30 Jun 2020
ثورة يونيو 2013 – إرادة شعب !!
كل عام وأنتم بخير 🙂
—————————-
كتتويج لكل ما أحاط به من أحداث سواء قبله أو بعده .. هــ يفضل يوم 30 يونيو واحد من أعظم و أمجد أيام التاريخ المصرى الغنى بلحظات العزة والفخار .. شاء ذلك من شاء ، وأبى من أبى
ثورة 30 يونيو ماكانتش مجرد حدث ، إتحد فيه المصريين (شعب وجيش) لإنقاذ الدولة المصرية من السقوط فى براثن تنظيم إرهابى .. لكنها كانت ثورة لإنقاذ هوية الدولة المصرية من الضياع والتدمير والطمس الكامل على إيدين اعداء الحياة من خوارج العصر وكلاب أهل النار
ثورة 30 يونيو ماكانتش مجرد حدث قام فيه المصريين بإنقاذ وتغيير مستقبل مصر فقط ، لكن تم فيه تغيير مستقبل العالم كله .. أيوة بدون أدنى مبالغة .. مستقبل العالم كله … بداية من مستقبل المنطقة العربية والشرق الأوسط .. ووصولا لمستقبل أوروبا وروسيا وحتى الصين .. و رغم إن الكلام ده مش أول مرة نقول على صفحتنا ، لأننا شرحناه كتير من خلال مقالات مطوّلة على مدار سنين … لكن بنحب نكرره ، علشان كل مصرى ومصرية شاركوا فى 30 يونيو ، يعرفوا حجم الإنجاز اللى عملوه لبلدهم وللعالم كله .. وعلشان كدة بنقول إن اللى شارك فى 30 يونيو ، سواء من الشعب ، أو من أفراد و قيادات القوات المسلحة المصرية .. كانوا حاطين أرواحم على أكفهم بالمعنى الحرفى للكلمة
تخيل كدة ببساطة خالص لو كانت 30 يونيو فشلت .. و لو ماكانش الجيش قام بتأمين نزول المتظاهرين فى كل حتة فى مصر .. كان إييه اللى هــ يحصل .. تخيل كدة مليشيات الإخوان وهى بــ تهاجم المصريين فى الشوارع ، وتقتل ونحرق وتفجر .. تخيل حملة إعتقالات لكل قيادات الجيش والشرطة ، و إلقاء القبض على كل الرموز المعارضة لحكم الإخوان .. و بعد كدة تفكيك مؤسسة الجيش وإعادة هيكلة مؤسسة الشرطة المصرية وتحويلهم لكيانات إخوانية ممسوخة
تخيل كدة تغيير الهوية ، وتحويل سيناء إلى ولاية إرهابية تضم نخبة النخبة من التكفيريين وقيادات الإخوان والجماعات التكفيرية … تخيل إعطاء جزء من سيناء للفلسطينين بديلا لغزة ، وتصفية القضية الفلسطينية للأبد .. تخيل تقسيم مصر زى ما حصل كدة فى السودان ، ويبقى عندك دولة مسلمة فى الشمال ودولة مسيحية فى الجنوب وولاية إرهابية فى سيناء … تخيل كدة تدخل أميريكا وحلف الناتو فى مصر بالسيطرة على قناة السويس وكل مدن القناة والساحل الغربى من سيناء بدعوى حماية المصالح الغربية ، وخطوط التجارة العالمية.
تخيل كدة بعد سقوط مصر وتدمير مؤسساتها وأخونتها فى غضون سنة بالكتير ، ييجى الدور على دول الخليج اللى ماكانتش هــ تاخد غلوة فى إيدين المخطط ، و كان هــ يتم الإستيلاء على ثرواتها ، إما بالتقسيم وإما بالإذعان … تخيل كدة التوسع التركى فى سوريا والعراق وليبيا وتونس والجزائر ، وتبقى مصر مجرد ولاية خاضعة للقرد التركى لصالح أميريكا والغرب فى ثوبه القديم (أوباما / كلينتون / كاميرون) … تخيل كدة مد من التوسع الإرهابى التكفيرى يضرب كل دول المنطقة زى ما حصل وشوفنا .. لكن المرة دى فى عدم موجود مصر والجيش المصرى !
تخيل كدة خط الغاز اللى كان هــ يطلع من قطر للعراق لسوريا لتركيا ثم لجنوب أوروبا ، لضرب إقتصاد روسيا فى مقتل ، بالتزامن مع إنطلاق موجات لا نهائية من الإرهابيين بدعوى الجهاد علشان تضرب روسيا ، وتدمر قدراتها الإقتصادية والعسكرية وتسقطها فى فخ الدمار والفوضى.
تخيل كدة بعد دمار المنطقة ، وسقوط مصر وروسيا ، وسيطرة النظام القديم وشبكات المصالح على مقدرات كل المنطقة من روسيا شمالا لحد أثيوبيا جنوباً .. و من افغانستان شرقا وكل الدول اللى بتنتهى بـلفظ (ستان) .. لحد المغرب العربى غرباً .. تبدا بعدها مرحلة حصار التنين الصينى وهدمه وتدميره بإستخدام نفس السلاح وهو سلاح التنظيمات الإرهابية التكفيرية ، وحروب الوكالة ، و دعم السلاح الغربى ، بدون ما الغرب يخسر فرد واحد من جيوشه ، أو يخسر دولار واحد من إقتصاده ، بل بالعكس .. دى مكاسب لا نهائية ….
غمض عنيك ، وإسرح بخيالك كدة ، وتخيل كان العالم هــ يبقى عامل إزاى !؟ … مش تقوللى كورونا ، وسنة المليار الذهبى .. مليار ذهبى مين !؟ .. دى كانت هــ تبقى مليارات (بشر وفلوس) … عرفت بقى لييه الأفعى “كونداليزا رايز” قالت عليها فوضى خلاقة !!؟
خلاص .. تخيلت !؟ .. شوفت !؟ … طب فتح عنيك بقى وشوف الواقع النهاردة على الأرض عامل إزاى .. شوف مصر حجمها إييه فى العالم النهاردة .. عرفت إنت عملت إييه بنزولك فى 30 يونيو ومشاركتك فيها !؟ .. عرفت إنك غيرت مستقبل العالم مش مستقبل مصر فقط … عرفت إنك حطمت أحلام وطموحات ومخططات إترسمت من سنين .. عرفت إنك حرقت مليارات الدولارات اللى إتصرفت على مخطط الهدم ده .. عرفت بقى لييه دول كتيرة ومعروفة وقفت جنبنا !؟ .. عرفت بقى لييه الدول دى بعيدا عن اللعبة السياسية الحالية ، شايلين لمصر الجميل ، وعارفين إن اللى حصل فى مصر كان يعتبر بالنسبة لهم قبله الحياة اللى حافظت عليهم و على أنظمتهم وشعوبهم !؟
و الأهم من إنك تعرف ده كله .. عرفت إنت قيمتك إييه !!؟؟
ثورة 30 يونيو كانت ومازالت وهتفضل درس من أهم دروس الإرادة والتحدى والإنتصار ، وقبل كل ده كان وقوف ربنا بحوله وقوته مع جيش مصر وشعبها …. وإذا كانت حرب أكتوبر قد أحدثت انقلاباً ، وغيرت العلم العسكرى ووضعت له أسسا جديدة بعد أن حطم المقاتل المصرى كل أسس العلم القديم .. فــ ثورة 30 يونيو كانت ومازالت وستظل حدث مهم وعلامة فارقة فى تاريخ ، ليس مصر وحدها .. بل للعالم أجمع
و زى ماقال الرئيس عبد الفتاح السيسى على صفحنه، “سيتوقف التاريخ كثيرا أمام ثورة 30 يونيو المجيدة، وستظل حية في ذاكرة كل الأجيال، بما رسخته من مبادئ العزة والكرامة والوطنية والحفاظ على هوية مصر الأصيلة من الاختطاف …. وفي العيد السابع لثورتنا المجيدة، أؤكد أننا أمة صنعت التاريخ وما زالت تصنعه في شتى الميادين وتلهم الإنسانية بما تحققه، وأجدد العهد على المضي في معركتنا الشريفة في العمل والبناء ومواجهة التحديات الداخلية والخارجية بنفس العزم والإصرار”
النهاردة ذكرى يوم جميل .. تجاوزنا فيه أيام ضياع وإنكسار …
النهاردة يوم فرحة لكل مصرى وطنى محب و منتمى لبلده …
إفرحوا بقوة ..
أنشروا علم مصر على صفحاتكم ..
أنشروا صور ذكرياتكم عن اليوم ده ..
غنوا وهللوا وعلوا الصوت ..
فهناك خرفان كارهون حاقدون ….. يتألمون .. 🙂🙂
حفظ الله مصر وشعب مصر
و كل عام وحضراتكم بخير
و من نصر لنصر بإذن الله