لمـاذا فرنسـا – عملية تأديب فرنسا – شارل إيبدو

 10 Jan 2015

 لمـاذا فرنسـا – عملية تأديب فرنسا  –  شارل إيبدو 

————————————————-

 جريده ساخره  فرنسيه اسبوعيه ….. مش بتطبع ألفين عدد على بعض … يعني ملهاش اي لزمه و لا تأثير …. بقالها سنوات بتنزل رسوم كاركتير بتسخر من كل شىء … و نزلت الاف الرسوم و النكت اللى سخرت فيها من اليهود و المسيح المسيحيين و من سيدنا محمد والمسلمين .

 وطوال الفتره دي و لا حس و لا خبر …. تقوم تنزل كاركاتير عن داعش فـ ميعديش 4 ايام و تهجم داعش على مقر الجريده و في قلب باريس و تقتل الصحفيين كلهم …. و مش بس كده … يتم تصويرهم من مكان قريب جدا وهما بيقوموا بالعمليه و بيتحركوا بكل اريحيه و بمنتهي الثقه و بيهربوا بعربيه ستروين صغيره و يتم اذاعه المشاهد  دي و لا كأنه مشهد من افلامهم المضروبه بتاعة العراق اللى بيخوفوا بيها الشعوب العربيه 🙂 🙂 

 طب ايه بقي الموضوع … و ايه اللى بيحصل … و الكلام ده معناه ايه …. و ايه علاقتنا بيه .؟؟؟؟ ……. و زي ما اتعودنا مع بعض من زمان في تأصيل الامور … و تفكيك المواضيع عشان نفك التشابك اللى بيغطي على الصوره ….. لنعيد تركيب العناصر دي تاني واحده واحده عشان تبان لينا الصوره الكامله ( من وجهة نظرنا طبعا و ليك انك تتفق او تختلف معانا   ) …. و معلش …. الموضوع كبير شويه و معقد جدا و متشابك …. فـ معلش …… تعالي على نفسك و كمل قرايه و هات كوباية الشاى بتاعتنا و تعالوا نفكر مع بعض واحده واحده ..  

 هي داعش دي تبع مين ؟؟؟ ……. ومين اللى صنعها و بيصرف عليها و بيسلحها و يمولها  و بيخدم عليها لوجيستيا و عسكريا و طبيا و بيقيم معاها شراكه اقتصاديه بشراؤه البترول المسروق منها من العراق و سوريا و ليبيا  ؟؟؟ ……….. اكيد التحالف الغربي بقيادة بقيادة امريكا ……… صح ؟؟؟؟ ……. جميييييييل  🙂 🙂 🙂 

 طب مش فرنسا دوله غربيه ؟؟ …… .. امال ليه طلقوا عليها كلابهم السعرانه تنهش فيهم في قلب باريس ؟؟؟؟ ….. و ليه دلوقتي ؟؟؟؟؟  ….. و يا تري هما الكلاب السعرانه دي مطلوقه من زمان و لا لسه اليومين دول ؟؟؟؟ ….. الاجابه ….. ان فرنسا بتتأدب و الكلاب السعرانه مطلوقه عليها من حوالي 4 سنين 🙂 🙂 …. طب ازاي ؟؟؟؟؟

 شوف يا سيدي ….. عشان نعرف اصل القصه …. لازم نعرف شوية خلفيات سياسيه و تاريخيه صغيره ….. 🙂 🙂 ….  لو تلاحظوا ان فرنسا دايما مش دوله تابعه تماما للغرب … لكن ليها شخصيتها المستقله النابعه من المخزون الحضاري الكبير اللى عندهم …. فهى دوله ليها لغتها الخاصه و ثقافتها و حضارتها العميقه …. بعكس دولة ال 200 سنة حضارة اللى هي امريكا 🙂 🙂 …. لكن ده ميمنعش انها دوله غربيه مفتريه و ليها اطماعها الاستعماريه زيها زي بقيت دول الغرب  …. فهي موجوده و بقوه في دول شمال و غرب افريقيا و ليها قواعدعسكريه على الارض في مالي و النيجر و غرب افريقيا ……

 يعني تلاقوا مثلا ايام احتلال اسرائيل لسيناء … كانت بتسلح الطيران الاسرائيلي باحدث طائرات في العالم ….. و في نفس الوقت لم ترفض بيع عدد من نفس الطيارات الى مصر بشكل غير مباشر عن طريق ليبيا …. او تلاقوها مثلا كانت من اكتر الدول الاوروبيه المسانده للقضيه الفلسطينيه (طبعا بشكل نسبي بالنسبه لبقية الدول) … طبعا مش حبا في سواد عيون العرب 🙂 🙂 …. و لكن عشان تقول للغرب انها مش تابعه ليهم و ان ليها شخصيتها و اجندتها الخاصه.

 ايضا فرنسا من اكثر الدول في العالم تقدما في الصناعات العسكريه و خصوصا في مجال الطيران و البحريه و الصواريخ سواء الجويه او البحريه …. و حتي في المجال ده كانت فيه معركه بينها و بين الدول الاوروبيه و الغرب …. لما اتفق دول الاتحاد الاوروبي على تصنيع طائره مقاتله اوروبيه تنافس الطائرات الامريكيه …. انتهي الوضع بعد سنين من المشاكل ان فرنسا بعملاق صناعة الطائرات الفرنسيه  شركة داسو ” Dassault ” انفصلت عنهم و صنعت هي لوحدها الطائره الفرنسيه الرافال بشخصيتها و بالتقنيات المتطوره الفرنسيه و اللى اصبحت منافس قوي للطائرات الامريكيه  ….. و سابتهم يصنعوا مع بعض طائره تانيه سميت بـ ” التايفون ” لعدم اقتناعها بالتقنيات الاوروبيه اللى هي سبقاهم فيها بكتيييييير.

 المهم … عشان نخش في الموضوع ……. اتفقنا و شرحنا بالتفصيل في الـ 6 اجزاء بتوع مجموعة مقالات “مصر ما بين العدوان الثلاثي و الحرب العالميه الثالثه ” تأصيل التحالف الغربي بقيادة امريكا و انجلترا لتفتيت بلاد الشرق و الاستيلاء على مصادر الطاقه ….. و ان فيه تحالف شرقي لمواجهة التحالف الغربي بقيادة روسيا و الصين عالميا و مصر اقليميا….. و شرحنا في مقالين تانيين قصة مشكلة انهيار سعر البترول و حرب انابيب الغاز بين الشرق و الغرب …. فـ عشان مـ منعيدش الكلام تاني ….. فـ ياريت اللى مقراش الاجزاء الثمانيه دول يقراهم عشان حيبقي صعب عليه ربط الامور مع بعض

 عامة القصه مش الاستيلاء عن ثروات الشرق الاوسط بس ….. لان لسه فيها تفاصيل تانيه   …. و لسه فيه دول تانيه المفروض انه يتم تحجيمها و الاستيلاء على الثروات اللى بتتحكم فيها و هي فرنسا 🙂 🙂  ….. ازاي ؟؟؟؟

 مش ملاحظين ان غريبه قوي ظهور الجماعات الجهاديه و التكفيريه في النيجر و مالي ونيجيريا ؟؟؟؟ …. طب ايه اللى جاب الشامي للمغربي ؟؟؟ …. و اشمعني الكلاب السعرانه دي مظهرتش عشان تنشر الاسلام بتاعها في اي بلد تانيه غير في المناطق اللى فيها ثروات زي العراق و الشام و ليبيا و غرب افريقيا دونا عن اي بلد تانيه في العالم  ؟؟؟؟  ولا بقيت العالم كله خلاص حطم الاصنام و بقي مسلم خلاص ؟؟؟ 🙂 🙂 🙂  

 القصه كلها ان منطقة غرب افريقيا مليانه خيرات ربنا ….. بترول و ماس و دهب و معادن و مصايد اسماك  ….. و غيرها كتييييير …. طب و مين اللى موجود من زمان و مسيطر على المناطق دي و ليه قوات و قواعد عسكريه على الارض هناك ؟؟؟؟ …. فرنسا طبعا اللى هي ليها شخصيتها المستقله عن الغرب و اللى اكيد بتقاوم و بترفض تسليم الثروات دي للغرب عشان تاخد الفتات 🙂 🙂  

 جميييييل …. فبقدرة قادر يا مؤمن طلع ليهم جماعة بوكو حرام و الجماعات التكفيريه في شمال مالي و النيجر … قال ايه بقي يا مؤمن …. نقح عليهم الاسلام في الحته دي بالذات 🙂 🙂 …. و بدأوا يضربوا في الحكومات المواليه لفرنسا هناك و في القوات الفرنسيه اللى على الارض  🙂 🙂 

 فرنسا اتأدبت او سابتلهم الجمل بما حمل ؟؟؟ …. لا طبعا …. امال ايه اللى حصل في الاربع سنين اللى فاتوا ؟؟؟ …. فرنسا لقت ان الجماعات دي ظهرت في مناطق نفوذها في غرب افريقيا …. و في تونس و ليبيا و سوريا …. فأخدت قرارات و اتحركت بناء على تقدير موقف كان خاطىء تماما و للاسف اتنصب عليها من امريكا  نصباية السنين … 🙂 🙂 …. ازاي ؟؟؟؟

 فرنسا لما شافت ان كرة الجليد بدأت تتحرك على الارض في تونس و سوريا و ليبيا و غرب افريقيا …. بدأت تتحرك بسرعه …. و كانت اول دوله تعترف بالحراك المسلح في سوريا …. و كانت اول و اكبر مشارك في العمليات العسكريه في ليبيا … و ده املا منها انها تلحق و تكون موجوده على الارض في تقسيمة الكعكه اللى بتتقسم لصالح امريكا …. 🙂 🙂 …. لكن للاسف …. بعد ما دفعت دم قلبها في العمليات في ليبيا و بعد كل ده … لقت نفسها اتركنت على الرف و اخدت الصابونه اللوكس 🙂 🙂 ….. و مش بس كده …. دى لقت مناطق نفوذها في غرب افريقيا بتتفتت ….  

 فرجعت تاني و بدأت تتحرك منفرده …. و بعد ما كان موقفها السياسي متخبط ما بين مصالح الغرب و مصالحها هي شخصيا …. و بعد زيارة الامير سعود الفيصل وزير خارجية السعوديه اللى هدد فيها فرنسا بخسارة فرنسا لمصالحها السياسية و الاقتصاديه مع العرب في حاله دعمها للمخطط الغربي …. بدأت تفوق و تقتنع انها بكده حتخسر الجلد السقط ….. فبدأت تدعم علانية الخيار الشعبي المصري في 30 يونيو…. و بدأت تتحرك بشكل نشط جدا عسكريا في غرب افريقيا …. و تدعم قواعدها العسكريه …. و تدعم نفسها مع حكومات مالى و موريتانيا و النيجر .

 و مش بس كده …. دي بدأت في سباق مع الزمن في تشييد قاعدة ” ماداما ” في شمال النيجر و على الحدود الجنوبيه لليبيا اللى هي حتكون اكبر قاعده جوية ليها هناك و اللى منها تقدر الطائرات الفرنسيه التحرك بكل حريه للوصول الى العمق الليبي و ساحل الغرب الافريقي للقيام بعمليات دون الحاجه للتزود بالوقود لضرب الكلاب السعرانه الامريكيه اللى على الارض في مالي و النيجر و شمال نيجيريا اللى نفدوا على الكلاب اللى في ليبيا عبر النيجر و الوضع هناك حيطلع خارج السيطره على المتطقه كلها و مش بس كده …. ده حيهدد ايطاليا و جنوب اوروبا بالفعل …. 🙂 🙂  

 و مش بس كده ….. دي كمان بدأت في التحرك منفردا لدعم الدول المناهضة للخطه الامريكيه سواء عسكريا أو سياسيا  ( طبعا بما يتناسب مع اجندتها ) …. زي مصر و السعوديه و الجزائر في صفقات تسليحيه متقدمه تكنولوجيا خارقه بذلك الاتفاقات الغربيه الضمنيه بعدم نقل اسلحه متقدمه تكنولوجيا الى الدول العدوه لاسرائيل عشان يفضل ميزان التفوق الاسرائيلي النوعي في السلاح قائم … و بكده هي بتضرب فهمي نظمي رسمي في الامريكان و بتلعب لهم في الازرق  🙂 🙂 …. ازاي ؟؟؟

 اتمام الاتفاق لتسليم حاملتين طائرات الى دوله عربيه لتكون اول دوله عربيه تمتلك حاملات طائرات و هي الجزائر اللى حتتسلم اول حاملة طائرات هليكوبتر الحديثه ” ميستيرال “السنة اللى احنا فيها 🙂 🙂  …. و اتمام الاتفاق مع مصر لتوريد الكورفيتات البحريه المتقدمه تكنولوجيا لمصر و مش بس كده ده كمان نقل تكنولجي التصنيع للكورفيتات دي للترسانه البحريه في الاسكندريه  

 ده غير قرب انتهاء المفاوضات لتسليم مصر عدد فرقاطتين ” فريم ” اللى حتقلب موازين القوي البحريه في البحر المتوسط اللى هي مقلوبه اصلا لصالح البحريه المصريه ….. ده طبعا بخلاف المفاوضات اللى شغاله دلوقتي لتزويد مصر بالمقاتله الاحدث على الاطلاق ” الرافال” اللى لو نجحت مصر في الحصول عليها … حتكون اول دوله في العالم تمتلك المقاتله دي بعد فرنسا … و لاول مره حيتعدل ميزان القوه النوعيه التكنولوجيه ما بين مصر و اسرائيل بسبب فرنسا 🙂 🙂

 و كمان فيه بعض الأخبار المتداوله ( غير مؤكده رسميا ) على بدىء مفاوضات السعودية مع فرنسا على توريد 45 قطعه بحريه فرنسيه الى البحريه السعودية ( لنشات دوريه سريعه)

 و نيجي بقي للتحرك الفرنسي الحراق ….. فتحركت فرنسا بقوه مع المجموعه العربيه سواء داخل الاتحاد الاوروبى او داخل الامم المتحده لدعم انهاء القضيه الفلسطينيه من جذورها  بدعمها انشاء الدوله الفلسطينيه و انضمامها الى محكمة العدل الدوليه …. و ده مش حبا في سواد عيون العرب … لكن ضربا في الامريكان اللى نصبوا عليها في الحدوته دي كلها 🙂 🙂

 بعد التحركات دي كلها … حنلاقي التحرك المصري الفاعل و المتناغم و المتلاقي في مصالحه مع التحركات الفرنسيه للقضاء على الكلاب السعرانه في ليبيا و احكام الخناق عليهم  …. فـ بيتم التنسيق مع الجزائر و تشاد امنيا و مخابراتيا …. و بيتم استكمال حصار بؤرة الارهاب الليبيه شمالا عن طريق ايطاليه و جنوبا عن طريق فرنسا اللى موجوده على الارض في النيجر جنوب ليبيا   …. و ده سبب رئيسي لزيارة السيسي لايطاليا و فرنسا الشهر اللى فات و اللى شرحناه بالتفصيل في مقال ” مصر تتمدد خارجيا ” بجزئيه 🙂 🙂 .

 طبعا الكلام ده كله مش على هوى امريكا خاااااالص ….. و فوق كل ده …. طلع وزير الدفاع الفرنسي  ” جون ايف لودريان ” يوم 3 يناير و كملها بتصريح ناري متحديا امريكا فهمي نظمي رسمي لما قال ” يجب علينا التدخل العسكري المباشر في ليبيا للقضاء على ميلشيات الارهاب المسلحه في ليبيا …. الارهاب الليبي سيطال مصالحنا في النيجر و سيمتد الى فرنسا نفسها” …. فمعداش يومين و قالوله … قلبك على  الفلسطينيين و الدول العربيه و عايز تحارب الارهاب ….. طب خد بقي الارهاب عندك و في قلب باريس  كمان   

 و طلع قادة الغرب كلهم يتباكون و يقولوا لفرنسا … انتي حبيبتنا …. احنا واقفين معاكي يا أوختي 🙂 🙂  …  بس هاه !!!!! يا تري بقي حتعقلي يا فرنسا و الوضع اللى خلقناه ده … حنستغله مع بعض و حتشتغلي معانا زي زمان في احداث 11 سبتمبر و لا حتعملي ايه ؟؟؟؟ …..  🙂 🙂

  و جه الرد الرسمي لفرنسا على لسان الرئيس الفرنسي “فرانسوا أولاند ” اللى كان غريب جدا و خارج الصندوق 🙂 🙂 …. اولا رفض وصم المسلمين بالارهاب و قالها صراحة ان المسلمين ملهومش علاقه بالكلام ده في اشاره ان انا عارف اللعبه و عارف مين اللى ورا الكلام ده … و مش بس كده ….. ده استخدم نفس منهج الدوله اللى وقفت في وش الغرب كله و هي مصر و طلب من شعبه النزول عشان يدوله تفويض لمكافحة الارهاب .

 طب ده يعني ايه ….. و ليه طلب من الشعب الفرنسي الطلب الغريب ده على المجتمعات الاوروبيه ؟؟؟ …. و هل هو فعلا محتاج التفويض الشعبي ده ؟؟؟ ….. و يا تري التفويض ده عايزه لمواجهة مين بالظبط ؟؟؟ …. و حيعمل بيه ايه ؟؟؟

 بلاش نستبق التوقعات …. و خاللي بالك من قاعده مهمه خااااالص ….. في السياسه ….  اللى بيتم في الغرف المغلقه بيختلف تماما عن اللى بتشوفه و ممكن يكون عكسه خالص او ان بيبان ليك حاجه و بيتم التحضير لحاجه تانيه خااااالص ……. و  ده اللى حنتكلم عليه في المقال القادم بالتفصيل انشاء الله

 تحياتنا ليكم.

 لمتابعة تعليقاتكم