24 Sep 2015
صفقة الميسترال وقراءة فى المشهد العسكرى والسياسى .. !!
————————————————————
لأول مرة بالنسبة لمصر وفى تطور غير مسبوق بالنسبة لموازين القوى فى الشرق الاوسط على مستوى القوى الاقليمية والدولية ، تم الإعلان عن إتمام صفقة تاريخية استكمالا لخطة تطوير البحرية المصرية كقوة بحرية ضاربة .. مش كقوة اقليمية بس ولكن كقوة دولية مصنفة وقادرة على حماية بل وتهديد التواجد العسكرى لقوى عظمى سواء فى البحر المتوسط أو الاحمر ويمكن ابعد من كدة كمان .. !! ..والصفقة دى هي تسليم فرنسا لمصر عدد 2 حاملة طائرات من طراز ميسترال 😊
الصفقة مش وليدة اللحظة .. لكن كانت تتويج للتخطيط المصرى اللى بدأ من فترة للسيطرة التامة على شرق المتوسط وحماية مصادر الطاقة المصرية .. وعلشان كدة كان تطوير الترسانة البحرية فى اسكندرية والتعاقد على شراء الفرقاطة فريم اللى وصلت مصر فعليا من كام شهر .. وتزويد سلاح الجو المصرى بمقاتلات الرافال لتحقيق سيادة جوية وغطاء يحمى النمو المضطرد فى القوة البحرية المصرية … و ده يوضح ان مصر مش بتتحرك بعشوائية ، لكن بخطة طويلة المدى للوصول لمستوى قوة قارية مش مجرد قوة إقليمية !!
الجميل فى الصفقة دى ان الميسترال مش مجرد حاملة طائرات مروحية وخلاص ..، لكنها كمان بتشتغل كسفينة إبرار قادرة على احتواء تشكيلات كاملة من الدبابات و المدرعات داخلها .. و ده معناه انها سلاح هجومى مش دفاعى .. يعنى سياسة مصر العسكرية دلوقتى مش هى نفس السياسة الدفاعية السابقة للدولة المصرية ، .. بمعنى ان مصر دلوقتى بتأمن حدودها بحرياً وبرياً وجوياً بأسلحة هجومية تمتلك قوة الردع الكافية للرد على أى تهديد لمصر
و الاهم ان الميسترال تعتبر مركز قيادة و سيطرة بكل ما تحمله الكلمه من معاني …. فهي تحتوي علي قاعة للقيادة مساحتها 850 متر مربع و تستوعب اكثر من 150 قائد و فني و تحتوي على احدث تقنيات السيطرة و الاتصال بكافة الوحدات البحرية على مساحات واسعة …. يعني نظريا ممكن لحاملة واحدة ، السيطرة علي المجال الحيوى المصري و قيادة و توجيه كل الوحدات البحريه في البحر المتوسط
وعلى الرغم من ان الميسترال مجهزة بمستشفي بحري مجهز بأكثر من 50 سرير بأحدث الاجهزة الطبية.. ومجهزة بأحدث الأنظمة إلكترونية، وقدرة مسح رداري بمدي 180 كيلومتر .. إلا ان اى حاملة طائرات بتكون قوتها الضاربة هى فى سلاح الطيران الخاص بها .. وعلشان كدة جاء الاعلان المرة دى من موسكو نفسها عن توقيع القاهرة اتفاق ، لتزويد مصر بـ 50 مروحية روسية حربية من طراز “كا-52 تمساح” علشان تتناسب مع حاملة الطائرات ميسترال باعتبارها مروحية حربية ثنائية المقاعد للجيل الجديد. وتعتبر نسخة مطورة لمروحية “كا – 50” (القرش الأسود) الروسية الضاربة وتستخدم لتدمير الأهداف الأرضية والأهداف الجوية البطيئة، إضافة إلى تنفيذ مهام الاستطلاع وقيادة مجموعة من المروحيات 😊😊
ده بخلاف ان حاملات الطائرات مش بتمشي لوحدها …. دي بتمشي بزفه و هيصه 😊 😊
يعني لازم بيرافقها عدد كبير من القطع البحرية سواء لمكافحه الغواصات او الالغام او الدفاع الجوى او القوة النيرانية و الصاروخية للدفاع او الهجوم على القطع البحرية المعادية
يعني الصفقة دي لازم و لا بد يتبعها صفقات مكملة ضخمة جدا سواء في الاعداد او النوعيات … يعني احنا لسه بنقول يا هادي 😃😉 ..
وعلشان كدة كانت البداية بتعاقد مصر مع فرنسا على توريد كورفيتين جاويند إضافيين لمهام مرافقة و حماية الميسترال بحرياً ، إضافة إلى المدمرة فريم كأقوى مدمرة بحرية فى الشرق الاوسط اللى وصلت مصر فعليا فى افتتاح قناة السويس .. و ده معناه ان مصر بتعلن عن نفسها بقوة ، كأقوى قوة اقليمية فى الشرق الاوسط وكواحدة من القوى الضاربة المعدودة على مستوى العالم .. وبتوجه رسالة ان اذرع البحرية المصرية والجيش المصرى قادرة انها تطول اعدائها فى اى مكان لحماية الامن القومى المصرى !!
الاعلان عن الصفقة دى كان بالتزامن مع سفر الرئيس السيسى لحضور جلسة الجمعية العامة للأمم المتحدة اللى هيتقرر فيها اعطاء مصر كرسي عضوية مجلس الامن لمدة عامين … فى نفس الوقت اللى بتحقق فيه قوات الجيش المصرى نتائج مذهلة فى حرب الجبال وحرب العصابات فى عملية حق الشهيد اللى جيشنا ساوى فيها الارهابيين هم و اوكارهم واسلحتهم ووسائل النقل بتاعتهم بالأرض ، وتم فيها اصطياد جرذان الارهاب وسحلهم وارسالهم فى طرد بالبريد السريع لجهنم عند اخواتهم
ده معناه ان مصر هاتدخل الاجتماع وهى بتمثل قوة لها ثقل ، و قادرة على عمل اضافة وتغيير داخل المجلس .. وخصوصاً ان مصر هاتكون مدعومة بقوى دولية منهم 3 دول من الدول الخمسة دائمى العضوية فى مجلس الامن وهم روسيا والصين وفرنسا 😉😊 مع الوضع فى الاعتبار ان بوتين يذهب للامم المتحدة .. لاول مرة من 6 سنوات .. بالاضافة للتنين الصيني اللى دخل على الخط بقوة وخصوصا فى الملف السورى.
مصر اصبحت أمر واقع كقوة اقليمية ودولية .. شاء من شاء وأبى من أبى .. وعاش اللى قال ان مصر بكرة تبقى قد الدنيا 😊😊