26 Feb 2020
كله بقى ع المكشوف … !!
—————————-
شوف بقى يا سيدى ..
بيقولك حصل إيييييييه … حصل إن وزير الدفاع الاسرائيلى السابق ورئيس حزب “إسرائيل بيتنا”، أفيغدور ليبرمان” قال من يومين في حديث للقناة الـ 12 للتلفزيون الإسرائيلي أن رئيس الوزراء بنيامين نتنياهو أوفد رئيس الموساد يوسي كوهين مع قائد رفيع في الجيش الإسرائيلى إلى قطر علشان يطلبوا من الدوحة مواصلة دعم حركة “حماس” !!!
أفندم !!!؟؟؟ …. أااااه والله … الكلام المكتوب صح .. حضرتك ماقرأتش غلط ..
إسرائيل بتتوسط لدى قطر علشان تستمر فى دعم حركة حماس …
طب إييه الحدوتة بقى !!
الحدوتة يا سيدى .. إن اللجنة القطرية لإعمار غزة أعلنت في ديسمبر الماضي إنها هــ تواصل إمداد قطاع غزة بالمساعدات حتى أواخر مارس المقبل فقط … و طبعا شنطة الدعم دى كانت بتروح لحماس وخالد مشعل .. بإعتبارهم يعنى حركة الــ و لامؤاخذة المقاومة الفلسطينية لتحرير القدس وإقامة دولة فلسطينية .. وإسقاط إسرائيل وإزالتها من الوجود .. و فى نفس الوقت هم الإبن بالتبنى لقطر وإيران…
و عنها … إسرائيل زعلت وإتقمصت .. وقالت إزاى الدعم يتقطع عن حركة المقاومة اللى ضدنا ….. قووووم إيييه !!؟ … رئيس الموساد وقائد القيادة الجنوبية (للجيش الإسرائيلي، الجنرال “هرتزي هاليفي” ، قاما بزيارة لقطر بتكليف من نتنياهو شخصياً، فى زيارة تعتبر الثانية من نوعها فى خلال ستة أشهر … وإستغرقت الزيارة دى 24 ساعة فقط .. التقوا فيها بــ شخصيات قطرية، من بينها محمد بن أحمد المسند، رئيس الاستخبارات القطرية ومستشار أمير قطر للأمن القومي، وطلبوا من القطريين الإستمرار فى تقديم الأموال والدعم لحماس بعد 30 مارس !!
تخيل بقى إن إسرائيل من طيبة قلبها .. بتجرى على أكل عيش حركة المقاومة اللى ضدها !! 😁
حركة المقاومة اللى ماعملتش حاجة منذ إنشائها غير ترسيخ الخلاف والإختلاف بين الفصائل الفلسطينية والضرب طول الوقت فى الحكومة الفلسطينية !
حركة المقاومة اللى أكثر من 70% من عملياتها العسكرية ، هى ضد مصر وضد الجيش المصرى !
حركة المقاومة اللى صواريخها الفشنك اللى بتطلقها على إسرائيل ، مافيش مرة موتت قطة حتى … وبعدها تقوم إسرائيل بإجتياح القطاع وقصفه بالطيران فى سيناريو مكرر .. وكأن حماس وظيفتها هى قتل ، أو التسبب فى قتل الفلسطينيين وليس الإسرائيليين
حركة حماس اللى لو كانت قامت بدور مقاومة حقيقية ، وجمعت الفصائل الفلسطينية تحت راية واحدة .. كان زمان فلسطين إتحررت من 40 سنة
لكن للأسف حركة حماس … و مش حماس بس .. لكن جماعة الإخوان ، وكل تنظيمات التأسلم السياسى .. وكل الكيانات الموازية الموالية للأيديولوجيات الدينية .. كلهم كلهم … وبغض النظر عن الغلاف الظاهرى اللى بيخدع المغيبين … كلهم تم إنشائهم لهدف واحد فقط .. وهو ترسيخ الفرقة .. والتكسير فى الأنظمة العربية .. وتحطيم الدول .. و تدمير الوعي و الولاء والإنتماء القومى .. وتدعيم فكرة العداء التام للجيوش العربية ، والعمل على تفكيكها وإسقاطها .. للوصول فى النهاية للهدف الأساسى وهو حماية أمن إسرائيل ….. و على رأى أشقائنا فى لبنان … كلهن يعنى كلهن .. 😏
متشكرين يا عم نتنياهو على حرصك على مصلحة حركة حماس ..
و لا عزاء … للمغيبين