18 Nov 2021
الرباعي العربي و نكتة التعاون الإماراتى التركي لضرب لقناة السويس. (الجزء الأول)
———————————————————————————————————-
- التعاون الإماراتي التركي.
- إعلان تحويل المجلس التركي إلى منظمة الدول التركية.
- تهديد الإجتياح الروسي لأوكرانيا.
- أزمة الحدود بين بيلاروسيا و بولندا تعطي قبلة الحياة لتركيا.
- الإنتخابات الليبية.
- حرب الطاقة بين السعودية و أمريكا.
- الحرب الأهلية في أثيوبيا.
- التعاون الأمني المصري الإسرائيلي و تعديل إتفاقية كامب ديفيد.
بصوا بقي …. المقال دة تقيل شوية …. و محتاج كوباية شاي … أو ترمس شاي …. لان المواضيع فيه متشابكة و معقدة لأقصي درجة و مينفعش تفهم موضوع من غير ما تربطها بالباقي …. و لأن الموضوع طويل و الأحداث متلاحقة و ممكن الناس تتوه شوية … فإحنا حنقسم الموضوع على أكتر من مقال …. ده أولهم و حيكون مقدمة لضبط بعض المفاهيم ….. فركز كده معايا الله يرضي عليك و حتسمع كلام حيكيفك 😊 .
نمسك أول موضوع و هو التعاون الإماراتي التركي ….. فـ إمبارح أعلن مسؤولين أتراك عبر وكالة رويترز عن زيارة للشيخ محمد بن زايد الى تركيا يوم 24 نوفمبر القادم لأول مرة من 10 سنوات ليكسر بها جمود العلاقات و العداء البارد بين الدولتين … و إعلانهم عن بدء تدشين علاقة جديدة بين البلدين و دعم كبير منتظر من الإمارات للإقتصاد التركي الذي يعاني من إنهيار كبير …. و بدأت أخبار يتم تداولها عن تدشين خط نقل ملاحي – بري ما بين (الإمارات و ايران و تركيا) و الذي ستم من خلالة نقل الحاويات من جبل على الى ميناء إيراني … ثم يتم نقلها بريا عبر ايران لتعبر الحدود التركية و يتم شحنها مرة أخرى على سفن في المواني التركية و بذلك تتجنب العبور من قناة السويس … 😊 .
طبعا بدأ القطيع إياه في نشر الخبر بكثافة و و شغلوا الإسطوانات و مناحات الشماته إياها …. شفتم الإمارات باعت مصر …. و المستقبل مع تركيا …. و راحت عليكم … و قناة السويس خلاص إنضربت …. و هييييييييه 😊 😊
طب الأول قبل ما نتكلم في أي حاجه …. و عشان المرارة الله يرضي عليكم و المرجيحة اللى الناس بتركبها كل شوية و للأسف مش بتتعلم …… فـ من سنة 1956 لما تم تأميم القناة و لغاية النهاردة … يعني من 65 سنة …. كل شوية حد يطلع و يقولك خلاص حـ يتعمل بديل لقناة السويس … اللى يقولك حنحفر قناة من إيلات الى حيفا … و اللى يقولك لأ …. ده خط سكة حديد من ايلات الى حيفا … و اللى يقولك لأ …. خد الجديد بقي …. ده خط سكة حديد من ايران الى البحر الأسود …. و هرى كتييييير …. المهم انه يقولك خلاص حتتعمل 😊 …. طب محدش سأل نفسة لية مفيش دولة أو حتي أي تحالف بين مجموعة دول إتجرأوا و حاولوا يعملوا أي بديل لقناة السويس أو ينفذوا أي هري من المشاريع اللى بقالكم سنين بتسمعوه في الإعلام من سنة 1956 لغاية النهاردة ؟؟؟؟ 😊 ….
إحنا مش حنهري كتير … بس في كلمة و رد غطاها …. مركب واحدة بس زي “إيفرجفن” حبيبة قلبنا اللى كلنا فاكرينها 😊 بتشيل 24 ألف حاوية مكافئة (TU) … عارف ده معناه إية ؟؟ 😊 … يعني لو تم تفريغ المركب دي و اترصت الحاويات دي قدام بعض على قطار سكة حديد … فإنت عايز قطار من 12 ألف عربة … و طولة حوالى 160 كيلو متر …. يعنى القطار أولة يبقي في محطة رمسيس في القاهرة و أخرة مثلا في دمنهور 😊 …. و العلم الحالى و المستقبلي لا فيه قطار بالطول ده و لا فيه جرارات بها قوة قطر تقدر تجر العدد الهائل دة من العربات بوزن البضاعة اللى فيها …. بخلاف الوقت اللى حيتاخد لتفريغ العدد الهائل دة من الحاويات و رصها على القطار الوهمي ده …. و الوقت ما بين نقطة الإنطلاق و الوصول و إعادة شحنها على سفينة أخري …. فـ إنت بتتكلم في أسابيع بخلاف العمالة الهائلة و تكلفتها و تأمينها لو بتعدي ما بين دول بحدودها …. في حين إن قناة السويس بيعدي فيها 80 مركب زي إيفرجفن و أكبر منها في اليوم الواحد …. يعني الكلام دي خيال علمي لا يمت للواقع بصله …. فالله يرضي عليكم بلاش تركبوا مرجيحة الهري دي …. فـ اللى يعرف يعمل حاجة … يبطل كلام و يورينا نفسه. 😊 😊
نرجع بقي للموضوع الأول و هو التحركات الإماراتية مع تركيا و أخبار إعادة العلاقات ما بينهم …. 😊
فاكر مرجيحة التعاون الإماراتي مع أثيوبيا ضد مصر و زيارة أبى أحمد لأبوظبي السنة اللى فاتت و الكلام عن تعزيز العلاقات ما بينهم ؟ 😊
طب فاكر مرجيحة زيارة أبي أحمد للسعودية و زيارة وزير الدولة السعودي للشئون الإفريقية أحمد القطان لأديس أبابا و تسلمة رسالة من الملك سلمان تؤكد على التنسيق المشترك ما بين البلدين لتعزيز العلاقات و قالك الكلام ده ضد مصر؟ 😊
طب فاكر مرجيحة زيادة الإستثمارات الإماراتية و السعودية في أثيوبيا في نفس وقت التصعيد الأثيوبي ضد مصر و قالك الخليج بيشتغل ضد مصر؟ 😊
طب فاكر مرجيحة إتفاق مصر على مد الغاز المصري للبنان في نفس وقت قطع العلاقات الخليجية سياسيا و إقتصاديا مع لبنان و قالك مصر بتشتغل ضد الخليج ؟ 😊
طب فاكر مرجيحة دخول مصر العراق لنقل تجربتها الإقتصادية و قالك مصر داخلة تاخد دور السعودية اللى على حدود العراق ؟ 😊
و غيرها كتييييير المراجيح اللى الناس اتلعب بيها …. فـ ببساطة …. اللى مش فاهم إن الرباعي العربي في أوج درجات التنسيق ما بينهم يركن على جنب …. و كل اللى بيحصل هو مجرد تبادل أدوار ما بينهم لعمل إختراقات في جبهات الصراع في منطقتنا مش أكتر .
طب محدش أخد باله إن كل التحركات دي معلنة و غير سرية و واضحة للجميع و بتحصل بشكل عادي جدا و علاقات الرباعي العربي في أفضل حالاتها ؟؟ …. طب محدش أخد باله إن الإمارات و السعودية من أكبر المستثمرين في محور قناة السويس و هم أكبر داعم إقتصادي لمصر و إن كل التحركات اللى بتحصل تحس إنك بتتفرج على هجمة مرتدة في ماتش كرة قدم كل لاعب يباصي الكورة و يصلحها للتاني و يوسعلة و يديلة المجال انه يشوط على الجون.
طب محدش أخد باله إن الإعلان عن الزيارة تم في نفس الوقت اللى وزير الخارجية المصري موجود حاليا بالإمارات … في نفس الوقت اللى الطيران المصري و الإماراتي موجودين في اليونان مع الطيران القبرصي و الفرنسي لعمل مناورات حربية في شرق المتوسط لدعم قبرص و اليونان في مواجهة الأطماع التركية 😊
طب محدش أخد باله إن ثالث مستورد للمنتجات المصرية العام الحالى هي تركيا و إن فيه طفرة كبيرة جدا للإستثمار التركي داخل مصر و عدد كبير لرجال الأعمال الأتراك بدأو ينقلوا أعمالهم لمصر 😊 .
أمال ايه الهدف الحقيقي من الزيارة ؟؟؟ …. ده بقي حنتكلم علية بالتفصيل المقال القادم إن شاء الله … إهدي بس أنت كده على نفسك و اتفرج و إتعلم و إتكيف 😊
تحيا مصر و تحياتنا.