الرباعي العربي و نكتة التعاون الإماراتى التركي لضرب لقناة السويس.  (الجزء الثاني)

20 Nov 2021

الرباعي العربي و نكتة التعاون الإماراتى التركي لضرب لقناة السويس.  (الجزء الثاني)

————————————————————————————

  • التعاون الإماراتي التركي.
  • إعلان تحويل المجلس التركي إلى منظمة الدول التركية.
  • تهديد الإجتياح الروسي لأوكرانيا.
  • أزمة الحدود بين بيلاروسيا و بولندا تعطي قبلة الحياة لتركيا.
  • الإنتخابات الليبية.
  • حرب الطاقة بين السعودية و أمريكا.
  • الحرب الأهلية في أثيوبيا.
  • التعاون الأمني المصري الإسرائيلي و تعديل إتفاقية كامب ديفيد.

في المقال السابق اتكلمنا عن التحركات العربية لمواجهة الأطماع التركية في المنطقة…. و عشان نفهم الأخبار المتلاحقة دي …. لازم تاخد بالك من حاجة مهمة … و هو تاريخ 2030 و اللى تحس إن إتفق علية دول العالم و كأن الفترة دي هى إمتحان صعب حيعدي على الجميع و اللى حيوصل فيه للتاريخ ده سالم حيكون نجح في الإمتحان …. و حيكون ليه شأن كبير في نظام عالمي جديد بيتشكل دلوقتي .

و في مقالات سابقه كتير اتكلمنا عن مخطط تدمير دول المنطقة و جيوشها الوطنية و تقسيمها و ان ده كان بيتوافق مع احلام عثمانلية الأناضول اللى اشتركوا في المخطط ده و كان كل هدفهم انهم يوصلوا 2030 و يكونوا كونوا إمبراطورية عثمانلية تسيطر سياسيا و عسكريا على منطقة الشرق الأوسط و شمال أفريقيا لصالح من يديرون هذا المخطط …. و بعد كده يقوموا بتكوين جيوش جراره من شباب هذه الدول اللى كان بيسميها اعلاميا العناصر المحلية الداعمة يبعتوها تحارب الصين في شرق اسيا و روسيا في منطقة القوقاز بحجة نصرة الدين و مسلمين بورما و القوقاز … و يبقي كدة ضربنا كل العصافير بحجر واحد …. امريكا و اوروبا استولت على خيرات المنطقة و حاربت و استنزفت روسيا و الصين بدون ان تخسر دولار واحد او جندي واحد….. و كلنا شوفنا نواة الجيش دة بالعناصر و الميليشيات السورية اللى كان بيبعتها قردوغان عشان تحتل ليبيا و شمال سوريا…. و كان المفروض إعلان الامبراطورية العثمانية الجديدة يكون في 2023

طب إية دخل الكلام ده كلة بالرباعي العربي و موضوع المقال ؟؟؟؟ … أصبر بس يا صديقي و متستعجلش لان كله مربوط ببعضه 😊 😊

الكلام ده باظ تماما بسبب 30 يونيو و قائدها و شعبها اللى وقف للاطماع دي و انتهت بالخط الأحمر الشهير في ليبيا و خروج الأسطول المصري في شرق المتوسط ليحمي مقدراته و ثرواته و يتعاون عسكريا مع قبرص و اليونان و اقتصاديا مع اسرائيل …. و تخرج تركيا من شرق المتوسط بخفي حنين 😊 …. و تخسر علاقاتها مع كل جيرانها لدرجة ان ماحدش بقي طايق النظام التركي … لا اوروبا و لا امريكا و لا حتي روسيا ….  فـ تبدأ تركيا تبتز اوروبا بموضوع اللاجئين …. و تدخل تركيا في مستنقع من الازمات الإقتصادية و يوصل الدولار الى 10.65 ليره بعد ما كان ب 2 ليره فقط ….

و بعد فشله في تحقيق اطماعه في الشرق الأوسط و خسارته لحلفاؤه الغربيين و حتي خسارته لروسيا اللى استغلته احسن استغلال لتثبيت رجلها في المنطقة و بعدين في الاخر رمته…. لان روسيا عمرها ما حتنسي له اسقاطه للطياره الحربية و لا قتل السفير الروسي امام الكاميرات ….. فـ تأكد النظام التركي أنه اتباع فهمي نظمي رسمي و اصبح عبىء على الجميع …. فبدأ يستغل الموقف الحالي بين روسيا و الغرب في حرب الطاقة …. و الأوضاع المتلاحقة عن تباطوء امدادات الغاز الروسي لأوروبا و تهديده بغزو أوكرانيا و دخول بيلاروسيا في صف روسيا و بداية حرب حدود باردة و اشتباكات محدودة  بينها و بين بولندا لتهديد المانيا بإغراقها باللاجئين …. و صعود اسعار الغاز الى مستويات قياسية تهدد الإقتصاد الوروبي و تضربه في مقتل …. لدرجة إعلان منظمة الطاقة الأوروبية حالة الطوارىء و الإجتماع الدائم لأول مرة منذ حرب 1973 ….. و ده اللى هنشرحه بالتفصيل في المقال القادم لأن فيه كلام كتير “عنب” 😊  و لعب على كبير يستاهل مقال مفصل

طب عمل ايه بقي الحج قردوغان …. بدأ يغازل الغرب بالخطة القديمة تاني 😊 …. بس مش في جزئها الأول بتاع الشرق الأوسط لأنه فشل فيه و سبق السيف العزل …. لكن في جزئها التاني الخاص بروسيا و اللعب في منطقة القوقاز …. يمكن الغرب يرضي عليه و يديله فرصة تانية .

فأعلنت تركيا يوم الجمعة اللى فاتت تحويل المجلس التركي الى منظمة الدول التركية !!!!! …. طب إيه يا عم الدول التركية دي ؟؟؟ …. قالك ده تحالف بين خمس دول ناطقة باللغة التركيه هم ( تركيا – أذربيجان – وكازاخستان -قيرغيزستان – أوزباكستان ) و دي منظمة ظاهرها التعاون الإقتصادي و لكن هدفها الحقيقي هو مواجهة روسيا بتحالف اسلامي و لعب كبير في الساحة الخلفية لروسيا في منطقة القوقاز 😊

طب هو أصلا الدول دي ناطقة بالتركية ؟؟؟ …. يا سيدي متدقش قوي 😊 … ماهو اللغة التركية أصلا مش لغة أصلية و لكن هجينه و داخل فيها كتير من لغات أهل القوقاز … فاللغات في الدول دي قريبة شوية من اللغة التركية …. يعني سهل قوي التقارب و الدول دي لو الغرب استخدمها هتبقي بيئة خصبة جدا و مكان آمن للميليشيات بتاعة الجهاد على الكفار و يلا نحارب روسيا الكافرة زي زمان و كدهون …. و نبقي عملنا واجب مع الغرب في مواجهة روسيا …

ها ….  إيه رأيكم بقي ؟؟ … مش أنا كده حلو و جميل و أستاهل ترضوا عني و أكمل في الحكم ؟؟؟ … ساعدوني بقي إقتصاديا لان خلاص البلد بقت على الحديدة  😊 😊

دي الورقة الأخيره اللى في إيد تركيا دلوقتي و اللى بتلاعب بيها الغرب …. لدرجة تهديده العلني بإحداث حالة من الفوضي لن يتصورها أحد إذا تم إقصاؤه في الإنتخابات القادمة …. في رسالة تبان في ظاهرها أنها موجهة الى ناخبيه … و لكنها موجهة اساسا الى الغرب انه هيستخدم ميليشياته في تفجبر منطقة شرق أوروبا و منطقة القوقاز بالإرهاب الجهادي و اللى حيطال روسيا و اوروبا و منطقة الشرق الأوسط … يعني عليا و على أعدائي و فيها يا أخفيها 😊   … و هو مركز جدا في الخطة بتاعته و مفضي نفسه ليها تماما …. عشان كده بيحاول يعمل هدنة مع العرب في الشرق الأوسط و مهدي اللعب خالص في شرق المتوسط عشان يفضي لمواجهة الدب الروسي بدعم غربي …. و الورقة الوحيدة اللى بيلعب بيها في شرق المتوسط هي الإنتخابات الليبية اللى الجميع أصر على دعم تنفيذ الرؤية المصرية سواء اوروبا او امريكا او حتي روسيا .

طب الحاج بوتين مايعرفش الكلام ده ؟؟؟؟ و هيسيبه يلعب في فناؤه الخلفي و ينفذ المخطط بتاعه ؟؟؟ … و ايه اللى بتعمله روسيا في مواجهتها مع الغرب …. و هل حيقدر قردوغان على روسيا و هي دولة عظمي برده مش دولة صغيرة ؟؟ … و هل المخطط ده حينجح إنه يكون طوق النجاه له ؟؟؟ … و برده ماقلتش ايه دخل كل ده بتحركات الرباعي العربي تجاه تركيا ؟؟؟

مش هنعرف نجاوب على السؤال ده … غير لما نكمل شرح في التحركات الروسية في اوروبا و حرب تكسير العظم بين روسيا و الغرب اللى شغاله دلوقتي و اللى قد تتحول لإجتياحات عسكرية و حرب في اوروبا … و دة اللى هنشرحه المقال القادم ان شاء الله .

طب إحنا ايه وضعنا من كل ده ؟؟؟ …. إحنا المستفيد الأكبر من كل الأحداث دي … إحنا خلصنا مذاكرة و دخلنا الإمتحان و نجحنا بتفوق … و قاعدين نتفرج على المطحنة اللى شغالة في الدور التانى من الإمتحانات …. و قاعدين نلم في أرباحنا سواء إقتصاديا بعد ارتفاع اسعار الغاز … او جيوسياسيا بعد تأكد اوروبا ان مصر هي الحليف السياسي و الإقتصادي المؤتمن على المنطقة 😊

تابعونا في المقال القادم .

تحيا مصر و تحياتنا.

لمتابعة تعليقاتكم