07 Jul 2021
السد الأثيوبى – نقطة نظام ..!!
—————————
” لَئِنْ لَمْ يَنْتَهِ الْمُنَافِقُونَ وَالَّذِينَ فِي قُلُوبِهِمْ مَرَضٌ وَالْمُرْجِفُونَ فِي الْمَدِينَةِ لَنُغْرِيَنَّكَ بِهِمْ ثُمَّ لَا يُجَاوِرُونَكَ فِيهَا إِلَّا قَلِيلًا ﴿60﴾ مَلْعُونِينَ ۖ أَيْنَمَا ثُقِفُوا أُخِذُوا وَقُتِّلُوا تَقْتِيلًا ﴿61﴾ سُنَّةَ اللَّهِ فِي الَّذِينَ خَلَوْا مِنْ قَبْلُ ۖ وَلَنْ تَجِدَ لِسُنَّةِ اللَّهِ تَبْدِيلًا ﴿62﴾” …. صدق الله العظيم (سورة الأحزاب).
و كالعادة …. و للاسف نجحت كتائب “المرجفون في المدينة” في جر الرأي العام لمناقشات ابعد ما تكون عن أصل المشكلة …. في محاولة منهم لتشكيل ضغط على متخذ القرار المصرى…. و لاضعاف الجبهة الداخلية و تفكيكها.
كتير بيتكلموا و بيطالبوا باعلان الحرب على اثيوبيا و ضرب السد و كأن مشكلة مصر هى السد نفسه و لو اتضرب كل مشاكلنا حتخلص 😏😏 و لو السد ما إنضربش بكره الصبح يبقي هــ نموت من العطش … و اننا دولة ضعيفة و شكلنا وحش و كرامتنا راحت ….. و ده كلام منافي تماما للواقع.
للاسف نفس الفيلم الهندى و نفس الحرب النفسية اللى بتتعمل دلوقتى …. هى نفسها اللى اتعملت قبل كده من نفس التيار و نفس الاشخاص ” المرجفون في المدينة” في مواضيع زى :-
◀️ إزاى سايبين اعتصام رابعة !؟ .. المفروض الجيش يضربهم بالطيارات …. دولة ضعيفة و قيادة هــ تضيع البلد !!
◀️ إزاى سايبين الارهاب في سيناء !؟ …. المفروض الجيش يبيد القبائل بالقرى بتاعتهم اللى هناك عاطل على باطل و نخلص بقي …. دولة ضعيفة و قيادة هــ تضيع البلد !!
◀️ إزاي بيحفروا قناة السويس غلط و يدمروا البيئة البحرية …. دولة ضعيفة و قيادة هــ تضيع البلد !!
◀️ إزاي تنازلت مصر عن حدودها البحرية و حقول الغاز في البحر …. دولة ضعيفة و قيادة هــ تضيع البلد !!
◀️ إزاى نعوّم الجنيه و نشيل الدعم و نسيب الناس تموت من الجوع …. دولة ضعيفة و قيادة هــ تضيع البلد !!
◀️ إزاي نسيب ليبيا للاحتلال التركى اللى جنوده خلاص هــ يوصلوا السلوم بعد بكره و يدخلوا مصر …. دولة ضعيفة و قيادة هــ تضيع البلد !!
◀️ إزاي سايبين قطر و تركيا يلعبوا في المنطقة … المفروض الجيش يدخل يشيل قطر من الوجود و نعلن الحرب على تركيا و نضربها عشان نخضعهم لينا …. دولة ضعيفة و قيادة هــ تضيع البلد !!
و غيرها كتيييييير من المواضيع اللى كل مرة الناس بتكتشف ان الدولة المصرية حققت اللى هى عايزه … و فرضت ارادتها كاملة …. و بأفضل سيناريو و بأقل تكلفة …. و بحلول محدش كان بيفكر فيها و لا يعرفها …. و ساعتها …. بينسي كل اللى كان بيقوله و يدور على موضوع تانى يزايد بيه على دولته و قيادتها.
و يعتبر أفضل من وصّف الوضع الحالى بين مصر و اثيوبيا هو الاستاذ الكبير / أسامة الدليل …. ربنا يديه الصحة …. لما قال ” الناس اللى عمالة تتكلم عن حتمية الحل العسكرى و تأخره …. عاملين بالظبط زى الراجل اللى رجع البيت لقي مراته بتخونه على الكنبة …. فــ جرى الدم في عروقه و ساب المشكلة الرئيسية و هى الخيانة …. و قام حارق الكنبة 🙈 … أهو السد ده هو الكنبة ….. لكن مشكلتنا الحقيقية مع اثيوبيا هى تصرفات حكومتها و توجهها لاستعمال المياه للتحكم في مصر و فرض ارادتها عليها”
و علشان مانتوهش من بعض ….. و عشان نوضح الصورة …. و زى ما اتعودنا مع بعض …. هات كوباية الشاي بتاعتنا …. و حنتكلم في نقاط محدده :-
مصر عمرها ما كانت مشكلتها اقامة سد على النيل …. بدليل وجود ٦ سدود داخل السودان اكبرهم سد الروصيرص و عمرنا ما سمعنا عن مشاكل بسببهم …. بالعكس …. ده مصر حتشترك في بناء سد “واو” في السودان الجنوبي …. لان السدود مفيدة جدا للتنمية و تنظيم تدفق المياه طوال العام يعنى في مصلحتنا …. و ده في حالة بناؤه لغرض التنمية المشتركة و ليس منع الماء و استخدامه للتعطيش او التحكم في الدول زى ما اثيوبيا عايزة تعمل.
أي عمل عسكرى في الدنيا ليس هدف في حد ذاته و لكن هو وسيلة للوصول لاتفاق قانونى ملزم للطرفين زى ما حصل معانا مع اسرائيل لما استرجعنا سيناء …. و بعد كده القوة العسكرية هى اللى بتحمى تنفيذ هذه الاتفاقية.
كل دول العالم الكبيرة عندها انهار دولية …. و مبلطجة على دول تانية في الميه …. يعنى كله ملطوط …. و القوانين الدولية مطاطة في الموضوع ده …. و العالم مليان مشاكل في اقتسام المياه و الكل قاعد بيراقب هــ نحلها ازاى …. فاللى بتعمله مصر دلوقتى هــ يكون سابقة تاريخية الكل هــ يمشي عليها بعد كده لانها اول مواجهه بين دولتين بسبب المياه ….
عشان كده مصر بتشرك العالم كله و بتشهده على انها بتسعى بكل الطرق و بتستنفذ كل الطرق السلمية لانشاء اتفاق قانونى سلمى ملزم .. و الا هــ تعمل سابقة دولية في استخدام الحلول العسكرية لحل مشاكل المياه …. و ده هــ يكون خطر على الامن و السلم العالمى …. يعنى عدانا العيب و أزح.
اثيوبيا نظامها نظام نصاب بينصب على شعبه بافتعال الحروب …. للتغطية على سرقاته الداخلية زى ما نصب عليهم و عمل سد معيوب …. و بيعمل المستحيل ان مصر تضرب السد اللى حتى بعد الملىء الثانى مش هــ يقدر يخزن اكتر من ٧ مليار متر فقط …. يعنى لازم تعرف ان طول ما مصر مأجلة الحل العسكرى …. فهو ممكن و متاح …. فسيبك بقي الله يرضي عليك من قصة انه لو الملىء الثانى بدأ فمش حنعرف نضرب السد …. سيب الناس الفاهمة و اللى عندها المعلومات الحقيقية تشتغل و سيبك من هرى الفيسبوك.
اعرف كويس ان مصر لو هــ تستخدم الحل العسكرى هــ يكون موجه الى مشكلتها الرئيسية و هو النظام الاثيوبي ذات نفسه …. يعنى آخر و اسهل هدف هــ يتضرب ، هــ يكون السد نفسه …. و احنا صابرين لاننا مش عايزين تارخيا ان يذكر عن مصر انها ضربت و أرجعت حضاريا دولة افريقية ١٠٠ سنة الى الوراء ….. فإحنا بنشّهد العالم اننا لو وصلنا للحل ده …. ماحدش يرجع يلومنا.
موضوع انا متغاظ و لازم نربيهم و انا متوتر و لازم نقوم بعمل عسكرى عشان ازييط بيه على زمايلي في الشغل …. ده اسلوب تعمله حضرتك مع جارك اللى بــ يبلطج عليك في ركنة العربية في الشارع …. مش في علاقات دولية و مصير شعوب.
مصر اعلنتها صريحة اكتر من مرة …. ماحدش هــ يقدر ياخد نقطة مية من مصر و اللى عايز يجرب يجرب …. الاسلوب بقي ايه و هــ نعمل ده ازاى …. مش بتاعة حضرتك و لا تفهم فيه …. ده بتاع القيادة المصرية اللى عمرها ما خذلت حضرتك و لا ضيعت حق من حقوقك …. موضوع بقي حقول الغاز و تيران و صنافير و الجنيه اللى غلب الكارنيه …. ده كلام ضانى بليّة كبيرة ملناش دعوة بيه.
تانى و تالت و رابع …. هدفنا هو الوصول لاتفاقية قانونية ملزمة لها تفاصيلها الفنية و القانونية اللى ماينفعش تتكسر حتى لو بارادة اثيوبيا …. زيها زى الاتفاقيات الملزمة اللى مع السودان و اللى بتشغل بيها ال ٦ سدود اللى عندها …. و الاتفاقية دى تحميها قوة عسكرية قادرة على حمايتها…. يعنى ممكن تعديل تصميم السد باضافة فتحات او تخفيض ارتفاعه و تبادل معلومات و غيرها من التفاصيل الفنية …. غير كده …. القوة العسكرية هــ تكون الفاعلة ….. و فنيا …. لسه قدامنا وقت كبير قد يتجاوز العام او الاتنين قبل الوصول لحجم مياه داخل خزان السد تمنعنا من العمل العسكرى …. لسه بدرى …
تاااااانى …. مصر اعلنتها كتيييير …. مسألة المياه حياة او موت و مافيهاش هزار …. و ماحدش هــ يقدر ياخد نقطة مية من مصر ..
و أخيراً …. التاريخ بــ يعيد نفسه …. نفس اللى بيحصل دلوقتى هو نفس اللى حصل مع السادات في ٧١ و ٧٢ …. يلا حارب …. انت خايف تحارب …. هــ نحارب امتى !!؟ …. فين الكرامة !!؟ …. فين المواقف !!؟ …
الخلاصة :-
======
عيني في عينك كده …. انت و اللى جنبك و اللى قاعد وراك عارفين و متأكدين ان موضوع السد حيخلص و مفيش نقطة مية هــ تنقص …. بس انت نفسك تشوف و تتفرج على جيشك بيضرب و طيارات و غارات عشان تقعد تتفشخر …. يعنى موضوع نفسية و عصبية مش اكتر.
العلاقات الدولية لا تحل بمنصات هرى الفيسبوك …. ريح نفسك و إبعد عن “المرجفون في المدينة” اللى كل مرة يهزوك و يلعبوا باعصابك …. انت مش هــ تكون اقدر من دولة باجهزتها … و رئيسها كان مدير مخابرات حربية ….. خلّيك تقيل و سيب الامور لرجالها.
حط في بطنك بطيخة صيفي …. موضوع السد خلصان تماماً و اعرف ان خلع تنظيم الاخوان من مصر و ايقاف مشروع الشرق الاوسط الجديد و تحجيم ذراعة في المنطقة و هو النظام التركى كان اصعب بكتيييييير من موضوع السد الخايب ده ….. اثيوبيا خلاص رايحة في الوبا و ربنا يكون في عون شعبها.
كل الدعم للقيادة و الدولة المصرية اللى عمرها ما ضيعتنا و لا هــ تضيّعنا
حفظ الله مصر برئيسها وجيشها وشعبها 🙏
والمجد للثابتين … 💪