الرباعي العربي و نكتة التعاون الإماراتى التركي لضرب لقناة السويس (الجزء الخامس)
————————————————————————————
- التعاون الإماراتي التركي.
- إعلان تحويل المجلس التركي إلى منظمة الدول التركية.
- تهديد الإجتياح الروسي لأوكرانيا.
- أزمة الحدود بين بيلاروسيا و بولندا تعطي قبلة الحياة لتركيا.
- الإنتخابات الليبية.
- حرب الطاقة بين السعودية و أمريكا.
- الحرب الأهلية في أثيوبيا.
- التعاون الأمني المصري الإسرائيلي و تعديل إتفاقية كامب ديفيد.
إتكلمنا في الأربع أجزاء الماضية عن تحركات الرباعي العربي تجاه تركيا و دورها في تنفيذ مخطط تفتيت المنطقة و الإستيلاء على ثرواتها لصالح الغرب … و ربطنا ده بحرب الطاقة (الغاز) بين روسيا و أوروبا و دور تركيا فيها …. و حرب الطاقة بين السعودية و الغرب … و النهاردة حنتكلم عن تحركات الرباعي و تبادل الأدوار في العراق و اثيوبيا و تركيا و ليبيا…. و اللى حنجاوب فيه عن تساؤلات الكثير عن التحركات الإماراتية و السعودية في اثيوبيا و ليبيا و تركيا.
مقدمه :-
———
بصوا بقي …. فيه مقدمة مهمه جدا لازم نستوعبها …. لازم نعترف إن معظمنا مستجد سياسة …. و قبل 2010 …. كان عندنا مشكلة كبيره جدا في الوعي الجمعي اللى استولى عليه التيار الديني و اليسارى المخترق من الخارج و اللى شكلوا عندنا وعي زائف لمشاكلنا و ده لاسباب كتير اتكلمنا عليها بالتفصيل و كان النظام السياسي القائم مشارك فيه …. و كان كتير مننا كان أقصي إهتمام ليه هو ماتشات الكورة و الدورى العام او التنظير على ملفات فساد و إطلاق النكات السياسية … و ده كان نتيجته ان لما الناس نزلت في الشوارع …. نجح قطاع واسع من المثقفين و المنظرين انهم يقودوا قطاع كبير من الناس لاختيارات كانت كلها خاطئة و لبّست البلد في الحيط لما سلموا البلد لتنظيم ارهابي …. و لغاية النهاردة فيه ناس كتير بتتكلم في السياسة من منطلق علاقاتهم الشخصية الضيقة … يعني انا متخانق مع فلان … فلازم صاحبي يجي معايا عشان نحدفه بالطوب مع بعض و كأنها عركة في في الشارع …. او بيتكلم و ينظر على ادارة الدول و سياساتها الخارجية زي ما بيدير محل البقاله بتاعه …. في حين ان السياسة المرتبطة بمصائر الشعوب تختلف تماما عن الكلام الساذج ده.
و ده ظهر بوضوح جدا في كل القضايا اللى مرينا بيها في آخر 8 سنوات …. طبعا واحد حيقول … إنت بتنعتنا بالجهل !!!! … إحنا متعلمين و فاهمين و من حقنا نعرف و نقرر و نشارك و كفاية بقي و كدهون … 😊 😊 ….
طب أقولك حاجة .
فاكر اللى كان بينتقد و بينظّر و بيحلف طلاق تلاته بمنتهي الثقه بعد ترسيم الحدود البحريه إن مصر اتنازلت عن حقول غاز شرق المتوسط لإسرائيل و قبرص و اليونان … و بعدها طلع كل الكلام ده هجص 😊
فاكر اللى كان بينتقد و بينظّر و بيحلف طلاق تلاته بمنتهي الثقه إن مصر باعت سيناء في حاجة اسمها صفقة القرن و إزاي تتعاون مع اسرائيل و بعدها اكتشفنا إن مصر بتعمر في سيناء و عدلت اتفاقية كامب ديفيد و الجيش المصري دلوقتي على الحدود رسميا 😊.
فاكر اللى كان بينتقد و بينظّر و بيحلف طلاق تلاته بمنتهي الثقه إن مصر لازم تدخل ليبيا عشان تحمي حدودها الغربية … و طلع كلامه كله غلط و إن سياسة الردع و ضبط النفس المصري نجحت في تحقيق الهدف ده من غير إطلاق رصاصة واحده 😊.
طب فاكر قد إية ناس كتير كانت مقتنعة إن مصر لازم تدخل تضرب سد الضحك الأثيوبي (النهضة) اللى عمره ما حيكمل أصلا …. و كان بيتكلم عن الخنوع المصري و الذل و الهوان و كدهون … و طلع إن القرار المصري ساعتها كان صح و إن ضرب السد ساعتها كان حيبقي طوق النجاه للنظام الأثيوبي و كان فخ منصوب لمصر بمنتهي العناية.
طب فاكر الكلام اللى اتقال لما مصر راحت العراق و قالك مصر بتتحدي السعودية بتمددها داخل دوله على حدودها الشمالية و في عمقها الإستراتيجي … و طلع الكلام كله غلط.
و غيرها كتير من المواقف اللى مش لازم تتشرح و تتناقش للرأي العام …. لأن مفيش دولة في الدنيا بتناقش تحركاتها و قراراتها في أوقات مواجهات و صدامات دولية و تطرحها للرأي العام يهري فيها … و كلنا نفتكر كلمة الرئيس للشعب المصري …. بلاش هرى 😊 … يعني خليكوا في اللى انتوا فيه لانكم متعرفوش حاجه و سيبونا نشتغل صح.
و الجزء الخامس النهاردة مرتبط ارتباط وثيق بالأجزاء السابقة … فـ ياريت اللى مقراش الأجزاء … يقراها الأول عشان يربط المواضيع كلها ببعض … لأن اللى مش مقتنع إن الرباعي العربي بيتحرك ككتلة واحده من بعد هجمة 2011 بما يسمي الربيع العربي و إن قيادات هذا الرباعي مقتنعين إن مصيرهم واحد في معادلة صفرية لا يجوز فيها غير الإنتصار و فرض الإرادة أو الفناء الى الأبد … و إنهم بيتحركوا في تبادل أدوار رائع و بتنسيق تاااااام و عرف يفك الإشتباك بين العلاقة الدولية المشتركة و التنافس الإقتصادي الشريف ما بينهم اللى برده ماشي بتنسيق كبير و تكامل ….. حيفضل كل مره ينظَّر و يعارض و يدي من قلبة على الفاضي … و في الآخر حيطلع كلامة غلط زي كل مره و حـ يلاقي النتيجة على الأرض في صالح الرباعي مجتمعين و كلامه كله غلط … زي ما حصل في الأمثلة اللى قلناها قبل كده و غيرها كتييييير من اللى شوفناه. 😊
————————————–
و عشان المقدمة كانت كبيره بس مهمه … فاحنا حختصر الكلام في جزئين و هما … الملف الأثيوبي و الملف التركي.
بالنسبة للملف الأثيوبي … يجي هنا سؤال …. هل من مصلحة مصر إن أثيوبيا تتفكك كحكومة مركزية و تقوم حرب أهليه تطول مداها لسنين ؟؟؟؟ …. الأجالة قولا واحدا … لأ طبعا …. طب ليه ؟؟؟؟ … أقولك.
دولة زي الصومال عدد سكانها مكملش 15 مليون بس … بقالها عشرات السنين وضعها عامل قلق رهيب في المنطقة من بعد ما اتفتت و ده أدي الى وجود قواعد عسكرية من بلاد كتييييير… قواعد امريكية و فرنسية و تركية و غيرها ….. تخيل بقي أثيوبيا اللى هي دولة فيها كتلة سكانية كبيره 100 مليون …. و لو الأمور فيها فرطت و حصل فراغ هناك …. الفراغ ده حيتملي بالإرهاب اللى حيضرب في القرن الإفريقي كله و اريتريا و السودان و يهدد منابع النيل و البحر الأحمر… يعني صلب الأمن القومي المصري …. و حتخش دول كتير تفرض سيطرتها بالوكالة …. و كل دولة حتحارب التانيه و تحاول تفرض اجندتها و تصفية حساباتها مع القوي التانية في داخل القاره بواسطة الكلاب السعرانة المسلحة اللى حتطلقها في المنطقة … و ده بيمثل خطورة كبيره على الأمن القومي المصري …. طب دول زي مين ؟؟؟ … زي إسرائيل و تركيا و امريكا و الصين …. و كمان إيران 😊 …. اللى ظهرت أسلحتها بأيدي جيش أبي أحمد زي درونات “مهاجر 6” و اللى ممكن بعد شوية نلاقي تجربة اليمن انتقلت الى القرن الإفريقي و نلاقي الحرس الثورى عدي البحر و قاعد في اثيوبيا جنوب مصر …. طبعا ده مثال واحد للى ممكن يحصل من الفراغ اللى ممكن يحصل هناك….
الفراغ ده لازم يتملى على الأرض بحلفاء و ليس بأعداء تحسبا لأي سيناريو حيحصل و ده سبب التحركات السعودية و الإماراتية اللى بنشوفها بين الحين و الآخر هناك … و هي تحركات مش بتضر مصر خالص بل على العكس …. و اللى يقولك بينقلوا سلاح لأبي أحمد … قولة فين السلاح ده و عمل بيه إيه و إيه نتيجته على الأرض ؟؟؟ …. طب إسأله إنت شوفت الكلام ده ؟؟؟؟ …. حيقولك … بيقولوا على الفيس و الصحفي الفلاني كتب و المقال العلاني قال … و كلها صحف مشمومه أو ضد الرباعي العربي ذات نفسه 😊
واحد حيجي يسأل … يعني مصر عايزه تدعم أبي أحمد ؟؟؟ … الإجابة لأ طبعا و أفضل سيناريو لمصر هو إنتقال للسلطة يحافظ على كيان الدولة الأثيوبية من التفكك …. أما موضوع سد الضحك الأثيوبي فهو إنكشف للعامة خلاص لأن مصر عارفة و متأكده إن السد ده عمره ما حيكمل لأسباب هندسية و كلنا شوفنا فشل الملىء الأول (الملىء الثاني مبدأش أصلا ) اللى موصلش حتي 6 مليار حتي الآن و ليس 18 و نصف مليار زي ما كان بيقولوا السنة دي و التصريحات الأثيوبية إن الملىء ممكن ياخد 10 سنين …. يعني أكثر من المدة اللى كانت طالباها مصر أصلا اللى هي كانت 7 سنين ….. و سبب بناؤه هو جر مصر لحرب وفخ كان منصوب ليها و متحضر كويس …. و عشان كده كان الإستفزاز فوق الوصف و كأن الأثيوبيين كانوا شوية و حيبوسوا إيد مصر عشان تضربهم … و لما مصر مضربتش … أبي أحمد كارته اتحرق و فشل في مهمته عشان كده الغرب باعه …. و عامة موقف مصر واضح و معلن … اتفاق ملزم عشان محدش يكررها تاني في حوض النيل مش أكتر … فمن الآخر … كل التحركات الإماراتية هناك هي تحركات محسوبة بعناية و بتنسيق كامل مع الرباعي العربي ….
و هي على فكرة نفس التحركات مع الجانب التركي 😊 …. يا تري محدش أخد باله إن في نفس يوم زيارة محمد بن زايد لتركيا … كانت الطيارات المقاتلة الإماراتية بتشترك مع مصر و اليونان و قبرص و فرنسا في مناورات قتالية “ميدوزا” في شرق المتوسط و على الحدود التركية !!!! و في نفس الوقت كان وزير الخارجية المصري في الامارات …. و بعد الزياره مباشرة تم الإعلان عن إتصال هاتفي بين الشيخ محمد بن زايد و الرئيس السيسي أعلن فيها أنها كانت للتنسيق و لتوحيد المواقف ….
طب محدش فكر في تبعات إنهيار تركيا أو انفجار الوضع فيها و دخول دول فيها زي إيران أو الجماعات المسلحة !!!! …. و إيجابيات دخول الرباعي العربي مبكرا هناك و عرض شراء الكثير من الأصول التركية المتحكمة في إقتصادها برخص التراب أثناء أزمة إقتصادية هناك في إتفاقات مشروطة …. في مقابل تعهد تركيا و تنفيذها الفعلي على الأرض بتغيير سياساتها التوسعية في الوطن العربي و عدم تأثيرها على الإنتخابات الليبية و إنسحابها من شمال العراق و سوريا !!!!
أردوغان وقع و فلس خلاص … و بدأ من كام شهر يتودد لمصر علنيا و ساق علينا الدنيا كلها عشان نتصالح معاه و كان مفكر إنة لما يخرص الكام كل/ب اللى عنده … مصر حتجري عليه … لقي مصر رجلها تقيلة و قالت مفيش تقدم في العلاقات غير لما يطلع من ليبيا و شرق المتوسط و شمال سوريا و العراق …. و ردت مصر بتعميق التحالف الإقتصادي مع اليونان و قبرص لتشديد الخناق عليه …. و إقتصادة وقع و الليره و التضخم عنده فقد السيطره عليهم … فمحدش حينقذه غير إنه يصلح علاقاته مع كل أطراف الرباعي العربي ….. يعني من الآخر …. الإمارات راحت تتفاوض معاه و ترميلة الحبل … و هو و اختياره … يا يمسك فيه و يطلع من الدوامة … يا إما يلفة حوالين رقبته و يتخنق بيه …. و لاحظ إن مبلغ الـ 10 مليار ده هو كلام اعلامي مش أكتر لأن المبلغ ده و لا يعمل حاجة في الإقتصاد التركي المنهار و محدش بيرمي فلوس كاش و يمشي …. دي مجرد بروتوكولات و اتفاقيات تفاهم مشروطة.
و من إمبارح بدأ اردوغان يطلق تصريحات مفادها إنه عقل و حيصلح علاقته بجيرانه زي اسرائيل و مصر لأن ده من مصلحة تركيا …. عامة ….. أفلح إن صدق … و الحبل في إيدة 😊 … و إن كنا نتوقع إن الغباء الجيني للإخو/ن حيكون سيد الموقف …. و أدينا شوفنا سعر الليره و هو نازل يغرق حتي بعد الإعلان عن نتائج الزياره و البنك المركزي يعلن عن تدخلة السيادي لإنقاذ الليره …. و ده معناه حاجة واحده …. الفاااااااتحه 😊 😊
تنسيق الرباعي العربي على أعلى مستوي …. و كلنا شوفنا مشروع الطاقة و تبادل المياه المشترك اللى كان بين (الإمارات و الأردن و اسرائيل) اللى أعلن عنه …. و بمجرد اتصال السعودية بالإمارات إن المشروع ده حيأثر على مشروع نيوم و مشروعات الطاقة الخضراء في السعودية …. الإمارات وقفت المشروع فورا …. و ده بيدل على التنسيق التام ما بينهم.
ياريت منقلقش و بلاش ننجر ورا الناس اللى بتسخن …. و مش لازم تفهم كل حاجة في وقتها … و تأكد إن من يدير الأمور في الرباعي العربي هم مجموعة من المعلمين و الصنايعية اللى إيديهم تتلف في حرير …. و التنسيق و تبادل الأدوار على أعلي مستوي …. و سيب الأمور تمشي و متشغلش بالك … و إعرف ان الدولة اللى حسمت كل الملفات الخارجية بمنتهي الحرفية و النجاح في أوقات كنا في موقف أضعف بكتير من دلوقتي …. مش مستنية يوتيوبر و لا بوست على الفيس عشان يقولها تعمل إية و الخطر فين و تتصرف إزاي …. يعني من الآخر كده …. متشغلش بالك بالهري 😊
تحيا مصر و تحياتنا.