المعركة مستمرة .. والدم بالدم !!

04 May 2020

المعركة مستمرة .. والدم بالدم !!
——————————-

لما الرئيس السيسى من كام سنة طلع فى تصريح اعلامى وقال إن رجال القوات المسلحة اختاروا انهم ياخدوا الرصاص فى صدورهم بالنيابة عن أفراد الشعب .. ماكانش الكلام ده من قبيل المبالغة ، أو الخطاب الشعبوى !! … ولما قال فى لقاء اعلامى اخر ، ان أمنك واستقرارك يامصر ثمنه حياتى .. وحياة الجيش ، ماكانش دعاية انتخابية لحصد الاصوات !!

لما اتقال ان مصر بتخوض حرب وجود .. ماكانش ده مجرد شحن معنوى زائد … و لما اتقال اننا نروح نموت احسن (الجيش) قبل ما حد يروّع المصريين .. ماكنش ده مجرد (طق حنك) زى ما اهلنا فى صعيد مصر بيقولوا .. لأ .. ده كان حقيقة واقعة .. بيعيشها رجال القوات المسلحة كل يوم للحفاظ على أمن مصر واستقرارها

لما كنا احنا أو غيرنا بنتكلم ان فيه حرب مشتعلة من 2013 سيناء وعلى جميع خطوط المواجهة .. كان البعض بيكذب الكلام ده .. و دول ناس مالناش دعوة بيهم .. لكن حتى إللى كان مصدق و حاسس باللى بيحصل ، ماكانش متخيل حجم المخاطر إللى بيواجهها ابطال الجيش المصرى ، والجحيم إللى هم عايشين فيه .. لحد ما ظهر للنور مسلسل #الاختيار .. وشوفنا و حسينا من مجرد صورة سنيمائية قد اييه صعوبة الموقف برغم ان الصورة دى لا تمثل حتى 10% من الحقيقة القاسية .. و مع ذلك فضلت الناس برضوا تتسائل .. هم ولادنا بيموتوا لييه فى سيناء !!؟ 🤔

ده بيان القوات المسلحة إللى صدر بالأمس .. عن حصيلة إللى قامت به القوات المسلحة فى خلال الفترة الماضية … واللى بتوضحلنا شيئ مهم جدا … انه مش معنى اننا مش سامعين حاجة ، ولا شايفين إللى بيحصل .. وعايشين حياتنا بشكل طبيعى .. وبنخرج ونتفسح ونروح المدارس و النوادى و بنمارس اعمالنا .. وحتى بعد كورونا و انشغالنا بأحداثها والحظر و الماسكات واللى بيحصل فى مصر واللى بيحصل فى العالم … مش معنى ده ان الدنياةد خلاص تمام .. و جبرت كدة ، وماحدش عايز حاجة من حد … لأ .. احنا لسة فى معركة البقاء .. ولسة ابطال القوات المسلحة بيخاطروا بحياتهم و بيضحوا بنفسهم علشان احنا نعيش .. حتى لو ماشعرناش بكدة 🙄

الجيش المصرى دايس بالفعل وبالمعنى الحرفى للكلمة على رقاب كلاب السكك إللى المعلم الكبير لسة بيدعمهم وبيشغلهم وبيلعب بيهم زى عرايس الماريونيت … وعملية بئر العبد كانت مجرد عملية يائسة لمحاولة الرد على إللى بيحصل فيهم .. والحفاظ على السبوبة علشان ما تتقطعش … عملية ليست الأولى.. ولن تكون الأخيرة… لأننا لسة فى حرب.. والحرب مانتهتش 😏

ياريت إللى لسة ماشافش الفيديو والبيان الرسمى ده يتفرج عليه .. ويربط بين الكلام والصورة دى ، وبين إللى بيشوفه فى مسلسل الاختيار .. علشان يعرف ويفهم ان الموضع فعلا مش هزار .. ولا بالسهولة إللى البعض متخيلها .. واللى بيخليهم احيانا يتفلسفوا وينظروا على الجيش المصرى وقياداته ويتخيلوا انهم من خلال موقعهم خلف الكيبورد و من خلال الاسمارت فون بتاعهم يقدروا يقولوا اييه إللى ينفع يتعمل واييه إللى مايتعملش !!

للمرة المليون … جيش مصر مش بيواجه شوية بهاليل لابسين جلاليب ومربيين ذقونهم .. لأ .. دى مواجهة مع تنظيمات دولية .. وأجهزة استخبارات خلفها دول و دعم لا متناهى من المال والسلاح ، وكمان من الأفراد المسلوبى الارادة إللى تم السيطرة عليهم اما باسم الدين .. او التغرير بهم باسم الثورة

حفظ الله مصر و جيشها وشعبها

لمشاهدة الفيديو و متابعة تعليقاتكم