16 Apr 2016
مواقف كاشفة فى حريق الكتدرائية !!
————————————
كتدرائية نورتردام .. واحدة من التحف الأثرية والتاريخية والمعمارية .. و شاهدة على الحضارة الإنسانية .. وقد ارتبط اسم الكاتدرائية التاريخية برواية الكاتب الفرنسي الشهير فيكتور هوغو “أحدب نوتردام” ويزورها أكثر من 13 مليون سائح سنويا …. و إحنا فى المقال ده مش هــ نتكلم عن التفاصيل المعمارية لمبنى الكنيسة ، وتاريخ بنائها و حدوتها التاريخية ، لأن كل دى معلومات سهل الحصول عليها .. وكتير من الناس إتكلمت عنها … لكن هــ نتكلم عن المواقف الكاشفة والمصاحبة لحريق الكنيسة ، بالنسبة للكثيرين سواء برة أو جوة ..
أولا.. الكنيسة تحفة معمارية تمثل لمحة حضارية وتاريخية من التاريخ الإنسانى فى جانبه المتحضر ، بالإضافة إلى إنها رمز دينى … و علشان كدة ، الناس اللى فرحت باللى حصل ، وحوّلوا الموضوع لخانة المزايدة السياسية ، و الأقذر منهم اللى حطوا الموضوع فى خانة المزايدة الدينية .. إسمحولى اقول لكم ، إنكم عبارة عن قطيع من الزومبى المتخلف دينيا وحضاريا وإنسانياً .. بل بالعكس .. يمكن الزومى متحضرين عنكم شوية … بجد شئ دنئ وقميئ إنك تلاقى ناس شمتانة فى اللى بيحصل .. و ده فى حد ذاته يكشف ما يتمتع به هؤلاء الناس من مكيافيللية سياسية وداعشية دينية تكمن فى داخلهم ، .. سواء ادركوا ذلك ام لا !!
ثانياً .. و فى المقابل … الناس والمنظمات والجهات والدول اللى إتشحتفت وإتصعبنت على الأثر الإنسانى العظيم اللى ضاع يا عينى … وأظهروا تعاطفهم مع فرنسا و مع الفرنسيين … كنتم فين بقى لما الكنائس المصرية إتحرقت فى عهد الإخوان !!؟؟ (الكلام ده موجه للى جوة واللى برة كمان) … كنتم فين لما تم نهب المتحف المصرى وتم حرق المجمع العلمى فى القاهرة فى الأيام السودة اللى عاشتها مصر فى زمن مجيدة !!؟؟ … كنتم فين لما تم نهب وتدمير الأثار والمتاحف الحضارية ، والمكتبات الثقافية اللى تضم كتب من امهات التراث الإنسانى فى العراق وسوريا !!؟؟ … بجد إلا تستحون من أنفسكم !؟
ثالثاً .. بالنسبة للمزايدين من بتوع المكيافيللية السياسية … ياترى لو حدث حريق زى ده فى الكتدرائية المصرية ، أو فى مسجد السلطان حسن مثلا أو جامع عمرو بن العاص … ياترى كنتم هــ تتشحتفوا كدة ، وإلا هــ يطلع منكم حد يهاجم الدولة ويقول إن ده إهمال وتسيّب ودولة فاشلة فى الحفاظ على أثارها … أو تلاقى حد تانى طالع بيقول إن دى خطة السيسى علشان يبيع الأثر ده لمستثمر إماراتى !! …. طب ياترى الميديا والمواقع الإخبارية العالمية هــ تهتم وتتعاطف معانا زى ما تعاطفت مع فرنسا … وإلا هــ يتم توجيه اصابع الإتهام للدولة !!؟؟
رابعاً … بعد اللى حصل ، طلع الرئيس الفرنسى وقال إنه سيتم بناء الكنيسة وترميمها لتعود أفضل مما كانت .. وإنه بيفتح باب التبرعات من إجل إعادة البناء بمشاركة الشعب الفرنسى ، … و بعدها بدأت بالتبرعات بالفعل بــ تعهّد الملياردير الفرنسي فرانسوا هنري بينو، بتقديم مئة مليون يورو لإعادة بناء الكاتدرائية … ياترى بقى بتوع الدول لا تبنى بالتبرعات ، راحوا فين !!؟؟ … عندهم عذر شرعى وإلا القطة أكلت لسانهم !!؟؟ .. وإلا الفيريجين ده من التنظير ، مش نازل غير مع “سوفت ويير” مصر وبس !!
خامساً … الناس الفتّايين اللى تسائلوا وتحدثوا و أوجدوا الحلول للحكومة الفرنسية من وجهة نظرهم ، إن المفروض كانت الطائرات تسحب مياه من نهر السين المجاور للكتدرائية وتقوم بإخماد النيران فى حينه … فــ قالت وكالة الأمن المدني الفرنسية، إن سقف الكتدرائية والبرج الرئيسى فيهم عوراض خشبية أثرية ضخمة ، و أي إلقاء للمياه من الجو لإخماد الحريق يمكن أن تضعف هيكل الكاتدرائية، و قد تؤدى إلى إنهيارها تماما و تتسبب فى أضرار جانبية للمباني في المنطقة المجاورة …. و ده فى حد ذاته نموذج صارخ وواضح ورسالة لكل الخبراء الإستراتيجيين اللى بيفتوا ويفهموا فى كل حاجة ، إن رأيك المبنى على لا شئ ، أو مبنى على معلومة مغلوطة .. ده فى حد ذاته جهل مطبق …. يا حبيبى مش إنت اللى هــ تفتى فى المواقف الصعبة اللى زى دى … الدولة مش مستنية الإستاتيوس بتاعت سيادتك على حسابك الشخصى علشان تاخد بيها وتمشى وراها !!
وأخيراً .. المدعي العام في باريس قال ان حريق كتدرائية نوتر دام غير متعمد ، وإحنا بنقبل التصريحات الرسمية و بناخد بيها .. لكن برضوا لازم نفضل نتسائل … هل من المصادفة حدوث كل الأحداث الدامية دى طول الوقت فى فرنسا فقط … !؟ .. أكيد لأ …
و فى النهاية .. عميق اسفنا لما حدث فى فرنسا .. نتعاطف دينياً وإنسانياً وحضارياً … ونتمنى إن ربنا يحفظ الجميع من مثل هذه الأحداث .. ويحفظ بلدنا مصر من كل شر ، و من كل ما يتم التخطيط به لها من أهل الشر ….. أهل كل شر ..
تعيشى يا مصر .. و ربنا يحميكى