22 Nov 2021
الرباعي العربي و نكتة التعاون الإماراتى التركي لضرب لقناة السويس. (الجزء الثالث)
حرب الغاز الأوروبي – دائما الإجابة بالخريطة
——————————————————————
- التعاون الإماراتي التركي.
- إعلان تحويل المجلس التركي إلى منظمة الدول التركية.
- تهديد الإجتياح الروسي لأوكرانيا.
- أزمة الحدود بين بيلاروسيا و بولندا تعطي قبلة الحياة لتركيا.
- الإنتخابات الليبية.
- حرب الطاقة بين السعودية و أمريكا.
- الحرب الأهلية في أثيوبيا.
- التعاون الأمني المصري الإسرائيلي و تعديل إتفاقية كامب ديفيد.
في المقالين السابقين إتكلمنا عن تحركات الرباعي العربي تجاه تركيا … و المخططات التركية للمحافظة على وجوده بعد خروجه من جميع معاركه بخسارة فادحه سواء في الشرق الأوسط او في شرق المتوسط و احساسه ان الكل باعه بعد ما أصبح ثقيل العبىء على الجميع سواء امريكا او اوروبا او حتي روسيا …. و بدأ يستخدم آخر أوراقه و هي إستثماراته في الإرهاب الجهادي للضغط على الجميع للمفاضلة بقبول بقاؤه او بتفجير الوضع على الجميع بمبدأ عليا و على أعدائي …. و تقديم نفسه كرأس حربه لمواجهة حليفه السابق روسيا لصالح الغرب … و مع إننا شرحنا الكلام ده في مقالات مفصلة سابقة …. و عشان نفهم علاقة تركيا بروسيا و إييه سبب الأزمة الحالية ما بين روسيا و أوروبا ….. لازم نحكي القصة من الأول …. فـ واحدة واحدة كده و طول بالك و أصبر معايا لان الجزء ده طويل شوية و مينفعش يتجزأ …. و هات كوباية الشاى بتاعتنا و ركز معانا لان الكلام دلوقتي إحلو جدا 😊.
شوف يا سيدي …. بعد سقوط الإتحاد السوفيتي …. امريكا و الغرب بدأوا يزحفوا و يقربوا شوية شوية على حدود روسيا الغربية بإستقطاب دول و قبول عضويتها في الإتحاد الأوروبي و حلف الناتو بعد ما كانت جزء من الإتحاد السوفيتي و حائط الصد لها في مواجهة اوروبا الغربية …. زي مثلا بولندا و رومانيا و لاتفيا و ليتوانيا و كرواتيا و بلغاريا و التشيك و غيرهم…. و طبعا ده بيمثل تهديد مباشر على روسيا … لان تخيل إن قوات حلف الناتو البرية بدأت توصل على الحدود المباشرة لروسيا في حين إن أمريكا في الجانب الآخر من العالم و يبعد أقرب جندي روسي لها آلاف الأميال …. فلما جه بوتين الحكم …. حاول يرجَّع روسيا تاني كقوة عظمى في مواجة الغرب و أكيد مش حيقدر يغير الوضع على الأرض … لكن بدأ يشتغل على تكوين حائط ممانعة و دفاعي مهم و لقي إن أهم سلاح ممكن يعتمد عليه هو سلاح الطاقة …. و نجحت روسيا بإمتياز كبير أنها تقدم نفسها لأوروبا كمورد أساسي و رخيص للغاز اللى أوروبا ماتقدرش تستغني عنه لانه بيمس إقتصادها مباشرة و حياة مواطنيها ….
روسيا قدمت تنازلات كتير للغرب للوصول للهدف ده سواء سياسيا او اقتصاديا او حتي تعاقديا في شروط بناء خطوط الغاز و تكلفتها ….. و لعبت على عنصر الطمع و الجشع الغربي و أظهرت نفسها متعمدة إنها الدولة المفككة الغلبانة اللى بتحاول تبيع مواردها بأي شروط عشان محتاجة فلوس تبني نفسها و تأكل شعبها … بالبلدي كده … إتمسكنت لحد ما إتمكنت 😊 … لأن روسيا لم تنس تارها القديم مع الغرب اللى فكك إمبراطوريتها و ذلها قدام العالم و إستولى و سيطر على إرثها في دول أوروبا الشرقية….
و في الآخر نجحت روسيا إنها تمد أوروبا كلها بالغاز عبر أنابيب من حدودها الى أوكرانيا … و من أوكرانيا بيتم توزيع الغاز الروسي على بقية أوروبا في مقابل إنها بتاخد جزء من الغاز بسعر تفضيلي و فوقيها مليار و ربع دولار قيمة إستخدام اراضيها لنقل الغاز …. يعني بالبلدي كده … الماسورة الأم بتاعة الغاز الروسي الأوروبي و التوزيعة الرئيسية بقت في دولة واحدة و هي أوكرانيا اللى أظهرت ولاء و وفاء تام لروسيا و لم تنضم لا لحلف الناتو ولا الاتحاد الأوروبي حتي اليوم لأن أكتر من نصف شعبها و بالذات القريب من الحدود الروسية بيتكلم روسي و بيعتبروا نفسهم روس و الباقي ما بين متعاطف او بيكره روسيا …. و دي الغلطة الإستراتيجية اللى عملتها روسيا انها وضعت البيض في سلة واحدة 😊 .
المهم …. روسيا إستخدمت عائدات التصدير لبناء نفسها مرة أخرى و بالذات في الشق العسكرى و التسليح اللى تسارعت وتيرة نموه و تطوره لإعادة الأمجاد الروسية مرة أخرى …. و نجحت روسيا في هدفها الحقيقي 😊 …. مش أنت بتزحف و بتقرب على حدودي و بتهددني … طب أنا وصلت إني دخلت عندك و بقيت متحكم في الطاقة اللى انت عايش بيها … و مش كده و بس … ده أنا نجحت إني أخش كل بيت و فندق و كشك أو حتي كوخ داخل بلادكم …. و مافيش مواطن أوروبي يقدر يستغني عني ….. و في اللحظة دي … بدأت روسيا تفرض نفسها و تحط شروطها أمام الغرب لإيقاف زحف حلف الناتو لحدودها الغربية …. و وصل الأمر إن لو الحاج بوتين زعل بس …. يقعد يحط رجل على رجل و يحط إيده بس على محبس الغاز …. يقوم يترعب المواطن و الناخب الأوروبي و يضغط على حكوماته لمسايرة روسيا … لأن البديل أنه حيتجمد هو و عياله من البرد في الشتاء 😊 .
طب حلو قوى الكلام ده …. إييه دخلنا إحنا بالقصة دي و دخل تركيا و دخل موضوع المقال أصلا ؟؟؟؟ …. أصبر شوية بس يا صديقي ….. التقيل جاي ورا …. لان المواضيع كلها مرتبطة ببعض و انت شخصيا جزء أصيل من المشهد ده 😊 .
في اللحظة دي أمريكا و الغرب فاقوا …. و بدأو يدوروا على بديل للغاز الروسي … و بدأوا في إحياء المشروع القديم و هو خط غاز (نابوكو) …. و اللى المفروض حينقل غاز وسط اسيا و بحر قزوين و منطقة القوقاز …. يروح على تركيا …. و من تركيا يطلع على أوكرانيا عبر اقليم القرم عشان يستغلوا البنية التحتية المنشأه بالفعل هناك … و يفصلوا الماسورة اللى جاية من روسيا و يركبوا مكانها ماسورة خط نابوكو … و الفرع تاني يروح على بلغاريا و رومانيا و منهم الى بقية اوروبا …. زي الخريطة اللى موجودة في الصورة في الربع اليمين اللى فوق ….. تمام كده ؟؟!!! … و عشان الغاز ده حيكون جاي من مناطق متوترة أصلا سياسيا …. ففكروا كمان يتوصل معاه غاز منطقتين تانيين … و هو غاز الخليج القطري ….. و الإيراني كمان لو نفع …. و غاز شرق المتوسط اللى أحتياطياته التقديرية تكفي اوروبا سنين طويلة 😊.
بس عشان المخطط ده يحصل … كان لازم يتم ترتيب المنطقة بالكامل سياسيا …. فلازم يتم الإستيلاء على اوكرانيا … و تقوية تركيا سياسيا و عسكريا …. و تفكيك دول المنطقة سواء منطقة الخليج … او منطقة الشرق الأوسط زي مصر و العراق و سوريا و ليبيا اللى حيتاخد الغاز بتاعهم و يطلع في انابيب عبر سوريا الى تركيا ثم الى اوروبا كلها … و طبعا مافيش حركة سياسية في المنطقة بتأجر نفسها بالفلوس و تقدر تقود المخطط ده غير إبنهم الغير شرعي التنظيم الإرهابي للاخوان سواء في مصر او تركيا …. و اللى توافق ده مع أطماعها في المنطقة و أحلامها في إعادة تكوين الدولة العثمانية مره أخرى … فتم دعم القرد اعلاميا و اقتصاديا و عسكريا بمنتهي القوة …. و تم التحضير على الأرض كويس جدا لبداية المخطط إما باستغلال أوضاع سياسية و اقتصادية او بفرضها على الأرض …. و بدأ تنفيذ المخطط أو ما يسمي بالثورات الملونة اللى الغرب كان كل تحركاته ساعتها إن الدول تتفكك و يتم تسليم السلطة لفصيل واحد بس و هو تنظيم الإخوان الإرهابي …. و ده اللى عشناه و عارفين تفاصيله و عارفين اتواجه ازاي و تم دحره ازاي و مش حنحكي فيه تاني .
المهم في زحمة الأحداث دي اشتغلوا على أوكرانيا … و لقينا لأول مرة الثورات الملونة تظهر في شوارعها … و اللى افرزت المطالبة بانتخابات و دستور جديد …. و في لحظة عجيبة اتعمل فيها خداع كبير لوعي الناس هناك باستخدام الإعلام و مواقع التواصل الإجتماعي ….. اتشالت الحكومة الموالية لروسيا و جت حكومة جديدة … و اكتشف الشعب إنهم مجموعة ليبرالية تدين بالولاء الكامل لأمريكا … و بالمعني الحرفي للكلمة … مافيش حد فيهم بيخش الحمام غير لما يتصل يستأذن من واشنطن … و هنا فاقت روسيا اللى مالحقتش تسيطر على الأحداث …. و بدأ الأمن القومي لروسيا يتهدد بشكل كبير لأن الموضوع مش حيقف على تهديد امداد الغاز لأوروبا … ده كمان الحكومة في اول يوم اعلنت انها حتخش حلف الناتو و الاتحاد الاوروبي.
روسيا رفضت نتايج الإنتخابات و لعبت للغرب في الأزرق و اتحركت و ضربت ضربة معلم و قالت انا ححل الموضوع من جذوره … فـ دخلت استولت على اقليم القرم بذات نفسه و بكده قطعت جغرافيا موضوع مد خط الغاز لأوكرانيا عشان تحيدها و تستفرد بيها بعدين … و بدأت تستخدم نصف الشعب الأوكراني اللى بيدين ليها بالولاء لعمل مظاهرات لرفض الإنتخابات وإعادتها او بالإنفصال عن اوكرانيا و الإنضمام لروسيا ….. فطبعا الحكومة بعتت الشرطة و الجيش لفرض الأمن بالقوة في المنطقة الشرقية … فإتفاجئت بإن روسيا سلحت عبر حدودها المواطنين هناك بالسلاح و المسلحين المدربين او كما يقال بمجموعات فاجنر القتالية … و اللى بهدلوا الجيش الأوكراني و مسحوا بيه الأرض … بيوقعوا ليهم طيارات قتالية و قصف مدفعي و تكتيكات عسكرية و كأنهم بيواجهوا جيش نظامي متطور أو الجيش الروسي بذات نفسه …. و وصل الأمر أنهم بدأو يزحفوا ناحية العاصمة نفسها …. فالغرب اتحرك بسرعة لأنقاذ الحكومة الموالية له … و لعب لعبة محترفة …. بصراحة …. ملعوبة 😊 …. فتم إسقاط طائرة ركاب مدنية فوق الإقليم الشرقي لأوكرانيا اللى فيه الناس المواليين لروسيا و يموت كل اللى فيها … و يتهم الغرب كله روسيا باسقاطها و يقوم بـ تهييج الرأي العام العالمي عليها …. ليتم ايقاف القتال … و الكبار يقعدوا مع بعض و يتفقوا على لمّ الدور …. و يتم الإتفاق على ان يبقي الوضع على ماهو عليه ….. روسيا توقف القتال و خططها للإستيلاء على اوكرانيا و تسيب الحكومة الموالية للغرب في مقابل استمرار تدفق الغاز الروسي عبر اوكرانيا و عدم ضم اوكرانيا للإتحاد الأوروبي أو حلف الناتو 😊 .
طب روسيا تسكت ؟؟؟ … لأ …. و عشان تأمن نفسها …. لازم تُفشِل خط غاز نابوكو المدعوم من الغرب تماما …. فعملت حاجتين …
أولا :- بدأت تشق الصف الأوروبي بالتفاوض المباشر مع الجنوب الأوروبي الأكثر فقرا بالنسبة لشماله …. و أعلنت عن إنشاء خط غاز السيل الجنوبي اللى مساره موجود في الخريطتين اللى في الجزء العلوي من الصورة …. من روسيا الى رومانيا و بلغاريا كبديل رخيص لغاز نابوكو لان الخط ده حيكون أقصر و تكلفتة أقل بدلا من غاز قاطع آلاف الأميال و متحمل على تمنه ايجار مروره في أكثر من دولة …. و ده قوبل برفض أمريكي و دول شمال اوروبا …. بس دول جنوب أوروبا وقفولهم و قالولهم أنتوا دول أغنياء و مش بيهمكم حاجة … سيبونا ننمي نفسنا و متقفوش في طريقنا.
ثانيا :- قام ناطط جوه تركيا ذات نفسها العضوه في حلف الناتو و اللى بيها أكبر قواعد الحلف الجوية في العالم عشان يضرب التحالف الغربي في مقتل … و عشان يأمن تواجده في سوريا عشان يقطع جغرافيا أي فكرة مستقبلية لإعادة تنفيذ خط غاز “نابوكو” … و بدأ يلعب مع القرد نفسيا مستغل عقدة النفسية في السيطرة و جنون العظمة …. و يقوله انت مستقبلك معايا … سيبك من امريكا و الغرب … و ياسيدي لو على احلامك إن ماسورة الغاز تبقي عندك … ولا تزعل يا عم … أنا بقي حعملك خط غاز مخصوص يطلع من عندي و يمر من خلالك لأوروبا و حسميه “ترك ستريم” … و حبيعلك سلاح و نعمل تحالف مشترك و حـ تتنغنغ فلوس …. و حجوزك هنومه يا قناوى يا ولدي 😊 ….. و أخده على حجره خاااالص 😊 …. لدرجة إن الدول الغربية بدأت تلعب في الأزرق و يستفزوا في روسيا عشان يكسروا التعاون الروسي التركي باي تمن … فـ خططوا لإسقاط الطائرة السوخوي الروسية … فبوتين يقوله أكيد مش قصدك … يقتلوله السفير الروسي على الهواء مباشرة في أكبر إهانة لدولة عظمي … فبوتين يقوله أكيد مش أنت … إنت حد جميل …. لغاية لما أقنعه يقع في المحظور و يشترى منه نظام الدفاع الجوى الـS400 اللى لغاية دلوقتي ماشتغلش و لا حيشتغل أصلا لأن روسيا مش عبيطة تطلع اسرارها العسكرية لواحد مخبول حيروح يبيعها للغرب في اي وقت … و أمريكا و الغرب أدرك إنها بتتعامل فعلا مع واحد مخبول و لازم يتم التخلص منه في اسرع وقت….. فهدف بوتين أنه كان يحرق ورقة تركيا تماما في إيد الغرب و في الآخر يرميها في الأرض.
طب روسيا تسكت على كده ؟؟؟ … أبدأ … قامت مكملة خطتها بإقامة بدائل جغرافية متعدده لإستمرار سيطرتها على امدادات الطاقة لأوروبا و راحت ضاربة اسفين تاني داخل الأتحاد الأوروبي …. و متفقة مع ألمانيا منفردة على مد خط انابيب تاني ما بينهم مباشر في البحر … لا بيمر على دول و لا حاجه زي ما هو واضح في الخريطة في الجزء السفلي من الصورة و سمته خط “السيل الشمالى” … و بالتالي حيكون سعره أرخص لأنه مش متحمل بأيجارات مرور عبر دول …. و ده مفيد جدا لألمانيا قاطرة الإقتصاد الأوروبي …. ساعتها أمريكا و بقية اوروبا اعترضوا و هدوا الدنيا …. بس ألمانيا هي اللى بتصرف على أوروبا و فرضت كلمتها و قالتلهم مصلحتي أهم … و ده من أهم الأسباب اللى الحاج أبو حنان “ترامب” ساعتها هدد اوروبا بإنه حيسحب الجيش الأمريكي من اوروبا و حيسيبهم يواجهوا روسيا لوحدهم … و إن مادام أنتوا بتدوروا على مصلحتكم … إدفعوا بقي تمن الحماية ليكم … و طلع كلام في اوروبا ساعتها إنهم بيفكروا يعملوا حلف عسكري لوحدهم …. و كانت العلاقات الأمريكية الأوروبية في أسوء اوقاتها….. المهم الخط ده خلص السنادي و جاهز على العمل.
قوم إية بقي يا مؤمن … ألمانيا تبدأ ترضخ نسبيا للضغوط الأمريكية و الأوروبية بعد مجىء الديمقراطيين حبايب ألمانيا الليبرالية …. بس بطريقة مسك العصاية من النص … فـ قالت لروسيا معلش … الخط ده مش حينفع يشتغل دلوقتي بسبب إن مكتب شركة غاز بروم الروسية طبقا لسجلها التجاري مش موجوده في ألمانيا و لكن في سويسرا و لا ينطبق عليها القانون الألماني … فياريت الشركة تستوفي ورقها و تفتح مكتب تمثيل في برلين و هو اللى يوقع العقود الجديدة عشان نعرف نشغل الخط قانوني … 😊
طبعا أمريكا إتجننت لأن الحجة الألمانية شكلها تأجيل و ليس إلغاء … لكن روسيا عملت معاهم الصح …. قامت مع قدوم الشتاء و في الوقت الصح … قللت امدادات الغاز لأوروبا و اللى سبب أزمة طاقة رهيبة في أوروبا و رفعت أسعاره بشكل جنوني … و ده اللى مش أثر على الدول و الحكومات … لكن وصل تأثيره داخل كل بيت أوروبي اللى يا مابقوش لاقيين غاز … أو ان كل مواطن أوروبي بقي بيصوت من فواتير الغاز اللى تضاعفت عليه بشكل جنوني و بدأ يضغط على حكومته إنها تحل الموضوع ده بأي شكل مع روسيا ….
طب بوتين يسكت على كده ؟؟؟ … أبدا 😊 …. راح لاعب بورقة محدش كان يتوقعها و هي الحاج “لوكاشينكو” رئيس دولة بيلاروسيا 😊 اللى هي على حدود روسيا و شمال أوكرانيا …. و ده بقي حكاية و حدوته لوحده … و لازم نحكيها عشان الصورة تكمل ….. فالحاج “لوكاشينكو” ده أول رئيس لبيلاروسيا من اول إستقلالها عن الإتحاد السوفيتي من 1994 … و من ساعتها و هو رئيس و ماسابش الحكم ….. و هو دلوقتي في الفترة الرئاسية رقم 6 …. و هو بيعتبر حاكم قوي ماسك البلد من حديد و بيدين بالولاء الكامل لروسيا و مسمحش للغرب أنهم يعملوا فيه زي ما عملوا في أوكرانيا …. و آخر إنتخابات نجح فيها برده و لكن الغرب اتهموا بالتزوير و مش معترفين بالنتايج …. قام ضارب كرسي في الكلوب و استغل الموقف تمام التمام … عمل اييه بقي 😊 …. قام أعلن عن إتحاد ما بينه و بين روسيا … و قال لبوتين إنت سيدي و تاج راسي و اللى يمسني يمسك … دافع عني بقي … و قام منفذ خطة عجيبة … الغرب صحى الصبح لقي سفارة بيلاروسيا في تركيا بتلم اللاجئين السوريين و بتديهم فيزا سياحة لبيلاروسيا و الخطوط التركية بتنقلهم هناك … و اتوبيسات بتاخدهم من المطار و بترميهم على الحدود مع بولندا عشان يقتحموها …. و يدخلوا هناك .
طب إيه الهدف ؟؟ … ظاهريا …. إن “لوكاشينكو” بيضغط على الغرب إنهم يسيبوه في حاله … لكن الهدف الحقيقي إن المهاجرين دول هدفهم مش بولندا خاااالص …. الهدف إنهم يعبروا بولندا و يروحوا ألمانيا يعيشوا فيها …. و بالتالي روسيا بتضرب كذا عصفور بحجر واحد … منها إنها بتضغط على ألمانيا بالغاز و بالمهاجرين عشان توافق تشغل خط الغاز اللى موقفاه …. و منها إنها بتدعم بيلاروسيا عشان الغرب يسيبوها في حالها ….
طبعا أوروبا إتجننت … و قالت لروسيا كده ماينفعش … هو إحنا ناقصين … فالحاج بوتين ببراءة الأطفال قالهم و أنا مالى … لا المهاجرين دول طالعين من عندي و لا الطيران الروسي هو اللى بينقلهم … روحوا شوفوا مين اللى بيعمل كده …. إحنا عمرنا ما بنتدخل في شئون الدول الأخري 😊 ….. راح أول حاجة عملوها إنهم هددوا تركيا بتوقيع عقوبات على شركة طيرانها و على الإقتصاد التركي اللى أصلا واقع و رايح في ستين داهية 😊 😊 …. الله !!! طب و أنا مالى يا لمبي 😊…. و أنا ناقص يا خويا 😊
المهم عشان مانطولش عليكم لأن التفاصيل كتييييير جدا …. تركيا واقعة في مصيبة من كل ناحية و مع الجميع لأنها حشرت نفسها في كل المصايب كعادة الغباء الإخو انجي بإمتياز … و بقت في مواجهة مع الجميع سواء روسيا او اوروبا او أمريكا …. يعني مسكت السلك عريان و بتلوش بالمعني الحرفي للكلمة.
طيب إنتوا مـ قلتوش برده …. ايه دخل كل ده بتحركات الرباعي العربي تجاه تركيا ؟؟؟ و حنتعامل معاها ازاي ؟؟ …. برده ده مش حنعرف نجاوب عليه بشكل مباشر غير لما نكمل الصورة بالمواجهة السعودية الأمريكية و حرب تكسير العظام ما بينهم … و الأوضاع في أثيوبيا و ليبيا …. 😊
تابعونا في المقال القادم .
تحيا مصر و تحياتنا.