7 Mar 2016
حد سمع حاجة
—————
مصر بتغرق ..
مصر بتنهار ..
مصر رايحة فى داهية ..
قناة السويس بــ تضيع ..
أزمة الدولااااااااااااااااررررررررر …
للأسف أصبح من الطبيعى فى الإعلام ، وعند اشخاص معينة ، .. إنك ما تسمعش غير كل ما هو سلبى .. وأصبح من الطبيعى فى الإعلام ، وعند اشخاص معينة ، .. أنك ماتشوفش غير صورة سودة .. وأصبح من الطبيعى فى الإعلام ، وعند اشخاص معينة ، .. أن يتم عن عمد تجاهل كل شئ كويس .. ولو حد إتكلم عنه ، فــ بيمر عليه مرور الكرام !!
حد سمع مثلا تحليلات مفصلة وبالأرقام عن نتائج زيارة الرئيس السيسى ومذكرات التفاهم اللى تم توقيعها ، والمنح العلمية اللى قدمتها اليابان لــ 2500 مصرى على مدار الــ 5 سنوات القادمة .. والمساهمة فى تطوير المتحف المصرى الجديد ومطار برج العرب .. وغيره وغيره وغيره !!؟؟ .. طبعا لأ .. بس المهم السجادة الحمرا !!!
طب حد سمع حاجة عن بنت جميلة عندها 17 سنة إسمها ياسمين يحيى مصطفى طالبه مصرية اخترعت جهاز لتنقيه المياه والهواء من التلوث وفازت فى مسابقة معرض أنتل الدولى للعلوم والهندسة لأن الجهاز اللى ابتكرته ياسمين بــ يعمل على تبخير مياه قش الارز وبعدين يتم تحويله الى سماد بدل ما يتحرق ويتسبب لنا فى السحابة السوداء بتاعة كل سنة .. وإن القوات المسلحة أعلنت تكفلها بإنتاج الجهاز ده !!؟؟ .. أكيد لأ طبعا … بس المهم عصام حجى اللى كل كلامه بيقطر كره وغل وحقد على مصر واللى فيها واللى منها !!
طب حد سمع عن شركة صدّرت شحنة اتوبيسات لإنجلترا طبقا لأعلى المواصفات العالمية وغيرت فى خط الإنتاج بتاعها علشان تنقل الدريكسيون من الشمال لليمين علشان يتوافق مع النظام الإنجليزى للمرور !!؟؟ طبعا لأ ..
الشركة دى إسمها MCV – Manufacturing Commercial Vehicles و دى شركة يا سيدى رأس مالها 7 مليار جنيه بتتعاون مع مصانع الإنتاج الحربى ، وبتوفر 7500 فرصة عمل وبتنتج حوالى 800 منتج فى السنة وبتصدر اتوبيسات وسيارات لكوبا و الجزائر و جنوب أفريقيا و الصين و الكونجو و نيجيريا كازاخستان .. و ….. وإنجلترا …
عارفين يعنى إييه إنجلترا تستورد منك اوتوبيسات نقل عام !!؟؟ .. يعنى غنتاجك مطابق لأعلى معايير الجودة العالمية .. ومش كدة وبس لكن كمان بتنتج قلابات ومعدات بتستخدم فى مشاريع قناة السويس …. بس كل ده مش مهم .. لكن المهم إننا نقول قناة السويس بتضيع ، و نفرد مساحات كبيرة لتقرير معلول النية من غير ما نحلل المعلومة ونفهمها علشان 200 ناقلة غيروا خط سيرهم لرأس الرجاء الصالح من اصل 17500 سفينة بتمر فى قناة السويس بحجة قال إييه .. أصل البترول رخص … طب بس ياريت ياللى بتقول كدة ، تفهم الكلام الأول قبل ما تقوله علشان ما يبقاش شكلك وحش وإنت بتردد ورا إعلام الفتة زى البغبغان !!
طب حد سمع عن إن شركة بيجو الفرنسية بتدرس إعادة تصنيع سياراتها فى مصر !!؟؟ .. طبعا لأ … أو إن أسبانيا بتقوم حاليا بتصنيع القطار فائق السرعة بناء على توقيع مذكرة تفاهم مع وزارة النقل فى مصر وهــ يجرى استكمال التصنيع فى مصانع الإنتاج الحربى علشان تدشين خطوط «الإسكندرية – القاهرة» و«القاهرة – أسوان» و «الغردقة – الأقصر» واللى هــ يتم على 3 مراحل !!؟؟ .. طبعا لأ !! .. بس المهم نصرخ من ازمة الدولار ، ونحاول نصدر صورة إن المشكلة هى مشكلتنا إحنا وبس بالرغم من إن الدولار إرتفع قصاد الريال السعودى والليرة التركية والروبل الروسى والين اليابانى واليوان الصينى واليورو الأوروبى .. وإلا الجنيه المصرى ده بمعزل عن العالم !!؟؟
طب حد سمع حاجة عن طريق الحرير الدولى أو محور 30 يونيو اللى بدأ إنشائه لربط مدينة بورسعيد بطريق التجارة البرية لقارة افريقيا !!؟؟ .. طبعا لأ .. بس المهم نفضل فى حالة الإحباط اللى إحنا فيها ، ونفضل طول الوقت باصّين فى الأرض ، ومش شايفين !!
مصر فيها سلبيات ، وماحدش يقدر ينكرها .. وفيه تحديات كبيرة قدّام المصريين .. بس الصورة مش سودة وظلمة أوى زى ما فيه ناس كتير بتحاول توهمنا ..
بصوا لحجم الصعوبات والتحديات ، هــ تعرفوا إن اللى بيتعمل ده مش قليل .. ومش هــ نعرف ده غير قدّام .. علشان كدة بصوا لبكرة ، وتفاءلوا بالخير تجدوه