26 Feb 2018
مصر تحارب – مصر تنتصر
سيناء 2018 بداية الخلاص
—————————-
مقال النهارده محتاج شوية تركيز … و شويه صبر في القرايه … و محتاج كوباية شاي محترمه …. لان بالامس كان بداية الاعلان عن المرحله النهائيه للحرب العالميه اللى المنطقه بتواجهها من سنين و الاعلان الرسمي عن بداية المواجهه الحقيقيه للمحرك الرئيسي لكل النهايات الطرفيه اللى تسببت في تفكيك الدول المحيطه و محاولة تركيع و كسر مصر.
و اللى متابع مقالاتنا من اربع سنوات حيكون الربط بين الامور بالنسبه ليه سهل جدا لاننا اتكلمنا كتيييير و بالتفصيل على اللى بنشوفه و اللى احنا داخلين عليه الايام القادمه …. و زي ما اتعودنا على تأصيل الامور … و بدون الدخول في تفاهات و لغط البدله العسكريه …. خلينا ندخل في الموضوع على طول…. و نحاول نربط بين النقاط التاليه
1) مصر تعلن عن العمليه سيناء 2018 … و الكل كان مفكر انها زيها زي عمليات حق الشهيد … و إذ بنا نشوف الجيش المصري بكااافة فروعه و اسلحته ينتفض بطول مصر و عرضها و كانه في حرب شامله اكبر من تحركه في حرب 1973 … لان وقتها كان بيتحرك على اتجاه استراتيجي واحد … لكن اليوم نراه يتحرك على كافة الاتجاهات الاستراتيجيه برا و بحرا و جوا بكل قوته. !!!!
2) كل المنظمات الدوليه و اكبر المؤسسات الاعلاميه العالميه تصر باصرار رهيب و بشكل ممنهج و مدروس على اما باداء القلق او انتقاد العمليات او بث الاكاذيب عن سير العمليات …. و الاهم … هو اصرارهم المتهمد على استخدام مصطلحات ( مسلحين – متمردين – الصراع الداخلي ) !!!!!
3) تم الاعلان بالامس عن عدد القوات المشاركه في العمليه …. و هي تتكون من 127 كتيبه كااامله تتكون من 60 الف مقاتل … منهم 88 كتيبه كامله تتكون من 42 الف مقاتل في شمال سيناء وحدها …. و اللى بعيد شويه عن العسكريه … نحب نقوله ان العدد ده كبييييير جدا … و يكفي انك تعرف ان القوات المصريه اللى كانت مسؤوله عن المجهود الرئيسي لتحرير الكويت من الجيش العراقي اللى كان اياميها بيقولوا عليه الجيش الرابع على العالم كانت 35 الف مقاتل فقط … ده بخلاف 60 قطعه بحريه متنوعه و كمان 355 طائره حربيه ( الضربه الجويه في حرب اكتوبر كانت بـ 220 طائره فقط )…. و كمان الاعلان الرسمي عن دخول 15 كتيبه دفاع جوى الى سيناء … و ده اول اعلان رسمي على فكره …. بخلاف الكتائب المعاونه زي الكتائب الهندسيه و الفنيه و الاداريه و الامداد و التموين…..!!!!
4) تعمد الاشاره الى القيام باكبر مناورات شامله بحريه في البحر الاحمر مع الجانب الفرنسي بحجم قوات مخيف من الجانبين سواء في نوعيات القطع البحريه او الجويه او البريه في نفس وقت العمليات الشامله في كل انحاء مصر و بدون التأثير على اداء مهامها …. و ايضا الاشاره الصريحه بدور القوات البحريه في حماية و التأمين الكامل لحقل ظهر ضد اي اخطار سواء كانت اخطار مباشره او حتي عمليات نوعيه.
5) بالامس و بدون سابق انذار … إذ فوجئنا انه و للمره الاولي في تاريخ العسكريه المصريه يتعمل مركز قياده و سيطره متقدم و رئيسي داخل اراضي سيناء على احدث النظم العسكريه … و تعمد ذكر عمق المركز و هو 27 متر (9 ادوار كامله) تحت الارض ( يعني محصن ضد اقوى القنابل التي تم التوصل لها حاليا في احدث الجيوش ) …. بخلاف بعض الانشاءات التي لم يعلن عنها ….. مع تعمد الشرح لخطط التنميه في سيناء و الاشاره الى انها الحرب الحقيقيه للشعب المصري …. و التعمد الواضح للاشاره ان الدوله تعمل على توطين 8 مليون مواطن في سيناء و انه معندناش وقت ولازم يتم توطين 3.5 مليون مواطن في 2022 و ليس 2027 ….. و ده طبعا مع ظهور الرئيس بالافارول العسكري القتالي …. اللى استخدم هذه المفردات في كلمته للشعب المصري:-
– اللى يفكر بس يقرب من اللى احنا بنعمله … لازم مصر كلها تغضب … و مش حنسمح ان يقرب من مصر تاني او يحاول انه يدخلها في الفوضي و الخراب و التدمير تاني
– الحرب مش حرب عسكريه فقط و لكن حرب تنميه و تعمير
– مساحة سيناء تساوي كل مساحه المعمور من مصر و اللى بيعيش عليها كل سكان مصر في كل المحافظات
– المعركه صفريه … يا نهزمهم يا نهزمهم … يا اما نروح نموت
– احنا مش بنخاف غير من ربنا بس
– حنغير وجه مصر الى الافضل
– انا بنادي نداء قومي و وطني … انا بأستجير بالله و بالمصريين …. اللى بنعمله دلوقتي من فرض ارادة التعمير هو امن قومي حقيقي ( وكررها 3 مرات)
طب هي ايه الحكايه بقي !!!!! … شوف يا سيدي و في نقط محدده مع اننا بقالنا سنين بنشرح فيها … لكن يا ريت تربط ما بينهم عشان تشوف الصوره كامله من غير الضباب اللى بيتعمد اعلامنا انهم يتوهوك فيه :-
– كان لازم يتم تفتيت دول المنطقه و تهجير سكانها بحملات تطهير عرقي على اساس طائفي و عرقي و مذهبي لتكوين دويلات صغيره ضعيفه يكون ولاؤها للغرب …. و الهدف الاستيلاء على مصادر الطاقه من غاز و بترول و خاصة في شرق البحر الابيض و البحر الاحمر لانها مناطق ما زالت بكر و ذلك قبل نضوب الخليج العربي اللى بقاله عشرات السنين بيتم استنزاف ثرواته…. و كذلك التحكم و الاستفاده من ثروات المنطقه سواء التاريخيه و الثقافيه سواء في تجارة الاثار او سرقة التاريخ او الثروات البشريه سواء في تجارة الرقيق الابيض من النساء و الاطفال او في تجارة الاعضاء البشريه …. و ده حصل على نطاق واسع في مناطق في العراق و سوريا.
اللى كان حيقوم بالدور ده على الارض هم نتاج استثمار الغرب طوال 90 عاما من انشاء جماعة الاخوان الارهابيين اللى اللى بدأو يستخدموا قواعدهم البشريه على الارض في انشاء مجموعات من الكلاب السعرانه اللى تم تدريبها و دعمها مخابراتيه و عسكريا و لوجيستيا في تنفيذ هذا المخطط … و الوكيل الحصري و قائد هذه المجموعات كان النظام التركي اللى كان حيتجمع عنده كل مواسير الغاز اللى طالعه من الخليج و شرق البحر المتوسط لامداد اوروبا بالطاقه … و الممول كان النظام القطري اللى كانت جائزته هو تعيينه حاكم للجزيره العربيه كامله بعد تفتيت دول الخليج و القضاء على انظمتها.
النقطه المهمه هنا و ياريت نركز فيها كويس ….. كلنا شوفنا ازاي بيتم دعم الارهابيين دول عسكريا بتوفير الغطاء الجوى المباشر لكل عملياتهم سواء بتنفيذ ضربات اجهاضيه لاي تحرك عسكري يستهدفهم … او بتوجيه ضربات معاونه لهم … او حتي بحماية انتقالهم من مدينه الى اخرى …. و كذلك التأمين العسكري لنقل الاثار و البترول المهرب حتي الحدود التركيه…. ده غير انشاء المعسكرات التدريبيه لتدريب المجموعات القتاليه تحت مسميات مختلفه و تأمين وصول احدث الاسلحه النوعيه لهم…. و كلنا نفتكر اسقاط طائر الطيار الكساسبه الاردني … اللى تم اسقاط طائرته لمجرد محاولته الدخول في منطقه خاصه بمن يسمونهم داعش و محاولته قصف او تصوير ما يجري على الارض … يعني الناس دول تحت الحمايه الدوليه بقوة السلاح …. و ازاي شوفنا الاتوبيسات المكيفه اللى نقلت عشرات الالاف من داعش الى الحدود التركيه تحت حماية الطيران لدول ما تسمي التحالف و وصلت ان فيه شهود عيان وثقوا خروج مئات من قاده داعش بواسطة طائرات النقل العسكريه الامريكيه…. و ازاي بيتم استضافة قادة الجماعه الارهابيه في دولهم و توفير الحمايه القانونيه و الاعلاميه لهم.
و كلنا شوفنا ازاي الدول الاوروبيه اللى تمتلك اكثر النظم صرامه في مراقبة و تتبع عمليات غسيل الاموال كانت بتغض الطرف عن الانتقال الآمن و السلس لاموال داعش سواء في عمليات بيع البترول و الاثار المسروقه او في شراء و تمويل صفقات اسلحه … و كذلك التحرك بكل حريه للعناصر الارهابيه بين دول الاتحاد الاوروبي سواء لتجنيد المزيد من المقاتلين او حتي لنشر ايدولوجيتهم …. و الدوله اللى كانت بتفكر بس تقول مش حشترك في كده … كان بيتم تهديدها مباشرة باطلاق الكلاب السعرانه دي عليهم في عقر دارهم….
و شوفنا ازاي وسائل الاعلام الغربيه شغاله كذب و تدليس على كل ما يختص بمصر … و ازاي هم بيعملوا المستحيل لدعم جماعة الاخوان الارهابيه و تصويرهم على انهم ضحايا … و لما تحط كل ده جنب اصرارهم على استخدام و ترسيخ مصطلحات زي (الصراع الداخلي – متمردين – مسلحين) … تقدر تستنبط ان من يدير هذه الحمله على مصر هي مراكز ابحاث متخصصه و اجهزة مخابرات دوليه …. ليه ؟؟؟؟ … شوف يا سيدي :-
في الاعراف و القوانين الدوليه … بيتم اطلاق مصطلح “الصراع الداخلي” على انه صراع بين طرفين يمتلكون الشرعيه …. و بالتالي هم بينفوا صفة الارهاب عن ولايا سيناء او تنظيم حسم او اي و كل من يحمل السلاح ضد الدوله المصريه طوال السبع سنوات الماضيه … و ان ما يحدث من عمليات لمقاومة الارهاب الحقيقي في سيناء هو ليس مكافحة ارهاب و لكن هو استخدام للقوه العسكريه المفرطه في حق اصحاب قضيه حقيقيه … و هو بذلك ينزع الشرعيه عن سياسات الدوله لمكافحة الارهاب و اعطاء الشرعيه الدوليه للارهابيين.
اما مصطلح ” متمردين” … ففي القوانين و الاعراف الدوليه … تعريف المتمردين انهم مجموعه من ابناء الدوله يحملون نفس جنسيتها (على اساس ان مفيش اجانب عندنا وسطيهم )…. و هم مجموعه من الاشخاص لهم حقوق قضيه مشروعه و لكن يوجد عليهم غبن و ظلم و سدت امامهم كل الوسائل السياسيه فلجئوا مطرين لحمل السلاح لتحقيق اهدافهم السياسيه للوصول الى الحكم باسقاط الحكومه و الاستيلاء على الحكم …. فيجب ان يتم التحاور معاهم واحتواؤهم و ادخالهم في العمليه السياسيه لانهم جزء من النظام ….. زي ما بتحاول تعمل دلوقتي امريكا مع طالبان في افغانستان
اما مصطلح “المسلحين ” فحسب التعريف الدولي … هم مجموعه من المدنيين الوطنيين اللى انتفضوا بسبب احتلال جيش اجنبي جزء من ارضهم ليقوموا بمقاومته بالقوه المسلحه … و اللى كنا زمان في الثقافه المصريه زمان بنسميهم الفدائيين …
و ده يوضح بشكل جلي ليه كل قادة الاخوان و القطيع اللى ماشي وراهم بيصروا انهم دايما يقولوا ان جيش مصر هو جيش احتلال محتل سيناء و يجب مقاومته و ان انصار بيت المقدس هم السكان الاصليين جيش مصر المحتل لتحرير سيناء … و ان الجيش بيقتل الاهالي و بيحاربهم.
الكلام ده مش كلام مرسل او مكايدات سياسيه و اعلاميه …. دي استراتيجيه غربيه بيتم محاولة فرضها على مصر …. ازاي ؟؟؟؟ … اقولك ….. شوف يا سيدي
بعد الزلزال المصري و القنبله النوويه اللى فجرها الشعب المصري في 30 يونيو و اللى عطلت تماما خطة تنظيم اهل الشر و اطماعه في المنطقه …. و بعد فرض مصر ارداتها على الجميع بالرغم من حرب الارهاب على مصر و حصارها سياسيا و اقتصاديا …. انتقل الغرب الى الخطه البديله …. و هي مادام مش عارفين ناخد مع مصر حق و لا باطل دلوقتي و ده بسبب التفاف الشعب المصري حول جيشه و دعمه التام لكل الخطوات اللى بتاخدها الدوله المصريه سواء سياسيا او اقتصاديا …. و مع بداية مرور مصر من عنق الزجاجه سياسيا و اقتصاديه و بداية تحولها الى قوة اقتصاديه و عسكريه في المنطقه … يبقي يجب الحفاظ على ادواتهم اللى على الارض من الجماعات الارهابيه دي …. و بالاخص المحافظه على ايدولوجيتهم و فكرهم داخل المجتمع المصري ….. فيجب اجبار المصريين على المصالحه السياسيه معاهم و ادماجهم في الحياه السياسيه مره اخرى …. لاننا مادام مقدرناش دلوقتي ….. يبقي نستني شويه و نبقي نتسخدمهم لاحقا لما الشعب يهدي شويه او ينشغل او ينسي.
اما لو الدوله المصريه بدات بالفعل في تدمير الجماعات دي و مواجهتهم عسكريا وفكريا … يبقي يا روح ما بعدك روح و لازم نتحرك …. حتي لو وصلت الى مواجه عسكريه …. و ده سبب الرعب اللى سببه الجيش المصري باستخدامه كل هذا الكم من العتاد العسكري …. انه بيوصل رساله ردع ان اللى حيقرب حيشوف … و دخول مصر مش نزهه لان حيحاول يخش يحمي رجالته زي ما كان بيعمل في العراق او سوريا بمنتهي السهوله … هو حر …. و الاقمار الصناعيه و نظم المراقبه شايفه كويس ايه اللى بيحصل على الارض و ازاي بيتم تأمين القوات …. و ده تم ذكره صراحة في الاجتماع الاخير … ان الطائرات بتقوم بحماية القوات البريه اللى على الارض و اللى بتحميها كتائب من الدفاع الجوي تحت عين طائرات الاستطلاع و منظومات التحكم و السيطره.
الرئيس السادات تم اغتياله بعد خطاب شهير تكلم فيه عن بدء الخطوات التنفيذيه لتعمير سيناء …. و ده اللى للاسف اخذ بالحسبان طوال 30 سنه لاحقه باهمال سيناء و ده كان سبب خروج سيناء تماما عن السيطره حاليا …. اما اليوم … فالدوله المصريه بتعلن التحدي …. سيناء مش حنسيبها لحد … و اننا بنسابق الزمن اننا نعمرها غصب عن الارادات الدوليه …. و تم اعلانها صريحه …. تعمير سيناء و القضاء على رجالتكم اللى على الارض معادله صفريه …. يا نهزمهم يا نهزمهم … يا اما نروح نموت … و يا روح ما بعدك روح .
الجيش المصري قاااادر على حماية مصر ضد اي عدو مهما كانت قوته … و هم يعلمون ذلك جيدا … و بالذات مع التفاف الشعب المصري حوله …. ده غير قوة التوازنات الاقليميه اللى مصر نجحت في اتمامها … سواء توازنات استراتيجيه سياسيه او عسكريه … و الاهم … التوازنات الاستراتيجيه الاقتصاديه اللى مصر فرضتها على الجميع ….
احنا مش بنقلقكم … لكن الوقت دلوقتي لا يحتمل الكلام المنمق …. مصر بتحارب حرب شامله حقيقيه … و بتفرض ارادتها على الجميع … و بتنجح يوم بعد يوم …. و العنصر الرئيسي في نجاحها … هو وحدة المصريين و توحدهم خلف قيادتهم …. و التوحد مش بالكلام … اذا مكنتش قادر على التبرع زي ما عمل أبهاتنا زمان … على الاقل اتبرع بدمك .
و نعرض بعض المشاريع الجاري انهاؤها داخل سيناء و التي تم الاعلان عنها و اللى سببت هلع حقيقي لاهل الشر … لانها تنهي تماما على احلامهم و خططهم للمنطقه :-
- من سنة 2014 الى 2019 يتم الانتهاء من 290 مشروع 175 مليار من الجيش ….. 100 مليار مشاريع حكوميه و الانتهاء الفعلي من 134 مشروع بقيمة 24 مليار جنيه و جاري التنفيذ 156 بقيمة 151 مليار
- الانتهاء من المشاريع في 2022 و ليس 2030
- انفاق قناة السويس
- المزارع السمكيه
- المنطقه الصناعيه ببورسعيد
- مطار البردويل الدولى بوسط سيناء
- 10 طرق باجمالى 1339 كيلومتر 26.6 مليار جنيه
- 81 الف وحده سكنيه و 2421 بيت بدوى 24 مليار
- مدينة الاسماعيليه الجديده 42 الف وحده سكنيه
- مدينة شرق بورسعيد
- مدينة رفح الجديده
- اسكان المساعيد
- 26 تجمع تنموى سوار كان تجمع زراعي او بدوى او للصيادين
- 15 مستشفي و وحده صحيه
- انشاء و تطوير 53 مدرسه و جامعه و معهد منها جامعه الملك سلمان
- مصنع اسمنت العريش و مجمع مصانع الرخام
- 5 مشاريع زراعيه بقيمة 26 مليار جنيه
- انشاء سحارة سرابيوم و سحارة المحسمه لنقل 2 مليون متر مكعب من المياه الى سيناء
- محطة معالجه مياه بحر البقر بقيمة 20 مليار جنيه
- محطة معالجه مياه المحسمه
- 54 مشروع لتحليه مياه البحر للشرب بقيمة 31 مليار جنيه تم الانتهاء الفعلي من 23 مشروع
- 27 بئر برفح و الشيخ زويد
- تطوير شبكة مياه الشرب بالعريش
- تنفيذ العديد من مشروعات انشاء و تطوير شبكات الصرف الصحي بمدن سيناء
- الانتهاء من رفع كفاءة شبكة الكهرباء لجميع مدن سيناء
- 38 مشروع ثقافي و رياضي بتكلفة 6.8 مليار جنيه
- ازالة الالغام و المتفجرات
- تطوير و رفع كفاءة مطاري العريش و شرم الشيخ
- انشاء 8 قرى للصيادين ببير العبد
- انشاء مرسي للصيادين برمانه
- انشاء 7 طرق بطول 436 كيلو متر
- انشاء المنطقه الصناعيه للرخام و الزجاج بمنطقة وسط سيناء
- مدينة شرق بورسعيد حتكون العاصمه الاقتصاديه لسيناء بإسم “سلام”
تحيا جمهورية مصر العظمي