خط أنابيب إيلات عسقلان – دايما السر فى التريند

07 Feb 2021

خط أنابيب إيلات عسقلان – دايما السر فى التريند .. !!

——————————————————

على رأى الفنان سعيد صالح … “طبق الأصل العلقة اللى فاتت .. لا قلم زااااد ولا قلم نقص” 😁 … هو هو نفس الترند بتاع كل مرة .. و هو هو نفس الهطل اللى بــ يتقال كل مرة … و للأسف الشديد نفس الفخ اللى بــ نقع فيه كل مرة … والمشكلة إنه بــ يبقى مطلوب من الدولة إنها هى اللى ترد وتثبت وتأكد عكس الكلام اللى بــ يتقال .. برغم إنه القاعدة القانونية بتقول “البينة على من إدعى واليمين على من أنكر” .. يعنى اللى بيفتعل الأكاذيب هو اللى مطالب إنه يجيب إثباتات لكلامه مش العكس ! 😏

وكعادة صفحتنا فى تأصيل المواضيع .. فــ إحنا هنقول نبذة كدة عن الموضوع من أوله علشان نفكر الناس ويبقى الكلام على بينة .. وفى الإعادة إفادة !!

من بداية ما تم الإعلان عن البدء فى حفر قناة السويس الجديدة ، وإحنا بنواجه تريندات مفتعلة وحملات تشكيك بشكل مستمر .. بداية من تريند إن القناة دى فنكوش .. ومروراً بقى بإنه مافيش تمويل ..، إلى إن الفلوس اللى دفعها المصريين مش هــ ترجعلهم وإن دى أكبر حملة نصب فى التاريخ ..، إلى إن القناة هتنهار ..، إلى إن الكراكات غرقت بالفعل والنظام مش عارف يواجه الناس ..، وإن دى مجرد تفريعة أصغر من طشط الست الحاجة والدة وجدى غنيم ..، و وصولا إلى إن حفر القناة هــ يتسبب فى كارثة بيئية ، وإن ذكور السلطعون فى البحر الأحمر هــ تهجم على إناث ابوجلمبو فى المتوسط وهيحصل فضيحة كبيرة أوى ، تستلزم المطالبة بالثأر من أنثى القريدس 😁 .. ألخ ألخ ألخ

وإتحفرت القناة وخلصت فى سنة بالضبط رغم انف الكارهين .. علشان نخش فى تريند القناة اللى بتخسر ، وإن الدولة مش هــ ترجّع للمصريين فلوسهم ..، وناهيك طبعا عن إن الفلوس دى حرام علشان كيت وكيت وكيت … المهم إن المصريين اللى إستثمروا فى القناة صرفوا فوايدهم بالكامل وبعدين رجعت لهم فلوسهم من أصل الشهادات غير منقوصة .. والقناة ماطلعتش بتخسر ولا حاجة .. بل بالعكس .. دى بتحقق يوم بعد يوم أرقام قياسية سواء من حيث عدد السفن المارة ، أو حتى من حيث الحمولة !

ونبدأ تريند جديد مليان شحتفة عن التفريعة اللى مالهاش لازمة ، وإن مش المهم القناة لكن الأهم هو الخدمات اللى بــ تتقدم .. وشوفوا دبى عاملة إييه فى جبل علي .. وكالعادة يعوم البعض على وش التريند ، وتطلع الدولة تقول إنه بالفعل فيه مناطق خدمية موجودة ، وفيه مناطق صناعية بــ يتم إنشائها زى المنطقة الصناعية الصينية وغيرها

و نخش بقى فى تريند جديد وكان بالفعل تريند قوى جدا عن إن قناة السويس خلاص هــ تفلس ، لأن السفن هــ تبطل تعدى فى القناة وبقت بتغير خط السير إلى طريق رأس الرجاء الصالح والدليل إنه فيه شخص كتب فى موقع تحت بير السلم ، ونقلت عنه وكالة رويترز الإخبارية ..، إنه فى خلال 3 شهور ، فيه بتاع حوالى 15 سفينة و ربع كدة عبروا من رأس الرجاء الصالح بدل مايعبروا من القناة !! 🙃 .. والمصيبة إنه وقتها طلع الإعلامى عمرو أديب يزيط فى الزيطة ويعمل شو على حساب الدولة ، ويلطم ويولول ويبكى على اللبن المسكوب …. وعلشان كدة كان لازم التريند ده بقى نرد عليه فى المقال التالى:

قناة السويس ورأس الرجاء الصالح – مارس 2016

المهم بقى .. إنه كل شوية كان بيطلع تريند شكل .. ومرة يقولك قناة بنما هــ تاثر على قناة السويس .. و مرة يقولك ممر مش عارف إييه فى بحر الشمال واللى هو أصلا مش بيشتغل غير شهر فى السنة .. ومرة خط سكة حديد إيلات .. لأ خط سكة حديد بين الصين وبين إسرائيل .. لأ القناة البديلة اللى هــ تحفرها إسرائيل من عند إيلات فى خليج العقبة .. لأ نرجع تانى لخط سكة حديد إيلات أشدود .. و أخرة المتمة طلع لنا فى المقدر جديد دلوقتى خط أنابيب إيلات عسقلان .. اللى الخليج هــ يمشّى فيه الغاز والبترول بتاعه علشان يوصل إيلات .. ومن إيلات يتفرغ فى حاويات ويتنقل فى قطارات لحد عسقلان على المتوسط ، علشان يتم تصديره لأوروبا من خلال إسرائيل !!! .. وبدأنا نخش تانى على اللطميات والولولة اللى بــ يفتعلها لجان السوشيال ميديا علشان تسحل المصريين وراها … و ياخراب بيتك ياقرمط .. وضاعت عليك فلوسك .. وقناة السويس هــ تقلب على قناة روتانا سنيما … ألخ ألخ ألخ

فى الحقيقة إحنا جيبنا التسلسل ده علشان بس تعرف حاجتين مهمين جدا:

#أولا: إن التريند مش وليد اللحظة .. لكنه بــ يبنى طول الوقت على تاريخ من الأكاذيب .. و بــ يأكد للكل إن كل اللطميات والكربلائيات دى هدفها إحداث ضغط رأى عام علشان إما وقف أى مجهود بــ يتعمل للتقدم للأمام ، أو التشكيك المستمر فى المجهود والإنجاز والحدث ، علشان توصل لنقطة لارجعية إنك ماتصدقش اى حاجة إيجابية بعد كدة مهما كانت حقيقية وموثقة !

و #ثانيا: إن دولتك مش دولة فاشلة .. ولا القائمين عليها فاشلين ومش دريانين باللى بيحصل حواليهم .. لأ .. إحنا دولة بتبص لقدام .. وبالذات فى كل ما يتعلق بالأمن القومى المصرى ، وقوت المصريين وحماية مستقبلهم .. و بــ تاخد الإجراء المناسب فى الوقت المناسب ، بدون ماتطلع كل شوية تقولك إحنا عملنا وسوينا كذا وكذا ، وبنخطط لكذا وكذا .. لأن ده مش مطلوب .. وكمان مش موجود ومافيش دولة فى العالم بتعمل كدة !

المهم إن هيئة قناة السويس طلّعت بيان للرد على الهراء ده كله  و بــ تنفى فيه  وجود تأثير لمشروع خط أنابيب “إيلات – عسقلان” على تنافسية قناة السويس وحركة الملاحة بها وأكدت الهيئة في بيان صحفي إن الحديث عن تأثير الخط (فى حالة تشغيله) يعنى لو إتعمل من الأساس … تم تداوله بصورة خاطئة !

الهيئة ردت بالأرقام وقالت إنه مع فرض تشغيل الخط ده ، وإنه إستوعب كل تجارة البترول والغاز ومشتقاته القادمة من الخليج عبر قناة السويس والمتجهة شمالا .. و ده طبعا شيئ مستحيل .. فــ لازم نبقى فاهمين إن حجم بترول الخليج اللى بــ يمر من قناة السويس يمثل حوالى (12% إلى 16%) من حجم تجارة البترول الخام ومشتقاته اللى بتمر من قناة السويس … لكن بالنسبة لإجمالي حركة التجارة العابرة للقناة، فهو يمثل حوالى ((0.6%)) فقط من إجمالي حركة التجارة المارة بقناة السويس لمختلف أنواع السفن.

يعنى زى ما حضراتكم شافين إن الخط مع فرض تشغيله ، وإستيعابه للإنتاج البترول الخليجى بالكامل المتجه لأوروبا وكندا وأميريكا _و ده زى ماقولنا مستحيل_ فــ تأثيره مش هــ يتعدى تاثير جزء عشرى من حجم التجارة المارة فى قناة السويس .. مع الوضع فى الإعتبار إن دول الخليج العربي خاصة الإمارات والسعودية والكويت بتعتمد في تصدير البترول الخام بشكل كبير على السوق الآسيوي خاصة الصين والهند وكوريا الجنوبية واليابان بنسبة تزيد عن 85% من الصادرات البترولية لمنطقة الخليج العربي !!

وللعلم .. إيرادات قناة السويس تتميز بتنوع مصادرها وفقاً لتنوع فئات السفن المارة عبرها فتمثل إيرادات سفن الحاويات حوالي 50% ..، فيما تمثل نسبة سفن الصب الجاف نحو 17% ..، ونسبة إيرادات الغاز الطبيعي المُسال نحو 5% ..، وحاملات السيارات نحو 4% ..، والمشتقات البترولية والكيماويات بأنواعها نحو 12% ..، فيما تمثل إيرادات البترول الخام 6.4% ..،  و 5.6% إيرادات لأنواع سفن أخرى.

طب هل مصر حاطة فى بطنها بطيخة صيفى ، وساكتة و واقفة بتتفرج !؟ .. وإلا بتتحرك طول الوقت وبتعمل إجراءات وخصومات ودعاية وتسويق !؟ ..

أيوة .. مصر مش واقفة ساكتة .. والدليل إن التقارير الدورية لقناة السويس بحسب ما نشره موقع سكاى نيوز قال إنه حصل ارتفاع فى نسبة تجارة مشتقات البترول العابرة لقناة السويس إلى 14% (منتجات يصعب نقلها عبر خطوط الأنابيب) في مقابل تراجع نصيب البترول الخام إلى نحو 8% فقط من حجم التجارة المارة بالقناة نظراً لتزايد الاستثمارات في قطاع البتروكيماويات ونشاط تكرير البترول عالمياً .. والكلام ده إمتى .. فى 2020 .. يعنى فى عز أزمة كورونا وتراجع حركة التجارة ونقل البترول على مستوى العالم نتيجة حالة الركود وإنخفاض الإستهلاك ! 🙂

يعنى و من الأخر كدة الله يكرمكم واحدة واحدة على نفسكم .. وإعرفوا قيمة بلدكم وقيمة اللى معاكم ، وقيمة اللى بتعمله الإدارة المصرية الحالية

يابنى ياحبيبى مافيش ممر بحرى فى العالم يضاهى ممر قناة السويس بحجم التجارة اليومية العابرة يوميا من الشرق للغرب والعكس ، بمئات الألاف من الأطنان فى سهولة ويسر بقوافل وسفن رايحة جاية شمالا وجنوبا

يابنى ياحبيبى مافيش حد ممكن يعمل خط قطار يشيل 250 حاوية للقطار الواحد ، مع فرض إن القطار ده يبلغ طوله حوالى 50 عربة .. و ده مجرد فرض جدلى .. علشان يستبدله بــ ممر بتعبر فيه الناقلة الواحدة وهى شايلة على متنها 24 ألف حاوية ! 🤔

يابنى ياحبيبى  مافيش حد هــ يسبب ممر تجارى إستراتيجى بحرى ، بيمر بالكامل دخل حدود وأراضى دولة واحدة وبيقوم على تأمينه القوات المسلحة للدولة دى ، علشان يراهن على خط برى بــ يمر بأكثر من دولة بكل المخاطر اللى ممكن يتعرض لها الخط ده من الإستهداف ! .. و ناهيك طبعا عن كفائة الإمكانيات والسعة الناقلة وحجم حمولة التجارة المنقولة فى اليوم الواحد !

يابنى ياحبيبى .. مصر بتتحرك برؤية متكاملة .. ومع فرض إنه فيه اى مشروع ممكن يهدد النقل فى قناة السويس ، فــ الدولة المصرية بتتحرك برضوا وبتعمل تطوير للممر الملاحى وكل ما يرتبط بيه ..، من أول حفر قناة السويس الجديدة .. لتوسعة مجرى القناة .. لتعميق المجرى القديم والجديد علشان يستوعب ناقلات أكبر ، بغاطس أعمق وحمولات أكبر .. لإنشاء المناطق الصناعية والخدمية الجديدة .. لتطوير الخدمات الأمنية وتأمين المجرى الملاحى .. لتدعيم خط القناة بخطوط برية زى خط القطار الكهربائى .. لتطوير خط سوميد ومد شبكات تربط بين البحرين الأبيض والأحمر وموانى العين السخنة والدخيلة ومحطات الإسالة وغيرها ألخ ألخ ألخ .. كل ده مصر بتعمله ، علشان تخلى أى مشروع يتم طرحه لمنافسة قناة السويس ، يبقى مجرد ضرب من الخيال !

لكن السؤال اللى بيطرح نفسه .. هل ممكن فى أى وقت من الأوقات ، الحياة تدب فى واحد أو أكثر من المشروعات دى !؟

أيوة ممكن .. فى حلة واحدة بس .. فى حالة عدم الإستقرار ، وإن الدولة تنهار وتسقط فى فخ التفكك .. وتتقطع بين فرق وعصابات .. ويبقى عندك جيش حر وجيش مليشياوى … و .. و … و … ساعتها بس ممكن يبقى المشروعات دى لها بصيص أمل إنها تتنفذ .. وحتى برضوا لو ده حصل .. هيبقى الأسهل و الأوفر ، إن الدول الكبرى تجتمع ، وتخش تحتل المجرى الملاحى بحجة حماية حركة التجارة العالمية !! يعنى برضوا قناة السويس هى الحل الوحيد ومافيش أى حل بديل !

و طالما الشيئ بالشيئ يذكر .. فــ ده هــ ياخنا لحاجة بسيطة جداً كانت دايما بــ تتقال من ضمن عمليات الحرب المننهجة على الرئيس الراحل جمال عبد الناصر .. وهى إن تأميم القناة ماكانش له لازمة وكان قرار خاطئ ، لأن عقد القناة كان كدة كدة هــ ينتهى سنة 68 ، وإن إنجلترا وفرنسا الحلوين الكيوت كانوا هــ يسلموا لمصر القناة فى نهاية تاريخ العقد وعليها مليون بوسة 🤭🙄 .. و ده طبعا كلام ناس ولامؤاخذة يعنى .. لأن مافيش دولة إحتلال ممكن تسلمك منجم ذهب ، أو شريان حياة للتجارة العالمية علشان سيادتك تديره وتبقى شوكة فى حلقه .. الكلام ده كلام أهطل ، واللى مصدقينه محتاجين يكشفوا بجد على قواهم العقلية .. أو على الأقل يراجعوا منظور رؤيتهم للأمور الوطنية بعيداً عن الغرض الفكرى اللى بتحكمه ايديولوجيات دينية او إنتماءات سياسية !

إحسبوها دايما بالعقل ، وإبعدوا عن سموم التريند .. وخلّو البوصلة بتاعتكم دايما هى البوصلة الوطنية اللى بتساعدكم تشوفوا الحقائق بدون أى إفراط أو تفريط !

حفظ الله مصر وشعبها من كل سوء

 

مقالات ذات صلة عن قناة السويس:

———————————-

لمتابعة تعليقاتكم