23 Aug 2015
الشرق الأوسط .. لعبة بنج بونج 1
———————————
الصراع مشتعل بشكل فوق التصور .. والموقف أصبح أصعب من الموقف أيام الحرب الباردة فى القرن العشرين .. والجييم رايح جاى ، واللى بــ يقع مش بــ يقوم تانى !! .. عارفين لييه !!؟؟ .. لأن أيام الحرب الباردة ، كان الوضع العالمى مستقر .. صحيح كان فيه معسكرين متضادين ، لكن الصراع كان متكافئ وكل طرف عارف قوة الخصم وبيتحرك بمنهى الحذر .. وكان الهدف هو كسب أرض جديدة أو تحقيق الفوز فى جولة من الجولات على حساب الطرف الأخر ..
إنما دلوقتى الوضع مختلف لأن الحرب النهاردة هى حرب بقاء ، بين طرف عايز يستكمل سيطرته على العالم بالسيطرة على كل مصادر الثروة و إعادة رسم خريطة العالم لخدمة مخطط معين مرسوم من زمااااان .. ومن زمان أوى كمان .. وطرف رافض المخطط ، و بــ يسعى لتشكيل نظام عالمى جديد يقوم على أنقاض النظام القديم وعلى حساب بقائه وسطوته الدولية .. وبالتالى فــ الحرب دى ماينفعش يبقى فيها إتنين كسبانين ، ولا يبقى فيها حل وسط .. يعنى يا غالب ، يامغلوب
المشكلة إن أرض الصراع المرة دى هى الشرق الأوسط .. وده طبعا مش وليد الصدفة ابداً .. وأظن إحنا إتكلمنا عن الموضوع ده كتير فى مقالاتنا عن خطوط الطاقة ، وإسرائيل الكبرى وعمليات فرض الإرادة …. وكلمة السر فى كل ده هى جحافل وطوائف التأسلم السياسى ، اللى تم إنشائها مخصوص علشان كدة !!
ضربة البداية كانت 30 يونيو اللى قلبت الترابيزة على دماغ الكل وضربت كرسى فى الكلوب ، وبوظت المخطط اللى إتصرف عليه مليارات ، ومش هــ ابالغ لو قلت تريليونات ، .. بدايةً من سنة 1983 لغاية 2011 وما سمّي بالربيع العبرى …
أخخخخخ .. ولا مؤاخذة معلش ..
قصدى الربيع العربى 😃😃
الموضوع أصبح زى لعبة البنج بونج ، .. يعنى 30 يونيو تحصل .. فــ تظهر داعش .. روسيا تحط رجلها فى المنطقة .. فتولع أوكرانيا .. الخليج يساعد مصر .. فــ نحاول نهد أوبك ونطربقها على اللى فيها .. الخليج يصمد .. فــ نزغزغه من العراق .. نأسس لمشروع قناة السويس وللقوة العربية المشتركة .. فتولع اليمن ويتم تهديد باب المندب .. تحصل عاصفة الحزم .. فــ ييجى الإتفاق النووى الإيرانى ومعاه شوية عمليات إرهابية فى السعودية .. مصر تتوغل فى أفريقيا .. أوباما بزززاااااات نفسه يزور اثيوبيا والإتحاد الإفريقى .. مصر تفرم الإرهابيين فى سيناء .. فــ ييجى الإرهابيين من ليبيا … مصر تضرب الإرهاب فى ليبيا .. فــ يلاعبك من أثيوبيا .. طب تقارب سعودى روسى وصفقات نووية وسلاح .. فــ نهز سوق البترول أكثر عن طريق إيران ونزعزع الموقف الإقتصادى للسعودية .. الملف السورى هــ يهدأ ويتحل .. طب نولعلهم لبنان ….. وهلم جرة 😊
لكن الشئ الجميل إنك لو بصيت فى كل اللى بيحصل ده ، هــ تلاقى مصر لاعب أساسى فى كل التحركات ، .. و مش كدة وبس .. لكن ده مصر فى أحيان كتيرة بتغرد منفردة ، وبتحلق هناك بعيد ، و بتنجح فى فرض رؤيتها الخارجية وتوجهاتها بالنسبة لكل الملفات الشائكة فى المنطقة ، بعد ماخرجت من نطاق الهيمنة الأميريكية و التبعية للغرب برغم كل محاولات الضغط عليها من كل الإتجاهات ..
الرئيس السيسى فى روسيا بعد بكرة ، فى زيارة هــ يكون لها مردودها على السياسة الإقليمية والدولية وخصوصاً فيما يخص الملف السورى ، وكمان تأثيرها على الإقتصاد المصرى اللى اصبح على رأس الأولويات الملحة للرئيس السيسى وحكومته ، بعد أولويات تأمين مصر سياسياً وعسكرياً ضد مخططات إسقاطها ..
و …
و للحديث بقية بإذن الله