكهربائية والكمالية ، زى شاشات التليفزيون و الموبايلات والثلاجات .. وغيرها

و أكيد مش محتاجين نقول إن إنخفاض بعض الأسعار مرجعه إلى زيادة المعروض .. يعنى زيادة الإنتاج …. وطبعا إحنا مش هــ نذكر هنا اسعار محددة لسلع بعينها …. أولا .. لأننا مش بنعمل نشرة سلعية … وثانياً .. منعاً للمزايدات ، واللى هيدخل يقولك فين ، وإزاى ، وماحصلش ، وماشوفتش … والأهم .. إن الأسعار دايما تخضع للنمط الشرائى لكل مواطن ، وبيشترى إييه ، و منين … لكن فى المجمل .. بعض السلع اسعارها إنخفضت .. أو على الأقل ثبتت .. و ده فى حد ذاته مؤشر جيد جداً

مؤشرات البطالة كمان إنخفضت لمستوى 7.45% كأدنى معدل وصلت له في 30 عاما .. بعد ما كنا وصلنا لمستوى يقارب الــ 14% .. و طبعا ده نتاج لحاجات كثيرة جداً .. أهمها الحجم الضخم من المشروعات القومية اللى شغالة فى كل مكان فى مصر والمعروفة بإسم (مشروعات الفنكوش) 😁 ، واللى كانت سبب فى خلق فرص عمل لحوالى 5 مليون مواطن مصرى . يعنى بنتكلم عن حوالى 15 مليون مواطن فى متوسط 3 أفراد لكل أسرة ، أصبح لهم دخل محترم بعد ما كانوا بدون أى مصدر رزق … و طبعا بالإضافة لتعافى حركة السياحة واللى أكيد أوجدت فرص عمل لمئات الألاف سواء كعمالة مباشرة فى القطاع نفسه أو عمالة غير مباشرة بتخدم على القطاع السياحى زى السائقين وأصحاب المحلات وعمال المصانع اللى بتشتغل على خدمات الفنادق وشركات السياحة من مواد غذائية وغيره .. و ناهينا عن إرتفاع مستويات الدخول للعاملين فى القطاع ، نتيجة زيادة حجم الإيرادات و حركة الرواج …. و كل ده غير القطاع الزراعى والصناعى.

أيضا إنخفاض الدولار أمام الجنيه المصرى فى شكل دراماتيكى .. واللى بدأ يزيد بشكل متسارع من شهر فبراير الماضى من مستوى 17.89 لحد ما وصل إلى 16.08 .. و ده هبوط كبير فى خلال 8 شهور .. وخلينا نقول للتذكرة فقط إنه بعد قرار التعويم ، وصل الدولار لمستوى 19.82 …. و ده معناه إن مصر تخلصت نهائيا من ضربة التعويم .. وبدأ الجنيه المصرى يرتفع فى اتجاه القيمة السوقية الحقيقية … و ده كمان كان أحد أسباب إنخفاض الأسعار ، حتى لو كان مش محسوس بالنسبة للبعض … و دى فرصة نفكر اللى قالوا إن الدولار هيوصل فى شهر أكتوبر 2019 إلى 250 جنيه .. ياترى إنتوا فييين .. لا أسكت الله لكم نهيقاً 😁

كمان وفقاً لتقارير التنافسية العالمية لجودة الطرق .. مصر تقدمت 90 مركزاً لتصل للمركز 28 عام 2019، مقارنة بالمركز 45 عام 2018، والمركز 75 عام 2017، والمركز 107 عام 2016، والمركز 110 عام 2015، والمركز 118 عام 2014 .. يعنى إحنا بقينا من أفضل 28 دولة على مستوى العالم من حيث جودة الطرق .. متخطين كثير من دول أوروبا وأسيا وأميريكا الاتينية …. وأوضح مجلس الوزراء أنه كان من المستهدف تنفيذ 7000 كيلو متر ضمن المشروع القومي للطرق، تم تنفيذ منها فعلياً 5000 كيلو متر، وجاري تنفيذ 2000 كيلو متر، فضلاً عن تطوير وصيانة ورفع كفاءة شبكة الطرق الحالية بإجمالي 5000 كيلو متر.

دى مجرد بعض المؤشرات السريعة اللى بتوضح إحنا كنا فين وبقينا فين …

والسؤال بقى .. هل إحنا كدة بقينا زى الفل .. طبعا لأ .. و أكيد ما بقيناش سويسرا .. لكننا ماشيين على الطريق الصحيح … و عجلة التطور والجودة بتتسارع ، لأن الصعب خلاص خلص .. و هــ نبدأ نلمس فعليا نتاج اللى كان بيتعمل فى البلد على مدار الكام سنة اللى فاتوا .. واللى دول العالم بــ تنظر له بكل إستغراب ، وبتصنفه بالفعل فى مستوى الإعجاز .. لأن اللى حصل فى مصر فى خلال 5 سنوات ، ماكانش ممكن يحصل فعليا فى اقل من 30 سنة 🙂

طب تأثير كل اللى بيحصل ده إييه على الأرض !!؟؟
ده اللى هــ نجاوب عنه فى المقال القادم علشان نرد على الشخص البيضوحباطى اللى كل ماتتكلم معاه يقولك .. طب و هو أنا إستفدت إييه من كل ده !!! 😉🙂

لمتابعة تعليقاتكم