07 Mar 2022
الأزمة الأوكرانية و مخاض تشكيل النظام العالمى الجديد – جزء 3
—————————————————————
إتكلمنا في المقالين السابقين عن التأصيل السياسي و التاريخى للأزمة الروسية الأوكرانية … و النهاردة حنتكلم على الشق العسكري و على العملية العسكرية الروسية في أوكرانيا … و لأن ناس كتير مش بتحب الكلام العسكري المتخصص … فحنحاول نتكلم بشكل مبسط على قد ما نقدر علشان الفكره توصل للجميع … و هات بقي كوباية الشاي بتاعتنا عشان حنتكلم على رواقه … و بالذات إن وقت الحروب هو وقت الإشاعات و الحروب النفسية و الأخبار المضروبة و بالذات إننا واقعين تحت آله إعلامية متحكم فيها الغرب بشكل كبير …. و عشان تتأكد من كده …. ياريت تفتكر الحرب النفسية الإعلامية اللى وقع فيها الشعب المصري يوم 1 يوليو 2015 اللى أذاعت فيه كل وكالات الأنباء إن سيناء تم إحتلالها من قبل قوات داعش بعد دحرها للجيش المصري و أحتلالها للعريش و رفح … في الوقت اللى العكس هو اللى كان بيحصل على الأرض و الجيش كان هو اللى عاملهم حفلة شواء و باربيكيو على شرفهم و قتل منهم المئات …. و دي يا دوب كانت عملية واحده في يوم واحد في مكان واحد … فما بالك بقي في حرب شاملة طويلة زي بتاعة أوكرانيا … تخيل بقي حجم الأخبار المضروبه و الفيديوهات المفبركه اللى شغاله عليك من كل الأطراف 😊 . و بالذات إنك بتتابع حرب بين جيشين بيستخدموا نفس الأسلحه و التمويه و بيتكلموا نفس اللغه و شكلهم واحد … فسهل جدا أي حد يصور أي حاجه و يبلي بيها الطرف التاني 😊 …. و كلنا شوفنا عشرات الفيديوهات اللى نشرتها أكبر الصحف و وكالات الأنباء في العالم … و اللى إكتشفنا بعدها إنها يا إما فيديوهات قديمة أو مفبركه أو فيديوهات من أفلام خيال علمي أو جيمز إلكترونية 😊 …. فواحده واحده كدة الله يرضي عليك و حنتكلم في نقاط محددة و إعذرونا لو البوست كان طويل شوية.
– للأسف ناس كتير بنت حساباتها إن الروس دخلوا في مستنقع الحرب التقليدية داخل مدن في دولة مساحتها كبيره و إن إذا مكانش فيه حسم سريع على الأرض لصالح روسيا فكدة حتخسر الحرب و حيتم إصطيادها و إستنزافها …. مع إن المفاجأه إن العكس هو الصحيح و إن الروس هم اللى فاجأوا العالم بنوع جديد من الحروب بيتم إستخدامه لأول مره في التاريخ و هى ” الحرب الهجينه ” طويلة الأمد و بأسلوب ناعم ….. و هو اللى أربك حسابات الغرب تماما و هو السبب الحقيقي لحالة الإرتباك الكبيره اللى واضحة جدا في تصريحاتهم المتناقضه و المتسرعه و الغير محسوبة …. في حين تجد التصريحات الروسية هادئة و واثقة و محددة …. طب يعني إيه الكلام ده ؟؟؟؟ …. شوف يا سيدي.
– الغرب بنى حساباته على العقيدة السوفيتية القديمة اللى كانت بتعتمد على مواجهة الدول و المدن المتمردة بدخول الجيش الأحمر السوفيتي لسحق هذه المدن تماما تحت جنازير الدبابات … بالبلدي كده … كان الروس بيخشوا يسفلتوا بيهم الأرض بالمعني الحرفي للكلمة لتأديب هذه الشعوب و تكبيدهم ثمن فادح و جعلهم عبره لأى مدينة تفكر في تكرار هذا التمرد … و طبقا للعلم العسكري … فأي حرب شاملة لغزو دولة أخري … لازم يسبقها ضربة جوية شامله ساحقة لمراكز القيادة العسكريه و الإتصالات و المطارات و باقي الأهداف العسكريه و بعض الأهداف المدنية … و كذا تمهيد نيراني كثيف سواء بالمدفعية طويلة المدي و الصواريخ لضرب كل المدن تمهيدا لدخول الدبابات و القوات البرية …. زي بالظبط ما حصل في حرب 56 و 67 و 73 و حرب الخليج الأولى و حرب الخليج الثانيه و حرب البلقان و باقي الحروب اللى عاصرناها سواء قديما أو حديثا …… فحتلاقي قبل بداية الحرب ….. لازم يكون فيه ضربة جويه و مدفعيى و صاروخيه و بعدها يبدأ هجوم بري ساحق و سريع لعمل نصر عسكري سريع و مباغت على الأرض …. و الروس طبعا عندهم القدره الجوية الساحقه لتنفيذ هذه الضربه بكل شراسه.
– و كان الغرب حاسب حساباته على كده و محضر مزادات أعداد القتلي من النساء و الأطفال و البكائيات و تهيج شعوب الكره الأرضية كافة على روسيا لتقبل أي شىء يفعله الغرب ضد روسيا …. و كانت الآله الإعلامية بتاعته جاهزه بمئات الفيديوهات المفبركه و الجاهزه للبث عن الفظائع اللى المفروض كان الروس حيعملوها … و محضرين على الأرض آلاف المرتزقه اللي عندهم خبره في حرب المدن (في العراق و سوريا و ليبيا و دول البلقان) لإستنذاف القوات الروسية على الأرض بالصواريخ المضاده للدبابات و الكمائن و أسلحة قتال المدن …. يعني من الآخر الغرب واخد قراره بإستدراج روسيا لإستنزافها على ارض أوكرانيا و التضحية بالشعب الأوكراني و المتاجره بدمه …. بموافقة دلدولهم زيزي مشاوير … ما هم جابوه و دعموه و وصلوه لهذا المنصب عشان كده و هو مجرد أراجوز لا يملك من أمره شيئا و كان عارف إن بلده حيتم تدميرها لأن ملوش تمن …. لأن الحرب الحقيقة بين أمريكا و ورسيا و ميدان المعركه هي بلده أوكرانيا .
– نيجي بقي للجانب الروسي …. اللى إستفاد تماما من تجربته في أفغانستان … و غير من عقيدتة القتالية و غير من أساليبه تماما …. و ده ظهر في إنتصاراته في جورجيا و الشيشان ….. و شوفنا إزاي مبقناش نسمع حاجه عن داعش و لا النصره في سوريا لما دخل الروس هناك و المعادلة تغيرت تماما على الأرض …. و اخيرا حسمهم الأمور في كزاخستان …. يعني الروس بقى عندهم خبرات هاااائلة في حروب المرتزقه و حروب المدن اللى الغرب كان محضرها ليهم في أوكرانيا …. طب حد يسأل … و هو الغرب مكنش يعرف كده ؟؟ … الإجابه إن الغرب دائما و أبدا نمطي في مؤامراته … و بيستخدم نفس الأسلوب من عشرات السنين لأن الحروب دي مش على أرضه و مش خسران حاجه … نفس اللى عمله الغرب في افغانستان هو اللى عمله في الشرق الأوسط بدولها جميعا و هو اللى عمله في الشيشان و جورجيا و حاليا في اوكرانيا … و هو باني حساباته على تفكك روسيا بسبب تأثير الحصار الإقتصادي و اللى حنتكلم عليه المقال القادم.
– أمال روسيا عملت إيه و إيه موضوع الحرب الهجينة دي ؟؟؟ … شوف يا سيدي …. مع بداية الحرب مشفناش لا ضربة جوية و لا شوفنا السوخوي و هي بتلقي بأطنان من المتفجرات و لا ظهرت القاذفات الثقيله و لا أي حاجه من الكلام ده … و حتي الحشود العسكريه الكبيره اللى على الحدود … فضل أكثر من نصفها حتي الآن متحركش … و اللى دخل روسيا قوات كبيره فعلا و لكن المجهود الحربي الحقيقي لسه مدخلش أوكرانيا أساسا …. و لم يقتحم الجيش الروسي المدن و الكتل السكانيه الضخمه زي ما كان الغرب عامل حساباته …. و شوفنا مدنيين واقفين قدام الدبابات و الجيش الروسي سايبهم و بيحاول ميحتكش بيهم خالص …. و لاقينا مثلا فيديوهات مصورة لإستيلاء روسيا على مطار إستراتيجي هام بواسطة عشرات الطائرات الهليكوبتر !!!! …. الله !!!!؟؟؟ … و هو فيه غزو شامل بيتم بطيارات هليكوبتر ؟؟؟!!!! … و ليه روسيا لم تستخدم أبدا مصطلح غزو أوكرانيا أبدا و لكنها دائما بتأكد أنها عمليه خاصة لتحييد القدره العسكرية لأوكرانيا لجعلها دولة حدودية محايده ….. و ليه روسيا ماشيه عسكريا بمنتهي البطىء في اوكرانيا و كل يوم تعلن عن وقف القتال لخروج المدنيين و ترجع تاني تضرب و كأنها هي اللى بتطول في وقت الحرب ؟؟؟؟!!!! هو إيه الموضوع ؟؟!!!
– شوف يا سيدي … روسيا فاجأت العالم إنها إستبدلت الضربه الجويه اللى كان الجيش الأوكراني بيستعد ليها بضربه صاروخية بعيدة المدي شامله ساحقه و بمنتهي الدقه و الفاعليه …. و ده ليه سبب مهم إن تكلفة الصاروخ أقل بكتييير من تكلفة الطائره لو تم إسقاطها و صعب على الدفاعات الجوية التصدي ليه في حالة إغراق سماء أوكرانيا بآلاف الصواريخ مره واحده …. في نفس الوقت اللى هاجمت فيه أوكرانيا إلكترونيا و سيبرانيا بمنتهي الشراسه و بأساليب فعاله و جديده … فالأوكران تفاجئوا بإنقطاع كل الإتصالات و الإنترنت و حتي شاشات الرادارات إنطفت … و في أقل من 10 ساعات … تم تدمير و تحييد سلاح الدفاع الجوى تماما و كذلك ضرب كل المطارات …. و بذلك .. تحقق للروس أول أهدافها العسكريه و هي تحقيق السياده الجوية الكامله على كل أجواء أوكرانيا ليتبقي فقط في يد الأوكران الصواريخ المحموله على الكتف …. و هي ممكن تحقق بعض الخسائر إن تم إحسان إستخدامها … و لكن لن تعطل سير معركه أو تحسمها أبدا…. و ده كان مفاجأه تماما للغرب.
– الحاجه التانية اللى فاجئت الغرب و أربكت حساباته هي عدم الهجوم البري الكاسح على المدن …. و لكن دخول قوات روسيه هدفها ليس إقتحام المدن … و لكن محاصرتها و خنقها و محاولة إستلام السلطة فيها بالتسليم أو بمباركة المدنيين مع نشاط واضح للـVSB او( KGB سابقا) الروسي اللى مخترق تماما المجتمع الأوكراني … و إذا تم القصف فبيتم إنتقائيا … يعني دخول المدن بأقل الخسائر سواء في القوات أو في المدنيين مهما طال الوقت او الخسائر في القوات الروسية … و هي عقيدة جديدة تماما على الروس …. و اللى فاجىء الغرب بجد إن القوه الحقيقية الضاربه للجيش الروسي لم تدخل أوكرانيا حتي اليوم …. و بالفعل على المستوى العسكري … بدأ السقوط الناعم للمدن الأوكرانية في الجانب الشرقي و الجنوبي … و استولي الجيش الروسي على كل ساحل أوكرانيا بالكامل سواء على البحر الأسود أو على بحر أوزوف … و لم يتبقي له غير مدينة وحيدة إستراتيجية و هي مدينة “أوديسا” الواقعة أقصي جنوب غرب أوكرانيا … وبدأ في فتح محاور جديدة في الشمال لتطويق العاصمة كييف نفسها مع عدم الهجوم عليها ….. و هذا المسار عكس تماما ما كان يتوقعه الغرب … الذي بني حساباته على السقوط الدموى السريع للمدن و ليس السقوط الناعم طويل الأمد وسط حرب هجينة تعتمد على الحروب الألكترونية و التحرك السريع المباغت على الأرض و الإلتفاف و التطويق و الكر و الفر و الإنسحاب و التقدم …. و ده اللى فسر تصريح بوتين أن الشعب الأوكراني جزء من الشعب الروسي و أن أوامره للجيش بعدم التسبب بضحايا مدنيين بقدر المستطاع …. فبوتين مش عايز يخلق ضغائن تاريخية لشعب على حدوده … و عايز يسيب الأوكران يتعلموا بنفسهم و يعرفوا مين اللى بيبيعه فعلا من قاداته الغربيين…. و الموضوع ده بالذات مضايق الغرب جدا.
– الهدف الإستراتيجي العسكري الثاني للروس هو تفكيك القدرات النووية و البيولوجية لأوكرانيا …. فأوكرانيا ورثت عن الإتحاد السوفيتي تركه و قدرات نووية جباره سواء على صعيد المفاعلات أو البنية التحتية الصاروخية و الرؤوس النووية … و بالرغم من تسليم أوكرانيا كل الرؤوس النووية لأمريكا منذ أكثر من عشرين عاما … إلا أنها عندها البنية التحتية و العلمية الجاهزه لتصنيع رؤوس نووية في أقصر وقت … و إذا ربطنا الكلام ده بالتصريحات الرسمية لوزارة الدفاع الروسية اللى صرحت أنها رصدت مؤخرا نشاط أمريكي أوكراني كبير داخل معامل بيولوجية سرية داخل أوكرانيا لتخليق فيروسات جديدة و كذلك تخوف روسيا من إستخدام الـ 15 مفاعل نووي أوكراني كقنابل نووية تكتيكية بتفجيرها من قبل النازيين الجدد اللى بيديروا الأمور هناك في أي وقت مما يهدد روسيا مباشرة … و عشان كده كان الإستيلاء على المفاعلات النووية الأوكرانية هدف رئيسي للجيش الروسي …. و ممكن نفهم من الصراخ و العويل الغربي و الإتهامات المفبركة عن تسبب روسيا بتسريبات إشعاعية ممكن نفهم منه النوايا أو ما كان يخطط له … و عامة على الأرض … الجيش الروسي نجح في السيطرة على مفاعل تشارنوبل و مفاعل زابوروجيا و هو من أكبر المفاعلات النووية في أوروبا كلها و يوجد 9 مفاعلات عاملة و 4 متوقفين عن العمل في شرق و جنوب أوكرانيا و حنسمع عن سقوطهم في يد الروس قريبا جدا … لكن يوجد 6 مفاعلات في الغرب الأوكراني و اللى حياخدوا شوية وقت لوصول القوات الروسية اليهم … يعني الهدف الإستراتيجي الثاني للجيش الروسي بيتم تحقيقه على الأرض بهدوء و بخطوات ثابته.
– على الجانب الأوكراني …. و مع إن الجيش الأوكراني تسليحه مش ضعيف أبدا … لكن مثلا كل أنظمة الرادارات و نظم الدفاع الجوي الثقيله زي منظومات S300 و تور أم و بوك 3 و السام و غيرها و كذلك القوات الجوية الأوكرانية من طائرات السوخوي و الميج و غيرها من القوات … تم سحقها و تدميرها تماما في أول ساعات الحرب … و مشوفناش أي معارك برية حقيقية زي مثلا معارك دبابات أو إشتباكات متلاحمه بين قوات نظامية …. لكن زي ما يكون إن الجيش الأوكراني المنظم و الجنود قلعوا هدومهم و هربوا أو إنشقوا أو بالمعني الحقيقي … إختفي تماما أي وجود ليهم و محدش يعرف إيه اللى حصل بالظبط لأن فيه تعتيم كبير على الموضوع ده سواء من الجانب الأوكراني أو الروسي … و اللى بيأكد الكلام ده هو النداءات الدولية المتسارعه من القادة الغربيين بإستدعاء المرتزقه و المقاتلين الأجانب من كل بقاع الأرض لتجنيدهم و تسليحهم و دفعهم لمحاربة الجيش الروسي … طب فين الجيش الأوكراني ؟؟؟ …. و يمكن كلنا نفتكر عام 2014 لما أعلنت روسيا ضم إقليم القرم … فقام الأسطول الأوكراني الموجود في جزيرة القرم كاملا بالإبحار لروسيا لتسليم نفسه و معداته طواعية لروسيا على الفور.
– الحاجة التانية اللى لازم ناخد بالنا منها هو إن في الوقت اللى كنا بنسمع عن تصريحات متضاربه و متسرعه من القادة الغربيين عن فرض منطقة حظر جوى فوق أوكرانيا و إرسال أسلحة و طائرات من دول الجوار لأوكرانيا …. طلع خبر أعلنه البنتاجون عن نجاحهم في تدشين خط مباشر ما بين الناتو و الجيش الروسي للتنسيق ما بينهم للتأكد من عدم الإشتباك في الحرب الروسية و كذلك إعلان بعض الدول منهم بولندا عن رفضهم إستخدام أراضيهم لوجيستيا لدعم أوكرانيا خوفا من دخولهم الحرب أمام روسيا … و ده عسكريا ملوش غير معني واحد و هو إعتراف الغرب ضمنيا بنجاح المهمه الروسية في أوكرانيا و إعترافهم إن المدن الأوكرانية حتسقط تباعا عاجلا أو آجلا و إنه تم بيع أوكرانيا رسمي فهمي نظمى و إن آخر حاجه ممكن يعملها الناتو هو زيادة الثمن العسكري لأرواح الروس على الأرض بإستخدام المرتزقه … لكن الأمر في الآخر محسوم.
– الجيش الأمريكي كل شوية يعلن عن إرسال ألاف الجنود الى اوروبا لتعزيز أمن هذه الدول … بس الحقيقة الجنود دول مش رايحين يحاربوا … لكن مهمتهم الرئيسية هي إستقبال عشرات الآلاف من المرتزقه في معسكرات لتدريبهم و تسليحهم و إرسالهم الى اوكرانيا … و بيزينس تجنيد المرتزقه في العالم و شغل السماسره أصبح نشط جدا و بيتعمل من وراه مئات الملايين … فطبعا أول واحد دخل على الخط هو القرد اللى بيجند عشرات الألاف من السوريين و بيسحبهم من شمال سوريا و ليبيا و بيتم تجميعهم في معسكرات في شرق سوريا بيديره الجيش الأمريكي كنقطة تجمع و بيتم إرسالهم الى اوكرانيا … و كذلك بيتم تجميع المجاهدين الإسلاميين من كل بقاع الأرض سواء من شمال أفريقيا او الساحل الإفريقي او وسط أسيا و اللى بيقوم بالدور ده هي التنظيم الدولى للإخوان المسلمين تحت الدعاوي التاريخية بتاعة إن بوتين أمه يهودية و يجب محاربة روسيا الكافره اللى حاربت المجاهدين في افغانستان و أحرقت حلب … و كذلك أعلنت فرنسا عن ارسال الفيلق الأجنبي بقواتها المسلحة الى الحرب في أوكرانيا و كذلك فعلت انجلترا … و متستغربش من المسمي ده 😊 … فمعظم الدول الغربيه عندها كتائب من الأجانب و المرتزقه لا يحملون الجنسية بتاعة البلد اللى بيحاربوا ليها … و بعد ما يتقاعدوا بياخدوا الجنسية …. و ده أقصي حاجة حـ يعملها الغرب في موضوع أوكرانيا و اللى الروس عاملين حسابهم عليه و متمرسين في مواجهته … و هم عارفين إنهم حيواجهوا خساير في الأرواح و مستعدين لتقبله لأن الحرب دي حرب وجودية و مصيريه بالنسبة للروس .
– و في الأخير …. الروس بنوا حساباتهم على حرب طويله الأمد و سقوط ناعم بأقل الخسائر للمدن الأوكرانية بعكس ما خطط له الغرب …. و يبقي السؤال هنا …. هل حتصمد روسيا إقتصاديا و حتقدر تستكمل خطتها العسكرية و تواجه العقوبات و الحصار الإقتصادي و الثمن الفادح في الخسائر الإقتصادية ؟؟؟ و ليه روسيا عندها إصرار على إطالة أمد المعركه و ليه بتراهن على عنصر الوقت اللى الكل شايف إنه مش في مصلحتها … ده اللى حنجاوب عليه المقال القادم.
تحيا مصر و تحياتنا.