21 Aug 2014
ما بين العدوان الثلاثي 1956 / و الحرب العالميه الثالثه
معركه المصير خارجيه و ليست داخليه – الجزء الثالث
—————————————————–
أصدقاؤنا الاعزاء ….. تكلمنا في المقال الاول و الثاني علي تأصيل اسباب كل الاحداث العالميه و الاقليميه و المحليه و ما تواجهه مصر و عن التحالفات العالميه المتصارعه في معركة البقاء ….. و الذي يؤكد إعادة تشكيل موازين القوي عالميا و إقليميا و الدور المصري فيها من منظور عالمي.
و اتفقنا ايضا ان 30 يونيو و تحالف الجيش مع الشعب كان الحدث الفارق اللى غير المعادله على الارض و غير موازين القوي و افشل كل المؤامرات ليس على منطقه الشرق الاوسط فقط بل على العالم اجمع.
اليوم سنتحدث عن مصر و لكن من منظور اقليمي …. يعني حنقرب شويه و نركز داخل منطقة الشرق الاوسط.
و ايضا اتفقنا ان الخطه الغربيه تعتمد على اسلوب الكاو بوي …. فيهدف جر بلادنا الى حراك يبدأ فوضويا بالشوارع ثم يؤدي الى جر الشعوب الى الاقتتال الداخلي بآليات جاهزه و منفذين جاهزين على الارض مدعومين بآله اعلاميه و دعم سياسي غربي و الهدف هو تفتيت الجيوش النظاميه و تحويلها الى ميلشيات لافشال الدوله حتي يستكملوا مخططاتهم لتفتيت المنطقه كلها .
و ان الخطه المضاده كانت تمويييييت الاحداث على قدر المستطاع و عدم الانسياق وراء الاستفزازات في الشوارع لؤد الخطه في مهدها مهما حدث …. و ان يتم الرد على العقل المدبر نفسه في عقر داره …. و نقل المعركه من معركه عسكريه على ارضنا الى معركه اقتصاديه تطول آثارها مواطنيهم في عقر دارهم.
الخطه دي كانت مصريه خاااالصه و بدأ التحضير لها من اكثر من 10 او 15 سنه و تم جر الغرب و اجباره على عدم استهداف مصر عسكريا كالنموذج العراقي …. و تطميعهم في إستهداف مصر بحروب الجيل الرابع من الحروب …. و للاختصار …. كنا نزلنا مقال بيتكلم عن الموضوع ده بالتفصيل قبل كده …. و اللى مقرأهوش يبعتلنا في تعليق و حنبعتله لينك المقال فورا 🙂 🙂
المهم ….. اول تحالف عربي حنتكلم عنه هو اكيد التحالف الخليجي و بالذات السعودي …. و عشان تعرفوا قيمة الدور السعودي التاريخي و ليه الرئيس السيسي دائم الحديث عن دور الملك عبد الله …. فالموضوع اكبر بكتير من الدعم المالي …. فــ حنتكلم على مثالين حاسمين للدور السعودي عشان تعرفوا التنسيق و الترتيب كان ماشي ازاي:) 🙂 .
في يوم 3 يوليو طلع البيان التاريخي بعزل الجاسوس مرسي العياط و جماعته الارهابيه من حكم مصر …. و بعدها بعشر دقائق كان البيان التاريخي السعودي الداعم للحراك الشعبي المصري …. و تتابعت البيانات العربيه المؤيده لمصر و شعبها و جيشها …. لكن ده على المستوي العلني ….. لكن تحت الترابيزه كان فيه معركة تكسير عظم و فرض ارادات على امريكا القوي العظمي اللى اتفاجأت بالضربات المتتاليه دبلوماسيا و اقتصاديا ….. ازاي ؟؟؟؟ .
بعد البيان ده انتفضت امريكا و اوروبا كعادتهم 🙂 🙂 …. و كانوا مفكرين ان الدنيا زي ما هي و حيحصل زي كل مره …. بيانات شجب و ادعاءات ان اللى حصل انقلاب عسكري و حنقطع عنكم المعونه و تحركت القطع البحريه الامريكيه في البحر المتوسط و البحر الاحمر ….. بنفس الطريقه اللى حصلت في 2011 ….
السعوديه تحركت تحرك تاريخي على محورين ….. طلع خبر صغنن كده من السعوديه بمنتهي البراءه و الادب محدش اخد باله منه ساعتها ….. اتقال فيه ان المملكه السعوديه غير مهتمه حاليا في الاستثمار في اذونات الخزانه الامريكيه المطروحه حاليا ….. و دي كانت ضربة معلم و صفعه اقتصاديه لامريكا افقدت توازنها و خلتها تعيد حساباتها مره تانيه لان التحرك الامريكي بقي ليه ابعاد اخري ممكن تضرب الاقتصاد الامريكي بشكل مباشر …. و من مين ؟؟؟؟ من الخليج 🙂 🙂
و لان الاقتصاد الامريكي متلصم بالعافيه …. دخلت امريكا في دوامة نقص السيولة اللى كانت معتمده عليها من السعوديه لما تشتري اذونات الخزانه المطروحه …. و لو تفتكروا في وقتها ….. ان امريكا دخلت في ازمة كبيره جدا ساعتها و مقدرتش تدفع مرتبات الموظفين الفيدراليين لمدة 3 شهور …. و كان لازم يتم تعديل الميزانيه العامه لتعويض العجز ده اللى مكنش معمول حسابه على حساب بنود تانيه في الميزانيه 🙂 🙂 ….. و دخل الحزب الديمقراطي في سجال مع الحزب الجمهوري من اين يتم تعويض العجز ده … هل من بند التامين الصحي و لا المعاشات و لا انهي بند …. لغاية لما اتفقوا على شهر اكتوبر …. او ان السعوديه اشترت ساعتها اذونات جديده بعد ما فرملت امريكا …. الله اعلم ….. لكن الاكيد ان امريكا لبست في الحيط.
المثال التاني هو التحرك السريع لتفتيت التحالف الامريكي الاوروبي …. و يمكن كلنا نفتكر لقاء وزير الخارجيه السعودي سعود الفيصل مع وزير خارجية فرنسا …. لما راحله وزير خارجية قطر و اجتمع معاه لمدة ساعتين و قطع سعود الفيصل عليهم الاجتماع و جلس مع وزير خارجية فرنسا عشر دقائق قاله فيها رساله واضحه ” الاستثمارات السعوديه في فرنسا و التعاون الاقتصادي معها على المحك اذا وقفتم ضد مصر” …. الراجل في ساعتها طلع و قال بيان ان فرنسا تقف مع خيارات الشعب المصري ….:) 🙂
في نفس الوقت طلعت اخبار من الامارات عن الغاء او تأجيل البت في صفقات تحديث اسطول طياران الامارات من شركة ايرباص الاوروبيه …. و كذلك صرف النظر عن التعاقد على صفقه عسكريه ضخمه مع انجلترا لتزويد الامارات بدبابات بريطانيه و كذلك تأجيل التعاقد مع امريكا لشراء مقاتلات F16 – F15 لدراسة عروض روسيه لتوريد طائرات ميج و سوخوي يعني تقارب عربي خليجي مع روسيا لاول مره …. و دة اكيد مش حيتم الا لو ده توجه مصر القادم 🙂 🙂
الكلام اللى فات ده يعني خسارة اقتصاد الغرب لمئات المليارات من الدولارات و عشرات الالاف من العاطلين سيتم الاستغناء عنهم في المصانع اللى كانت التعاقدات دي معاها …. و ده اصاب امريكا و الغرب بصدمه مهوله لانهم مكنوش عاملين حسابهم على التحرك المتناغم من جبهه صلبه لها تأثيرها.
امريكا بجلالة قدرها اللى كانت في 2011 قالت لمبارك “Now is now” ….. تم طرد قطعها البحريه من المياه الاقليميه المصريه عسكريا بعد تهديدها بالتدمير بالغواصات و المقاتلات المصريه بشكل مباشر و تم تهديدها اقتصاديا في عقر دارها و ده موقف عمرها ما واجهته و مش متعوده عليه…… 🙂 🙂 …. امريكا فوجئت برد الفعل المصري لما اتكلمت عن قطع المعونه ….. و لقت رد الفعل ” اقطعها 🙂 🙂 ” …… طب حنمنع عنكم المعونات الاوروبيه …. و كان الرد ” و مالو 🙂 🙂 ” ….. الله ….. ده الموضوع كبير بقي …… هو فيه ايه بالظبط …. 🙂 🙂 ……. و ده سبب التخبط الامريكي ساعتها …. كل شويه تصريح متناقض و عكس التاني من المسؤولين الامريكيين….
مره تقولك ده انقلاب … و مره احنا لسه بندرس ….. و مره تم قطع المعونه العسكريه ….. و مره لا احنا مقطعنهاش بس احنا علقناها لمده 6 شهور بس ….. و البنتاجون يلطم للخارجيه و يطلع بيانات رسميه ينتقد فيها سياسة وزارة الخارجيه اللى بتدمر العلاقه مع اكبر و اهم حليف عسكري في المنطقه …. و حاله عجيبه من التخبط
لكن اللى كان باين ان امريكا كانت بتكسب وقت ….. على ما تدرس و تجمع معلومات عن مدي قوة التحالف العربي و صلاته بروسيا و الصين …. و كانت بتمنى نفسها بتغير الوضع على الارض باستخدام تحرك الاخوان على الارض ….. و انها مستنيه اي تحرك فاعل علشان تقدر تاخده ارضيه صلبه للتدخل مره اخري….. فكان اعتصام رابعه المسلح .
لكن سبحان الله ….. الغباء الاخواني كان سيد الموقف 🙂 🙂 …. لانهم كانوا عايزين يعيدوا قصه تفاعل الشعب مع القتلي الثلاثه بتوع السويس في يناير 2011 و اللى كانوا سبب نزول الناس بكثافه في يوم 28 يناير ….. و استدعاء التهويل والكذبه الاعلاميه اللى تم تضخيمها قبل يناير 2011 ان الداخليه بلطجيه و قاتله لاستهداف الداخليه و المنظومه الامنيه و كأن كل مؤسسات الدوله و المحليات كانت ملايكه ما عدا الداخليه و للاسف معظم الناس في وقتها صدقتها و مشت وراها ….. فكانوا مركزين جدا علي موضوع المذابح و الجثث و الاكفان و الاصفار الكتير اللى بتتحط جنب اعداد القتلي علشان الناس تتفاعل و تنزل تدعمهم فيدوا امريكا المساحه الى تتحرك فيها ضد مصر .
و لان ربنا مسلط عليهم غباؤهم ….. محطوش في دماغهم ان الشعب مبينساش …… عشان كده متحركش معاهم …. لانه منساش الطرف الثالث اللى اتقتل على ايديه المئات في السنوات الماضيه و قتلي الاتحاديه و لا ال 56 بتوع بورسعيد و لا قتلي احداث القائد ابراهيم الاولي بتاعة شاحن حازم ابو اسماعيل و لا التانيه ولا الاطفال اللى اترموا من على السطوح في سيدي جابر و لا العربيات الكتير اللى كانت بتتحرق و قتل من فيها زي المهندسه نهي محمد اللى اتسحلت بالجنازير عاريه و قتلوها ب 120 طعنه في شوارع سيدي بشر و العشرات اللى اتقتلوا على مدار شهور و تكفير المجتمع كله و اقتحام الازهر و الكتدرائيه و رفع السلاح بكثافه على الناس في الشوارع في كل فاعلاياتهم و وعيدهم باستدعاء المقاتلين من كل العالم لقتال الشعب المصري و كل ده كان قبل احداث رابعه اللى نساها الاخوان لانهم مش بيشوفوا غير نفسهم فقط …..و مفهموش طبيعة الشعب المصري ….. اعمل معاه اي حاجه الا انك تقرب من هويته الوطنيه او الدينيه او تحاول تستغبيه ….. مش حيرحمك .
المهم فشلت كل مخططاتهم داخليا و كان الرد عليها على المصدر نفسه و هو امريكا…. و ده سبب جنان الاخوان ساعتها ….. هم بينفذوا جوه و توصل البوارج الحربيه …. و يطلع صفوت حجازي يقولك النهارده العصر حيحصل حاجه كبيره و على المغرب مرسي حيكون في القصر …. و ميحصلش حاجه ….. الموضوع ده اتكرر كتير جدا …. لانهم كانوا بيتسابوا يعملوا المطلوب منهم بس كان بيتم تحديد و فرملة امريكا و اوروبا عن اي فعل باستخدام التحالف المصري الخليجي و الروسي ….. لان المعركه كانت شغاله بره مش جوه ….. فرض ارادات بقي ….. 🙂 🙂
و عشان تبقوا عارفين ….. تم التعامل و افشال المخططات الكبيره ….. زي تفجير محطات الكهرباء او تفجير كوبري السلام على قناة السويس و ايقاف الملاحه فيها باستخدام عناصر بريطانيه محترفه …. او استهداف المواني و المطارات و غيرها كتيييير ….. و سابوهم ينشغلوا في الهبل اليومي اللى كان بيحصل على منصة رابعه لان الدوله لو دفعت دم قلبها لكشف فكر الناس دي للشعب مكنتش حتوصل للنتائج المبهره اللى هم عملوها …. و ببلاش …. و زيعي يا جزيره 🙂 🙂
تاني تحالف و كان مفاجأه لناس كتير لانه كان مستخبي هو التحالف الجزائري …… لان لا تأمين لحدودنا مع ليبيا الا بالتعاون مع الجزائر فكان التنسيق الامني و المخابراتي معاها من احسن ما يكون ….. و يمكن الاخبار اللى طلعت باسباب زيارة الرئيس السيسي للجزائر لشكر بوتفليقه على اكتشافهم مخطط لاسقاط طائرته اكبر دليل علي ده …… فكان التعاون على المستوي الامني و المخابراتي و العسكري …. و ربنا يخاللي الطائرات المجهوله اللى بتضرب اهداف و معسكرات محدده سواء في الشرق او الغرب الليبي. 🙂 🙂
و اللى بسببه تم القضاء على المسميات الهبله اللى طلعت في ليبيا زي الجيش المصري الحر و تنظيم دامل و داعش …. و اللى كانوا دايما يتسابوا يتدربوا و يتسلحوا باحدث الاسلحه و يتصرف عليهم ملايين و ياكلوا و يشربوا اللبن و لما يكبروا و يبقي الواحد فيهم شحط ملوا هدومه و يقول انا جاهز ….. 🙂 🙂 تدخل عليهم طائرات و قوات مجهولة تسلم عليهم و تقتل اللى تقتله و تقبض على اللى تقبض عليه و لا من شاف و لا من دري .
اما بالنسبه لسوريا…. فالوضع معقد شويه و ده سبب اختلاط الامر على الناس …. ازاي ؟؟؟؟
السياسه يا جماعه مش زي العلاقات الشخصيه المباشره بين الافراد العاديين او بين الشركات ….. العلاقات بتكون متشابكه و متداخله و معقده لان نتائجها متعلقه بمقدرات و مستقبل شعوب .
لازم نفهم ان فيه خلاف ايدولوجي كبير بين مصر الدوله و سوريا حزب البعث المتعاون مع ايران اللى هي عدوا لمصر و الخليج ….. لكن لما نيجي نتكلم على وحدة الدولة السوريه يبقي لازم نفهم ان تفتيت سوريا خطره على مصر اكبر بكتييييير من وجود حزب البعث الحاكم هناك …. و عشان كده فيه تنسيق غير ظاهر ما بين مصر الدوله و سوريا الدوله
مصر لا تدعم بشار و لكن تدعم الدوله السوريه و وحدة اراضيها و تواجد الجيش العربي السوري …. لان لو سوريا ضاعت …. حيبقي الجيش المصري هو الوحيد في المنطقه في موجهة الجيش الاسرائيلي. و بالذات اننا فهمنا اللعبه و ان القصه هناك مكنتش زي ما بنشوفها علي شاشات الجزيره انها ثوره و ربيع عربي ….. الجيش السوري بيواجه ارهاب و احتلال و تفتيت لبلاده …. بغض النظر عن الخلاف المصري السوري في اول الاحداث في طريقة مواجهة الازمه.
اما السعوديه فلو كانت في الاول بتساعد جبهة النصره و لو بشكل غير مباشر ….. فهي كانت مش بتحارب سوريا الدوله ….. و لكن كانت بتحارب التوغل الايراني هناك …. و لو بشار فك تحالفه مع ايران النهارده حتلاقي السعوديه باعته قوات درع الجزيره تحارب مع الجيش السوري من بكره 🙂 🙂
و دلوقتي سياسة السعودية اتغيرت تماما تجاه سوريا …. و يمكن اهم دليل علي ده هو التغيرات الكتير اللى عملها الملك عبد الله لترتيب البيت من الداخل و تعيين و لي عهد و ولى لولي العهد و اقالة الامير بندر ابن سلطان مدير المخابرات السعوديه و هو من كان المسؤول عن الملف السوري ….. و يعتبر من اهم الشخصيات الداعمه للفكر الوهابي في المملكه السعوديه و كان من اهم داعمي جبهة النصره في سوريا .
السياسه معقده و متشابكه ….. و ده اللى خاللى السعوديه تتعامل بعد كده بشكل مختلف بعد ما اتاكدت ان مساعدتها جبهة النصره هناك ضد مصالح المنطقه كلها على المدي البعيد.
اما العراق بقي فحكايتها حكايه يطول شرحها ….. و عشان منطولش عليكم حنخليها في المقال القادم ان شاء الله …
انا حاولت ابسط الامور على قد ما اقدر و افتح رؤوس مواضيع بدون الخوض في التفاصيل. مع ان كتير من اصدقاؤنا طالبونا بتفاصيل اكتر لكن لو فتحناها حيبقي جرنان مش بوست على النت 🙂 🙂
لكن الكلام اللى فات ده كله يوصلنا لحقيقه واحده فقط.
عاش الجيش المصري العظيم و عاشت اجهزة الدوله المصريه و التي كانت هي من تدير المعركه منذ ثلاث سنوات حتي الان و اللى مخلوش بلدنا و اطفالنا و ستاتنا لعبه في ايد الامريكان و كلابهم السعرانه اصحاب الذقون و العقول الخربه.
و اكيد حيكون فيه مقال بيتكلم كله على الجيش المصري العظيم اللى المتخلفين بيشتموا فيه و ميعرفوش قيمته …. حنتكلم كلام بشوية تفاصيل و معلومات عسكريه حتوضح ليكم يعني ايه الجيش المصري و اد ايه الجيش ده جيش عظيم
و شكل المقالات مش حتبقي خمس مقالات بس 🙂 🙂 لكن حتبقي اكتر ….. حنتكلم فيهم بشكل مركز على مصر و الاحداث الداخليه اللى فيها و طبعا حنتكلم على التعاون الروسي لان فيه كلام مزززززيكا مع الروس 🙂 🙂 …. و كمان على الاحداث الامريكيه و الورد اللى فتح في جناينها 🙂 🙂 ….
و الاهم لازم يكون فيه مقال مفصل عن تأصيل لمصطلحات وطنيه مهمه تاهت وسط الهوجه و الفوضي المنظمه الدخيله اللي بدأت في مصر من اول احداث نصباية 2011 اللى اتنصب بيها علينا باستخدام الاحلام المشروعه للشعب المصري و شبابها .
اخر حاجه يا ريت اللى مقرأش باقي المقالات يدخل عليهم من اللينكات التاليه لان رؤيتنا للصوره كلها متكامله و لازم تتشاف كلها مع بعض
تحياتي ليكم