فك اشتباك ما بين …. الاتفاق الروسي التركي – قرار مجلس الشيوخ الايطالي- الجزء الاول

 4 Jul 2016

 فك اشتباك ما بين …. الاتفاق الروسي التركي – قرار مجلس الشيوخ الايطالي- الجزء الاول

—————————————————————————————

 اصدقاؤنا اصدقاء صفحه كلام في الصميم ….. مقال النهارده مقال دسم شويه …. و محتاج تقراه على رواقه لاننا حنجاوب فيه علي اسئله كتير وصلتنا منكم …. و زي ما عودناكم اننا دايما بنفكك الاحداث و نأصل الامور و بعد ما نشيل الشوائب …. نعيد تركيبها مره تانيه عشان الصوره تبان واضحه لينا بعد ربطها بمقالات سابقه…. فاللى عايز يسلي صيامه يقرأ على رواقه … او يحضر ترمس الشاى بعد الفطار 🙂 ….. و احنا حنجاوب على كل سؤال في جزء منفصل و حنحاول نبسط الامور بشكل كبير جدا.

———————————————–

  •  منين روسيا  بتشتغل مع مصر  و بيواجهوا الهجمه الغربيه و بتقدم ليها سلاح متطور و اتفاق نووى …. و روسيا متعنته في رجوع السياحه مره تانيه بالرغم من تعاون مصر الامني الكامل معاها.
  •  منين روسيا بعد اسقاط الطائره الحربيه الروسيه من قبل تركيا …. و بعد كميه الحوادث الارهابيه الكبيره اللى بتضربها كل يوم و اخرها الهجوم على المطار الرئيسي بتاعها …. و وافقت ترجع السياحه الروسيه لتركيا كمان شهرين و تسريع و تيره التطبيع و الدعم الاقتصادى.
  •  منين مصر و ايطاليا بينهم شراكه استراتيجيه في مجال الطاقه …. و مصر تعاونت تماما مع ايطاليا في موضوع مقتل الشاب الايطالي و اعتراف الخارجيه الايطاليه بخداعها بمعلومات ملفقه من قبل مصادر اخوانيه …. و رفض جامعه كيمبردج التعاون في التحقيق …. تقوم ايطاليا ترد بمنع تصدير قطع غيار الطائرات ال F16 لمصر …. و ايه تأثير ده علينا.

———————————————–

 شوفوا بقي …. فيه شويه مصطلحات و ثوابت في الجغرافيا السياسه و علاقة الايدولوجيات في العلاقات الدوليه لازم تبص عليها بتجرد و بدون عواطف و محتاجه تأصيل …. و ان كنا شرحناها قبل كده في موضوع علاقتنا بروسيا في مقال سابق اسمه  الشريك و الحليف و الصديق

 لكن حنلخصه كالاتي …. العلاقات الدوليه مفيهاش عواطف خااااالص و لا يسقط عليها ثوابت العلاقات الشخصيه المباشره …. فكل الدول بدون استثناء مش ملايكه و لكن بتسعى لفرض ارادتها و تحقيق مصالح شعبها حتي لو تعارضت مع الشعوب الاخرى….. لكن الموضوع ده بيختلف من الشرق للغرب ….. فالشرق طول عمره بيسعي لفرض ارادته و تحقيق مصالحه بتعظيم ارضيه المصالح المشتركه ما بين الدول و المحافظه عليها … و لا يمنع من الضغط عليك في الملفات المختلف عليها … لكن مش بيفرض ايدولوجيته عليك و مش بيدمرك و لا بيتخلي عنك و لا بيبيعك …. و لا عمرك تسمع انك مسكت جماعات سلحتهم دوله شرقيه او اعلاميين و نادر جدا انك تلاقي ليهم جواسيس.

 و ده بعكس الغرب تماما … اللى الايدولوجيه بتاعته مبنيه على ان بقاؤه تعتمد على تدمير الغير و الاستيلاء على مقدراته و ثرواته … فدايما تلاقيه ناطط عندك يا اما باحتلال مباشر بجنوده … او يبعتلك جماعات مسلحه او يدعم معارضيك او يمول تنظيمات داخليه مخربه او …..

 و عشان نفهم طبيعه علاقه روسيا بينا دلوقتي … لازم نرجع شويه لفتره الستينات …. فعشان نختصر الموضوع و لان تفاصيله موجوده في لينك مقال “الشريك و الحليف و الصديق” … فروسيا كانت الدوله صاحبة الايدولوجيه الاشتراكيه الشيوعيه …. و مصر رفضت تماما تبني الايدواوجيه الشيوعيه لانها دوله عربيه مسلمه … و حتي الاشتراكيه … فتم تطبيقها بما يتناسب مع مجتمعنا … فروسيا قالت لمصر معنديش مشاكل …. انا حديكي سلاح و معاه ذخيره و قطع غيار تكفيكي سنين قدام … لكن السلاح ده دفاعي فقط ….. فمثلا الطياره الميج كان مداها قصير جدا و لا تستطيع الاشتباك لاكثر من 15 دقيقه فقط بعكس الفانتوم اللى بتوصل الى 3 ساعات …… لكن لو عايزه الطياره اللى تروح لغايه تل ابيب تدكها و ترجه …. فلازم تعتنقي الايدولوجي الشيوعي بتاعتي و تلغي شخصيتك التاريخيه تماما … و تبقي زيك زي رومانيا و يوجوسلافيا و بولندا و غيرها من الدول الشرقيه آن ذلك ….. و في الحاله دي حتدينا كمان قطع من ارضك اخزن فيها سلاحي و تبقي قواعد ليا … و في الحاله دي انا اللى ححارب ليكي و ادافع عنك …. و ده اللى مصر رفضته تماما…. و فاجئت الجميع و حاربت بالسلاح الدفاعي و انتصرت و لم تفرط ابدا في ترابها الوطني و لا في سيادتها على ارضها.

 نيجي بقي لدلوقتي …. فكلنا تابعنا و شفنا ان فيه عمل مشترك كبير جدا و ترتيبات على اعلي مستوى بين مصر و روسيا لضرب الهجمه الغربيه لتفتيت و القضاء على الشرق … و ان فيه شغل مخابراتي على اعلي مستوى و تنسيق سياسي و تبادل ادوار رائع … و تعاون عسكري كبير …. و 30 يونيو كان الزلزال النووي اللى غير تماما شكل المنطقه و المعادلات الدوليه ….. و اللى شرحناها كتيييير و شرحنا ليه 30 يونيو كانت مهمه تماما لروسيا ….. و ان مصر هي بوابه اي دوله للدخول الى المنطقه … و هي التي فتحت سوق الشرق الاوسط للسلاح الروسي …. لان جيش مصر لما بيشترى سلاح …. بتلاقي كل دول العالم بتجرى تشتريه …. لان الجيش المصري جيش الخبره القتاليه و عمره ما بيشترى غير السلاح المحترم … و الكل بيتعلم منه ……..   لكن ليه احنا حاسين ان روسيا بتضغط على مصر اقتصاديا و متعنته في انها ترجع السياحه الروسيه لمصر … على الرغم من التعاون المصرى الكامل في الملف ده ……

 شوف يا سيدي … الاول تعالي نحسب كل الاحتمالات اللى هم مش حيزيدوا عن 3 احتمالات .

 الاول ان روسيا باعت العمل المشترك و اتحالف مع الغرب ضد مصر و عايزه تكسرها اقتصاديا …. و ده من رابع المستحيلات …….

 الاحتمال التاني انه بالفعل من مصلحة مصر و روسيا ان لا تعود السياحه الان و ده لاسباب امنيه لتركيز جهات عديده كل نفوذها على ضرب اي استعاده حاليه للسياحه بين البلدين …. و ده وارد في ظل الجنان العالمي اللى بيستهدف مصر …. فتلاقي القنابل تنفجر في تركيا و في مطاراتها … تاني يوم تطلع توماس كوك و و تشيل شرم الشيخ من جدولها نهائيا و الى اجل غير مسمي 🙂 🙂  …. القنابل تنفجر في تركيا … يقوم الانجليز ممدين عدم سفر الانجليز لمصر و يصرحوا انهم بيدعموا تركيا …..

 اما الاختمال التالت …. ان بالفعل روسيا متعنته و بتضغط على مصر زي زمان ما كانت بتغط علينا بعدم امدادنا بالسلاح الهجومي عشان تاخد قواعد عسكريه اياميها ….. لكن ده بالذات مش وارد … لان محدش عاقل يقدر يفكر ان مصر ممكن توافق على كده في الوقت اللى قبلت الحرب باسلحه دفاعيه … و بعد كده عادت امريكا و تم هدم نظامها عقابا على عدم الانصياع للأمريكان و تغيير عقيده الجيش لمنحهم قواعد على الارض المصريه …  بالورقه الاقتصاديه عشان تحقق مصالح ليها.

 لكن ممكن يكون الضغط اقتصادي  لاسباب اقتصاديه ….. و الحاجه الوحيده اللى موجوده هي موضوع الغاز …. ازاي ؟؟؟

 لو لاحظنا ان كان فيه ملاحظات كتير ان مصر بتتباطىء في الانفتاح على روسيا اقتصاديا …. فمثلا تم الاعلان في روسيا على العديد من البروتوكولات الموقعه مع مصر … من اتفاقيه التبادل التجارى بالعمله المحليه الى دخول مصر في الاتحاد الاوراسي و دخول مصر منظمه البريكس كمراقب و عرض العديد من المشاريع و نوعيات متقدمه جدا من السلاح على مصر …. في حين كنا بنلاقي تجاهل او عدم تحمس … او ان الكلام من ناحيه مصر بيكون بتقل شديييييد .

 القصه و ما فيها اننا لازم نعرف ان العلاقات ما بين مصر و روسيا علاقه خارج نطاق الميديا تماما … و ان كل اللى بنسمعه و بنشوفه بيبقي مش لينا و لكن موجه للغرب …. يعني مصر تعاقدت على اسلحه استراتيجيه حديييييثه جدا …. و حضرتك متعرفش عنها حاجه و بيتم الاعلان عنها تباعا في الوقت المناسب ….

 لكن زي ما قلنا في مقالات سابقه ان عام 2016 هو عام الحسم و اننا بنرجع تاني لاعاده ترتيب الدور من اول و جديد و ان فيه قوه بتختفي و قوى حترسخ ارجلها في المعادله الدوليه و اننا بنرجع تاني لعام 1945 ….. فروسيا ممكن برده تكون بتضغط على مصر لتمرير شىء ما او للموافقه على شىء ما … و مصر رافضه ده تماما و حتي لو حناكل عيش حاف.

 لو الكلام ده صح …. اكيد الموضوع مش قواعد عسكريه … لان الروس مش من الغباء ده … لكن ممكن انها عايزه تاخد حته من التورته بتاعه سبوبه الغاز …. يعني مصر في خلال سنتين حتكون من اكبر 3 مصدرى الغاز في العالم و حتكون من اكبر 3 احتياطيات في العالم …. و ده معناه ان المعلمين الكبار لازم يتفقوا على السوق و على مين يكون الكبير فيه و يتقسم السوق ازاي …. و برده يتم تقسيم سبوبه الانتاج …. يعني لو تلاحظوا ان مصر مجريتش على شركه غازبروم الروسيه … لكن الاتفاقيات مع ايطاليا و بريطانيا و هم دول غربيه …… و دي شخصيه مصر … انها عمرها ما بتترمي على حد … و لكن بتتعامل مع الجميع بمسافه واحده و مش بتخاللي حد يفرض رأيه عليها .

 عامة كل اللى قلنا عليه ده وارد ….. يعني مش معلومات و لكن مجرد خواطر 🙂 🙂  ….. لكن اللى يبان لينا ان مهما كان الاحتمال الصحيح …. انك تطمن تماما على مصر …. فهي مثلا معملتش زي تونس و دول تانيه …. اللى بعد الحوادث الارهابيه بنلاقي الدول كلها داخله تدعمها سياحيا و سياسيا … و ده لانها في الغرف المغلقه قالتلهم خلاص … سلمت … خدو اللى انتوا عايزينه … انا مش قدكم ….. لكن مصر بتتعامل بمبدأ راس براس … و مهما ضغط عليا … حستحمل و مش حطاطي …. و عامه هي اتقالت قبل كده ….. احنا لو حناكل عيش حاف ….. و بالرغم من ان علاقتنا بالروس استراتيجيه …. و مصر بالنسبه ليهم و لغيرهم كنز استراتيجي …. لكن ما دام حضرتك اخترت ان تكون كبير …. يبقي لازم تتعامل ككبير و تخش في اللعبه و تقاوم الضغط و تضغط غير … هم الكبار كده و ده قدرهم 🙂  🙂

 و بصراحه …. احنا كمان نخوف بصحيح 🙂 🙂  …. مهو مفيش دوله تواجه اللى مصر واجهته و تفضل واقفه على رجليها و تغير العالم كله من 3 سنين …. و افضل خانقها اقتصاديا … و بالرغم من كده …. تقدر في 3 سنين تسدد ترفع الاحتياطي النقدي بتاعها الى 18 مليار بعد ما كان 14.5  مليار بس  نصهم باعهم الجاسوس لقطر و تم سدادهم كاملين و كمان تفيذ مشاريع تعادل 1400 مليار جنيه ….. يعني في حدود 150 مليار دولار في سنتين فقط و التغيير النوعي في التسليح … و كل ده … و السياحه واقفه و الدولار بيتم المضاربه عليه و الحصار الاقتصادي على اشده … امال لو الدنيا شغاله كان حصل ايه .

 عامه زي ما اتفقنا الكام شهر اللى جايين حاسمين … و عشان الفتره دي حاسمه ….. حتكون صعبه ….. و زي ما انتم شايفين ان زي ما مصر بتتغير في علاقتها بدول العالم و بتحضر نفسها انها تاخد وضعها قدام الكبار … لكن اللى دايما معطلها هو الملف الاقتصادي لان ثقافة العمل مش موجوده ….. الناس لو تشتغل شويه حنعدي مراحل كتيييير جدا بسرعه صاروخيه …. العمل يا مصريين … العمل ثم العمل .

 و نستكمل الاجابه على باقي الاسئله في الجزء القادم

 تحياتنا 

لمتابعة تعليقاتكم