20 Sep 2015
عملية حق الشهيد بتجيب حق الشهيد وحق مصر !!
————————————————-
من حوالى اسبوعين اعلنت القوات المسلحة عن بدأ عملية حق الشهيد فى سيناء ارض الفيروز .. والهدف المعلن هو تطهير سيناء من الارهاب بشكل كامل ونهائي علشان تقدر مصر تستكمل مشروع تطوير محور القناة وتبدأ فى مشروع تنمية سيناء اللى هو واحد من أهم المشروعات القومية والتنموية فى الفترة القادمة ..
طبعا مشروع التنمية ده هانبقى نتكلم عنه فى مقال فى وقت لاحق .. لكن اللى عايزين نقوله ، إن فيه ناس وجهات ودول وتنظيمات بتحاول جاهدة لنها تفشل المشروع ده ، لأن تنمية سيناء وانشاء مدن ، وتوطين المصريين ، وشق طرق ، وحفر ابار مياه ، و أبار بترول ، واستصلاح اراضى ، .. و ده طبعا بجانب التنمية السياحية ، .. هايقضى تماما على أى تهديد عسكرى من الجانب الشرقى ، و هايخلى قناة السويس محمية بالتنمية والتعمير ، وبالمشروعات التنموية على جانبى محور القناة ، و اللى هاتشارك فيها دول بكل امكانياتها الاستثمارية ، و ده هايخلى اي تفكير فى الهجوم على سيناء مع تواجد الجيش المصر هو نوع من العبث العسكرى والسياسى 😊😊
عملية حق الشهيد وبرغم البيانات العسكرية المتلاحقة سواء على الصفحة الرسمية للقوات المسلحة او على القنوات الرسمية .. بتواجه تجاهل اعلامى كبير جدا سواء من حيث التنويه او من حيث عرض النتائج ، لإن الاعلام المملوك لبعض الشخصيات وتحت ادارة بعض الاعلاميين اللى ليسوا فوق مستوى الشبهات من حيث التوجهات السياسية او الفكرية ، مش من مصلحتهم يبرزوا الصورة الايجابية للجيش المصرى ، ولا العمليات اللى بيقوم بها فى سيناء !! 😉
ووسط كل هذا التجاهل ، لازم نقول ان الجيش المصرى فعلا بيخوض معارك حاسمة .. واتمنى او اتوقع انها تكون نهائية ضد الارهاب الاسود فى سيناء ، لانه بيقوم بعمليات تطويق كامل لاخطر المناطق الموبوءة بالارهاب فى رفح و العريش و الشيخ زويد .. عن طريق عمل كماشة حديدية فى شكل دوائر واللى بيتم من خلالها عزل كل الارهابيين وكلاب النار عن اي دعم لوجيستي بيوصل من الانفاق .. وكمان بيتم تدمير كل مخازن الذخيرة والاوكار اللى بيستخدموها كنقاط انطلاق للقيام بعملياتهم القذرة ضد الجيش والمدنيين !!
الجيش المصرى المرة دى بيشن حرب نوعية تكتيكية بتشارك فيها كل وحدات الجيش ، حتى قوات الصاعقة البحرية ،و اللي بتشارك لاول مرة فى العمليات ، وبتقوم بدور كبير فى تمشيط و عزل الشريط الساحلي عن اي امدادات للارهابيين بطول مسرح العمليات بزوارق خفيفة و سريعة مع دعم جوى كامل لاصطياد فئران التكفيريين .. وبكدة فالجيش بيقطع وبيهد أى امكانية لأى تحركات ارهابية سواء كانت برية او بحرية ، .. واللى خلى داعش تستغيث بكل الجماعات التكفيرية فى العالم ، وتعلن النفير العام لدعم قادة واذرع واذيال اخواتهم اللى بيسموا نفسهم ولاية سيناء ، بالإضافة لكل اللى انضموا لهم من الاخوان والمتسلفين .. لكن ولا حد هايستجيب لأنهم عارفين كويس أوى هم بيواجهوا مين ، واييه اللى بيتعمل فيهم هناك 😃😃
ويمكن ده اللى خلى جماعات الارهاب تحاول تعمل عملية فى الصحراء الغربية واللى ماحدش اتكلم عنها خالص غير المواقع الداعشية .. كنوع من انواع تخفيف الضغط على الجبهة الشرقية .. واللى الاعلام الغربى والمصرى سابوا الموضوع ده ، و شغلوا الناس عنه بحادثة السواح المكسيكيين .. واللى باعتبرها رسالة مباشرة من الجيش المصرى ، ان سلاح الحدود بشكل خاص والجيش المصرى بشكل عام على اعلى درجة من الجاهزية واليقظة …. فبلاش ياحبيبى تلعب مع الاسد لاننا مش هانسكت حتى لو تم تغليف اى عملية بطابع مخابراتى ….
والرسالة وصلت .. و بقوة !!! 😉😊
اهمية عملية حق الشهيد تكمن فى امتلاك الجيش معلومات كبيرة فاقت توقعات كل المراقبين من اجهزة المخابرات العالمية ، وحتى من الارهابيين انفسهم .. لأن الجيش بيقوم زى ما قلنا بتنفيذ عمليات نوعية و جراحية بتضرب الخلايا الارهابية في مقتل و بتعزلهم جوة دوائر ضيقة وليقوم باصطيادهم زى الفئران بعد حصارهم بشكل كامل
وكمان العملية دى تعتبر تحول لمسار الحرب والعمليات فى سيناء لإن شكل الجيش وادائه التكتيكى اتغير تماما بما يتوافق مع اسلوب قتال الشوارع وحرب العصابات .. يعنى بدل ما كان الجيش ثابت فى كتائب وفرق ، و بيبعت افراد لتطهير المناطق بدعم جوى .. اصبح دلوقتى بيتحرك زى الفهد و بيعمل عمليات انتشار بشكل واسع و بيضرب ف العمق بعتاد ثقيل و بأقل خساير في قواته .. وبرجال زى الاسود كل واحد فيهم طالع من كتيبته يعمل عملية وهو عارف انه مشروع شهيد .. وعارف ان فيه احتمال 50% يرجع و50% لأ !!.. و ده اللى جعل الجيش المصرى النهاردة هو الجيش الوحيد الجاهز والمؤهل عالميا لخوض حرب جبال وحرب عصابات على أعلى مستوى
ومش كدة وبس … لكن كمان الجيش بدأ ضخ مياه البحر المتوسط عبر انابيب عملاقة على طول الحدود مع غزة واللى ادى لإغراق عشرات الانفاق الحدودية فى الوقت اللى الحمساوية بيحاولوا فيه يشفطوا المياه دى ومش عارفين …. طب اشفط يا عم اشفط ….. ورينا كده هاتشفط بحر بحاله ازاى ..وورينا هاتوديه فين !!؟؟ 😃😃
الجيش المصري ياسادة بيخلص على الارهابيين اللى بيلعبوا فى المناطق الحدودية الشرقية وعامل لهم مفرمة حمادة بالفاهيتا .. ومانع فى نفس الوقت تدفق سيل من الارهابيين عبر الحدود الغربية ، ومأمن مصر داخليا .. وكل ده من غير تحالف دولي ولا يحزنون .. وشغل افلام الكاوبوى بتاع الغرب ده !!
الجيش المصرى مشغل المفرمة وجاهز لمواجة اى نذل حقير يفكر يهوب من ارض مصر .. وبيعمل فى الارهاب الدولى لواحده ومن غير اى دعم ، اللى ماقدرش يعمله تحالف دولى كامل بكل امكانياته .. !!
وافتكروا اللى حصل واللى عمله جيش بلدنا مصر فى الارهابيين فى 1 يوليو 2015.
خلاص هانت بإذن الله يامصريين .. وسيناء بتتوضأ