11 Dec 2015
البحريه المصريه – سلاح الغواصات بين الامس و اليوم
——————————————————-
مبروك للبحريه المصريه و لكل المصريين …. فبالامس تم تدشين اول غواصه TYPE 209 الالمانيه الصنع و اللى بتعتبر من احدث الغواصات العامله على مستوي العالم …. و لان مفيش كتير يعرف حاجه عن سلاح الغواصات المصري و دوره العظيم و قيمته و تصنيفه العالمي … و قد ايه بيتعمله الف الف حساب …. فدي فرصه نعرفكم و نقرب بيكم شويه من اقوى اسلحة البحريه المصريه و اللى مصنفه عالميا و هو سلاح الغواصات المصري.
و لان السلاح ده بيعتبر طول عمره و حتي الان سلاح سري سواء في تسليحه او عملياته و بطولاته اللى محدش يعرف عنها حاجه …. و ممنوع الكلام عنه ….. فاحنا حنتكلم بطابع تاريخي شويه … يعني معلومات قديمه شويه عسكريا ملهاش قيمة دلوقتي لكن اكيد حتكون جديده للكثير من اصدقاؤنا و بالقياس عليه … حتعرفوا يعني ايه شعار البحريه ” مصر المحروسه تحميها البحريه ” و يعني ايه ان البحريه المصريه قادره و مفتريه من زمااااااان و يعني ايه الجمله اللى بتتكرر كل شويه ” محدش يعرف قوة الجيش المصري الحقيقيه ” …. فالمقال النهارده حيكون طويل شويه و ليه الطابع العسكري البحت … لكن نأكد ليكم مدي الفخر و العزه و الثقه في قواتكم المسلحه اللى حتحسو بيه 🙂 🙂 .
اولا البحريه المصريه من اقدم القوات البحريه على مستوى العالم و تمتلك كم هاااااااااائل من الخبرات القتاليه المتراكمه عبر التاريخ و ده اللى وفر ليها القدره على تكوين شخصيتها المستقله و عقيدتها القتاليه و اساليبها القتاليه الخاصه دونا عن اي بحريه على مستوى العالم …. و مصر تمتلك عددا من القطع البحريه يصنفها انها اكبر قوات بحريه على المستوي الشرق الاوسط و على المستوى العربي و الافريقي …. اما على مستوي الكيف ….. فالخبرات المتراكمه لدي البحريه المصريه … تعوض بها فروق التكنولوجي عند مواجهة اي قطع بحريه احدث منها … فالعالم كله بيجري بيحفي عشان ينول الرضا و موافقه مصر و قواتها البحريه على اجراء مناورات معها عشان يستفاد منها … لان دائما و ابدا بيشوفوا تكتيكات قتاليه و حلول عملياتيه عمرهم ما درسوها و لا سمعوا عنها 🙂 🙂 …
فدائما و ابدا تلاقي فصول كامله تم الغاؤها من المقرارات الدراسيه في المعاهد العسكريه البحريه و تغيير العلم ذات نفسه بسبب تجارب قامت بيها قطع بحريه مصريه …. كان اشهرها استخدام لنشات صواريخ صغيره لمواجهة مدمره بحريه عملاقه و اطلاقه اول صاروخ بحري في التاريخ ليغرق المدمره … و تتغير التكتيكات البحريه من ساعتها تماما … فالحدث ده مثلا كان ليه تاثير على بحريات العالم اجمهع … ففيه دول قامت باخراج قطع بحريه عملاقه لديها و احلالها بقطع اصغر و اسرع و اصبحت تعتمد على الصواريخ البحريه 🙂 🙂
و مثلا بالرغم من التفوق الدائم في التكنولوجي ما بين سلاح البحريه المصريه و الاسرائيليه لصالح اسرائيل … الا ان البحريه المصريه دائما و ابدا و من الخمسينات و حتي اليوم اللى بنكلمكوا فيه واخده البحريه الاسرائيليه ” و اللى اكبر منها كمان ” ورا مصنع الكراسي 🙂 🙂 …. فعمرك ما تسمع عن انتصار واحد للبحريه الاسرائيليه او حتي استفزاز منهم … و تلاقيهم دائما و ابدا بيتكلموا عن سلاح الجو او المدرعات بتاعهم …. لكن يجوا عند البحريه يحطوا وشهم في الارض و متسمعش منهم غير صوت صرصور الغيط الحزين 🙂 🙂 .
نيجي بقي لسلاح الغواصات المصري اللى طول عمره محير الامريكان قبل الاسرائيليين نفسهم … فمبدايا كده و عشان نبقي على نور و حتي لا نقع في المحظور 🙂 🙂 … فسلاح الغواصات المصري سلاح سري للغايه و الحديث عنه لازم يكون بحساب … فهو اكثر سلاح مصري يكتنفه الكثيييير من الغموض و محدش يعرف عنه حاجه …. و محدش يعرف عدد الغواصات العامله الفعلي و لا تسليحها الحقيقي … ناس تجتهد و تقولك 4 غواصات و ناس تقولك 6 و ناس تقولك 8 …. كل الكلام ده مش صح لسبب بسيط جدا … ان بالفعل محدش يعرف و كلها اجتهادات مش اكتر .
و قبل ما الكلام ياخدنا و نقع في المحظور … نرجع بقي بالتاريخ و نتكلم عن بعض بطولات السلاح الفذ ده التاريخيه …. فاسرائيل لو بتقول ان القوات الجويه بتاعتها هي اليد الطولي لاسرائيل …. فبدون اي مبالغه و بالاحداث و بالحقائق و الافعال …. سلاح الغواصات المصري هو اليد الطولى للقوات المسلحه المصريه …. من باب المندب الى جبل طارق و خلونا بقي نتكلم عن اشهر غواصتين في التاريخ العالمي البحري و اللى اتغير العلم العسكري البحري اكتر من مره بسببهم و هم الغواصه 21 و الغواصه 24 و اللى كانوا واخدين اسرائيل و الاسطول السادس الامريكي اللى كان بيحمي السواحل الاسرائيليه ورا مصنع الكراسي طوال حرب الاستنزاف و حتي بعد انتصار اكتوبر …. و كانوا بالفعل ” البعابع ” اللى مسببه الرعب ليهم 🙂 🙂 و كان كل بحريات العالم تتمنى تاخد اي معلومه او خبره من الغواصتين دول عشان يعرفوا … هو بيعملوا الحاجات دي ازاي ؟؟؟؟
في الاول خلونا نتكلم يعني ايه غواصه … مع الوضع في الاهتبار اننا بنتكلم عن تكنولوجي الغواصات اللى حاربنا بيها اسرائيل و امريكا من اكتر من 45 سنه مش التكنولوجي بتاعة دلوقتي … فتخيل بقي مع التكنولوجي بتاعة دلوقتي نقدر نعمل ايه 🙂 🙂
الغواصات بتمشي بوسيلتين للطاقه … فبتمشي على السطح بالديزل … و لما بتغطس بتوقف الديزل و بتمشي بالبطاريات … و البطاريات مش بطاريات اللى نعرفها … ده البطاريه الواحده وزنها 850 كيلوا جرام … و اجمالي الامبير الخارج منها حوالي 40 الف امبير …. فتخيل شكل كابل الكهربا اللى بيتحمل الجهد ده 🙂 🙂 … و لان طريقة كشف الغواصه بتكون بالسونار او بالصوت … و لان الماء موصل جيد جدا للصوت اكتر من الهواء …. فطقم الغواصه قلبل الكلام جدا و بيتكلم بالهمس او الاشاره طوال فتره الابحار … و ممكن توصل ان القائد بيحدد للطاقم بتاعه عدد محدد من الكلمات يستخدمها طول اليوم …. و ده برده لتوفير الاكسجين اللى هو روح الغواصه …. لانك بالظبط في مقبره محكمه تماما … فحتي النفس محسوب عليك.
الغواصه من جوه مش زي ما بتطلع في الافلام الاجنبي … غرف واسعه و غرفة طعام فيها ترابيزه كبيره و جنبها ترابيزه بنج بونج و ناس بتتمشي و الكلام الفاضي ده … الغواصه في الحقيقه هي كتله ضخمه جدا اسطوانيه و طويله … من الداخل عباره عن ممر ضيق جدا طويل مقسوم الى قطاعات … و على جوانبه مواسير و كابلات و مفاتيح و محابس …. فمفيش فيها مكان واسع ….. لدرجة ان لو فيه اتنين بيعدوا عكس بعض … لازم يعدوا بجنبهم لان الممر ضيق جدا … و الاضاءه فيها خافته جدا … و صوت المكن بيدوي في ودنك 24 ساعه في اليوم ….. و نسبة عوادم ثاني اكسيد الكربون مرتفع جدا و النيتروجين المنبعث من البطاريات حوالين منك … و بيقاس بميزان من دهب …. لان اي زياده في نسبه ثاني اكسيد الكربون او النيتروجين عن الحد المسموح به و لو زياده طفيفه يؤدي الى انفجار الغواصه بالكامل .
فاهم قاعده بيتعلمها طاقم الغواصه في اول يوم ليهم هى ” الغواصه لا تغفر لطاقمها ابسط الاخطاء ” …. فهي السلاح الوحيد اللى روح كل الطقم متعلقه بيد كل واحد فيهم … اقل خطأ من اي فرد فيهم يضيع الغواصه تماما بالطاقم كله …. فمفيش اصابات … و لكن يا الطقم كله سليم … يا الطقم كله بالغواصه ممكن فعلا ميلاقوش جثثهم من اصله .
فتخيل نفسك قاعد في مقبره محكمه عليك كالحبس الانفرادي … تتنفس عوادم المكن و البني آدمين اللى معاك طوال 3 اسابيع … و اكسجين قليل جدا لدرجة انك مش بتتكلم و بتعد انفاسك عشان توفر الاكسجين …. وكمان متوقع انفجارك في اي ثانيه بسبب عدو ليك او غلطه فرد واحد من الطقم اللى معاك …. و ليك مقنن من الميه بمقدار كوب ماء او اكثر قليلا في اليوم … تستخدمه في الشرب او النظافه الشخصيه لكن ملكش غير المقنن ده بس …… و درجة الحراره بسبب المحركات تزيد عن 50 درجة مئويه ….. و رائحة الجاز و الشحم تزكم الانوف ….. و مطلوب منك انك تحارب و بتواجه قطع بحريه احدث منك بكتيييير و بتتفوق عليهم بكل روح معنويه عاليه ….. و لذلك …. ففرد الغواصات بيتنقي على الفرازه …. و اعداده بيعتبر تاني اكتر فرد في القوات المسلحه تكلفة بعد الطيار ….. لان فيه ناس ممكن و هي تحت تجيلها لوثه او هياج من الحبس الانفرادي و ظروف المعيشه القاسيه جدا … او تسمم ثاني اكسيد الكربون.
و بنظره تاريخيه …. فسلاح الغواصات المصري تم انشاؤه عام 1954 على يد اللواء السويفي … بغواصات روسيه تم استلامها من مواني بولندا … و في عام 59 تم توقيع اتفاقيه مع روسيا لتزويد مصر بعدد الغواصات الحديثه … و لكن بشرط تعجيزي … ان كان عندنا غواصتين روسيتين خرده لازم يتنقلوا روسيا لتخريدهم هناك … و لان الاتحاد السوفيتي ساعتها كان في اوج قوته … كان بيعتبر سلاحه من الاسرار العليا …. فلازم تتنقل الغواصات دي الى روسيا … و لما طلبت مصر منهم انهم يبعتوا اطقم روسيه يسافرا بيها … رفضوا تماما خوفا على اطقمهم من الغرق بيهم .
فبالفعل كانت الغواصه غير صالحه للابحار باي شكل من الاشكل … و غير صالحه للغطس … و حتي لو مشت على وش الميه بدون غطس …. الخبراء الروس قالوا ان الغواصتين دول لو عاموا على وش الميه و وصلوا بس الى مرسي مطروح من غير ما تغرق … فدي حتكون معجزه بكل المقاييس …. و لان حصول مصر على الغواصات الحديثه كان مسائلة حياه او موت … فتم اخد القرار الصعب .
تم الابقاء على اكثر الاطقم خبره في مصر … و تم تشكيل طاقمين الاحدث و الاقل خبره يسافروا بيهم روسيا …. عشان لو غرقوا و ده كان الاحتمال الاكبر …. متكونش الخساره فادحه لسلاح الغواصات المصري … و في حاله تحقق المعجزه و وصول غواصه واحده على الاقل منهم …. يرجع الطقم اللى سافر و يسافر الطقم الرئيسي بالطائره ليتلقي التدريب على الغواصات الحديثه و يعود بها الى مصر.
الغريب بقي ان الطقم اللى سافر كان عارف الكلام ده كويس … و بالرغم من كده قبلو المهمه بكل روح معنويه عاليه …. و بتحدي للموت نفسه … و عند الحديث الى احد افرادها ” ربنا يديله طول العمر و الصحه ” … قال …. ” كنا في اعلي روح معنويه و كنا بنهزر و نضحك و محدش كان بيفكر في اهله او عياله … لكن كل تركيزنا اننا ننجح مش عشان نعيش لكن عشان مصر تاخد الغواصات الحديثه باي تمن ” ….
و كان فيه تحدي تاني … ان الغواصه هي القطعه البحريه الوحيده اللى ممكن ضربها عند مشاهدتها …. لانها تعتبر جاسوس ملهوش ديه … فالسفر بها على وش الميه كده هو الانتحار بعينه … لكن اللى حصل ان الغواصتين سافروا الى روسيا من الاسكندريه غربا مرورا بليبيا ثم تونس فالجزائر فالمغرب ثم مضيق جبل طارق الى الاطلنطي ثم بحر المانش فخليج البسكاي ” و ما ادراك خليج البسكاي ” … فهو مسمي مقبرة السفن لانه بالفعل اصعب و اخطر ممر ملاحي في العالم … و اكبر القطع البحريه بتغرق فيه بسبب ارتفاع و قوه امواجه فما بالك بغواصه خرده … لدرجة عند دخولهم خليج البسكاي وصلتهم اغرب برقيه من قيادة القوات البحريه ….. و لا ينساها اي فرد من اطقم الغواصه حتي الان .. 🙂 🙂 … و كانت كالاتي ” الله معكم … نحن نرعى اولادكم ” …
المهم … تحققت المعجزه …. ووصلت الغواصتين للمواني الروسيه … و بالرغم ان الاتحاد السوفيتي كان في اوجه قوته و عنفوانه … و الشيوعيه كانت لا تعترف بالمجاملات و الكلام ده … لكن اول لما قربت الغواصتين من المياه الروسيه … تفاجئوا بقطع بحريه روسيه طالعه تستقبلهم في احتفالات صاخبه … و دخلوا المينا وسط اطلاق كل القطع البحريه ابواقها في زفه و هيصه كبيره … و لقوا قائد المنطقه الشماليه الروسيه مستنيهم …. و صمم انه يسلم على الطاقمين واحد واحد … و كان بيسلم عليهم و يشد على ايد كل واحد فيهم و كان لسان حاله بيقول …. هو انتوا بني ادمين زينا ؟؟؟ 🙂 🙂
و بعدها روسيا بعتت لمصر بما معناه ترفض ارسال الصف الاول للتدريبه كما كان مخطط …. بما معناه …. اذا كان اللى انتم بعتوهم دول الصف التاني او بالبلدي كده الكسر… امال الصف الاول ده شكله ايه 🙂 🙂 … متبعتوش حد … احنا عايزين دول … و هم اللى حيستلموا الغواصات الجديده … دول اتخلقوا عشان يكونوا رجال غواصات … و ده كان بداية تكوين اعظم طاقمين لاعظم غواصتين في التاريخ العالمي و هم طاقمين الغواصه 21 و الغواصه 24 😊😊
المهم الطاقمين دول مكدبوش خبر … و حطموا رقم الغطس السريع اللى كان مسجل اصلا باسم المصريين بس اللى كانوا في مصر … يعني ايه ؟؟؟ ….. الغواصه و هي ماشيه على وش الميه و عند وجود خطر عليها مثل ظهور طائرة او تهديد ليها لازم تغطس بسرعه للعمق الآمن …. و الرقم القياسي العالمي المسجل باسم الالمان كان 25 ثانيه …. و الصف الاول في مصر كسر الرقم ده و محدش عرف يوصلهم على مستوي العالم … المهم الطاقمين دول و هم في روسيا كسرو الرقم اللى اصلا مسجله المعلمين بتوعهم في مصر بكتييييييير 😊😊 …. و قامت القيامه هناك …. وقفوا التدريب و جم الخبرا عايزين يعرفوا ايه اللى بيحصل بالظبط ….. القصه ان القاده المصريين كانو بيستخدموا اسلوب في الغطس مغامر جدا … و بيعتمد على كفائه كل افراد الطاقم …. و على فكره … حتي الان اسرع غطس سريع على مستوي العالم بيعمله المصريين و محدش عرف يقرب من الرقم اللى بيعمله رجال الغواصات المصري .
الغواصتين دول لما رجعوا بهدلوا اسرائيل … و كان المشوار السهل ليهم كان اسرائيل …. و كان دائما و ابدا فيه غواصه مصريه داخل المواني الاسرائيليه … فكل شحنه سلاح كانت بتوصل المواني الاسرائيليه … بتكون غواصه منهم مستنياها في المينا … بتصور و ترصد كل صندوق بينزل منها و كل واحد واقف على الرصيف …. و كل محاولات البحريه الاسرائيليه بائت بالفشل في منع الغواصات المصريه من الانتهاك المتكرر لعذريه موانيها … و حتي باتعانتها بالاسطول السادس الامريكي …. كانت المطاردات و الكر و الفر و التخفي و الاذلال في صالح سلاح الغواصات المصري حتي في المواجهات بين الغواصات و الاسطول السادس الامريكي .
و حتي في المره الوحيده اللى حبت اسرائيل تعمل فيها ” برم ” … بعتت احدث غواصه عندها بأمهر طاقم عندها … بأمهر قائد و كان ألماني يهودي … تم اسره هو و الغواصه بتاعته على مشارف ميناء الاسكندريه … بعد التعامل معها بقنابل الاعماق و محاصرتها حتي خرج على السطح ليعلن استسلامه … و ليقف على ممشي الغواصه و يؤدي التحيه العسكريه لقائد الغواصه 21 على حرفيته العاليه بعد تحديه له انه لن يغرقه و لكن سيأسره هو بالطاقم بتاعه بغواصته نفسها 😊😊
الغواصه 21 من كترعشرات عملياتها الناجحه داخل اسرائيل و امام مواجهة الاسطول السادس و الى باب المندب و جبل طارق … و من كتر عمليات التجسس و الاشتباك و تلغيم المواني و انزال الضفاضع البشريه و الصاعقه … كانت بتسمي ” تاكسي البحريه ” … 😊😊 لانها كانت تحت الطلب … يادوب تكون راجعه من عمليه … يطلب منها عمليه اخري … و طاقمها كان لا يمل و لا يتعب 😊
معلش الكلام خدنا و طولنا عليكم … لكن التفاصيل كتير .. و البطولات لا حصر لها … و برده احنا مش عايزين نقع في المحظور …. لكن دي امثله صغيره عشان تعرفوا ليه اسرائيل كانت بتصرخ و بتحاول تمنع باي شكل اتمام صفقة الغواصات الحديثه لمصر … فرجال الغواصات المصريه اذا كان بيعملوا المستحيل بغواصات قديمه … امال حيعملوا معانا ايه لما يستلموا احدث غواصه في العالم …. و انا ناقص يا خويا 😊😊
ملحوظه صغيره ….. كل ما جاء في المقال عن احداث لرجال الغواصات هي حقائق تم نقلها من ابطالها الحقيقيين … ربنا يديهم طول العمر و الصحه …
معلومه على السريع … تعرفوا مين كان من قادة الغواصه 21 الفريق علي فاضل و الفريق مهاب مميش رئيس هيئة قناة السويس الحالى 😊😊
تحياتنا ليكم