قيمة العملة .. والمحددات الإقتصادية

30 Jul 2021

قيمة العملة .. والمحددات الإقتصادية !!!

————————————-

من حوالى أسبوع .. فى ذكرى إحتفال مصر بثورو يوليو المجيدة …  لما أعدنا نشر مقال قديم لنا عن ثورة يوليو … كان جزء كبير من المقال بيتكلم عن الديباجات الإخوانية اللى إنتشرت على مدار سنين وترسخت فى الوعى الجمعى المصرى وتحولت مع الوقت لقناعات غير قابلة للمناقشة

وكان من ضمن الديباجات اللى بــ تتقال إنه يقول لك إن الجنيه المصرى كان اغلى من الجنيه الذهب .. و كيلوا اللحمة كان بقروش .. والشقق والبيوت كانت كتير والإيجار كان بملاليم … و دى حقائق على فكرة ومن الواقع … لكن كان بــ يتم بيها اللعب على وعى الناس عن طريق وضعها فى غير سياقها للتدليل على إن الناس كانوا عايشين فى نعيم وبغددة فى زمن الملكية مقارنة بزمن ثورة يوليو أو بالزمن اللى إحنا عايشين فيه ده … وإحنا ما كناش بــ ندخل فى جدال عقيم مع من يتبنى هذا النوع من الكلام الخزعبلى لأنه مجتزأ وغير موضوعى …

لكن فقط كنا بنقول بسيطة خالص .. هم مش بيقولوا إن الفن مرأة الشعوب .. ماشى .. هات بقى الأفلام القديمة اللى إتعملت أيام الملكية ، وإتفرج على مصر كانت إييه !!؟ … هات الأفلام التسجيلية اللى إتعملت عن مصر القديمة زمان .. وشوف الناس كانت عايشة إزاى .. فى زمن كان ملك البلاد نفسه اللى هو الملك فاروق كان بــ يرأس جمعية إسمها جمعية مكافحة الحفاء .. علشان المصريين كان كثير منهم حافيين …

ولما تتفرج على أفلام نجيب الريحانى وتشوف الناس كانت عايشة إزاى … ولما تشوف المدرس والموظف اللى عيشتهم ضنك والمزارع اللى بــ يسف تراب وعايش بشكل غير أدمى .. ولما تشوف العامل اللى مش لاقى ياكل ، واجره بالكاد بضعة قروش … وتشوف رطل اللحمة اللى كان بــ 8 قروش لكن المواطن العادى مش قادر يدفع ثمنه لأنه غالى عليه … ألخ ألخ ألخ من المشاهد اللى موجودة فى ذاكرة السنيما المصرية للتأريخ …. هــ تكتشف إن الحكاية مش زى ما بيحاولوا يصورهالنا خالص !!

المهم إن صديق عزيز جدا لصفحتنا ، علق على المقال وقال إن الفرجة على الأفلام القديمة مش معيار للقياس .. لأن مثلا فى أحد مشاهد فيلم المليونير إنتاج سنة 1950 لإسماعيل ياسين بيقول فيه أن الجنية المصري = 5 دولار .. و فى فيلم الرجل الثاني من إنتاج سنه 1959 بعد الثورة ذكر إن الجنيه المصري = 2.5 دولار .. يعني فقد 50% من قيمته أمام الدولار …

وطبعا إحنا ردينا على صديقنا العزيز .. وحبينا نشارككم الرد ده … وبرغم إننا إتكلمنا فى الموضوع ده اكثر من مرة زمان وفى مقالات مفصلة … لكن هنتكلم فيه تانى علشان نعيد التذكير بيه .. ولأن ناس كتيرة بتنسى .. ودايما بتتكلم فى موضوع قيمة العملة وسعر الصرف فى مقابل الدولار بإعتبارة مؤشر لقوة الإقتصاد ..

وخصوصا لو عرفت ان مصر كان بيمتلك ايرادها 255 باشا … و لا كان عندها مصاريف على مصانع ولا صحة ولا بنية تحتية لعموم الشعب … يعنى ايراد بلا مصاريف .. طب كان هــ ييجى منين الإقتصاد القوى !!؟

وبدون الدخول فى تحليلات إقتصادية مكلكعة وكلام مجعلص .. فــ الحقيقة إن قيمة العملة عمرها ما كانت مؤشر صريح لقوة إقتصاد اى دولة .. لأن فيه محددات إقتصادية كتيرة بــ تكون مجتمعة هى اللى بتقيس قوة أى اقتصاد سواء فى وضعيته الحالية أو إذا كان مؤشره يتجه صعودا أو هبوطا .. زى القدرة الإنتاجية .. وتنوع مصادر الإنتاج .. وحجم الصادرات .. والناتج المحلى .. والإحتياطى النقدى .. والتصنيف الإئتمانى  .. وغيرها من المؤشرات … ثم يأتى أحيانا فى إطار محدد وفى حالات خاصة جدا مؤشر قيمة العملة !

يعنى على سبيل المثال لما نيجى نشوف الدينار الكويتي .. هــ نلاقيه يساوي حوالى 3.25 دولار .. هل ده معناه إن اقتصاد الكويت أقوى من اقتصاد أمريكا !!؟ .. طبعا لأ … هناك فرق كبير جداً .. والإقتصاد الكويتى لا يقارن بأقوى إقتصاد فى العالم وهو الإقتصاد الأميريكى ..

بلاش …. عندك مثلا الجنيه المصرى نفسه النهاردة يساوي حوالى 7 ين يابانى .. ويساوى كمان حوالى 5 روبل روسى … فهل ده معناه إن اقتصاد مصر النهاردة اقوى من اقتصاد اليابان وروسيا !!؟ .. بالتأكيد لأ …

كذلك الدينار الأردنى يساوي 22 جنيه مصرى .. فــ هل ده معناه إن اقتصاد الاردن أقوى من مصر ؟؟ … اكيد لأ طبعا .. احنا فى التصنيف العالمى سابقين الاردن بمراحل … وحجم الإقتصاد المصرى الكلى أعلى من الأردن بكثير جداً

يعنى زى ما حضراتكم شايفين بالأرقام اللى ذكرناها دى ، إن سعر صرف العملة مقارنة ببعضها مش ممكن توصلك لأى حاجة أو تعطيك حقيقة مؤكدة تقول إن قوة العملة فى مقابل الدولار أو فى مقابل عملات اخرى ، تعنى قوة إقتصاد الدولة .. لأنه فيه علاقة معقدة جداً بين العملات وبعضها لا يفهمها إلا خبراء الإقتصاد … وبالتالى مش معنى إن الجنيه المصرى فى زمن الملكية كان أغلى من الجنيه الذهب .. إنه ده كان مؤشر لقوة إقتصاد مصر ….. وإلا طالما احنا كنا جامدين أوى كدة اخر تلاتين حاجة ، طب ليه لم يصبح الجنيه المصرى عملة دولية وقتها ومعترف بيه دوليا ويمكن وضعه كإحتياطى نقدى للدول زى الدولار والجنيه الإسترلينى …. إلا لو كنت مصدق اكذوبة إن مصر كانت مسلفة إنجلترا .. وقاعد مستنى الفلوس دى ترجع تانى بالفوايد بتاعتها 😉🙂

ده مش كدة وبس .. لكن احيانا كمان فيه بعض الدول بتلجأ لتخفيض قيمة عملتها علشان تحقق أفضلية تسويقية لمنتجاتها فى السوق العالمية .. زى ما الصين عملت فى سنة 2015 ، لما قامت فجأة كدة بتخفيض قيمة عملتها “اليوان الصينى” فى مقابل الدولار .. برغم إن الصين تعتبر تانى اقوى إقتصاد فى العالم .. و ده عمل وقتها أزمة كبيرة مع اميريكا (أااه بالمناسبة … الجنيه الإسترلينى يساوى 9 يوان صينى و ده مش معناه إن إقتصاد إنجلترا أقوى من الإقتصاد الصينى على فكرة ) .. 😁

علم الاقتصاد علم كبير ومعقد جدا .. وبالذات اقتصاد الدول .. لأنه له محددات كثيرة … وعمره ما بيتقيم بقياس قيمة العملة .. فــ ماتسمحش لحد إنه يضحك عليك باللعب بالأرقام .. أو حتى بالتاريخ ويخليك تشوف صورة مغلوطة من خلال إدراك وربط خاطئ للمعلومات و الأحداث ..

حفظ الله مصر برئيسها وجيشها وشعبها 🙏

#مقالات_ذات_صلة

لمتابعة تعليقاتكم