04 Mar 2015
حركة حماس .. و الضربة فى مقتل .. !!
—————————————-
صدر من كام يوم قرار محكمة القاهرة للأمور المستعجلة باعتبار حركة “حماس” تنظيم إرهابي ، وطبعاً القرار ده خلق حالة من اللغط بين الناس ، ما بين مؤيد ومعارض .. وكان معظم المعارضين للقرار إما إخوان بالإنتماء أو بالتبعية ، و إما من اللى دايما بيخلطوا مابين حماس والشعب الفلسطينى صاحب القضية !
ده طبعاً غير حالة الصويت و الولولة من قيادات حماس و دلاديلهم على كل القنوات والأبواق الإعلامية اللى مالهومش شغلانة غير إنهم يشتموا فى مصر ، وأخص بالذكر قناة الحقيرة القطرية الصهيونية اللى تحولت بجد لقناة كوميدية من كتر مافقدت مصداقيتها وكمان فقدت تأثيرها على المصريين !
بعد حالة الصويت والعويل ، إنتقل قيادات حماس والذراع العسكرى بتاعهم كتائب عز الدين القسام واللى انا بجد مش عارف هم ذراع عسكرى ضد مين بالضبط ، إلى مرحلة التهديد الصريح والعلنى لمصر وللقضاء المصرى وللجيش المصرى .. وتوعدوا بالرد … يقوم يحصل بعدها بيوم تفجير دار القضاء العالى ، واللى مات فيها إثنين من أبنائنا مالهمش أى ذنب !!!
وشوف حكمة ربنا يامؤمن ، لما حركة أو تنظيم يعترض على وصمه بالإرهاب .. يقوم ينفذ عملية إرهابية عن طريق كلابه فى مصر علشان ينفى عن نفسه تهمة الإرهاب .. وطبعاً يطلع على طول شلة الكولّجية والمبررين لكل أعمال العنف للجماعة الإرهابية واللى معاها ، علشان يقولوا إن اللى حصل ده كان مدبر من حكومة العسكر علشان يدعموا قرار المحكمة !!!
ياسلام عليك !! .. أدى العقول اللى بتفكر صح ، واللى بتجيب التايهة !! .. أدى الناس اللى عايزة تحم البلد وتنقذها من اللى هى فيه !!! .. بجد لا تعليق .. 🙂
نرجع بقى لقرار المحكمة .. هــ نلاقى فيه سؤال بيطرح نفسه .. وهو هل الحكم ده مُلزم و إلّا لأ !!؟؟ .. بمعنى هل قرار المحكمة يسرى على الدولة ومؤسسة الرئاسة و إلّا لأ !!؟؟ .. وهل هو قابل للطعن عليه وللنقض ولا لأ !!؟؟ .. ودى بقى حاجة ممكن يفتيلنا فيها أصدقائنا القانونيين اللى معانا على الصفحة .. 🙂
أصل الحكم ده لو ملزم ، .. يبقى ده معناه إن الدولة مش ممكن تتعامل مع كيان إرهابى ، وبالتالى لا يمكن دخول أى عضو من أعضاء حركة حماس إلى داخل الأراضى المصرية عبر المنافذ الرسمية ، .. ولا يمكن إستقبال أية وفود ممثلة للحركة ، أو إجراء أى مفاوضات معاها بشكل رسمى ، .. ده طبعا غير إن أى حد هــ يتقبض عليه داخل الحدود المصرية ، هــ يتطبق عليه مباشرة قانون الإرهاب .. شوفتوا الحدودتة حلوة إزاى !!؟؟ =D =D
و ده معناه برضوا إن التعامل مع الجانب الفلسطينى ، لازم يكون من خلال السلطة الفلسطينية بإعتبارها القناة الشرعية الوحيدة اللى بتتكلم بإسم الفلسطينيين .. وبالتالى فــ من حق مصر كمان تطالب بحل حكومة التوافق الوطنى اللى حماس جزء منها ، لأن مصر مش بتتعامل مع أى تنظيمات إرهابية كمبدأ غير قابل للنقاش .. وكمان بحكم محكمة 🙂
بسيطة ما تستبسطهاش .. صحييييح =D =D =D
مسلسل حصار الجماعة مستمر .. وأنا بــ أعتبر إن حكم المحكمة ده هو ضربة موجعة حقيقى للتنظيم الدولى ، وحلقة من مسلسل هدم جماعة الإخوان الإرهابية فى كل مكان وعلى كافة الأصعدة .. على الأقل فى المنطقة العربية .. وخصوصاً لو ربطنا ده بإعلان تنظيم إخوان الأردن وهو ثالث أقوى فرع لتنظيم الإخوان فى المنطقة بعد مصر وسوريا .. بقراره بالإنشقاق عن الجماعة الأم فى مصر ، وإعلان مكتبهم التبرأ من جماعة الإخوان فى مصر 🙂 ..
ولسة الأيام جاية .. و واحدة واحدة هــ نتفرج و … و هــ نضحك
ربنا يحفظ بلدنا من كل ما يدبر لها ، ويحمى شعبنا من الفتن ومن الإرهاب .. ويبارك فى الجميع ويجعلهم صف واحد متكاتفين أمام كل قوى الشر