13 Nov 2017
لبنان و المجال الحيوي للامن القومي المصري
——————————————————-
على مدار اربع سنوات … نشرنا مئات المقالات التي تشرح و تفنّد ما تواجهه منطقتنا كلها من من حرب عالمية الهدف منها تدمير دول المنطقة ، و محو هويتها ، و القضاء على شعوبها تمهيداً لتقسمها ، و الاستيلاء على ثرواتها ، ثم نقل الصراع الى الشرق الاقصي لاعادة انتاج عجلة التدمير هناك على أراضي هذه الدول.
و اتفقنا على مدي عشرات المقالات ان الحرب دي بــ تعتمد على تهيئة مجتمعات الدول المستهدفه بزرع نخبة مصطنعه من الافاقين و الحثالة و النصابين و المرضي النفسيين يديرهم مجموعة من العملاء الممولين ليحضروا المجتمع لتفكيك نفسه بنفس ذات نفسه من الداخل جر دول الدول المستهدفه الى تسريع ريتم المواجهه …. و الوقوع في الفخ المنصوب لهم بعنايه للمواجهة العنيفة باستخدام القوة المسلحة و هو اسلوب الكاوبوي الفوضوي ((الفوضي الخلاقه)) ، اللى بــ يجيدوا التعامل و التحرك بيه للاجهاز على الانظمة و الدول .
فجميع الدول التي تم هدمها وقعت في هذا الفخ … مثل سوريا و ليبيا و العراق و اليمن …. لكن لان الدولة المصرية دوله قديمة و عريقة و تمتلك الخبرات التاريخية المتراكمة للحفاظ للمرة الألف على نفسها و على المنطقة باكملها …. فــ تنبهت الى هذا المخطط مبكراً و استعدت جيداً … و برعت و علمت العالم كله علم و اسلوب جديد في مواجهة حروب الجيل الرابع و الخامس و هو علم ” الصبر الاستراتيجي”
و علشان ما نطوّلش عليكم … و لان المقدمة دي شرحناها من قبل في عشرات المقالات المفصلة … واللى تقدروا تراجعوها على صفحة الويب بتاعة صفحة كلام في الصميم
و لان ناس كتييييير بعتت لينا لاستيضاح ما يحدث في لبنان وسط كم هاااائل من الشائعات و التخويف و الترهيب بنشوب حرب تطال المنطقه كلها …. فإحنا حنتكلم في نقاط محدده .. نستعمل فيها العقل و المنطق في تفكيك الصورة المشوشة اللى بــ يُراد زرعها في عقول الناس …. ثم اعاده تركيبها مره اخرى …. فــ هات كوباية الشاي بتاعتنا و استحمل معانا الله يرضي عليك و كمل المقال للآخر…. و اعذرنا لو طولنا عليك.
شوف يا سيدي … أولا لازم حضرتك قبل ما تحكم علي شىء بإنفعال و تكون متأثر بجموعه من الاخبار و الشائعات الموجهة المغلوطة …. لازم تحط مجموعة من المحددات و الثوابت الرئيسيه عشان ماتتوهش … و عقلك يشت …. فــ تحكم غلط … و بالتالي تتصرف غلط …. لان حضرتك المقصود و المستهدف من الحرب النفسية دي … و بداية نصر مصر أو هزيمتها … هو مدي وعيك و ايمانك بقضية وطنك .. يعنى الموضوع بيبتدى عندك وينتهى عندك برضوا. !
1- مصر دولة شريفه … لا عمرها تآمرت على أحد و لا عمرها طمعت في غيرها
2- المجال الحيوي للامن القومي المصري اللى بيأثر على حضرتك و على بيتك و اولادك بشكل مباشر يمتد من الخليج العربي الى جبل طارق و من جنوب اوروبا الى وسط افريقيا … فأي حدث في هذه المنطقه … له تأثيره الايجابي او السلبي على بيتك و اولادك مباشرة
3- مصر دولة قديمه و عريقه و تقيله … و هي تقود المنطقه بالكامل سياسيا لبر الامان .
4- لما العدو الفارسي و العثماني يقول ان مصر هي الجائزه الكبري …. و لما الدول العربيه جميعا و خاصة دول الخليج تقول ان مصر هي درع المنطقه و حاميها و هي عمود الخيمه … و لما مصر تقول ان أمن الخليج العربي هو خط احمر بالنسبة للامن القومي المصري … ده مش كلام مجاملات او فض مجالس …….. دي استراتيجيه ثابته … لان انهيار مصر معناها انهيار دول الخليج كاااااملةً .. ومعاها سيتم إلتهام باقي الدول العربية .. و ستكون تبعاته و تأثيره ليس على المنطقه فحسب و لكن على العالم اجمع … و إذا إنهارت دول الخليج و هي خط الدفاع الاول ضد العدو الفارسي … ستكون مصر في وضع استراتيجي من أخطر ما يمكن.
5- دول الخليج ( ما عدا اللى متتسماش) عمرهم ما اخدوا و لا هــ ياخدوا قرار ضد مصر و لا تآمروا عليها … و لا عمر مصر هــ تتآمر على دول الخليج …. و لكن السياسة هي فن الخداع و الممكن …. فالكل يمشي في اتجاه واحد و في خطة واحده بتناغم شديد و لهدف واحد.
6- قضي الامر …. مصر أخذت القرار و تقود المنطقة لتحقيقه .. و هو القضاء و تنظيف المنطقه مما زرعه اهل الشر بقيادة انجلترا على مدي عشرات السنين لاستهداف المنطقة و تدميرها…
- مافيش جماعات دينية داخل مجتماعتنا تاني
- مافيش اخوان و تيارات ريديكاليه تاني
- مافيش جماعات يساريه تدين للغرب بالولاء تاني
- مافيش ميليشيات مسلحه طائفيه تدين للفرس تاني
7- مصر تعمل على اطفاء الحرائق في المنطقه و تهدئة اسلوب الكاوبوى الفوضوي في كل المناطق المحيطة … و جرهم الى الاسلوب الشرقي الهادىء … أخد الحق صنعه.
8- الاخوان هم نظام ملالي ايران ، هم الحوثي ، هم القاعده ، هم داعش ، هم بوكو حرام … و افتح القوس و زود كل اسماء الكلاب السعرانه اللى بــ تنهش في جسد و عرض المنطقه … اللى أنشأهم خواجه انجليزي واحد … و اللى بيسلحهم واحد و اللى بيديرهم و يدربهم و يقولهم يعملوا ايه و ميعملوش ايه هو نفس ذات نفس الخواجه … فــ موضوع سنه و شيعه و سلفيين ده بقي فيلم هندي هابط …. ممكن يبان على مستوى القطيع اللى على الارض المضحوك عليه انهم مختلفين … لكن على مستوى القمه الامر مختلف تماما لانهم حبايب و اخوات و زي السمن على العسل …. و فضيحة ايران جيت اكبر شاهد على كده … لما اسرائيل و امريكا كانوا شوية و هــ يعلنوا الحرب على ايران و في الاخر اكتشفنا اسلحه اسرائيليه امريكيه تنقلها امريكا الى ايران … او مثلا داعش اللى هي سنيه و الرافد الاساسي لكلابها السعرانه هم الاخوان و السلفيين السنه … بتخش المناطق و بعد تنفيذ حملات التطهير العرقي … تقوم تسيبها للقوى المحسوبه على ايران !!!
9- احنا مش ضد الشيعه … و لا حضرتك مطالب انك تكرههم … و لكن احنا ضد استخدام الدين في السياسه …. فاحنا ضد ايران و الاخوان و كل الميليشيات المسلحة ذات الصبغة الدينية
10- دائما و ابدا يجب النظر للامور بعيون مصرية وطنية و ليس بعيون من يحاولون فرض نفسهم عليك … ابحث عن مصلحتك اولا … و اللى هي دايما بتكون مصلحة دولة المنطقه جميعا
النقاط العشرة دول لو اقتنعت بيهم و اخدتهم في حساباتك … هــ ترتاح و تستريح …..
نيجي بقي للموضوع اللبناني … ايه اللى حصل … و ايه دعوات الحرب و طبولها اللى بتستميت جهات و دول و اعلام انوا يسمعهالك بالعافيه … …
شوف يا سيدي … عشان تعرف ايه اللى حصل … ماينفعش تبص علي لبنان خارج سياق المنطقه و ما يحدث فيها … يعني ايه الكلام ده …. يعني لازم تربط مجموع الاحداث كلها مع بعض … فــ مثلا خلينا نبص على آخر كام شهر بس :-
ثلاثي الشر ( قطر-تركيا-ايران) برعاية انجليزية امريكية … زرع في ليبيا 1500 ميليشيا مسلحه تهدد مصر بطول 1200 كيلو متر …. مصر لم تنزلق عسكريا هناك … انشأت و دعمت جيش وطني ليبي مدعوم ببرلمان وطني تم إنشاؤه …. و بــ تقفّل عليهم تشاد من الجنوب … و بــ تقوم بتفكيك الجماعات المسلحه على الارض بهدوء شديد .. و يوم بعد يوم بيتم تمكين الجيش الوطني الليبي من اراضي دولته جزء جزء …. نار ولعت في الغرب و مصر بتطفيها و متسألش عن التفاصيل.
اسرائيل لم تخرج من حدود مصر الشرقيه الا بعد زرع ميليشيا اخوانيه مسلحه في قطاع غزه لاشعال الاوضاع على حدود مصر الشرقيه و داخل سيناء…. مصر ترد بعمل المصالحه الفلسطينيه بعد خنق قطر و محاصره ايران دوليا و تحجيم تركيا اللى لو تلاحظوا بقالها فاتره لا حس و لا خبر
بعدها بكام يوم تقوم اسرائيل تعلن عن دخول مسؤول كبير قطرى قطاع غزه عن طريق معبر اسرائيلي بمبلغ 20 مليون دولالا … و انباء عن زياره وفد من حماس الى طهران في نفس الوقت اللى بتتم محاولة اغتيال مسؤول الامن الفلسطيني في قطاع غزه بعربة مفخخه … و تنتشر الاخبار ان حماس نفضت اديها من اتفاق المصالحه … فــ تحصل حاجة محدش عارفها …. و الامور ترجع كما كنت … و يتم تسليم المعابر و المضي قدما في اتفاق المصالحه … نار ولعت في الشرق و مصر بتطفيها و متسألش عن التفاصيل.
من اكتر من سنة تطلع اخبار ان قوافل المساعدات الوحيده اللى ارتضت الجماعات المسلحه انها تعبر للمدنيين في المدن المحاصره في سوريا عي القوافل المصريه …. و من كام اسبوع … تلاقي خبر صغير ان سوريا و كل الكلاب السعرانه اللى على الارض ارتضت بوساطة مصر في اتفاق وقف اطلاق النار … و الكل يرتضي بدور وساطة مصر على الاراضي السوريه …. نار ولعت في الشمال و مصر بــ تطفيها و ماتسألش عن التفاصيل.
قطر تعربد في المنطقه بكل اريحيه …. قوم بعد كلمة مصر الحاسمة و الواضحه في قمة الرياض الاسلاميه الامريكيه ضد الارهاب …. تقوم دول الخليج بمقاطعة قطر و وضعها في حجمها سياسيا …. نار ولعت في الشرق و مصر بــ تطفيها و ماتسألش عن التفاصيل.
مصر تعلن عن استراتيجية التنمية 2030 … فبعدها باقل من شهر تعلن المملكه السعوديه عن استراتيجية التنمية السعودية 2030 و يتم الاعلان عن مشاريع تنموية مشتركة اقتصادياً و جغرافياً و سياسياً …. ثم تقوم المملكه بحملة تغير مجتمعيه غير مسبوقه لها اهداف معلنه و هي تهيئة المملكه للتنميه الاقتصاديه …. و لها اهدف غير معلنه و هي التخلص من حمل الجماعات الدينيه المتطرفه اللى اتزرعت في المنطقه … سواء على مستوى شيوخ الفتنه … او تابعيهم اللى على الارض … او ضرب منظومتهم الاقتصاديه اللى كانت لها يد كبرى في الصرف او الدعم لهذه الجماعات …. فمثلا … محدش ينكر ان كل الصف الاول من شيوخ الاخوان و السلفيين اللى بيقودوا الجماعات المسلحه على الارض دلوقتي … تم تقديمهم الى المجتمع العربي عن طريق قناة اقرأ في ال ART زمان … و غيرها كتير من شبكات المصالح و الاموال اللى كانت العمود الفقرى لكل الجماعات المسلحه و الجماعات السياسيه اللى كانت بتخدم عليها …. نار ولعت في الشرق و المدرسة المصرية و القرار العربي الموحد بيطفيها و ماتسألش عن التفاصيل.
ايران تتمدد بكل حريه في العراق …. و العدو العثماني يدخل شمال العراق عسكريا لدعم التركمان عسكريا و يقوم الاكراد باستفتاء الانفصال ….. يحصل حاجات على الارض …. تلاقي تركيا سكتت … و نتائج الاستفتاء اتحطت في الدرج … و تصريحات و تحركات ايجابية من العراق تجاه مصر و السعوديه …. نار ولعت في الشمال الشرقي و بتطفي و ماتسألش عن التفاصيل.
اطلاق صاروخ باليستي تجاه الرياض بعدها يتم الاعلان عن وجود جماعات ستقوم بتلغيم باب المندب و استهداف حركة التجارة العالمية المارة هناك …. فــ تحصل حاجه … يقوم الكلام ده يختفي …. …. نار ولعت في الجنوب و التحالف العربي بــ يطفيها و ماتسألش عن التفاصيل.
نيجي بقي الى لبنان …. فــ لبنان دولة فريدة من نوعها في تركيبتها السكانية و السياسية …. فهي تتكون من مجموعه من الطاوئف المختلفه…. و بإختصار شديد و بعد سنوات طويله من الحروب الاهليه اللى كانت كل طائفه فيها تستقوي بقوى خارجيه …. سواء فرنسيه او امريكيه او فلسطينيه او ايرانيه او عربيه او اسرائيليه ….. و للاسف و على مدار سنوات طويله … اسقطت هذه الطوائف بلدها بأيديها في معادلات اقليمية … و اصبح القرار اللبناني يجب ان يتوائم مع مصالح كل الدول و الكيانات الاقليميه اللى هي اصلا متصارعه مع بعض … و كانت الحرب البنانيه هي اول الحروب بالوكالة في التاريخ …. و كان كل زعيم طائقه منهم بيستقوى بطائفته عسكريا …. فتقوم المجزره ردا على تصريح من زعيم اخر … و من الاخر كده و بالبلدي و باختصار شديد …. اللبنانيين ورموا بعد سنين طويله من الحرب الاهليه …. و بعد انتهاء الحرب …. و بالرغم من ان كل طائفه معاها سلاحها اللى هو اقوى من سلاح الجيش الوطني ذات نفسه … الا ان الشعب بذات نفسه بكل طوائفه يقولك … و الله لو الزعماء دول اكلوا بعض … مش حنحارب … يدبروا حالهم مع نفسهم … احنا مش حنحارب الا لو التانيين هم اللى بدأوا .
الحرب الاهليه دي انتهت باتفاق الطائف اللى حضر فيه و أقره 62 نائب لبناني من اصل 73 نائب … اتفق فيه كل الطوائف اللبنانيه على كل شىء … و كان من اهم بنوده … تفكيك سلاح الميليشيات المسلحه لكل الطوائف بدون استثناء … و تكوين جيش وطني لبناني … و اتفقوا على المحاصصة السياسية بين كل الطوائف …. و ان كل طائفة تاخد حته من الحكم … فــ تلاقي هناك 3 مناصب دولة الرئيس ( دولة رئيس الجمهورية و دولة رئيس الوزراء و دولة رئيس البرلمان ) لان اكبر 3 طوائف لازم تاخد منصب من دول.
المهم الاتفاق تم … و البند الوحيد اللى لم ينفذ حتي الان هو نزع سلاح الطائفه الشيعيه اللى بدأت بحركة أمل في الجنوب و انتهت بحزب الله اللبناني و اللى ولاؤه التام لايران و ليس للبنان. … و كالعاده … و كي يتم شرعنة وجود الابن الغير شرعي في لبنان لمن زرع الدوله الاسرائيليه في المنطقه .. و زي ما حصل مع النظام الايراني بصبغ بطوله وهميه له بمعاداته لامريكا و اسرائيل … و بنفس المدرسه اللى استخدمتها اسرائيل في غزه عندما لم تنسحب من غزه الا بعد تثبيت اقدام حماس فيها … انسحبت اسرائيل من جنوب لبنان فجأه بعد زرع حزب الله هناك ..
و عشان مانطولش عليكم …. و بعد ما العالم كان مشغول باللى بيحصل في سوريا و ليبيا و العراق و مصر …. قامت مصر و السعوديه بحركه استباقيه غير متوقعه العام الماضي …. و بعد ما كان بيتم تحضير الموقف في لبنان الى الانفجار لان كان لازم تقوم حرب في لبنان و دي حتكون اصعب حرب في المنطقه لان الشعب هناك متقسم جاهز … الناس صحت الصبح لقت القوي اللبنانيه اتفقت على اختيار رئيس و رئيس وزراء ….. لكن بعد فشل المشروع في مصر و بداية فشله في ليبيا و سوريا و العراق … كان لازم تفجير الوضع مره اخرى …. طب ليه و ازاي ؟؟
ايران فقدت ارض كتيييير جدا في الثلاث سنوات الاخيره … فالاخوان و الجماعات الدينيه اللى كانت ظهير ليهم في مصر و دول الخليج بيتم اكلهم دلوقتي و تنضيف المنطقه منهم …. و بالتالي شرعية وجودهم و تدخلهم الديني اصبحت على المحك …. و كذلك مستقبلهم في العراق بعكس ما يظهر بدأ يصيبه الضعف و الشك … و سوريا بتخلص دلوقتي … و فيه جهود جباااااره بتعملها مصر لانهاء الوضع السوري بما يكفل وحدة الدولة السورية و بما يتوائم مع مصلحة الامن القومي العربي ككل …. و لو كل ده تم … هــ يصبح موطىء قدمهم في جنوب لبنان على المحك … برغم القوه العسكريه التي يمتلكونها … لانها مش حتكون فاضيه ليهم لما الوضع كله يخلص في الاراضي العربيه و يتجه العرب لمحاصرة ايران بذات نفسها و خنقها سياسيا و اقتصاديه ….
فكان لازم يتم اشعال الموقف من جديد لاضفاء شرعيه جديده على الابن الغير شرعي في جنوب لبنان … طب المره دي يحارب مين !!!! … طب اخونا افرايم سولومون قاعد يشرب سجاره و بيتفرج و مش هــ يخش حرب دلوقتي …. و مصر مش بــ تتجر في حروب … و السعوديه و الخليج ماشيين على نفس خط مصر .. و مفيش بينهم و بين لبنان اصلا حدود بريه …. و الداخل اللبناني مش هــ يقوم يحارب بعضه تاني بغض النظر على المحاولات المضيه اللى اتعملت عشان الكل يقوم ياكل في بعضه … يبقي لازم حدث كبير يحصل …. زي مثلا اغتيال زعيم السنه هناك سعد الحريري … و تولع الدنيا … و ده يكون سبب ان حزب الله يثبت اقدامه من جديد على الارض … و ممكن يكبر دماغه و يعمل نفس اللى عملته حماس فى غزه لما انفصلت بغزه عن فلسطين … و حلني بقي اما يلاقي السنه زعيم جديد و يتوافقوا عليه … يكون سبق السيف العزل
السيناريو ده كان الاقرب للحدوث … و اللى يأكده … انك كنت بــ تلاقي كل السياسيين و الميديا و الاعلاميين و الصفحات الاخباريه المشبوهه اللى كانت بتخدم على مشروع الاخوان او مشروع التقسيم …. شغاله الله ينور الفتره اللى فاتت و بتقولك … خلاص الحرب حتقوم … طبول الحرب …. طب حرب بين مين و مين … مايقولّكش حاجه … لكن المهم … او يارب … او ياريت الحرب تقوم بقي.
اللى عمله سعد الحريري و انتقاله فجأه مع كل اسرته الى السعوديه كان ضربة معلم … اجهضت ما كان يتم الترتيب له …. لفتح جبهه اخرى في الصراع العربي مع اهل الشر … و كان هــ يعطي قبلة الحياه مره اخرى لحزب الله اللى هو الان سياسيا في اضعف حالاته … معاه سلاح ايوَة … قوي على الارض ايوَة … لكن قوته قوة العاجز … او المشلول عن الحركه …. لانه سلاح مايقدرش يستخدمه و بالذات في هذا الوقت … لان لو استخدمه دلوقتى ، هــ يكون بيضرب ايران في مقتل و هــ يزيد الضغط فهمي نظمى رسمي عليها … و هــ تواجه تكتل دولي عربي بشكل مرعب في الوقت الحالي.
و اللى يأكد الكلام ده انك كنت تلاقي ان المحسوبين على التيار الشيعي و الاخواني في المنطقه هم اللى كانوا بيحاولوا بتركيز رهييب انهم يقنعوك ان سعد الحريري محتجز في السعوديه و مقبوض عليه … و انهم يا عيني زعلانين عليه و عايزينه يرجع … شوف ازاااااي …. !!! 🙂
و لما تيجي تمسك الاخبار … اللى ماعرفش ازاي ناس كانت بتنشر و تاكد ان مصر هــ تتجر لحرب في الداخل اللبناني …. مع انها لا دخلت ليبيا اللى على حدودها و لا غزه … تلاقي تصريح واضح من القيادة السياسية في مصر يضع ايران و حزب الله في خانة اليك … مصرضد اي عمل عسكرى في المنطقة حتي و ان كان ضد حزب الله او يران لكن امن الخليج خط احمر …. يقوم تاني يوم يطلع تصريح من الامارات انها تدعم التوجه المصري بعدها تصريح من وزير خارجية السعوديه يقول ان موقف السعوديه و مصر متطابق … و بعدها بيومين … يطلع سعد الحريري بنفس ذات نفسه و على الهواء مباشرة يقولك انا راجع لبنان و انا هربت من الاغتيال و استقالتي مشروطه.
الخلاصه … اللعب دلوقتي على تقيل و بيتم بتنسيق مصري خليجي بتناغم تاااااام بمنتهي الحرفيه … و المواجهه كادت ان تصبح مباشره … و لكن بالقوانين و المعاد و المكان اللى تحدده الدول العربيه بقيادة مصر …. و ياريت نسيبكم من نغمة الحرب و الطبول و الدفوف و الكلام الفاضي ده …. احنا مش هــ نقوم بحرب و لن نكون البادئين لها و لن ننجر لها … و لكن اذا قدر لنا …. فسيكون بالشروط و المكان و الزمان الملائم لمصر و الخليج و بالشكل الذي يضمن انتصارنا.
سؤال بس على السريع …. انهي دول في العالم يستحمل اقتصادها نشوب حرب في المنطقه تؤثر على سعر البترول و الطاقه و حركة التجاره العالميه !!!!!؟؟؟؟ … أومّال هي حرب بالوكالة ليه و مش حرب مباشرة ….. 🙂
تحياتنا