14 Jul 2016
فك اشتباك ما بين الاتفاق الروسي التركي – قرار مجلس الشيوخ الايطالي – الجزء الثالث
————————————————————————————–
اصدقاؤنا اصدقاء صفحه كلام في الصميم ….. في المقالين السابقين في الجزء الاول و الثاني جاوبنا على سؤالين من 3 اسئله بتشغل ناس كتير ….
- منين روسيا بتشتغل مع مصر و بيواجهوا الهجمه الغربيه و بتقدم ليها سلاح متطور و اتفاق نووى …. و روسيا متعنته في رجوع السياحه مره تانيه بالرغم من تعاون مصر الامني الكامل معاها.
- منين روسيا بعد اسقاط الطائره الحربيه الروسيه من قبل تركيا …. و بعد كميه الحوادث الارهابيه الكبيره اللى بتضربها كل يوم و اخرها الهجوم على المطار الرئيسي بتاعها …. و وافقت ترجع السياحه الروسيه لتركيا كمان شهرين و تسريع و تيره التطبيع و الدعم الاقتصادى.
النهارده حنجاوب على السؤال الثالث :-
- منين مصر و ايطاليا بينهم شراكه استراتيجيه في مجال الطاقه …. و مصر تعاونت تماما مع ايطاليا في موضوع مقتل الشاب الايطالي و اعتراف الخارجيه الايطاليه بخداعها بمعلومات ملفقه من قبل مصادر اخوانيه …. و رفض جامعه كيمبردج التعاون في التحقيق …. تقوم ايطاليا ترد بمنع تصدير قطع غيار الطائرات ال F16 لمصر …. و ايه تأثير ده علينا.
—————————————————————–
بصراحه اول لما طلع الخبر ده …. و لقيت الصفحات و القنوات الاخباريه إياها عامله مندبه و بتروج ان سلاح الطيران المصرى حيتأثر و الطيارات حتبقي زي الحديد الخرده من غير قطع غيار ….. و الفتي و الهرى من جنرالات المقاهي كان على أشدُّه مع انهم معملوش كده لما كانت امريكا الدوله المصنعه وقفت صفقات التسليح لاكتر من عام و نصف …. و مسألوش نفسهم هو الجيش كان بيعمل ايه ساعتها و هل امريكا ذات نفسها قدرت توقف ساعتها توريد قطع الغيار و لا لأ 🙂 🙂 ………. فبصراحه إفتكرت قصه المطار السرى أيام حرب الاستنزاف 🙂 🙂 ….
أصل ايطاليا معندهاش اصلا ولا طياره واحده F16 في سلاح الجو بتاعها 🙂 🙂 و معندهاش خطوط انتاج اصلا لانتاج قطع غيار لطياره لا تملكها 🙂 🙂 …. القصه و ما فيها إن سلاح الجو الايطالي بيعتمد على طائرات التايفون و التورنيدو … و كان متعاقد على طائرات جديده تايفون و كان حيتأخر تسليمهم ….. فإتفقت ايطاليا مع امريكا انها تأجر منهم حوالي 36 طياره F16 لفتره محدده لغاية لما يستلموا طياراتهم التايفون لسد العجز في عدد الطيارات بعد تاخر تسليم الطيارات التايفون و لما تستلم طياراتها الجديده … ترجع الطيارات ال F16 لامريكا تاني .
طبعا ايطاليا استلمت الطيارات دي بقطع غيارها … و لما رجعتهم كان عندها قطع غيار لم تستخدم تم دفع تمنهم في عقد الايجار و ملهاش لزمه …. فبالبلدي كده …. الجيش بتاعنا شاطر …. دخل على الخط و عرض على ايطاليا انه يشتريهم “لوط” بسعر مناسب للطرفين.
و اللى كتير مننا ميعرفهوش …. فمصانع الجيش الحربيه بتقوم بتصنيع حوالي 90% من قطع غيار الطائره الF16 …. و بيأمن ال 10% الاخرى من مصادر عديده ….. فلا ايطاليا مورد لمصر من اصله لقطع الغيار دي …. و لا مصر واقعه في عرضها علشان قطع الغيار دي من اصله 🙂 🙂 … امال لما القرار ملهوش لزمه و لا ليه أي تأثير …. ايه بقي الموضوع !!!
القصه و ما فيها هي بروجابندا سياسيه اعلاميه انتخابيه داخليه كان السبب فيها للاسف قطيع الحكوكيين و اليساريين و فلول الاخوان اللى عندنا …. لانهم لغايه دلوقتي بيبعتوا تقارير و شهادات مزوره للاعلام بتاعهم و السياسيين الايطاليين …. و لان السياسه هي فن قذارة استغلال الموقف … فكل واحد بيغني على الموضوع ده مادام مسمع مع الناخب اللى هناك لما يطلع و يقول خطب عصماء انه حيجيب حق شاب اتقتل في دوله تانيه
حكومه ايطاليا لو فعلا كانت عايزه تطلع قرار فاعل على مصر … كانت على الاقل اتكلمت على اي اتفاقيه عسكريه تانيه و اللى عليها العين … زي التعاون في المجال العسكري البحرى او الدفاع الجوى او اي تعاون آخر …. لكن كان قرارهم انهم يطلعوا قرار ملهوش اي تأثير على التعاون مع مصر … و في نفس الوقت يسكتوا الرأى العام هناك بأي حاجه و خلاص .
طب السؤال هنا …. و ليه ايطاليا متغطش فعلا على مصر …. و ايه اللى يمنعها من التصعيد الفعلي على مصر !!!! …. القصه هنا بسيطه جدا …. ان مصالح ايطاليا الاستراتيجيه مع مصر و احتياجها ليها …. اكبر بكتييييير من احتياج مصر لايطاليا …. طب ازاي … !!!
شوف يا سيدي …. و في نقط محدده :-
مصر في غضون تلات اربع سنين بالكتير حتبقي من اكبر 3 مصدرى الغاز في العالم و لمده لا تقل عن 100 عام قادمه …. و اللى واخد نصيب الاسد من حقوق التنقيب و الانتاج شركة ايني الايطاليه …. و ده بيدي ايطاليا اهميه اقتصاديه استراتيجيه كبيره جدا في المستقبل …. ده غير العائد الاقتصادي المغرى لانها حيكون عندها مصدر دائم للطاقه و المواد البتروليه بأسعار تفضيليه و اللى حيكون ليها عائد اقتصادي هام جدا على اقتصادها و لتامين مصادر الطاقه لها لمائه عام قادمه على اقل تقدير…. و لو خسروا مصر في مجال الطاقه … فغاز بروم الروسيه تتمني بس اشاره عشان تحط رجلها في البحر المتوسط … و غيرها كتير من الشركات 🙂 🙂
مصر الان هي القوه الوحيده في المنطقه اللى بتحد و بتسيطر على الصداع الدائم لايطاليا و هي الهجره غير الشرعيه في البحر المتوسط …. و بالذات ان اللى بيهاجر دلوقتي مش شباب عايز يشتغل … ده شباب عايز يعمل شلالات دم على شواطىء روما زي ما بيطلع في كل فيديوهات بتاعه داعش و ماعش و اخواتها … و السواحل الليبيه مش بعيده …. دي فركة كعب 🙂 🙂
ايطاليا ليها مصالح استراتيجيه دائمه في ليبيا …. و وجود ايطاليا بدور فاعل في اي حل في الملف الليبي … مسأله استراتيجيه كبيره جدا بالنسبه للطليان …. و محدش حيقدر يفرض حل او يحط رجله في ليبيا غير بالتوافق و مباركة مصر … لسبب بسيط جدا …. القوات الفاعله على الارض في ليبيا تدين بالولاء الكامل لمصر … لان تدريبهم و تسليحهم و التخديم عليهم برا و جوا و برا بقوات مجهوله طوال السنوات الماضيه … كان تحت اشراف مصر … و حتي حكومه الوفاق اللى اتعملت هناك … ملهاش كلمه و لا حيكون ليها قرار خارج نطاق الامن القومي المصري …. ليبيا على الحدود المصريه و دي امن قومي لمصر … و الامن القومي لمصر مفيهوش هزار …. و طوال الثلاث سنوات السابقه … اوروبا و امريكا و ايطاليا و حتي فرنسا حاولوا يفرضوا حلول …. و محدش عرف ياخد خطوه واحده او يفرض حل ترفضه مصر …… يعني ليبيا بوابتها لايطاليا و لغيرها هي القاهره 🙂 🙂
الكلام ده كله طلع في بيان رسمي لوزارة الخارجيه المصريه …. اللى بصراحه كان بيان قوى و حاسم … و اللى صاغه كان فنان …. و اللى فوَّق الطليان و خلاهم يعيدوا حساباتهم تاني …. و تطلع تصريحات من سياسيين تؤكد على اهميه علاقات ايطاليا بمصر … و انهم مش عايزين العلاقات تتأثر …. بس نفسهم يخلصوا القضيه …. و اللى مش حتخلص خالص لان مصر و الطليان و الانجليز عارفين كويس جدا على المستوى الامني و المخابراتي مين هو الحاج ريجيني و كان بيعمل ايه في مصر و مين اللى قتله و ليه …. لكن لان الموضوع مخابراتي و ليس جنائي … فكعادة النوع ده من القضايا حتتقفل ….. لكن اهي ورقه حيتم استخدامها لغاية لما ميبقاش ليها لزمه …. و حيتم نسيانها زي قضايا مشابهه كتيييير بين دول كتير و تم غلقها.
اما ملابسات القضيه نفسها …. فمش حنتكلم عنها لاننا اتكلمنا عنها قبل كده في مقالين مفصلين و مفيش داعي نعيد الكلام
الخلاصه …. القضيه سياسيه اعلاميه يديرها لقطاء الاخوان و اليساريين اللى مش بيسيبوا فرصه لطعن مصر بأي أكاذيب زي ما حصل في زياره فرنسوا هولاند لما جه مصر …. عبر منابر اعلاميه و منظمات دوليه مشبوهه زي منظمة العفو الدوليه و تقاريرها اللى عمرها ما اختلفت عن تقارير قناة الجزيره و قنوات الخرفان في تركيا …. ده غير ضغوط انجليزيه و امريكيه للتصعيد مع مصر او فرملة التعاون معاها للضغط علينا ……. فمصر موقفها قوى …. و في مركز قوه للطليان مش العكس….. و السياسيين هناك عارفين كده كويس …. و عامة عقلهم في راسهم يعرفوا خلاصهم
تحياتنا