الغواصة .. والمناورة  1

08 Aug 2017

الغواصة .. والمناورة  1

————————

مبروك كمان وكمان لمصر … 🙂 🙂 🙂 …. فبعد حوالى 8 شهور من إستلام مصر للغواصة الأولى “S41” من طراز “209 / 1400mod” … مصر تتسلم النهاردة الغواصة الثانية  فى إحتفالية رائعة فى مدينة كيل الألمانية .. وهى ضمن صفقة تضم 4 قطع من الغواصات هــ تدخل في خدمة القوات البحرية المصرية تباعاً 🙂  .. وتعتبر الغواصة الألمانية من الطراز ده ، من اخطر القطع البحرية على مستوى العالم .. لأنها مزودة بأحدث أنظمة الملاحة والاتصالات ، وتقدر تبحر لمسافة 11 ألف ميل بحري ، بالإضافة لقدرتها على إطلاق صواريخ وطوربيدات.

ونقلا عن عدة مصادر .. فــ تدشين الغواصة المصرية الجديدة الألمانية الصنع ، تم فى أحواض بناء السفن التابعة لشركة TKMS بمدينة ” كيل Kiel ” الألمانية، فى إحتفالية رائعة بحضور الفريق بحري / أحمد خالد، قائد القوات البحرية المصرية، ونظيره الألماني، وعدد كبير من قادة القوات المسلحة في مصر وألمانيا .. و تعتبر الغواصة زى ما قولنا من اخطر القطع البحرية على مستوى العالم ومن اهم مميزاتها بإختصار وبدون الدخول فى تفاصيل ومصطلحات عسكرية وعلمية معقدة ..، هو إنها مزودة بأنظمة تحكم فى إطلاق الطوربيدات وأنظمة تحكم اليكترونية للأسلحة خلال عمليات الإطلاق .. وتقدر تبحر لمسافة 11 الف ميل بحرى .. و دى تعتبر مسافة كبيرة فى عرف البحريات العالمية .. وكمان مزودة بأحدث أنظمة الملاحة والاتص

الات .. وتقدر تغوص لمسافة 500 متر تحت سطح البحر .. وهى مسلحة بأحدث انواع الطوربيدات والصواريخ البحرية المضادة للسفن وزرع الألغام البحرية !!

كلمة السيد قائد القوات البحرية المصرية الفريق | أحمد خالد فى الإحتفالية العسكرية بتدشين الغواصة ، تعكس مدى القوة والفخر اللى فيه قواتنا البحرية .. وتوضح الرؤية الشاملة لمصر وفهم وإستيعاب الأوضاع الدولية والأخطار المحدقة ببلدنا مصر حيث قال بعد الدباجة وكلمات الشكر فى رسائل هامة لكل الأطراف:

نحن اليوم نحتفل بإستلام الغواصة المصرية الثانية طراز (209/1400) .. بعد أن عايشنا خلال السنوات الماضية ومنذ بدء التعاقد على بناء الغواصات طراز 209 مراحل عديدة ، بذل فيها كلا الجانبين جهداً شاقاً وعملاً دؤوباً من أجل نجاح المشروع , كللت أولى نتائجه بالنجاح بوصول الغواصة الأولى S41 بطاقمها المصرى إلى أرض الوطن وإنضمامها للعمل ضمن وحدات الأسطول البحري المصري العريق … كما أكدت هذه الخطوة أن لدينا من الكوادر من هم قادرين على إستيعاب التكنولوجيا الحديثة في تشغيلها وصيانتها والعمل بكفاءة تامة على أنظمتها .. فمصر كان لها السبق فى دخول سلاح الغواصات كأول دولة في الشرق الأوسط وإفريقيا ، وعلى مدار تاريخ هذا السلاح نجد رجالاً سطروا بأحرف من نور بطولات عدة خلال حروبه المتعاقبة ..

وقال أيضا:

وفي ظل جيوش تنهار بمنطقتنا ، ودول تدمر من حولنا ، كانت ولازالت مصر قادرة أن تحافظ على وحدتها وتماسكها بل وتبني وتحدث من جيشها وهو ما ليس بغريب على دولة كمصر عانت على مدار تاريخها العريق الممتد لآلاف السنين من ويلات الحروب ومحاولات الإستعمار التي بائت جميعها بالفشل بفضل حروب عديدة خاضها الجيش المصري على طول تاريخه الممتد حفاظاً على أرضه وشعبه وهويته. … وفى ظل قيادة مخلصة لله والوطن ولشعبنا الأبي الكريم قامت القوات البحرية بجهد مضنى خلال السنوات الماضية لإعادة تطوير وتأسيس أسطولنا البحري وبنيته التحتية التي تليق به من أرصفة وقواعد ومنشآت وخدمات متنوعة ضمت واحد من أكبر أرصفة إستقبال الغواصات المغطاة بالإضافة لأحدث أنظمة التدريب والمحاكاة لتدريب أجيالاً من الأطقم العاملة مستقبلاً .. كما أن إضافة هذا النوع من الغواصات هو تنفيذاً لإستراتيجية عسكرية مصرية عامة تهدف لتطوير القدرة على مواجهة التحديات والمخاطر المحيطة بمنطقتنا .. حفاظاً على مقدراتنا وإعلاءاً لكلمة الوطن ولتحقيق السيطرة الكاملة على سواحلنا الممتدة بالبحرين الأحمر والمتوسط .. 🙂

ده كان إختصار لكلمة الفريق | أحمد خالد .. وإحنا من جانبنا نحب نأكد إن الغواصة المصرية الألمانية الجديدة وما سيتبعها من باقى قطع الصفقة ، تعتبر نقلة للقوات البحرية المصرية ، باعتبارها ذات قدرات هجومية عالية، وقدرة فائقة على تأمين السواحل المصرية ، بما تمثله من قفزة نوعية جديدة فى مجال التسليح البحرى … ومش محتاجين نفكر اصدقائنا بالتطور الكبير اللى شهدته قواتنا البحرية فى خلال الــ 3 سنوات اللى فاتوا بعد إنضمام قطع بحرية جديدة للقوة الضاربة للقوات للبحرية المصرية ، منها حاملتى الطائرات المصرية “أنور السادات” و”جمال عبد الناصر”، واللى وضعوا مصر كواحدة من ضمن 12 دولة على مستوى العالم اللى تمتلك النوع ده من حاملات الطائرات .. بالإضافة طبعاً لــ لنشات صواريخ من طراز “سليمان عزت” ، والفرقاطة “فريم” الفرنسية ، و 4 قرويطات من طراز “جويند” الفرنسية ، ويسبقهم لنش صواريخ من طراز “مولينيا”، حصلت عليه مصر كإهداء من القوات البحرية الروسية … و ده كله وضع القوات البحريةالمصرية كأقوى قوة بحرية فى الشرق الوسط وافريقيا .. وحط تحت الشرق الأوسط دى مليون خط 😉 .. وكمان أصبح ترتيبها السادس عالمياً بدون حسابات الكفائة للفرد المقاتل … ويكفينا كلام قائد القوات البحرية الفرنسية فى مناورات كليوباترا 2017 فى يوليو الماضى لما قال إن البحرية المصرية تتفوق على مثيلاتها فى الدول الكبري بلا منازع !!

أما الناس بقى اللى بتتكلم طول الوقت وبتقول هى مصر بتتسلح ليه .. ومش كان احسن جاب عيش للفقراء .. أحب بس أقول لهم إن كل صفقات السلاح دى .. قام بيها الجيش بدون ما يكلف خزينة الدولة قرش صاغ واحد زيادة .. وإذا كان ده مش عاجبك وشايف إنه من الأفضل إنه كان يتجاب عيش وجبنة للغلابة زى ما إنت بتحب تزايد دايما .. فــ احب أقولك إنه مش مسئولية الجيش إنه يأكلك .. لكن مسئوليتك إنت إنك تنهض بالدولة طالما بتتكلم عن المدنية والحكم المدنى … لأن مسئولية القوات المسلحة المصرية اللى انت بتوصفها بــ جيش المكرونة وجييش الكحك إنه يبقى عنده قوة الردع الكافية لحماية الغلابة اللى انت عمرك ما عملت علشانهم حاجة غير مزايدات فارغة وبس !!

مصر بتسعى جاهدة لملئ الفراغ الإستراتيجى ، اللى عمله سقوط الجيوش الكبرى لمعظم دول المنطقة اللى تسببت فيها ثورات الزفت العربى … ومش كدة وبس .. لكن كمان حماية مقدرات الشعب المصرى .. والثروات الهامة اللى بدأت تظهر .. وبالذات على سواحل مصر وداخل المياه الإقليمية والإقتصادية المصرية .. لأنك لو لم تمتلك القوة والقدرة على الردع .. يبقى توقع السقوط السريع .. فى ظل تحديات شرسة وحرب بقاء على كافة الأصعدة !

مصر بتسعى بكل اللى بتعمله ده لحماية الدولة من السقوط ، وحماية التطور الإقتصادى المتصاعد ، وحماية مشروعات التنمية اللى بتبنى وبتأسس لدولة قوية وغنية بإذن الله .. وكمان تأمين السواحل البحرية وخصوصاً السواحل الشمالية اللي هــ يتواجد فيها المفاعل النووي المصري .. بالإضافة لتأمين حقول الغاز البحرية سواء المكتشفة ، أو ما سيتم إكتشافه شمالاً وشرقاً … وكمان تأمين المدن السياحية والسكينة ، ومشروعات الساحل الشمالي.. و ده كله يخلينا نفكر فى الأسلحة النوعية اللى تعاقدت ، أو بتتعاقد عليها القوات المسلحة ، واللى بتوضح إنه فيه خطة موضوعة بتشتغل عليها الدولة ، وبتقوم بتوفير التأمين اللازم لها قبل حتى ما تظهر للنور ..

والكلام ده بقى ياخدنا لمناورات كليوباترا 2017 اللى تمت مع فرنسا الشهر اللى فات .. والمناورات العسكرية المشتركة مع اليونان من كام يوم .. بالإضافة كمان لمناورات النجم الساطع مع القوات الأميريكية اللى تقرر عودتها من خلال جدول محدد بداية من الشهر القادم …… و …….

و للحديث بقية فى الجزء الثانى 🙂  

لمتابعة تعليقاتكم