26 Aug 2014
ما بين العدوان الثلاثي 1956 / و الحرب العالميه الثالثه
معركه المصير خارجيه و ليست داخليه – الجزء الرابع
—————————————————–
أصدقاؤنا الاعزاء ….. اتكلمنا في المقالات السابقه عن تأصيل الحرب العالميه الحاليه و انها حرب وجود و ان معادلتها صفريه بها فائز فقط …. و ان المعركه مع الشرق بالكامل لهدمة و تفتيته و القضاء عليه و الاستيلاء على موارده من طاقه و زراعه و مصادر حياه و القضاء تماما على الايدولوجيه و الحضارة الشرقيه …….
و اتفقنا ايضا في المقالات السابقه ان 30 يونيو هي من غيرت المعادلة على الارض …. و تحدثنا عن التحالفات بين القوي الشرقيه سواء العالميه او الاقليميه في مواجهة القوي الغربيه و كيفية نقل الصراع على ارضهم و استهداف مواطنيهم في عقر دارهم ……
النهارده حنكمل كلام عن العراق ……
العراق دي حكايتها حكايه ….. و عشان نفهم ايه اللى بيحصل هناك ….. المفروض نكون بقت عندنا الخبره و اتعلمنا من اللى شوفناه و عيشناه آليات الاسلوب الامريكاني ( الكاوبوي ) في التعامل على الارض 🙂 🙂
امريكا دايما بتعتمد على خلق وضع متضرب على الارض بالتعاقد مع مقاولي الانفار لتوريد المخابيل و المجانين اللى بيحاربوا و ينفذوا على الارض لخلق كلاب سعرانه تأكل الاخضر و اليابس …. و لما الدنيا تبوظ على الارض …. تيجي تتدخل و تقولك ملكش غيري في حمايتك و لازم اكون موجوده في المنطقه يا اما اسيبهم عليك. 🙂 🙂 و ده اللى حاصل دلوقتي .
و عشان نعرف قصة العراق فلازم نفهم ان دايما امريكا تخلق و تربي اكتر من كلب سعران …. و تسيبهم يتنافسوا و يتقاتلوا علشان يدمروا بلدنا و هم بيتعاركوا …. و كمان علشان لو فيه كلب منهم اخدته الجلاله و قالك انا جدع …. تقوم تسيب عليه الكلب التاني يأدبه و ياخد مكانه …… و الموضوع ده من زمااااااان و ليه تأصيل مهم ….. اتكلمنا عليه بالتفصيل في مقالات سابقه لكن عشان نربط الامور ببعض …… حنتكلم عليه تاني لكن باختصار ….
في الاول لازم نفهم حاجه مهمه ….. بما اننا عمالين نتكلم على خطط و مؤامرات استراتيجيه طويلة الاجل بيتم تنفيذها عبر عشرات السنين…. فلو كنت مفكر ان امريكا هي من تخطط لذك و هي المسؤوله عنها تبقي غلطان 🙂 🙂 …. في مسرحيه زمان كان فيها جملة بتتقال تلخص القصه كلها ” انت المخ و انا العضلات ” …… و ده فعلا اللى حاصل …..
المخ اللى بيفكر و بيخطط مش موجود في واشنطن لكن موجود في مدينة الضباب …. في لندن 🙂 🙂 …. و امريكا ما هي الا منفذ لتعليمات و خطط انجلترا ….
امريكا فقط استلمت ملف تنفيذ المخططات من انجلترا بعد ظهور الحرب البارده مع الاتحاد السوفيتي عشان متكونش في وش المدفع معاها مش اكتر 🙂 🙂 …. فانجلترا هي من زرعت التطرف الديني في المنطقة و هي من زرعت اسرائيل لتحضير الارض للحروب الدينيه المستقبليه اللى بدأت ملامحها تظهر الان 🙂 🙂 ….. ازاي ؟؟؟؟ …. اقولك
الانجليز توصلوا من زمان ان المنطقه دي عمرهم ما يعرفوا يسيطروا عليها بالقوه العسكريه ….. و لكن تقدر تدخل بلادنا و تدمر اهلها لو ركزت على عنصرين مهمين و هما اهم اعمدة المجتمع العربي …. و لو تمكنت منهم يبقي دمرت المنطقه بالكامل …. و هم الدين و المرأه العربيه …. حنركز في المقال ده على الدين و كيف استهدفوه … و حنبقي نتكلم ازاي استهدفوا المرأه في مقالات قادمه …..
بإختصار المخابرات الانجليزيه زرعت الوهابيه في السعوديه لاستهداف الدولة العثمانيه …. ثم زرعوا حسن البنا بفكره الاخواني في مصر و الخوميني في ايران ثم زرعوا اسرائيل كدولة يهوديه …. و المسيحين اصلا كان عليهم تركيز كبير جدا لاستخدامهم طوال الـ 100 سنة الماضيه و لكن يحسب لكل الطوائف المسيحيه العربيه من المحيط الى الخليج انهم لم ينساقوا وراء اللعب على وتر الدين و مشاكل الاقليات و كانوا دائما مصدرا داعم للوطنيه و الهوية العربيه
و تبعا لمبدأ قسم المتقسم و بعد كده اتسلي عليه 🙂 🙂 ….. بدأ استخدام استثماراتهم لسنين طويلة في تحضير ارض المعركه القادمه في المنطقه لترسيخ فكر الجماعات و الفرق دي في تحريف امهات الكتب الفقهيه و كأنهم تنطبق عليهم الايه الكريمه “يحرفون الكلم عن مواضعه” و استدعاء حالات الكره و التكفير و الفتن من قرون مضت …. و العمل علي ترسيخ و فرض الفقه الجديد المغلوض المحرف من فتاوي التكفير و القتل و سبي النساء و اغتصاب الاطفال و كل اللى بنشوفه دلوقتي
و عشان تتأكدوا ان المصدر واحد لكل الفصائل دي و سواء كانوا سنة او شيعه …… و ان الفكر بتاعهم كلهم طالع من نفس الخواجه 🙂 🙂 🙂 ….. تلاقي الوهابيه و الاخوانيه و الشيعه بيكفروا بعض و بيتريقوا على فتاوي بعض و بيدعوا لقتل بعض …. لكن تلاقي تطابق رهيب في نظرتهم المحرفه للدين ….. هنا زواج متعه بالساعه و هنا نكاح جهاد بالساعه 🙂 🙂 …. هنا استخدام الاطفال جنسيا بفتاوي التفخيد و هنا زواج الاطفال بحجة ان الرسول تزوج عائشه بسن 7 سنوات ….. هنا ولاية الفقيه و هنا السمع و الطاعه سواء للشيخ او المرشد ….. هنا اباحة و منهجة الكذب و النفاق بفتاوي التقيه و هنا اباحة و منهجة الكذب و النفاق بفتاوي التعريض بالكلام ….. هنا القتل علي الهويه المذهبيه بحجة دم الحسين و هنا القتل على الهويه بحجة تكفير المذاهب الاخري …. 🙂 🙂 و غيرها كتييييير ….. المهم تحريف دين الاسلام و يبقي فيه دم كتير و قتل و دبح و تدمير للبلاد و العباد.
المهم علشان منطولش عليكم ….. امريكا استلمت ملف استكمال تنفيذ المؤامره على المنطقه من انجلترا و بدات الشغل على الارض …… و في المشهد العراقي امريكا خلقت تنظيم النصره و بعده خلقتلهم داعش …. و قادة التنظيمات دي كلهم يا اما كانوا متربيين في جوانتانموا و خرجتهم امريكا و بعتتهم هناك او كانوا ظباط و عملاء مخابرات ليها ….
تسليح النصره كان في الاول عن طريق عناصر سعوديه و ده قبل التحالف المصري الخليجي و قبل ما تبان ليهم القصه ….. اما داعش فكان تسليحها دعائي اكتر منه حقيقي …. فامريكا تسلح جيش المالكي …. يقوم 500 واحد من داعش هاجمين على قاعده عسكريه او مدينه تحتوي على 20000 جندي ….. يقوم الجيش مسلم ليهم القاعده او المدينه بالسلاح المبعوت اصلا ليهم …. و بكده يوصل السلاح الامريكي لداعش بطريق غير مباشر …. 🙂 🙂 و ده سبب ان كل القوي العراقيه بما فيها الشيعيه قلبت الترابيزه على المالكي رجل امريكا الاول و المتآمر على العراق
و الميديا الامريكيه و المتحالفين معاهم يقعدوا يبرمجوا الناس ان داعش دي وحوش ادميه و جيش قوي جدا و محدش قادر عليه و بيتم نشر اخبار و فيديوهات بتركيز على جرائمهم من اغتصاب الاطفال و النساء و قطع رؤوس الرجال و بيع النساء كجواري و طرد المسيحيين و كل الهبل ده اللى بيعملوه على الارض بشكل مبالغ فيه ….. و تحس ان اللى بيصور الافلام دي مخرج من هوليوود ….. و تلاقي لازم يقرب المايك و يكبر و يقول “الله اكبر” علشان تطلع في التسجيل بشكل مفتعل ….. و يطلع معاها علم اسلامي ….. علشان دايما تنطبع صورة ان هو ده الاسلام لتنفير الناس منه سواء الغير منتمي له او ان المسلمين يكفروا بدينهم لان مفيش دين يقبل باللى بيحصل ده ….. و كمان الهدف منه هو حضرتك ايا كان مكانك سواء في مصر او الخليج علشان تخاف و يكسر تحالفك مع قيادتك و يكسر ثقتك في جيشك و اجهزة دولتك…. و تصاب بحاله من الرعب و الهلع ….
و عشان بس تعرف ان كلها بروجابندا فارغه …. و ان احتلالهم للمدن بيكون بالتواطئ مع جيش المالكي او بالاستفاده من الفراغ الامني …. و ان بيتم تسليم المواطنين تسليم اهالي لشويه بلطجيه و صيع علشان يسوّقوا للوحش الكاسر اللى محدش قادر عليه غير طبعا امريكا و الغرب اللى حينقذوا المدنيين العرب العزل منهم 🙂 🙂 ….. انتم نفسكوا بتشفوهم بيتحركوا في عربيات دفع رباعي …. يعني عسكريا ….. انا مش حقول قذف جوي و سياده جويه …. ده لو دبابه واحده طلعت عليهم تجريهم زي الفيران …. و لو حصل تصادم مع جيش نظامي بمدرعاته تحت سياده جويه حيتفرموا 🙂 🙂 ….. ده حتي حبايبنا اللى جنبنا في ليبيا ….. تنظيم دامل و الجيش المصري الحر اللى تسليحه كان اكتر بكتيييير من الهبل اللى في العراق اختفوا من على وجه الارض في يومين اتنين لما قربوا من حدودنا الغربيه بواسطه قوات مجهوله مش بقي جيش نظامي 🙂 🙂
طب ليه امريكا دلوقتي اعلنت انها بتضرب في داعش ؟؟؟؟؟ ….
امريكا ختطها في العراق ان يتم تقسيمها الى ثلاث دول …. سنه و شيعه و اكراد …. و لان خططها عمالة تفشل الواحده و را الاخري …. فهي عايزه تلحق تفرض امر واقع على الارض قبل ما القصه تنتهي علشان تبقي ارضيه تقدر تبدأ منها بعد كده لو القصه كلها باظت منها …… و اقرب دوله جاهزه للظهور فعليا هي دولة الاكراد في الشمال …. و ده حيقضي على مشكلة اكراد تركيا بتهجيرهم الى وطنهم الجديد بالتراضي ….. لكن الوضع ده مرفوض عربيا و حتي على مستوي القوي العراقيه الاخري …..
و عشان يتم فرض ده على الارض بقوة السلاح فلازم يتم تسليح الاكراد …. طب خلاص …. داعش تعمل نفسها انها حــ تخش على الاكراد و امريكا تنتفض لنجدتهم فتقوم بتسليحهم فهمي نظمي رسمي حماية للاكراد العزل 🙂 🙂
عجبت لك يا زمن ….. شوف يا مؤمن حكمة ربنا 🙂 🙂 ….. امريكا مشغوله بالمدنيين الاكراد اليزديين اللى هما اصلا بيعبدوا الشمس و الطاووس …. 🙂 🙂 امريكا اللى قاعده تتفرج على داعش اللى هي اصلا من صنعتها و اوجدتها على الارض و تدعمهم لوجيستيا و عسكريا و مخابراتيا و هم بيدبحوا و يغتصبوا و يهجروا المسيحيين و يحرقوا الاثار و يروعون البلاد و العباد …. مع انها كانت قبل كده بتهد الدنيا لما توصلهم شكوي او اي حاجه تحصل لمسيحيين مصر و تقوم الدنيا علينا و تستخدم مسيحيين المهجر .
و عشان تعرفوا اد ايه احنا بينضحك علينا ….. ايران و العراق و ليبيا بجلالة قدرهم ايام العقوبات في الثمانينات و التسعينات كانوا مش قادرين يبيعوا برميل بترول واحد الا بالقدر المسموح بيه في العقوبات الغربيه …. لكن الغرب دلوقتي بيتعامل و بيشتري البترول العراقي و السوري عادي جدا من داعش اللى هم بيقولوا عليهم ارهابيين 🙂 🙂
يعني امريكا مضربتش داعش عشان موضوع البترول ….. لانهم بيشتروه بالفعل من داعش و البرميل ابو 100 دولار بياخدوه من داعش برخص التراب ب 10 دولار بس
و طبعا كلنا شوفنا الفيلم المضروب بتاع قتل الصحفي الامريكي اللى فكرنا بكذبة 11 سبتمبر 🙂 🙂 و لان اللعب بقي على المكشوف و دخل مرحلة فرض الارادات على الارض في حرب مفتوحه ….. طلع نائب الرئيس الامريكي يفضح نواياها يقول ان العراق مش حيتصلح حالها غير بانشاء دولة كرديه مستقله و ان داعش قوية جدا علينا و مش حينفع نقضي عليها غير بضربها في سوريا 🙂 🙂
و الدليل على ان اللعب بقي على المكشوف و ان كرة الجليد تتسارع بلا رحمه ….. من كام يوم و لاول مره الرئيس السيسي يتحدث باسماء دول و شركات و مؤسسات بعينها تعمل و تمول و تتآمر على المنطقه …. و رد السعوديه على التصريحات الامريكيه بالدخول عسكريا في سوريا كان ” الان السعوديه لا تريد تغيير نظام بشار الاسد ” …. يعني السعوديه الان تدعم بشار الاسد و الجيش السوري مع مصر رسميا 🙂 🙂 و طبعا محدش يتخض من الكلام ده ….. مهو هي دي السياسه 🙂 🙂 …. و حفكركم ….. بشار الاسد حيشتغل و يتعاون مع السعوديه رسمي و الايام الجايه حيظهر على السطح التعاون و التحالف الرسمي بين مصر و سوريا 🙂 🙂 …… و بكده تبقي مصر نجحت في ضم السعوديه للتحالف السوري و اعطت امريكا صفعه جديده و مبروك على مصر توحيد الجبهه العربيه تماما ضد الغرب الشرير 🙂 🙂 …. و كل ده لسه متكلمناش على المزززززيكا مع روسيا و الصين 🙂 🙂
و معلومه كده على السريع لكن في سياق الموضوع ….. انا مؤمن انك لو عايز تعرف ايه مترتب ليك كمان 10 سنين … اتفرج على الافلام و البرامج المستهدفه لينا …. و اكبر مثال على ده ….. اللى تابع برنامج ” آراب ايدول ” من سنه و نص ….. حتلاقي فيه متسابقه متقلش عليها بتمثل العراق 🙂 🙂 لكن اتقال من اقليم كردستان 🙂 🙂 و كان عليها تركيز و تلميع كبير …. و ده شغل برمجه عصبيه علشان ودن حضرتك و دماغك تاخد على المصطلع الغريب الجديد ده …. ان فيه دوله جديده عندك اسمها كردستان 🙂 🙂 …. و فيه امثله تانيه كتييييير في الفن الغربي و البرامج اللى بيجيبوها من هناك و يعربوها و يعرضوها عليك و انت قاعد بتتفرج و مبسوط و متعاطف و متفاعل معاهم 🙂 🙂
اما موضوع الفيلم الهندي بتاع ضرب امريكا لداعش ده ….. حد شاف حاجه ….. لأ …. طب حد عرف مين اصلا اللى انضرب على الارض ….. لأ …… طب اللى انضرب فعليا على الارض ده حد يعرف هو اصلا داعش فعلا و لا هو قوات بتحارب داعش ….. لأ …. طب حتي لو اللى اضرب على الارض ده كان من داعش ….. هل حد يعرف ان ليه قيمه عسكريه كبيره ولا مجرد خرفان من القطيع ملهومش قيمه ؟ ….. لأ …… 🙂 🙂
و ده نفس اللى بيحصل في ليبيا في موضوع الضربات الجويه …. …. الضربات دي بتكون لضبط الايقاع ما بين الكلاب السعرانه اللى على الارض …. يا اما لتأديب كلب منهم تجاوز المخطط ليه …. او لفتح طريق لواحد منهم على التاني لفرض امر واقع على الارض …. يعني مش كل الضربات الجويه نجري و نفرح و نقول دي قوات مجهوله حبيبتنا … 🙂 🙂 ….. ده ممكن يكون تصحيح اوضاع على الارض لصالح استكمال مخططهم او رمي بلوه علينا باتهامنا بالباطل بعمليه خايبه لتقليب الراي العام الليبي علينا ….. لان الناس دي نفسها تجرنا على الارض لمواجهة عسكريه …. و مادام المواجهه العسكريه ما بين الشعب في الداخل فشلت ….. يبقي نحاول نسحبهم لمواجهه عسكريه في الخارج باي طريقه ….. و ده اللى يفسر خروج تصريحات مكثفه من داخل ليبيا ان مصر بتساعدنا عسكريا …. او اننا بنطلب مصر تساعدنا …. او و النبي تعالوا بقي انتوا مبتجوش ليه … 🙂 🙂
لتالت مره انا حاولت ابسط الامور على قد ما اقدر و افتح رؤوس مواضيع بدون الخوض في التفاصيل لان التفاصيل كتيييييير لكن احنا بننور ليكم الطريق اللى لو قريتوا فيه و ربطوا الدنيا مع بعض حتوصلوا لنتايج اكبر بكتير جدا من المقالات دي .
و لو كان لينا نصيب نكمل و عمر و أجل حنبدأ في المقالات القادمه التركيز على مصر داخليا سواء اقتصاديا او سياسيا او عسكريا و تأصيل ما حدث في نصباية يناير لفض الاشتباك بين 25 يناير و 30 يونيو.
تحياتي ليكم