4 Mar 2017
عملية جبل الحلال ما بين اولاد الحلال و أولاد الحرام
————————————————-
أصدقاؤنا أصدقاء صفحة كلام في الصميم ….. بعد الكلام الكتير على عمليه الجيش المصري في جبل الحلال في سيناء الحبيبه و اللى كالعاده كانت مفاجأه مدوية لجيوش العلم اجمع و اللى كعادة الجيش المصري في عملياته غيّر العلم العسكرى للمرة المليون … و مع اللغط الكبير في المعلومات المتداولة ما بين التهويل و التهوين …. و نشر العديد من المعلومات اللى منها كان صحيح و منها كان خاطىء و منها كان مدسوس بطريقة السخريه عشان يقللوا من نجاح الجيش المصرى و يلفتوا الانتباه لما حضرتك تفرح و تنشر معلومات ساذجه عن عملية ستسجل بحروف من نور في التاريخ و العلم العسكري … زي نكتة الـ 600 مليار دولار اللى الجيش لقاها داخل احدي المغارات .
المقال النهاردة حيكون مقال يغلب عليه الطابع العسكرى … و كعادتنا لما بنتكلم في المواضيع العسكريه … حننحاول ان كلامنا يكون بسيط و مش معقد عشان المعلومه و الرساله اللى المفروض نوصلها توصل ليكم بسلاسه و بدون تعقيد .
و مع ان الكلام اللى حنبدأ بيه مقالنا هو كلام مكرر … و اًصدقاؤنا القدام معانا قروه كتير في مقالات سابقه … لكن تعالوا نتكلم بتركيز و نفهم ليه قلنا ان اللى حصل حيتكتب من نور في كتب العلم العسكرى و ان الجيش غير مفاهيم عسكريه لاول مره في التاريخ العسكرى القديم و الحديث … و معلش و بنعتذر ليكم … المقدمه حتكون طويله شويه … استحملونا ….. لكن زي ما اتعودنا … تأصيل الامور مهم جدا و بالذات في الموضوع ده.
شوف يا سيدي …. تم التخطيط من أهل الشر ان يتم فرض ارادتهم في سيناء بالقوه المسلحه …. و أهل الشر لما جم اختاروا طريقة المواجهه … اختاروا الاسلوب اللى مفيش جيش نظامى في العالم قدر يصمد امامه …. و هي حرب العصابات وسط مدنيين … محميين بطبيعه جبليه و هي اصعب طبيعه حرب ممكن يواجهها اي جيش نظامي …. إزاي ؟؟؟ ….. أقولك .
تعالوا نشوف اكبر الجيوش في العالم لما قدّر ليها إنها تواجه نفس الحرب حصل فيها ايه …. فمثلا امريكا القوه العظمي بجلالة قدرها لما قدّر ليها تواجه حرب عصابات من ميليشيات مسلحه في غابات فيتنام… و بالرغم من استخدامهم لتكتيكات غير اخلاقيه و مدمره ضد المدنيين مثل قذف و ازالة قرى بالكامل بكل سكانها المدنيين بقنابل محرمه دوليا زي النابالم ….. انهزمت و طلعت بخيبة تقيله … و خسرت في الحرب دي اكتر من 2000 طائره هليكوبتر و عشرات الالاف من المدرعات و عربات النقل و آلاف القتلي و مئات الالاف من الجرحي و طلعت من فيتنام لعدم قدرتها على تحمل حجم الخسائر و كمان بعقده نفسيه مجتمعيه لسه بتعاني منه حتي الان…. و ده ليه !!!! … لان العلم العسكرى بكل مدارسه الشرقيه و الغربيه بتؤكد على حقيقه واحده … استحالة كسب معركه ما بين جيش نظامى و حرب عصابات تقوم بها ميليشيات مسلحه .
الاتحاد السوفيتي بجلالة قدره لما قدّر ليه انه يواجه حرب عصابات من ميليشيات مسلحه في صحراء و جبال افغانستان … و بالرغم من استخدامهم لتكتيكات غير اخلاقيه و مدمره ضد المدنيين مثل قذف و ازالة قرى بالكامل بكل سكانها المدنيين بقنابل محرمه دوليا ….. إنهزمت و طلعت منها بخيبة تقيلة …. بعد ما خسرت هناك اكتر من 451 طائره ما بين طائرات مقاتله و هليكوبتر و اكتر من 14000 قتيل و عشرات الالاف من الجرحي و اكتر من 140 دبابه 1200 مدرعه و ناقلة جنود و طلعت من هناك لعدم تحملها الخسائر الفادحه في الافراد و المعدات … و كمان بعقده نفسيه مجتمعيه لسه بتعاني منها حتي الان…. و ده ليه !!!! … لان العلم العسكرى بكل مدارسه الشرقيه و الغربيه بتؤكد على حقيقه واحده … استحالة كسب معركه ما بين جيش نظامى و حرب عصابات تقوم بها ميليشيات مسلحه .
و نرجع تاني لامريكا القوه العظمي في العالم … اللى لما قدّر ليها تواجه حرب مدن و ميليشيات مسلحه في افغانستان ….. و بالرغم من حربهم اللى كانت دايما عن طريق القذف الجوى … و انتشارهم و تعاملهم على الارض اللى كان في اضيق الحدود …. و بالرغم من استخدامهم لتكتيكات غير اخلاقيه و مدمره ضد المدنيين مثل قذف و ازالة قرى بالكامل بكل سكانها المدنيين بقنابل محرمه دوليا ….. الا انهم ايضا انهزموا و طلعوا من افغانستان بخيبة تقيله و سلموها لعصابات الافيون و الهيرويين …. بعد تكبيدهم خسائر تتخطى الـ 30 طائره و عشرات الدبابات و المدرعات و اكثر من الالف قتيل و آلاف الجرحي …. و ده ليه !!!! … لان العلم العسكرى بكل مدارسه الشرقيه و الغربيه بتؤكد على حقيقه واحده … استحالة كسب معركه ما بين جيش نظامى و حرب عصابات تقوم بها ميليشيات مسلحه .
و ايضا امريكا في العراق … اللى بنفس الطريقه و السيناريو … و بالرغم من تعديلهم لتكتيكات عسكريه جربوها في العراق بناء على خبرات هزائمهم السابقه و اللى كانت كلها تتمحور على هدم القرى فوق سكانها و ازالتها بالكامل بسكانها بكل الاسلحه المحرمه دوليا …. الا انهم خسروا عشرا الالاف من القتلي و مئات الالاف من الجرحي و في الاخر …. سلموها لايران تسليم أهالى بمعاونة حلفاؤهم الاخوان المسلمين …. و ده ليه !!!! … لان العلم العسكرى بكل مدارسه الشرقيه و الغربيه بتؤكد على حقيقه واحده … استحالة كسب معركه ما بين جيش نظامى و حرب عصابات تقوم بها ميليشيات مسلحه .
و حتي يا مؤمن لما أمريكا عملت 30 راجل في بعض و دخلت الصومال في أواخر التسعينات عشان تعتقل محمد فارح عيديد بالقوه المسلحه …. و بعتت تشكيلات قتاليه من امهر و اشرس فرق المارينز …. اتعمل عليهم حفله …. و بقت فضيحه … و بقي كل مشكلة امريكا انها لما كانت بتبعت تشكيلات تنقذ التشكيلات اللى بعتتها في الاول … يدخلوا في الحفله و يستنجدوا بتشكيلات اخرى عشان تنقذهم … و بقوا عاملين زي اللى راحت تجيب تار ابوها … رجعت حامل 🙂 🙂 .
و لأنهم أهل شهر بالفعل … الناس دي فكروا فكره شيطانيه …. مادام الحروب مع الميليشيات دي سرها باتع مع الجيوش النظاميه و عمرهم ما خيبوا مع اي جيش حتي مع اقوى الجيوش اللى بتمتلك القدره التكنولوجيه و التسليحيه و الماديه …. و مادام احنا مشكلتنا الدائمه في تقسيم الدول و احتلالها هي الجيوش النظاميه …. طب ليه مناخدش احنا صف الميليشيات دي و و نعمل احنا جيش الشيطان اللى بيتكون من الميليشيات دي … و هي اللى تقوم بالسبوبه كلها …. احنا من بعيد ننشىء جيوش الميليشيات دي … نجيب شوية صيع على شوية مرتزقه على شوية شباب متعلم تعليم عالي لكن أهبل ….. نضحك عليه بالشعارات الدينيه الرناناه … و نسيطر عليه بواسطة افيون الشعوب … الدين و الجنس و المخدرات …. فالشاب من دول مجرد ما يسلم نفسه ليهم …. حنقدمله الجنس المباح على المشاع …. اختار و احلم و اتمني و شاور بس و انت تمارس الجنس مع اللى تعجبك سواء كانت طفلة او إمرأه او حتي طفل او رجل …. و كمان حتعمل دماغ مخدرات … و فوق ده حتتدخل الجنه حتف … و تكمل مسيرتك الجنسيه مع الحور العين اللى مستنيينك.
و نجحت الفكره …. و قدروا يكونوا جيش جرار من مئات الالاف من الشباب الصيع و ايضا الشباب المتعلم تعليم عالي …. و اللى بيديره رجال مخابرات و عسكريين على اعلي مستوى …. و تم تسليحه باحدث الاسلحه و نظم الاتصال الحديثه … و تدريبه على القتال المتلاحم و حرب المدن على يد خبراء عسكريين متخصصين … بخلاف التخديم عليهم لوجيستيا و مخابراتيا و دعمهم بكل المعلومات و صور الاقمار الصناعيه و كذا ادارة عملياتهم على الارض من غرف عمليات من قبل خبراء متخصصين … و قد وصل الامر في بعض الاحيان الى تقديم المعاونه الجويه و الغطاء الجوى لهم للحمايه من قبل الطيران الحربي لدول عظمي زي امريكا …. او القاء المؤن و الاسلحه لهم ….. و ايضا تم تخصيص خطوط انتاج بالكامل لمصانع سلاح في بلاد عديده لتسليح جيش الشيطان … و حتي بعض المصانع المدنيه …. زي مثلا شركة زي شركة TOYOTA اللى خصصت بالامر خطوط انتاج بالكامل لتسليح جيش الشيطان بعشرت الالاف من عربات الدفع الرباعي و ملايين قطع الغيار و نقلها للارهابيين في سوريا و ليبيا و العراق و اليمن و حتي في مصر…. و غيرها من الشركات المدنيه اللى اسماؤها ممكن تكون مفاجىء للجميع …
طبعا التخطيط الشيطاني ده و مع القاعده العسكريه التي تقول استحالة كسب معركه ما بين جيش نظامى و حرب عصابات تقوم بها ميليشيات مسلحه زايد عليه كمان كل الدعم العسكرى و التدريبي و اللوجيستي و التسليحي و المادي … بخلاف مئات من الخبراء العسكريين اللى درسوا و طوروا اساليب قتال الميليشيات بناء على الخبرات السابقه في التعامل معاهم ….. أصبح جيش الشيطان غير قابل للهزيمه …. و أصبح تفتيت الجيوش النظاميه مش اكتر من مسألة وقت … و ده يفسر حالة الرعب اللى فيها الحكومات الاوروبيه او الشركات العالميه و اكبر المؤسسات الاعلاميه بالكامل ….. اللى لو لم تنفذ ما يطلب منها …. يتم التلويح بمواجهة جيش الشيطان و نقل عملياته على اراضيها او ضرب مصالحها على مستوى العالم …. فترضخ و تقول حقي برقبتي … عايزين ايه و انا اعمله .
و طبعا لما بدأت المواجهه مع الجيش السورى و الجيش العراقي و الجيش الليبي … طبعا احنا عارفين و شفنا ايه اللى حصل … و إزاي شوية صيع كانوا بيستولوا على دول بالكامل …. فالميليشيات المسلحه دي في وقت من الاوقات و في أقل وقت ممكن لا يتجاوز الاسابيع القليله …. استولت على اكتر من 80% من مساحة سوريا …. و اكتر من 75% من مساحة العراق … و استولت على ليبيا بالكامل … و مفيش جيش قدر يقف قدامهم … لان الموجه كانت كبيره و عاتيه …
المقدمه دي مهمه جدا … و للاصدقاء العسكريين الموجودين معانا … يفهموا جدا معني الكلام كويس جدا …. و أعتقد من المقدمه دي … نقدر نعرف كويس جدا الجيش المصرى عمل ايه طوال الخمس سنين اللى فاتوا … و ليه الجيش اعلن رسميا ان تاريخ الاول من يوليو 2015 كان تاريخ فارق في العسكريه المصريه … و ليه كمان الحقه بتاريخ تاني و هو فبراير 2017 لما تم اقتحام جبل الحلال.
و طبعا لان الجيش المصرى معروف عالميا انه دائما و ابدا خارج نطاق الحسابات العلميه و العسكريه …..فقد تم الترتيب له ترتيب خاص جدا … و كان الكل بيراهن على تفتيته في النهاية … و كانوا بيعلنوها صراحة ان دول المنطقه كلها سهلة الا مصر … فهى آخر مرحلة و هي الجائزه الكبرى … و شفنا ازاي تم الترتيب لتفريغ الداخل المصرى امنيا و سياسيا في هوجة يناير ليتم استدراج الجيش المصرى لداخل المدن و الشوارع في تفكير شيطاني …. فإذا فشلت محاولات الوقيعه بينه و بين الشعب … فالجيش قد تم اشغاله امنيا داخل المدن و تم تفريغ الحدود من الاحتياطيات التعبويه و المسانده و ارهاقه لوجيستيا و تعبويا ….. و التركيز تماما على التفريغ الامنى في منطقة رفح و العريش بالقوه المسلحه ….. و ازاي تم استجلاب صفوة الصفوه من جيش الشيطان باللالاف و تسكينهم نفس المنطقه و في جبل الحلال …. و تهريب آلاف الاطنان من الاسلحه و المعدات و معدات الاتصالات الحديثه تحت الاشراف المباشر لنظام اول جاسوس مدني منتخب …. لفرض واقع على الارض و تهديد الدوله المصريه بجيش الشيطان.
و يمكن كلكم تفتكروا حديث الرئيس السيسي قبل انتخابة مباشرة لما قال ان خيرت الشاطر قعد معاه و هدده و قاله مصر حتواجه مسلحين من كل دول العالم … فالكلام كان مباشر بالتهديد بمواجهة جيش الشيطان اللى هو مصدر رعب لاي جيش نظامى عالمي ….. و لما قال البلتاجي بما معناه … يا ترجعوا مرسي يا اما حتواجهوا جيش الشيطان في سيناء …. و كلام الرئيس السيسي المباشر ليهم … مش حنسيب سيناء لحد … لو عايزين تاخدوا سيناء … يبقى موتونا الاول … و لوا عرفتوا تموتنونا ابقوا خدوها .
و كلنا شوفنا العالم كله كان مقلوب على مصر قد ايه … مش عشان هم كانوا بيكرهونا … لأ …. لانهم كانوا متأكدين ان مصر اتجننت و قررت تواجه جيش الشيطان …. و ان الموضوع مسألة وقت … و مصر حتنتهي تماما …. لان مفيش جيش يقدر يقف قدام هذا التخطيط…. فخلينا نشوف مصالحنا مع من يدير هذا جيش الشيطان عشان نأمن شره.
طبعا في البداية … الجيش المصرى عانى كثيرا … فهي حرب لم يدرسها من اي عسكرى من قبل … فهم محترفون في فنون القتال و صفوة الصفوة … تم تدريبهم و تسليحهم على أعلي مستوى … و حتكون مواجهتهم باهظة التكاليف سواء البشريه او في المعدات او فى قدرة مصر الاقتصادية على تحمل حرب طويلة الامد …. و عشان الناس تعرف بس يعني ايه الكلفه الماديه … فتكلفة ساعة الطيران الواحده للطائره الـ F16 بتبدأ من 4000 دولار و تصل الى 22500 دولار … يعني لو طياره واحده بس طلعت لفت لها لفتين بس من غير ما ترمي اي قنبله و لا تعمل حاجه خالص و نزلت بعد ساعتين …. فحضرتك دفعت من 9000 الى 45000 دولارو انت مغمض عنيك … و تكلفة ساعة طيران المروحيه الاباتشي تبدأ من 5000 دولار للساعه …. اما لو الطياره رمتلها قنبله او ضربت صاروخ واحد … فإنت بتتكلم على تكلفه بتبدأ من 2000 دولار لاحقر قنبله الى اكتر تكلفة قد تصل الى مئات الالاف من الدولارات و ممكن تصل الى صاروخ يتخطي المليون دولار بكتيييييير .
ده غير التكلفه الماديه للاعاشه و الاكل و الشرب و التزود بالوقود للعربات و المعدات و اللوجيستيات لنقل المعدات و قطع الغيار و و غيرها من تكلفة الحروب اللى بتكون باااااهظة جدا على اقتصاد اي دوله مستقره اقتصاديه … مش زي حالاتنا طالعه من مفرمه سياسية و اقتصاديه و اجتماعيه …. ده غير الحصار الاقتصادي و الضرب بتركيز على اي مجال او متنفس اقتصادي للدولة المصريه تستطيع ان تمده الى الجيش المصرى في مواجهته مع جيش الشيطان.
فمخطىء تماما من يظن ان استراتيجيتهم كان هدفه النهائي ضرب السياحه و ضرب العمله و الاستثمار لضرب الاقتصاد … و لكن هم عشان عارفين كويس جدا ان العمود الفقرى اللى سند الدوله المصريه في السنين اللى فاتت دي هو الجيش … فلو ضربنا الاقتصاد … الجيش مش حيعرف يصرف و لا يواجه جيش الشيطان … فلما ينهزم … الباقي كله سهل بالنسبه ليهم.
و لان الجيش المصري دائما و ابدا خارج نطاق التوقعات … فتم انشاء قوات جديده تماما بشكل فاجىء الجميع و بفكر جديد و هى قوات الانتشار السريع و اللى تم تدريبها و ترقيتها تسليحيا و تدريبيا و لمواجهة تكتيكات أهل الشر … و ده بدون ان تتأثر باقي تشكيلات الجيش او تتغير عقيدته القتاليه الكلاسيكيه …. و للى ميعرفش …. اللى حصل ده يعتبر معجزه عسكريه … ففى اي جيش في العالم له ميزانيه مفتوحه …. قد يستغرق انشاء تشكيلات جديده بحجم و قوه التشكيلات المصريه اكثر من 8 سنوات على اقل تقدير ….. لكن اللى حصل ان الناس صحت الصبح لقت الجيش المصرى كان بيكسب وقت مع الارهابيين في سيناء و بيتحمل خسائر في الارواح و المعدات ببساله و شجاعه و بيتحمل تريقة شباب خايب على النت … لغاية لما يجهز نفسه فعليا على الارض …. و كانت اخر نجاح ليهم في اقتحام كماين الجيش في سيناء …. في يناير 2015 … و اللى بعدها تم تفيذ ما تم الترتيب له و تجهيزه من قبل الجيش المصرى …. و اللى من ساعتها … جيش الشيطان هناك بيتم نفخه بالتدريج و بخطوات مدروسه … و بدأ الجيش المصرى ياخد المبادره و يكسب السيطره الفعليه على الارض و يسيطر على مفاصل الطرق و المدن و القري داخل رفح و الشيخ زويد و العريش.
و اللى خاللى من يدير جيش الشيطان يجن جنونه … فكل التكتيكات اللى اتدربوا عليها و الخبرات المتراكمه من حروب السوفيت و الامريكان في فيتنام و افغانستان و العراق و سوريا مش نافعه خالص مع الجيش النظامى المصرى …. فكان الترتيب للحدث الجلل بتاريخ الاول من يوليو 2015 … و لان الجيش المصري كان بيستدرجهم للوقوع في المصيده …. و مخلاش ليهم غير اختيار واحد بس …. و هو الهجوم الشامل على كل مواقع و كمائن الجيش المصرى في وقت واحد …. و هو الاسلوب اللى كانت مدن بالكامل في العراق و سوريا بتقع بسببه …. كان الجيش مستنيهم بتكتيكات و خطط مفاجأه تماما … و ده اللى خاللي هزيمتهم تكون مدويه و اعداد قتلاهم يتخطى المئات ….. في سابقه عسكريه لم تحدث من قبل في التاريخ العسكرى …. و من ساعتها و دول العالم اللى كانت بتقدم رجل و تأخر رجل في التعاون مع مصر … بدأت تتجرأ و تعاملها مع مصر يختلف تماما
لان بقي فيه مثال لجيش يقدر يواجه و يهزم جيش الشيطان …. و لكن كان فاضل المشكله الاخيره و هي جبل الحلال ….. و اللى فى العلم العسكرى …. تعتبر حروب الجبال من اخطر و اصعب انواع الحروب على الاطلاق …. و اللى لاول مره في التاريخ العسكرى يستطيع جيش نظامى ان يقتحم مسرح عمليات جبلي يتميز بالوعوره الشديده على مساحه شاااااااسعه و يسقطه من يد ميليشيات مسلحه باحدث الاسلحه و المعدات في ايام معدوده و من غير حرب شامله و لا حس و لا خبر …. فاللى حصل من اسبوع ده نصر عسكري تاريخي … سيتم كتابة تفاصيله بأحرف من نور في التاريخ العسكرى المصرى و في العلم العسكرى في جميع الاكاديميات العسكريه على مستوى العالم اجمع .
يعني الجيش المصرى مش بينتصر و يقضي على اسطورة جيش الشيطان بس … و لا بيقضي على مستقبل اسلوب حربي بالكامل و هو اسلوب حرب الجيل الخامس … و لا على جيل كامل من ضباط المخابرات الحربيه و الخبراء العسكريين و بلايين الدولارات اللى اتصرفت على انشاء النوع ده من الحروب ….. ده بيتفوق على نفسه و بيجوّد كمان … و بيقضي على اسطورة اخطر منطقة امنيه موجوده في العالم اجمع و اللى على مدى عشرات السنين تم تجهيزها من قبل دول عظمى لتكون هي الامارة الاسلاميه لجيش الشيطان و مركز انطلاقه الى جميع دول العالم.
و اللى حصل ده كان مفاجىء تماما للعالم اجمع … و ده اللى خاللى الزيارات المفاجأه من دول كتييييير تتوالى على مصر … لان البعبع اللى كانوا بيخوفوا بيه حكومات العالم كله خلاص بان و انكشف … و الكل و حتي و ان كان مشارك بشكل من الاشكال في تكوين البعبع ده … معندهوش غير سؤال واحد …. عملتوها ازاي دي ؟؟ 🙂 🙂
و يبقي هنا ان الكل من اصدقاؤنا عايز الاجابه على السؤال … عملوها ازاي دي ولاد العفريت دول 🙂 ؟ … طب كان فيه انزال جوى و لا اقتحام مباشر و لا ايه بالظبط ؟؟؟؟ … الاجابه باختصار …. ملناش دعوه 🙂 🙂 … و مش مسموح لحد انه يعرف دلوقتي … فخطط الجيوش لا تناقش على صفحات التواصل الاجتماعي … احنا ميخصناش التفاصيل العسكريه … لكن لينا النتيجه … الجيش خلص و اقتحم و بينضف . 🙂 🙂
طب مسكوا ايه جوه … و ايه موضوع ضباط المخابرات اللى اتمسكوا جوه …. فإحنا لا حننفي و لا نأكد … لكن اللى حنأكد عليه و بشكل صارم … ان الكلام بالطريقه دي بيأذى الدوله المصريه تماما في علاقاتها مع الدول الاخرى … فياريت منكونش زي الدبه اللى قتلت صاحبها … فمصر لاعب محترف من زمااااان في استثمار الاحداث بحرفه و حنكه داخل الغرف المغلقه …. و تستطيع ان تتلاعب بما يتاح لها من اوراق تماما … و هو ما يسمى بالقوه الناعمه … و اللى لها تأثير رهيب و حاسم و مكاسبه اكبر بكتيييييير من البروجابندا و الاعلانات الخايبه اللى لا تثمن و لا تشفي من جوع ….. فبنأكد تاني …. الجيش لم يصرح ابدا عن ما تم داخل جبل الحلال ….. فـ كل اللى بيقولك الجيش مسك مش عارف مين و عمل ايه … إسأله سؤال واحد … هو انت كنت معاهم ؟؟؟ …. طب عرفت منين مادام الجيش لم يعلن ؟؟؟ … فبلاش الله يرضي عليكم الكلام الكبير و اختلاق مواقف قد تضر بالدوله المصريه .
و عشان إحنا عارفين الناس مش حتسكت 🙂 … فاللى نقدر نأكده … إن الصيد كان ثمين جدا و أثمن مما يتصوره أحد ….. لكن … هل كان شخصيات محليه او أجنبيه باختلاف تصنيفاتها … ممكن …. هل كان قواعد بيانات و معلومات حاسمه في الحرب على جيش الشيطان ….. جايز ….. هل كان ادلة دامغه تدين التورط بالارهاب حكومات و شخصيات سياسيه عالميه و انظمه حكم …. إحتمال …. هل كانت معلومات تفك شفره جيش الشيطان و تفك شفره ما تم تجهيزه في سيناء لعشرات السنين الماضيه و ما كان يتم ترتيبه للمستقبل ….. كل شىء وارد ….. لكن اللى بنأكد عليه … الله يرضي عليكم … بلاش كلام كتير في الموضوع ده … لانه في صميم الامن القومي المصرى … و الاهم من ده … إنك بتتكلم عن عمليات عسكريه لازالت جاريه على الارض … و الرجاله بتقاتل بشراسه جيش الشيطان دلوقتي على الارض و حضرتك بتقرأ المقال ده … فبلاش فتاوى الله يرضي عليكم لان الجيش المصرى مش محتاج تاليف عشان يبان انه قوى و بيحسم على الارض …. و بالذات موضوع الـ 600 مليار دولار دول 🙂 🙂
طب ييجي السؤال هنا …. طب هل حيتم القضاء تماما على الارهاب في سيناء … الاجابه طبعا لسه ….. مع الوضع في الاعتبار ان الجيش غير تماما في المعادله على الارض … إزاي …. لو تلاحظ اننا داخلين على سنتين مسمعناش عن اقتحام كمين و لا سقوط شهداء باعداد كبيره …. بالعكس … فعشان تعرف قد ايه الجيش نجح نجاح باهر … ففي آخر شهرين بس … قام الجيش بعدد 15 عمليه استباقيه … يعني بمعدل عمليه استباقيه كل 4 ايام …. يعني الجيش خلص على الارض و بيتسلى عليهم … و قام ناطط ليهم في معقلهم داخل جبل الحلال .
و مش حنشوف الفتره اللى جايه غير عمليات عبيطه كلها خسه و نداله زي خطف مدنيين في الضلمه او زرع عبوات على الطرق … و اللى كمان قلت اعدادها بشكل كبيييييييييير جدا جدا … و حيتم القضاء عليها تماما …. لان الجيش بيحل مشكله تم ترسيخها على الارض على مدار عشرات السنوات …. فمش حتتحل تماما فى سنه و لا اتنين …. لكن حتتحل اسرع مما تتخيلوا …. لان الوضع بيتحسم على الارض … و يمكن على آخر السنه دي يكون لينا كلام تاني .
أخر حاجه و هى الحرقان الاسرائيلي و التصريحات العبيطه بتاعتة مبادلة الارض و اشاعة ضرب الصواريخ على ايلات من الاراضي المصريه …. هو مش حرقان و لا حاجه … هو شقي عمرهم اللى كان بيترتب في جبل الحلال بيتم تحطيمه امامهم بمنتهي الحرفيه زي السكينه في الحلاوه …. و الاهم …. ده رعب بعيد عنك 🙂 … الجيش المصري لما قال يا حرب …. اتفرجوا على أكشن على الارض مدرسهوش و لا شافوه في حياتهم … و على حدودهم … و قدام عنيهم … و بـ 1% فقط من قوة الجيش المصري …. اللى واقف على الحدود و في المنطقة (ج) بكامل عتاده و طيرانه بيلف و يرصد و يضرب على الشريط الحدودي … و إبقي سلملي على الملحق الامني لكامب ديفيد 🙂 🙂 …. أصل اللى بيدخل مبيرجعش 🙂 🙂 ….. و اهو بيصرخ و محدش بيسمع ليه لانه مزنوق زنقه سوده و ميقدرش يفتح بقه…. محنا قلنا قبل كده … جيش يحمي و لا يهدد ….. و والله يا اخويا يا عزرا انا كنت قاعد و في حالي … بس عامة اللى حضر العفريت … يصرفه 🙂 🙂 … ابقوا إصرفوه بقي لو عرفتم 🙂 🙂
تحياتنا