05 Jun 2017
لعبة الإرهاب .. فتش عن الحقيقة .. !!
—————————————
كلامنا النهاردة مش تحليل ..
كلامنا النهاردة مش علشان نصدر أحكام …
كلامنا النهاردة مش علشان نقول مين وإزاى …
لكن كلامنا النهاردة علشان نقول لك .. إوعى تنساق وراء الأحداث .. لكن ركز فى التفاصيل لأن الالمام بالصورة الكاملة أهم بكتير من اننا ننساق وراء مشاعرنا مابين فرحة أو شماتة أو شفقة او تعاطف ..
إللى بيحصل فى لندن هو شئ خارج نطاق المألوف .. وبحسبة بسيطة خالص هتلاقى ان الأحداث إللى حصلت مهما كانت عنيفة فهى فى النهاية ذات تأثير محدود .. و فيها استعراض و شو اعلامى يهدف لتوجيه الأنظار فى إتجاه معين ، أكثر من كونها عمليات إرهابية فعلية .. و ده معناه انها لا تخرج عن حاجة من ثلاثة : …
-إما انها إجراء عقابى وصراع بين أجهزة أمنية فيما يسمى صراع القوة .. وافتكروا كلامنا عن الأحداث إللى حصلت فى فرنسا قبل كدة
– أو انها تمثيلية على غرار ١١ سبتمبر وهــ يترتب عليها نتائج مش ممكن تتحدث بدون مايحصل إللى حصل ..
– أو انها رسالة تحذيرية من الجماعات وكلاب السكك إللى تم تربيتهم على مدار عقود طويلة علشان ينهشوا فى أطراف محددة .. واللى بيحصل ده مجرد جرس إنذار علشان مايتمش التخلى عنهم .. وخصوصا بعد ما بدأت الحلقة تضيق على الجماعات دى وأصبح وجودهم مهدد فى الدول إللى كانت بتأويهم وبتدعمهم !!
وفى كل الأحوال مش مهم خالص إنه يتم التضحية ببعض الموتورين ومغسولى العقول بإسم الدين فى عمليات من النوع ده ، لأنهم بالفعل ما يساووش حتى ثمن الرصاصة إللى هيموتوا بيها 😊 … والغريب إنه لأول مرة فى أحداث مشابهة ، تطالب الخارجية الأمريكية مواطنيها بتوخي الحذر أثناء وجودهم في لندن 😉
طبعا إحنا مايفرقش معانا ، و ولا يهمنا إنجلترا فى شئ .. لكن اللى يهمنا هى مصر .. لأنه فى عز المعمعة دى كلها .. تطلع قناة الــ BBC وتعمل تقرير ، تتهم فيه رؤساء مصر و الجيش المصري ، إنهم كانوا بــ يبعتوا معتقلي الإخوان إلي أفغانستان .. و ان المشير ابوغزالة كان بيسلحهم .. وإن ده تم من خلال إتفاقية بين مصر و امريكا … وإن مصر قدمت لهم كمان مساعدات لوچيستية … !!! .. والغريب إن التقرير ده كان قديم شوية لانه بــ بيتكلم فيه ابو العز الحريري و حمدين صباحي !!
طب ايه اللي فكر الــ BBC إنها تذيع تقرير زى ده كله هجوم على مصر ، والجيش المصرى ، وفى التوقيت ده بالذات .. فى الوقت اللى المفروض إنهم بــ يقوموا بتغطية عمليات ارهابية بتحصل في وسط لندن … !!! … هل الأخت بريطانيا عايزة تشيّل مصر مسئولية الارهاب العالمي كله وتنفيه عن نفسها ، بعد ما طلع الرئيس المصرى من كام يوم وقال إن مصر بتحارب الإرهاب الدولى نيابة عن العالم !!؟؟ … وإلا ده رد على الضربات الجوية المصرية لمعسكرات الإرهاب فى ليبيا والتحدى المصرى لأى حد ممكن يقرب من مصر .. ونكاية فى أميريكا اللى طلع رئيسها يؤيد مصر ويدعم ماتقوم به مصر لحماية أمنها القومى !!؟؟
بس ده كان زمان وجبر .. لأن مصر زمان غير مصر النهاردة …
المارد المصرى خلاص خرج من القمقم .. والمؤامرة على مصر خلاص بتستنفذ أدواتها 🙂
ونختم كلامنا النهاردة إن البنك المركزي بيعلن إن صافي النقد الأجنبي بلغ 31.126 مليار دولار بنهاية شهر مايو، مقابل نحو 28.641 مليار دولار بنهاية أبريل الماضي … و ده أعلى احتياطى للنقد الاجنبى فى مصر من 6 سنوات 🙂
ركزوا فى الصورة الكاملة .. وخليكم فاهمين إنه فيه حرب عالمية طاحنة خلف الكواليس تدور على أشدها بين كل الأطراف .. تقودها أجهزة الإستخبارات العالمية .. وتأكدوا إن رجال مصر فى موقع متفرّد جداً فى الحرب دى .. ومسابقين بكتييييير أوى ومستعدين لكل الإحتمالات 🙂