05 Mar 2022
الأزمة الأوكرانية و مخاض تشكيل النظام العالمى الجديد – جزء 2
—————————————————————
في الجزء الماضي إتكلمنا بشكل مبسط على التأصيل السياسي الحديث للأزمة الروسية الأوكرانية … و قبل ما نكمل كلام عن المشكلة …. لازم نفتكر بعض الحقائق اللى تاهت وسط الضباب الإعلامي اللى محاصرنا من كل إتجاه بالرغم من إرتفاع مستوى الوعي بشكل كبير مقارنة من 10 سنين فاتت مثلا زي إنطفاء وهج الإنبهار بالنموذج الغربي و إنسانية المجتمعات الغربية…. لكن قبل ما نتكلم على تطورات المشكلة على الأرض عسكرياً و سياسياً و تداعياتها على منطقتنا ….. و هو الأهم لنا … لازم نأصل بعض الأمور و المبادىء الأساسية عشان نعرف نشوف الصورة صح .
#أولا:- لازم نعرف هو إييه أصلا مشكلة الغرب مع روسيا و القومية الروسية …. و اللى يقولك الخوف من الأطماع التوسعية ده فكر مراهق …. و إوعي تتاكل بالشعارات الغربية العلمانية بتاعة الحريات و الكلام الفارغ ده لأن أصل الموضوع له أصول دينية و عقائدية أيدولوجية بحتة …. فالغرب الكاثوليكي بفرعه البروتوستانتي مش بيطيق الطائفة الأرذوثوكسية الشرقية و بيكرهها كره العمي …. و بيوظف الموضوع ده سياسيا و عسكريا بإمتياز …. زي بالضبط التصريح الشهير لجورج بوش لما قال في حرب العراق إنها حرب صليبية جديدة …. فحتلاقي كل حلفاء روسيا سواء في أوروبا أو أسيا يا إما مسيحيين أرذوثوكس يا إما مسلمين شرقيين واللى متعودين على التعايش مع بعض منذ 1400 عام …. و حتلاقي كل الغرب اللى متحالف ضد الروس هو يا إما كاثوليك أو بروتوستانت …. إحنا عارفين إن الكلام في موضوع الطوائف الدينية حساس و ناس كتير مش بتحبه … لكن للأسف دي الحقيقه اللى على الأرض….. فالمواطن الغربي حتي لو مش متدين او حتي لا ديني … هو يكره الطائفة الأرذوثوكسية …. و إوعي تفكر إنها مجرد صدفة إن كل اللى مع روسيا أرذوثوكس و الفريق الآخر كاثوليك و بروتوستانت.
#ثانيا :- اللى متابعنا من زمان عارف كويس اننا لا ننظر للأمور إلا بعيون مصرية فقط و طبقاً للمصلحة الوطنية المصرية … فإحنا لا عرّابين للغرب و لا عرّابين للروس … لأن الإتنين ليهم أطماعهم كإمبراطوريات عظمي توسعية …. لكن لازم تحط في دماغك بعض الحقائق التاريخية اللى محدش يقدر ينكرها … إن تاريخيا روسيا عمرها ما إحتلت بلد عربي لكن دايما المحتل كان غربي …. و اللى قصفنا في 56 كان غربي مش الروس … و تم أحتلالنا 6 سنوات من 67 الى 73 بسلاح و دعم غربي و ماحاربناش و إنتصرنا إلا بسلاح روسي …. و حتي الثورة الصناعية اللى قامت في مصر في منتصف الخمسينات و الستينات كانت بدعم شرقي روسي و تحت الحصار الغربي … و الإرهاب ماضربناش في العقد الماضي إلا بدعم غربي كامل …. و اللى بيهاجمنا لغاية دلوقتي إعلاميا و بيشهّر بينا في كل وسائل الإعلام هم الغرب مش الروس …. فماحدش يخش يقولنا أنتو منحازين لروسيا و روسيا دولة توسعية و الكلام المراهق ده … إحنا بنشوف مصلحتنا الوطنية اللى فوق الغرب و الروس.
#ثالثا :- التيار و الأيديولوجي الجديدة ، اللى زعماء الغرب المدعومين من رجال الأعمال بيحاولوا يفرضوها على العالم و هي النيوليبرالية الجديدة هي من أخطر التحديات الوجودية اللى بتقابل العالم حاليا …. فمصالحهم لا تعترف بالدول و لا بمصالحها القومية بل تعتمد في بقائها على إضعاف الدول و سلتطها المركزية … فأجندتهم عابره للحدود و مصدر قوتهم هي إنها القوميات و الثقافات و الولائات للأرض بخلق مواطنين محايدين تماما عن كل شىء حتي يسهل التحكم فيهم … فهم يسعون الى المواطن السلبي المحايد للوطن و الدين و العرق …. حتي الجنس يكون محايد فيه لاهو راجل و لا ست …. جنس ثالث … عشان كده حتلاقي كل الأفلام الجديدة و حتي الكرتون اللى بيتربي عليه الأطفال بقي بيدعوا لهذه التعاليم … فسوبرمان و بات مان اللى مرتبطين بيهم الأطفال أصبحوا شواذ في النسخ الجديدة…. عشان المواطن يطلع يكون ولاؤه لعلم واحد هو علم الريمبو … أما علم دولته فمالهوش أي قيمة عنده …. و عشان كده حتلاقي المجموعات دي اللى تحكمت تماما في الإعلام العالمي و في مراكز إقتصاده بيحاربوا كل النماذج و القادة القومين على مستوى العالم … و كان أولهم رئيس أمريكا نفسه (ترامب) … اللى لأول مرة يتم تزوير الإنتخابات الأمريكية و منع الرئيس الأمريكي من التحدث لشعبه لمدة أكثر من شهر و إلغاء حساباته على السوشيال ميديا و عشرات الآلاف من حسابات مؤيدييه وقت الإنتخابات …. و كذلك إستهداف كل القادة القوميين على مستوى العالم زي الرئيس السيسي و فلاديمير بوتين و رئيس الصين و محمد بن سلمان و محمد بن زايد و غيرهم … و الله يرضي عليكم بلاش حد يخش يشخصن الأمور و يقول ترامب كان وحش و بوتين شرير و بتاع الصين توسعي … إحنا بنتكلم على أيديولوجية و منهج بغض النظر عن تضارب مصالح القوميات دي أو إتفاقها ….. و مش بنقول مين ملاك و مين شيطان.
#رابعا :- المواجهة كانت حتمية و نحمد الله إن المواجهة تصدت ليها دولة كبيرة زي روسيا بدل ما نتحط إحنا في وش المدفع … و إعرف كويس إن لو إنتهت الحرب بخسارة روسيا … إحنا الدولة التانية اللى حيتلم عليها الغرب على طول … و إفتكر إن دول الـ G7 سابوا العالم كله … و سابوا الـ 193 دولة اللى مسجلين في الأمم المتحدة و ماجتمعوش غير في مصر و مطالبوش في بيانهم المجمع دولة تانية تندد بالعدوان الروسي غير مصر … و ماهددوش دولة بواردات القمح و السياحة و الإقتصاد و بعض الملفات السياسية غير مصر …. لأن مصر عمود أساسي في التيار القومي العالمي المناهض لسياستهم.
#خامسا:- روسيا لم تسعي الى الوضع الحالى و لكن أمريكا دفعتها إليه دفعاً ….. و صدرت أوكرانيا في وش المدفع …. فالموضوع كان بسيط و متفق عليه سابقاً ، وهو ان مافيش سلاح غربي يدخل اوكرانيا اللى على الحدود مع روسيا …. لكن أمريكا هي من فجرت الوضع بإرادتها و هي من إتخذت القرار في حين إن روسيا كانت بتستعد للمواجهة الحتمية من أكثر من 8 سنوات طبقاً لتقديراتها.
#سادسا:- مفيش دولة تقبل بوجود سلاح إستراتيجي لدولة عدوة ليها على حدودها … لأن ده تهديد وجودي لها …. فـ جون كيندي عام 1962 حرك أساطيله و أسلحتة النووية و حاصر كوبا و هددها بالفناء النووى لو قبلت دخول الصواريخ الروسية على أراضيها … و جون كيندي قال ساعتها لن أسمح بوجود صاروخ نووى يصل إلى الأراضي الأمريكية في أقل من 8 دقائق … و لو كوبا ماسمعتش الكلام كانت أمريكا إجتاحت كوبا و قامت حرب نووية ساعتها …. و هو نفس اللى عملناه في ليبيا لما الرئيس السيسي حشد قواته على الحدود رداً على أنباء الغزو التركي …. و عمل مناورة كبيرة و قال سرت الجفره خط أحمر … و لو القرد كان أتجنن و جرب يدخل كان الجيش المصري سفلت بيهم الأرض في ليبيا …. و ده نفس اللى عمله بوتين … برضوا حشد قواته على الحدود و قال اللى حيدخل سلاح الى أوكرانيا حخش أشيل الجيش الأوكراني من فوق وش الأرض … لكن لأن أمريكا كانت عايزة الحرب تقوم و المواجهة مع روسيا على أرض بعيدة عنها و شعب تاني هو اللى يدفع ثمن الحرب و هو الشعب الأوكراني …. ماتراجعتش و هي من أشعلت الحرب.
#سابعا :- إوعي تتغر بالدعاية الغربية إن الشعوب الأوروبية شعوب مسالمة قوى و متحضرة و الكلام الفارغ ده …. أو حد يقول إزاي الغرب يضحي بشعب أوكرانيا الأوروبي و يدخله حرب يعاني منها ….. دي شعوب متعطشة للدماء و نادراً ما عاشوا في سلام بينهم و بين بعض … إنت بس اللى حظك إنك اتولدت في فترة سلام مؤقت تعتبر الأطول في التاريخ …. فكلنا نعرف عملوا إييه في بعض في الحروب العالمية الأولى و التانية و إزاي الغارات اللى ما بينهم كانت عبارة عن سباق مين حيقذف مدن التاني أكتر و مين حيقتل مدنيين أكتر من التاني … و المجازر اللى حصلت مثلا في حرب البلقان و القتل و التعذيب و الإغتصاب الممنهج … فالإنسان عندهم أرخص شىء…. هم متعودين على كده.
#ثامنا:- أظن لما شوفنا الدعم الرهيب اللى واخده الأخت زيزي مشاوير (رئيس أوكرانيا) .. عرفنا كويس ليه الغرب مش بيدعم عندنا غير المعارضين الإمعات و الشخصيات الفاشلة … و عرفنا ليه دعموا معاتيه الإخوان و أول جاسوس مدني منتخب و ليه بيحموا و يدعموا ناس زي محمه على و الأخ أيمن بوتكس و غيرهم … عشان دولنا تكون مجرد عرايس ماريونت في إديهم
بعد المقدمة دي حنبدأ نتكلم على الموقف العسكري على الأرض و إييه اللى بيحصل و بيعمله الجيش الروسي و شكل المواجهة الغربية عسكرياً … و لأن الكلام حيكون طويل و متخصص شوية عسكريا…. حنخصص المقال الجاي للوضع العسكري و إزاي العلم العسكري بيتم إعادة صياغته من جديد لأن الحرب دي حرب جديدة تماما لم يري العالم مثلها من قبل سواء من الجانب الروسي أو الغربي … فـ اللى بيحب المقالات العسكرية حيلاقي كلام عنب 😊 …. فإنتظرونا المقال القادم.
تحيا مصر و تحياتنا.