03 Jul 2015
عاش جيش مصر العظيم
————————-
اصدقاؤنا اصدقاء صفحة كلام في الصميم …. بعد ما الامور هدت و الى اعصابه كانت بايظه و اللى كان منهار …. تعالوا نتكلم بهدوء و زي ما اتعودنا على تأصيل الامور , لكن احنا حنركز شوية على الناحية العسكريه و حنحاول نبسط الامور على قد ما نقدر و حنتكلم في نقاط محدده .
اللى حصل يوم الاربع كان امر جلل و كبير جدا و اللى كان متخطط ليه لو نجح كان ممكن يغير تاريخ و جغرافيا المنطقه تماما …. طب ازي ؟؟؟
شوف يا سيدي …. معروف تماما ان اصعب حرب يخوضها جيش نظامي هي حرب العصابات …. فامريكا بجلاله قدرها فقدت 2000 طائرة هليكوبتر في فيتنام ده غير الاف القتلي و مئات الالاف من الجرحي و انهزمت … و روسيا فقدت 20 الف مقاتل في افغانستان و انهزمت…. ففي التاريخ العسكري القديم و الحديث …. اي حرب عصابات طويلة المدي بيخوضها جيش نظامي بتنتهي بهزيمته و هروبه و انسحابه لانقاذ نفسه من الهلاك زي ما حصل مع امريكا و روسيا في فيتنام و افغانستان لانه لو كمل حيتفكك تماما زي ما حصل في ليبيا و سوريا و العراق.
و مع تطور علم و انواع الحروب و انتقالنا الى حرب الجيل الخامس …. و هي عباره عن تكوين ميليشيات ارهابيه منظمه يتم اطلاقهم على الدول المستهدفه ليتم تفكيك جيوشها ثم استباحة شعوبها سواء في تجارة الجنس او تجاره الاطفال او حتي الاعضاء ….. فتم تكوين التنظيمات الغربيه الماسونيه المسلحه اللى ليها اسماء زي داعش وماعش بيت المقدس و خلافه …. بيتم اعدادها و تسليحها و تمويلها و دعمها على اعلي مستوي …. و اعظم الخبراء العسكريين بيعملوا على تدعيمهم باحدث التكتيكات الحربيه و المعلومات و الصورالمحدثه ساعه بساعه عن المواقع اللى المفروض يهاجموها.
و التنظيمات دي بتستخدم عادة تكتيك واحد … و هو اسلوب الرعب و الصدمه مع الكثافه النيرانيه العاليه بعيارات كبيره …. و الاسلوب ده ناجح نجاح منقطع النظير و مفيش جيش و لا وحده عسكريه قدرت تقف امامه …. وفيه قري بل و مدن بالكامل تم احتلالها بالاسلوب ده …. طب ازاي ؟؟؟
اللى بيحصل ان الكمين او الوحده العسكريه بيتم مهاجمتها من جميع الانحاء في وقت واحد بضعف عدد المتواجدين فيه بعد تفجيره بسياره مفخخه لاحداث اكبر قدر من الخسائر قبل بدء الهجوم و اعطاب اكبر قدر من الاليات و المدافع الثقيله ان وجدت ثم احداث حالة من الصدمه و الرعب و عدم الاتزان داخل الوحده العسكريه دي … لان في نفس وقت التفجير بيكون مئات الطلقات و عشرات قذائف الهاون بتنهمر على الموقع من كل الاتجاهات ….
فبيتم تصفية الموقع في وقت قصير جدا بعد عزله تماما باقامة الكمائن على الطرق المؤديه ليه و نشر الالغام حتي لا يتم نجدة الموقع او الكمين طوال فترة تصفيته …. و الاسلوب ده نجح تماما في الاستيلاء على نصف العراق و سوريا نجاح منقطع النظير….. و حتي في سيناء زي كمين كرم القواديس و الكتيبه 101 و اللى كان التعامل فيه اشرس بكتير و رد فعل الجيش كان اكثر صلابه و صمود برغم سقوط عدد كبير في صفوف الجيش لكن الجيش كان بيطور نفسه و من تكتيكاته اسرع مما يتخيله اكبر خبير عسكري غربي او شرقي.
و لان الجيش المصري جيش شريف … و عقيدته القتاليه بتمنعه من استهداف الارهابي لو كان وسط مدنيين …. فكان الدعم الجوي لا يتدخل لان الارهابيين بيستغالوا ده …..و كانوا بيختبئوا وسط المنازل فيجي الدعم الجوي فيرفض الطايرين التعامل لما بيلاقوا الارهابي الخسيس واقف بين بيوت الناس بيطلع ليه لسانه.
الجيش المصري هو اول جيش نظامي في العالم و في التاريخ يقوم بالتعامل مع حروب الجيل الخامس و هو محتفظ بعقيدته القتاليه الكلاسيكيه …. و عرف ازاي يحافظ على نفسه و على ارضه و شعبه و يتعامل مع الملاعين دول و اساليبهم و ده عمره ما يجي الا من جيش عفي و قوي و قادر و مفتري …. طب ازاي …؟؟؟؟
اولا مئات التكفيريين دول بيدخلوا بسلاحهم عن طريق الانفاق اللى كل يوم بيتم اكتشاف انفاق جديده باطوال اكبر و على اعماق اكبر ….. و في نفس الوقت بيتم دعمهم من خلال بعض افرع القبائل و المدنيين و الاسر المعروف عنها دعمها لحماس (قرايب و منسايب و متجوزين من بعض) ده غير بيزنس التهريب اللى اوقفه الجيش بعملياته العسكريه و غلقه لمعظم الانفاق.
ايضا الناس دي بتيجي باحدث الاسلحه ذات الكثافه النيرانيه العاليه …. و على التليفزيون المصري صرح احد اللواءات انه لاول مره استخدم الارهابيين الكورنيت المضاد للدبابات و السام 7 المضاد للطائرات و ده تحول كبير جدا.
طب احنا متعودين انهم يهاجموا كمين و لا اتنين و يطلعوا يجروا …. لكن ايه هدفهم لما يتم الهجوم على كل كمائن الشيخ زويد (15 كمين) ده غير قسم الشرطه و منشئات عسكريه في نفس الوقت … و اشمعني في التوقيت ده …. و هل دي حلاوة روح و لا تهور و لا ايه بالظبط ؟؟؟؟
بص يا سيسي 😊 ….. من اخر احداث الكتيبه 101 و اتخاذ القرارات اللى الناس اتريقت عليها ساعتها و مفهمتهاش بتعيين الفريق اسامه عسكر قائد منطقة سيناء و تم تغيير كل تكتيكات الجيش بما يتلائم مع تكتيكات حروب الجيل الخامس …. في سابقه هي الاولي من نوعها عالميا …. و من ساعتها و الجيش حاطط عليهم و مش عارفين يتنفسوا ….. و تم انشاء كمائن كتير مدروس مواقعها بعنايه كبيره …. و اللى خنقت تحركاتهم و امدادهم بالاسلحه تماما …. فده خلاهم يبلعوا الطعم و يخادوا القرار انهم لو استنوا على نفسهم حينتهوا و لازم يخرجوا من جحورهم و يتعاملوا و انه يتم تصفية الكمائن دي و طرد الجيش تماما من منطقة الشيخ زويد.
فتم الهجوم المتزامن على جميع الاكمنه العسكريه في توقيت متزامن لتصفيتها بنفس الاسلوب بتاعهم اللى مخيبش في اي مكان تم استخدامه …. و اول لما يبدأ العرض …. كان الكل جاهز اعلاميا لدعمهم …. فتم اذاعة الاخبار المدروسه بعنايه و بتبادل الادوار بحرفيه بين وسائل الاعلام الماجوره …. ففي حين ان الجيش كان مستنيهم و بيتعامل معاهم …. كانت الاخبار بتطلع انه تم الاستيلاء على مدينة الشيخزويد و ان الجيش بيتعرض بمذبحه و انه تم رفع علم داعش و اسر الجنود و الاستيلاء على دباباتهم و معداتهم 😊😊 …. و ده عشان يتم الدفع بعدها بالاف المقاتلين عبر الانفاق لتدعيم التشبث بالارض و خلق وضع جغرافي جديد …. و كان حيتم استهداف القوات الدوليه عشان تخش القوات الدوليه سيناء بغرض حماية الوضع الجديد بحجة حماية القوات الدوليه.
و طبعا لانها مش ماتش كوره و مينفعش الجيش يطلع بيانات يكشف فيها عن خططه و هو على ارض العمليات …. ظهر كل العملاء على حقيقتهم و وصل الامر ببعضهم انه ينادي بتدخل دولي في سيناء زي الاخ جورج اسحاق 😊😊
المهم عشان نعرف ان الجيش كان مستنيهم و عارف تسليحهم و كان هو اللى عاملهم كمين مش العكس …. لاول مره يتم استخدام طائرات الاف 16 قبل الاباتشي و تم ضرب سياراتهم بقنابل موجهه شديدة الدقة وسط المنازل اللى كانوا بحتموا فيها …. و تم تصفية معظمهم …. و عشان تبقوا عارفين ان العدد المعلن عن اعداد قتلاهم اقل بكثيييييير جدا عن الحقيقه لان العدد ده هو عدد الجثث اللى في حوذة الجيش …. لاكن فيه جثث كتير جدا تم اخلاؤها من قبل الارهابيين و تم نقلهم لاماكن مجهوله (حتي الان) اثناء التعامل .
و ده اللى خاللي الاخوان و قناواتهم بعد ما كانوا بيرقصوا على الدماء المنتظره من جنودنا …. قعدوا يصوتوا و يولولوا من صينية المكرونه باللحمه المفرومه اللى عزمهم عليها الجيش المصري ….. لدرجة ان قناة الفطيره العميله وصل بيها الامر انها تنتقد الجيش المصري علانية بانه استخدم القوه المفرطه في التعامل مع العناصر المهاجمه … 😊😊 …. حاضر يا سيدي … بلغ الجيش المره الجايه انه ميحفرش على الناشف و يدهن الصواريخ فازلين 😊😊
اللى حصل يوم الاربعاء ده سيتم تدريسه في المعاهد العسكريه على مستوي العالم لان التكتيكات المستخدمه سواء من سرعة التعامل و بسالة الجنودو الظباط في المحافظه على الكمائن اللى مفيش كمين واحد سقط في ايدي الارهابيين و سرعة و حرفة الابرارا الجوي و خنق الارهابيين و التعامل معاهم اصابهم بشلل تااااام … و خاللي جثثهم تنتشر باعداد كبيره …. بالرغم من تواجدهم بين المدنيين اللى للاسف كان منهم ناس بتدعمهم و جزء تاني كان خايف على نفسه من تصفيته هو و اسرته في حالة عدم استجابته لدعمهم.
الخلاصه الله يرضي عليكم …. الجيش المصري ادري بشئونه …. و وقت العمليات ياريت محدش ياخد اي معلومات من اي جهة تانيه غير المتحدث الرسمي للقوات المسلحه و البيانات الرسميه ….. و بلاش الفتاوي العسكريه و حضرتك قاعد على الفوتيه في بيتكم ….. و نغمة انك زعلان على العساكر الغلابه …. خليني اقولك ان مصر معندهاش جنود غلابه …. لان العسكري اللى بيحمي ارضه و عرضه مش غلبان … و انه رايح يموت عشان حضرتك تلاقي بيت آمن فيه الفوتيه و التكييف اللى حضرتك قاعد تنظر منه على الجيش المصري اللى هو اقوي مما تتخيل حضرتك و بيعمل اللى محدش في العالم كله قدر يعمله …
تكتيكات جيشنا و لوغاريتمه محدش يقدر يفكها لانها تعتمد على بسالة و صلابة و شجاعة الجندي اللى حضرتك بتتريق عليه …. اللى فيه جيوش كتير خلعت زيها و سلمت شعبها و سلاحها الى الارهابيين …. زي ما حصل كتير في العراق لما هرب 20 الف جندي امام 800 ارهابي و سلموا البلد تسليم اهالي ليهم …. لكن الجندي المصري بمنتهي البطوله و الفداء مسابش الكمين بتاعه و لا ترك سلاحه …. ( محافظا علي سلاحي … لا اتركه قط … حتي اذوق الموت) …. الجندي عبدالرحمن اخد رصاصه في جنبه و قاتل و قتل 12 اراهابي قبل ما يستشهد …. الامور دي عمركم ما تشوفوها في اي جيش الا في جيش خير اجناد الارض.
قوة الجيش المصري من صلابة جبهته الداخليه و تلاحم الشعب معاه … خليكم داعمين في ضهر جيشكم اللى لولاه لكان عرضنا و ستاتنا مستباحين لكلاب اهل النار و اطفالنا بيباع اعضاؤهم للي يدفع اكتر.
اما اصداء اللى حصل سياسيا فحنتكلم عنه في المقال القادم ان شاء الله
عاش الجيش المصري العظيم … و عاش الشعب المصري العظيم
و تحيا مصر