27 Apr 2021
من يدير كورونا … !!؟
——————–
من فترة بدأ الكلام فى كل دول العالم عن حملات تطعيم لكل المواطنين … وبدأ الحديث عن توقع انحسار أزمة كورونا فى القريب العاجل .. وخصوصاً انه فيه دول قدرت تطعّم اكثر من 60% من سكانها … و فيه دول زى الإمارات مثلا تجاوزت فيها حملة التطعيم 95% من تعداد السكان … واللى أعطى الأمل انه ممكن العالم يخرج قريب من حالة الاغلاق وتبدأ الناس ترجع لحياتها العادية بشكل طبيعى !!
لكن الغريب .. وفجأة كدة … يحصل استشراء مفاجئ للإصابات فى دولة الهند … لدرجة إن عدد الاصابات اليومى فى الهند تخطى حاجز ال 350 ألف إصابة يومية .. إنت متخيل الرقم … و ده طبعا أدى لإنهيار المنظومة الصحية بالكامل … وأصبح بــ يتم حرق جثث الموتى فى محارق جماعية زى اللى حضراتكم شايفينه فى صورة المقال كدة
ولو عرفت ان تعداد سكان الهند يصل تقريبا لمليار و 400 مليون نسمة … فــ ده يديك فكرة عن حجم الكارثة اللى بتواجهها الهند .. بل والعالم كله … وبالذات مع الحديث عن ظهور سلالة جديدة من التحور الجينى لفايروس كورونا …. يعنى احنا قدام موجة جديدة من الكورونا ماحدش يعرف هتنتهى ازاى !!
طب السؤال اللى بيطرح نفسه … ياترى اييه الرابط بين بدء أمل الخلاص من كورونا وبين اللى بيحصل فى الهند !!؟
أقولك ياسيدى ..
لازم تبقى عارف إن الهند بــ تنتج أكثر من 60% من كمية اللقاح الخاص بــ فايروس كورونا فى العالم .. ومعظمه للتصدير .. وإن قدرة المعامل الهندية يتجاوز المليار جرعة فى السنة … لكن لما حصل اللى حصل .. الهند قالت للعالم .. ثانية واحدة كدة بقى … شوف ياحبيبى إنت وهو .. بلا 60% إنتاج بلا بتاع … أنا مش هــ أنتج حاجة للعالم .. أنا هــ أحل مشكلتى الأول .. وبعدين ابقى أشوف مين عايز إييه !!
و زى ما ذكرنا إن تعداد سكان الهند حوالى مليار و 400 مليون نسمة … و بفرض إن معامل إنتاج اللقاح إشتغلت بكامل طاقتها وهى مليار جرعة فى السنة .. ولو الهند هــ تستهدف تطعيم 70% من تعداد سكانها … يبقى إحنا بنتكلم عن حوالى سنة على الأقل ، هــ يبقى فيها أزمة لقاح فى العالم كله لحد ما الهند تقدر تستعيد التوازن وتحاول تسيطر على الجائحة فيها
المشكلة الأكبر .. إن التحور الجديد بدأ يظهر منه حالات فى إنجلترا وإيطاليا .. و ده معناه إنه ممكن يكون العالم مقبل على مرحلة جديدة من الإغلاق بهدف السيطرة على الموجة الجديدة المتحورة من الفايروس .. يعنى مزيد من العزلة ومزيد من الخسائر الإقتصادية …
إحنا مؤمنين جداً إن العالم لا يدار بالصدف ..
و زى ما حصل إستشراء للإصابات فى أميريكا .. وبالصدفة طبعا قبل الإنتخابات الأميريكية مباشرة .. وبالصدفة برضوا يتم الإعلان عن إنتاج اللقاح بعد 48 ساعة من الإعلان الإعلامى عن فوز بايجون …
و زى ما بالصدفة البحتة ، إن كل الساسة اللى تم إصابتهم بكرونا محسوبين بشكل أو بأخر على التيار القومى زى ماكرون وبوريس جونسون وترامب وغيرهم
فــ برضوا بالصدفة البحتة بيحصل اللى بيحصل دلوقتى فى الهند .. وفى التوقيت ده بالذات .. مع بدء ظهور أمل التخلص من الجائحة …. و ده معناه إن أزمة كورونا لسة مكملة معانا شوية حلوين كدة .. يعنى على الأقل سنة ونصف من دلوقتى.
والسؤال اللى بيطرح نفسه .. سواء إعتبرت السؤال ده ترسيخ لنظرية المؤامرة وإلا لأ … ياترى هل فيه حد من مصلحته إستمرار الوضع على ماهو عليه لمدة سنتين كمان !؟ .. وإييه الهدف .. ؟؟ .. وإييه المكاسب من ده !؟ ..
عموما .. اللى يهمنا دلوقتى هو إن المصريين ياخدوا بالهم من نفسهم .. وبلاش حالة اللامبالاة بتأثيرات الفايروس ده .. وتجاهل اللى ممكن يحصل لو إرتفعت حالات الإصابات فى مصر … فى حالة لو دخلنا فى الموجة الرابعة … لأن الثمن هــ يبقى غالى جدا …
حفظ الله مصر برئيسها وجيشها وشعبها 🙏