مصر تتمدد فى الداخل والخارج – حدوته إبتدت بكلمتين 2

 17 Dec 2014

 مصر تتمدد فى الداخل والخارج  – حدوته إبتدت بكلمتين 2

——————————————————

 إتكلمنا فى المقال السابق عن تحركات مصر العربية والأفريقية ، وقلنا إن التحركات دى الهدف منها هو محاولة تأمين وضعية الدولة المصرية الجديدة ، وحماية ظهرها من أى إحتماليات لإعاقة إنطلاقة الدولة ، عن طريق خلق دور سياسى وإستراتيجى فى وضع دولى وإقليمى ممتلئ بتحديات من أصعب ما يكون …

 لكن القصة مش كدة وبس .. دى مصر بعتت جابت قبرص واليونان فى إجتماع قمة فى القاهرة ، فى تحدى صارخ لدولتى المواجهة إسرائيل وتركيا .. لأن إذا كانت قبرص بينها وبين إسرائيل “ما صنع الحداد” ، فــ اليونان بينها وبين تركيا “ما صنع الحداد ، و أبووووه كمان” 🙂 … لأ .. وكمان نلاقى مصر بتعمل مناورات عسكرية بحرية مع اليونان فى البحر المتوسط ، وكأنهم بيطلّعوا لسانهم لأردوغان صاحب وهم الخلافة 🙂 .. وفى نفس الوقت مصر بتظبط نفسها إقتصادياً وإقليمياً عن طريق تسوية النزاعات على أبار غاز المتوسط ، واللى إتكلمنا عنها برضوا فى وقتها وقتلنا الموضوع بحث وردّينا على كل المشككين فى النوايا خلف هذه المباحثات وهذه القمة ..

وبعدين ، تخرج مصر من الدائرة الإقليمية الضيقة ، للدائرة الإقليمية الدولية الأوسع عن طريق تظبيط العلاقات مع إيطاليا بزيارة على أعلى مستوى ، تم فيها إستقبال الرئيس السيسى بكل ترحاب وعظمة ، ومؤتمر صحفى يعلن فيه رئيس إيطاليا عن دعمه ودفعه للإستثمارات الإيطالية فى مصر !

 الخطوة دى لها خطورتها ومدلولها الخاص ، لإن إيطاليا كدولة هى رئيس الإتحاد الأوروبى فى دورته الحالية ، بالإضافة لإن إيطاليا هى الظهير البحرى لقبرص واليونان ، .. وكأن السيسى بـ يجاهد لتحويل شرق المتوسط لبحيرة مصرية بتوطيد علاقات مصر مع كل الدول اللى ممكن يتم إقامة علاقات إستراتيجية معها !! .. بالإضافة لمحاولة تأمين مصر سياسياً داخل الإتحاد الأوروبى .. وإفتكروا كلمة الرئيس اليونانى لما قال بعد قمة القاهرة ، إن اليونان وقبرص هــ يقوموا بدعم موقف مصر داخل الإتحاد الأوروبى !!

 لكن الأخطر من كدة هو تكوين جبهة مع إيطاليا لمحاولة حصار ليبيا من الإتجاهات الأربعة زى ما قلنا فى المقال اللى فات ، لأن إيطاليا بتعانى بشكل درامى من موجات الهجرة غير الشرعية اللى بتخرج كل يوم من ليبيا متوجهة لإيطاليا ، وبما إن ليبيا مافيهاش حكومة فعلية وخفر سواحل ، فالموضوع بسيط جداً .. 🙂 .. “يالا يا عم خد لانش وإطلع على إيطاليا” .. ، وكمان كام شهر هــ نلاقى أعلام داعش مرفوعة فى روما ونابولى =D .. وهو ده يمكن السبب فى إجتماع دول الإتحاد الأوروبى أول إمبارح فى جلسة بخصوص الوضع فى ليبيا !!!

 وبعدين يخرج الرئيس المصرى من إيطاليا على فرنسا ، علشان نسمع عن الحديث عن تعاون عسكرى فى مجال الفرقاطات البحرية وتطوير الأسطول المصرى ، .. لكن الأنكى والأروع إن الزيارة دى تكون فى نفس الوقت اللى فيه الإخوان ودلاديلهم ومؤيديهم فى الداخل والخارج ، بيعلنوا عن ثورة بــ يسمّوها إسلامية يوم 28 نوفمبر هــ تأكل الأخضر واليابس ، .. علشان يكون ده رسالة للعالم كله ، إن كل الدعاوى دى لا تمثل شئ ، وإن مصر مستقرة ، بدليل إن الرئيس المصرى بــ يسافر برة مصر لإجراء مباحثات عن مستقبل الدولة المصرية ، وهو مطمئن إن البلد ثابتة وأمنة ، ومافيش أى خطورة عليها من كل اللى عايزين ينهشوا فيها … وطبعاً كلنا أكيد فاكرين إن هو ده اللى حصل فعلاً ، وإن كل المظاهرات فى 28 نوفمبر طلعت فسسسسسس … =D =D =D

 وإذا كان فيه وفد عسكرى هندى زار مصر من كام شهر ، بدون الحديث عنه بشكل مكثف فى وسائل الإعلام ، .. فــ الدور دلوقتى جاء للحديث عن زيارة الرئيس السيسى فى الفترة اللى جاية لجمهورية الصين الشعبية ، واللى سافر بسببها وفد مصرى رفيع المستوى الأسبوع اللى فات للتحضير للزيارة دى .. وقبل ده كله ، نسمع كلنا أخبار طايرة كدة بإعلان الصين عن طائرتها الجديدة ، واللى بتحاول تنافس بها الطائرات الأميريكية ، مع إمكانية خضوعها لبرامج التحديث والتطوير عن طريق سلاح المهندسين للدولة اللى بتتعاقد على شرائها .. ودى طبعاً لعبة سلاح المهندسين عندنا ، واللى طوّعوا الطائرات الروسى القديمة اللى وقفت بعد 30 يونيو فى وجه حاملة الطائرات الأميريكية فى البحر الأحمر ، واللى قناة الــ بي بي سي جابت تقرير مفصّل عنها ، بإنها فاجئت حاملة الطائرات الأميريكية بظهورها فى وضعية إنقضاض بعد ما خدعت الرادارات الأميريكية و …………… و بس .. 🙂 🙂

 نييجى بقى للزغلول الكبير اللى وزير الدفاع عبد الفتاح السيسى راح زاره فى روسيا وتم إستقبال السيسى إستقبال الفاتحين من رئيس ثانى أقوى دولة فى العالم ، وكلنا شوفنا فى وسائل الإعلام ، إزاى كان الرئيس بوتين بــ يرافق السيسى وزير دفاع مصر فى جولاته لمصانع الإنتاج الحربى الروسى ، وبعض مواقع المشروعات الروسية الكبرى .. علشان ييجى دلوقتى الدور على الرئيس الروسى لزيارة مصر ويكون فى إستقباله وزير دفاع مصر الأمس ورئيس جمهورية مصر اليوم “الرئيس عبد الفتاح السيسى” فى زيارة تعتبر الأولى من نوعها من سنين طويلة لرئيس روسى لمصر ، واللى هــ يترتب عليها نتائج أعتقد إنها هــ تكون نتائج كارثية على البلطجى الأميريكى ، وشيخ المنصر البريطانى العجوز ، واللى بــ يحرّك ، وبــ يتحرّك زى الذئب هناك من خلف الستار !!

 ولما نتكلم عن الوضع الإقليمى والدولى ووضعية الدولة المصرية الجديدة فيه ، و نحط كمان على كل ده ، المشاريع العملاقة الإقتصادية والناجحة على الأرض المصرية ، والعلاج الناجح والفعّال لفئران الإخوان فى الداخل والخارج، بالإضافة للظهير الشعبى والدعم الغير متناهى من جموع المصريين لقيادتهم السياسية ، … هــ نقدر نقول إن كل ده هــ يكون فى جيب الرئيس السيسى كــ كروت سوف يجيد إستخدامها جيداً فى لقائه مع أونكل أوباما بحد أقصى شهر مارس 2015 مالم يحدث أى تغييرات .. واللى هــ يكون بإذن الله بعد نجاح العملية الإنتخابية ، ونجاح المؤتمر الإقتصادى العالمى اللى هــ يعقد فى شرم الشيخ فى منتصف مارس القادم

 مصر بــ تتمدد فعلياً على الأرض خارجياً وداخلياً ، علشان ترجع بشكل قوى وفعّال ، وتلعب دور مؤثر إقليمياً ودولياً ….

 وياريت يفضل الإينكيلاب كدة يترنّح على طول ، لأنه لو فضل يترنّح كدة ، مش بعيد إن اللعب بدل ما يبقى على المشاريب ، .. يبقى على الفانلّات =D =D =D

  لمتابعة تعليقاتكم