21 Sep 2014
ما بين العدوان الثلاثي 1956 / و الحرب العالميه الثالثه
معركه المصير خارجيه و ليست داخليه – الجزء الخامس
——————————————————-
أصدقاؤنا الاعزاء….. بعد فتره من التوقف نعود لكم مره اخري لاستكمال سلسلة مقالتنا بخصوص الاحداث الجاريه و معركة المصير و الوجود التي نواجهها الان ….. في الاجزاء الاربعه السابقه اتكلمنا على تأصيل القصه كلها بالتفصيل ….. و اللى اكدت الاحداث يوم بعد يوم صحة رؤيتنا للامور و بالذات احداث العراق و اليمن و المحاولة اليائسه لجر المنطقه مره اخري الى التحالف مع امريكا مره اخري لاستعاده نفوذها و الضغط بكل الاوراق الممكنه للسيطره على مصر و الخليج و فك التحالف العربي الشرقي لهدم الدولار الامريكي و تفكيك و هدم امريكا ذات نفسها.
و زي ما وعدناكم المقال ده حيكون مقال خاص جدا و شيق جدا و طويل شويه 🙂 🙂 ….. فحضروا كوباية الشاى بتاعتنا ….. لاننا حنتكلم فيه عن الجيش المصري العظيم و قدراته ….. و يمكن ناس كتير تعرف ان الجيش المصري جيش قوي و لكن متعرفش اي تفاصيل ….. عشان كده حنركز النهارده علي جيشنا ….. الجيش المصري ….. اقدم جيوش في العالم …. و خير اجناد الارض…… و ليه بيتعملوا الف حساب ….. و ليه هو دائما الرقم الصعب في اي معادله اقليميه ….. زي مثلا من ثلاث شهور ايران شمت نفسها شويه على دول الخليج … قام لقي الجيش المصري بيعمل مناورات في السعوديه و الامارات و البحرين …. قام اتكتموا و مسمعناش ليهم حس لغايه دلوقتي ….. و ليه التركيز عليه لغاية دلوقتي كبير لاسقاطه و تفكيكه ….
في الاول و قبل ما نتكلم لازم نتفق على شوية مبادىء علشان منقعش في المحظور 🙂 🙂 :-
———————————————————————————
الجيش المصري في الستينات كان ينتهج سياسة الردع بالاعلان ….. زي ايران و اسرائيل و امريكا و دول كتير اللى بيستخدموها لغاية دلوقتي ….. يعني لما يصنع او يجرب سلاح جديد ….. يعمل اعلان كبير و ينزل صور و يعمل مهرجانات ….. ( تجربة الصاروخ القاهر – تصنيع الطائره حلوان – عرض عسكري لقدراته – ….. الخ ) ….. لكن من اول السبعينات اتخذ الجيش سياسه للردع مختلفه تماما و هي الصمت 🙂 🙂 …. عدوك من مصادر معلوماته تجيله اخبار ان عندك بلاوي و انت ساكت و لا كأن عندك حاجه …. فيقلق منك اكتر ….. و دى على فكره نتائجها اكبر بكتير من البروجابندا و سياسة الاعلان …. عشان كده اكتر من مره الرئيس السيسي يقول ان محدش يعرف قدرات الجيش المصري غير شخصين او تلاته فقط في الدوله .
حنحاول نتكلم بشكل مبسط على قدر الامكان لان فيه ناس كتير معندهاش الثقافه العسكريه او الموضوع بيبقي تقيل عليهم .
كلامنا كله حيكون كلام عام و في نقاط محدده و بدون الخوض في اسرار و عشان محدش يسألنا عن مصادر …. و عشان بردوا منقعش في المحظور …. مش حنقول ان الكلام ده من خبرات شخصيه 🙂 🙂 لكن اعتبروا كلامنا ده دردشه نت بننقل من معلومات منشوره في مجلات متخصصه تم نشرها على مدار سنوات في الاعلام الاجنبي و العربي و المصري من قبل 🙂 🙂
اهم حاجه بقي و لاني عارف ان للاسف فيه كائنات هلاميه عايشه و سطينا و شباب كيوت ساقط بنطلونها من يتامي البنا و شمامي كلة نصباية يناير بتوع يسقط يسقط …… عندهم حساسيه و حرقان من اي موضوع يخص الجيش ….. فياريت يوفروا وقتهم و وقتنا و ميقروش المقال …. لان بالنسبه لينا اي حد حيعلق و يستخف دمه او يتطاول على الجيش المصري حيتعمله بلوك على طول من غير نقاش.
——————————————————————————————-
شوفوا بقي….. الجيش المصري ده حدوته كبيره جدا و ميعرفهوش بجد غير اللى اشتغل فيه و عاش حياته كلها يخدم فيه …. و اهم ما يميز الجيش المصري هو عقيدته القتاليه الفريده ….. لانه دوناً عن جيوش العالم كله فهو يعتمد على الفرد قبل المعده و السلاح ….. بمعني ان العلوم العسكريه دائما بتقيم قدرات الجيوش و بتبني خططها العسكريه في اي معركه على حسب نوع التسليح اللى بيمتلكه الجيش و بعد كده مدي قدرة الافراد على استيعاب قدرات السلاح ده …. بعكس الجيش المصري اللى هو الجيش الوحيد في العالم اللى بيعتمد فى بناء خططه على قدرات الفرد اولا ثم يدعمها بالسلاح المتوفر …. و ده بيدي دائما نتائج خارج نطاق العلم العسكري و خارج المقرر و عمر ما حد بيقدر يتوقع الجيش المصري ممكن يعمل ايه….. و ده سبب ان في اي معركه او حتي مناوره بيدخلها الجيش المصري تسمع بعدها مصطلح ان المعركه دي غيرت العلوم العسكريه و بتدرس في المعاهد و الكليات العسكريه العالميه…..
من اوضح الامثله على الكلام ده هو اقتحام الساتر الترابي و المانع المائي في 73…. العلم العسكري على طول بيتجه اولا الى نوع السلاح ….. فكل الخبراء العسكريين العالميين اتفقوا على انه يلزم قنبله زريه للقضاء على الساتر الترابي و تحصينات خط بارليف …. و انه حتي في وجود قوات مسلحه بارقي الاسلحه و اللى بالفعل مكنتش موجوده وقتها لاننا كنا بنحارب بخرده و مخلفات الحرب العالميه الثانيه ….. فمن 50% الى 75% من القوات سيتم القضاء عليها اثناء العبور ……. اما العسكريه المصريه فعقيدتها مختلفه و فريده ….. فـ الاول الجندي هو اللى عبر …. و خلص القصه بخرطوم حريق و بعد لما خلص ….. عدت الدبابه و المعده و السلاح ….. فدايما الاجابه بتبقي خارج المقرر 🙂 🙂 و علي اساسها بـ يتم تغير العلوم العسكريه الغربيه و الشرقيه .
مثال تاني و من ايام حرب اكتوبر….. كان فيه مشكلة وقود الصواريخ المضاده للطائرات ….. اللى اوقف تصديره الروس لمصر عقابا على طرد الخبراء الروس …… و اصبحت الصواريخ قبل المعركه مجرد قطع حديد لا قيمة لها ….. و كان اياميها تصنيع وقود الصواريخ يعتمد على علم متقدم جدا و كانت فيه 3 دول فقط في العالم هي من تملك التكنولوجي و اسرار صناعته ….. في 6 اشهر فقط كان دكاتره مدنيين مع سلاح المهندسين المصريين توصلوا الى التركيبه و كيفية انتاجه باساليب عبقريه محدش فكر فيها قبل كده و قبل المعركه باسابيع قليله كانت مصر انتجت 150 طن من الوقود ده ….. و تم ادخال علم تصنيع وقود الصواريخ الى مصر ….. و الروس اصابهم الذهول لما شافوا الصواريخ بتصول و تجول و تسقط الطيارات الاسرائيليه …. برده كلمة السر هو الفرد اللى غير خط سير المعركه.
مثال ثالث و من ايام حرب اكتوبر برده….. الدبابه المصريه مداها المؤثر كان 800 متر و كانت بتواجه الدبابه الاسرائيليه اللى مداها المؤثر 1500 متر ….. فكان القرار ان يتم مواجهة اللواءات المدرعه بأفراد المشاه لاول مره في التاريخ ….. يعني لواء مشاه ياواجه كتيبه مدرعات ….. و ده عمره ما حصل في التاريخ العسكري ….. او مثلا زي 10 افراد يذهبوا و يعودوا عوما لتفجير ميناء حربي لاول مره في التاريخ العسكري ….. برده كلمه السر هنا الفرد اللى ممكن يعوض الفرق الرهيب في امكانيات السلاح 🙂 🙂
و للاسف دايما بيحصل خلط عند ناس كتير انهم يقولوا ان الجيش ايام اكتوبر حاجه و دلوقتي حاجه تانيه….. فهو بالفعل حاجه تانيه لان الجيش الان اقوي عشرات المرات من ايام حرب اكتوبر ….. و خليني اكلمكم في نقط مباشره و دايما حـ ندي اشارات و مقارنات على الجيش الامريكي او الاعداء المحتملين لينا.
اي جيش في الدنيا في اي حرب اهم سلاح فيه و هو السلاح الحاسم على الارض هي القوات البريه….. لانها هي اللى بتحسم على الارض …. القوات الجويه تدعم و تساعد و لكن اللى بيخلص على الارض فعليا هم القوات البريه ….. و القوات البريه المصريه سواء مدرعات او مشاه او مشاه ميكانيكي او مدفعيه او قوات خاصه بكل انواعها بتعتبر من اقوي الجيوش اقليميا …. و حديكم مثال صغير من حرب الخليج 🙂
مصر اشتركت في حرب الخليج بـ 35000 مقاتل محترف عباره عن فرقتين….. الفرقه الثالثه مشاه ميكانيكي و الفرقه الرابعه المدرعه ( و ما ادراك ما الفرقه الرابعه المدرعه المصريه 🙂 🙂 ) و بقوات خاصه و دفاع جوي و وحدات اداريه و اسناد …… و للى ميعرفش يعني ايه فرقه ….. فـ الفرقه بتتكون عادة من 3 الويه و كل لواء بيتكون من حوالي 5 كتائب لكن مش عايزين نخش في تفاصيل لان الاعداد دي بتختلف من فرقة المدرعات الى فرق المشاه الميكانيكي ….. المهم ….. الفرقه دي تشكيل قتالي كبير جدا 🙂 🙂
عند وصول الفرقه الثالثه المشاه الميكانيكي لمكان تمركزها كان يجاورها كتيبه مشاه امريكيه جايه بقالها 3 ايام و كانوا لسه بيجهزو المعسكر بتاعهم (الفرقه تحتوي حوالي على 18 كتيبه تقريبا)….. و في الصبح صحى الامريكان لقوا الفرقه بالكامل اتمت تمركزها و المعسكر المصري اتبني و خلص بكل تجهيزاته و القوات نازله طابور الصباح و جاهزة للقتال 🙂 🙂 و ده يدل على انضباط و احترافيه عاليه جدا.
الامريكان وضعوا خطة تحرير الكويت و تتلخص في ان تقوم القوات الامريكيه بتجنب الاشتباك مع القوات العراقيه و ان تقوم بالالتفاف عليها من غرب الكويت ثم تتجه يمينا لتطويق الكويت و فصلها عن الاحتياطيات التعبويه الموجوده في البصره جنوب العراق و تدخل القوات الامريكيه لتحرير الكويت من الشمال …… و كان الدور المصري يتلخص في ان تكون على يمين القوات الامريكيه كحاجز بين القوات العراقيه و الامريكيه بطول الحدود الكويتيه الغربيه لتقوم بحمايه اجناب القوات الامريكيه و تقوم بالانقضاض على الكويت من حدودها الغربيه لشغل القوات العراقيه و امتصاص كل الضربات المدفعيه و الصاروخيه على ما تتحرك القوات الامريكيه و تقوم بالهجوم من الاجناب شمالا و تدخل الكويت و بذلك تقوم هي بتحرير الكويت بعد ما تكون القوات العراقيه انهكت تماما …. يعني بالبلدي كده ….. سيب العراقيين و المصريين يعجنوا في بعض و المصريين ياخدوا كل الضربات المركزه و انا الف من وراهم و ادخل على الجاهز 🙂 🙂
و بالفعل كان صدام حسين عامل تحصينات رهيبه يقال انها احدث بكتير من تحصينات و عوائق خط بارليف…. لدرجه انه كان حافر اخاديد و ترع بالكيلومترات ماليها بترول علشان اي قوات تحاول تعبرها يولع فيها…. ده غير غابات الالغام اللى زرعها و كثافة الدبابات و المدفعيه و الصواريخ المجنحه كروز الصينيه المتطوره قصيرة و متوسطة المدى.
الجميل في الامر ان القوات المصريه فاجأت قوات التحالف انها دمرت كل منصات الصواريخ بعيدة المدي في العمق الكويتي و اقتحمت كل التحصينات العراقيه و دمرت كل تحصيناته بسرعه و احترافيه عاليه فاقت كل المعدلات في العلوم العسكريه و بأقل الخسائر و بخطط و تكتيكات محدش شافها او درسها قبل كده و دخلت الكويت قبل الوقت المحدد بعشر ساعات و قبل التفاف القوات الامريكيه من الشمال…. و دخلت بالفعل مدينة الكويت….. و الامريكان اوقفوا تقدم القوات المصريه لحين وصول عناصر امريكيه عشان تتصور المدرعات الامريكيه في شوارع الكويت بالعلم الامريكي في نشرات الاخبارعلى انها هي من حررت الكويت 🙂 🙂
الاهم بقي و ده اللى عليه العين….. اللى عاصر الحرب دي زي حالتنا مكنش بيسمع من امريكا غير على 3 اسلحه كانت امريكا عاملاها البعبع للعالم كله …. و كانت صور الثلاث اسلحه دول بتتعاد في كل النشرات بكثافه على انها احدث و فخر التكنولوجيا العسكريه الامريكيه و هم دول اللى حيخلصوا في الحرب دي و اي حرب مستقبليه و هم الطائره الشبح ” بي 117 ” و الصواريخ المجنحه كروز و منظومة باتريوت المضاده للصواريخ ….. و دول كانوا اول مره يتم استخدامهم فعليا في عمليات حقيقيه …. الجميل بقي ان الجيش المصري علم على الامريكان علامه عمرهم ما حينسوها ….. فكان السبب انه يطلع سلاحين منهم من الخدمه نهائيا و التالت يدخل في مرحلة اعادة تصميم من اول وجديد 🙂 🙂 …. ازاي ؟؟؟
اولا حنتكلم على المرحومه الطائره الشبح ” بي 117 ” اللى صورتها منوره في الصوره فوق 🙂 🙂 …. الطائره الشبح كانت مصممه انها لا تكشف باي وسيله على اي رادرا ….. يعني تدخل اي دوله و تضرب اي اهداف من ارتفاعات عاليه و محدش يشوفها و لا يعرف جت منين و لا راحت فين ….. الدفاع الجوي المصري توصل الى نظريه و طريقه عبقريه لاكتشاف الطائره دي على الرادار باستخدام رادارات قديمه معدله في سلاح المهندسين المصريين تعمل على الموجات UHF اللى كانت بتستخدم في الحرب العالميه التانيه….. فكانت حرب الخليج احسن فرصه لتجربة الرادار ….. و اول لما راحت وحدات الدفاع الجوي و شغلت الرادار كانت الطائره الشبح منوره على الرادار المصري ولا قمر 14 🙂 🙂 ……. و الامريكان عملوا مشكله كبيره ساعتها و كأنهم كانوا بيحلفونا منقولش لحد الاكتشاف ده لان كده حيروح عليهم مئات المليارات المدفوعه لتصنيع الطائره دي لانها فقدت اهم ميزه لها و اصبحت طائره عاديه زيها زي اي طائره مقاتله اخري ….. و لان فيه تعاون تقني كبير في الدفاع الجوي المصري من زمااااان ما بين مصر و روسيا و اوكرانيا و يوجوسلافيا ….. استعار الصرب نفس النظريه المصريه في اسقاط نفس الطائره في اول طلعه ليها في حرب يوجوسلافيا و انتشرت نكته هناك ساعتها و هي ” Opps … we didn’t know it was visible ” ومن ساعتها الطائره دي طلعت من الخدمه 🙂 🙂
السلاح التاني اللى اترمي بردوا في الزباله بسببنا هي منظومة باتريوت 1 …. 🙂 🙂 …. و بسببنا تم ادخال تعديلات كتير عليها و تم انتاج جيل جديد تماما منها مبني على كثير من المنظومه المصريه …… الامريكان اول لما راحوا السعوديه نشروا بطاريات الباتريوت لمواجهة الصواريخ العراقيه ….. و ثمن بطاريات الصواريخ دي كان غالي جدا و تكلفة تشغيله عاليه ….. و مع ذلك كان الامريكان بيقولوا فيها شعر و انها منظومه مفيش بعد كده …… المهم …. وحدات الدفاع الجوي المصري نشرت نظام صواريخ مصري خاااالص ….. رخيص جدا …. مضاد للطائرات و الصواريخ و اي حاجه بتطير على ارتفاعات منخفضه ….. و غير قابل للتشويش ….. و اسمه “نظام آمون” …… العراق لما ضربت قوات التحالف بصواريخ كروز المجنحه بكثافه فشلت بطاريات الباتريوت في اسقاط اي منها ….. و النظام المصري قضي علي اي صاروخ سواء كان سكود او كروز في القطاعات المنتشر فيها ….. و دي كانت ضربه قاضية اخري للسلاح الامريكي و الكويت تعاقدت مع مصر لشراء المنظومه ….. و الامريكان عملوا مشكلة كبيره للضغط على مصر لبيع عدد من البطاريات دي ….. و انتهت ببيع مصر لعدد من بطاريات النظام آمون لامريكا في مقابل صفقه كبيره من طائرات الاباتشي اللى كان الامريكان بيرفضوا بيعها لمصر 🙂 🙂 ….. و بدأو في تعديل تصاميم صواريخ الكروز الامريكيه لانها فقدت قيمتها بعد وجود نظام دفاع جوي مصري بيصدادهم زي الذباب 🙂 🙂
الخلاصه هنا في انك تستنتج حاجه مهمه جدا….. ان السلاح الامريكي و التكنولوجي الامريكيه قبل ما تطلع و يتم نشرها للقوات الامريكيه …. بيكون الجيش المصري جاب تفاصيلها و اشتغل على اسلحه لمواجهتها و تطليعها من الخدمه اساسا 🙂 🙂 و هو قاعد ساكت و محدش بيعرف ايه اللى توصل ليه الجيش المصري غير بالصدفه البحته 🙂 🙂 ….. و ده سبب اصرار الامريكان على عمل مناورات النجم الساطع مع الجيش المصري لانهم بيجوا يتعلموا عندنا و يشوفوا ايه الجديد اللى وصلناله …. و هو بردوا سبب الكلمه اللى اتقالت كتير لما الغت امريكا مناورات النجم الساطع ” ان الامريكان هم الخسرانين 🙂 🙂 ” …. و دي فعلا حقيقه …. و يا ريت كنتوا تقدروا تشوفوا جنودهم و قادتهم كان بيحصل فيهم ايه ايام المناورات ….. و لا لما كانت حبيبة قلبنا الميج 21 القديمه لما كانت بتسقط الاف 15 الامريكيه الاحدث في سلاح الطيران الامريكي 🙂 🙂 .
و لو جينا اتكلمنا على القوات الخاصه المصريه فحدث و لا حرج….. فإذا كان بيقال ان القوات الخاصه المصريه مصنفه انها السادسه على العالم و في مواقع بتقول انها الرابعه ….. لكن الاكيد ان قوات الصاعقه البحريه هي الاولي على العالم بدون منازع …. و ده مش من دلوقتي ….. الصاعقه البحريه المصريه مفتريه و سابقه العالم بسنين ضوئيه و متفوقه علي اي مثيل ليها في اي جيش في العالم من اكتر من 45 سنه من ايام الهجوم على ميناء ايلات 3 مرات …. القصه اصلي بالارقام و معدلات التنفيذ ….. فلغاية النهارده اي معدلات بتعملها اقوي صاعقه بحريه في العالم شوف هي قد ايه ….. و اضربها في اتنين يطلعلك معدلات التنفيذ المصريه 🙂 🙂 …. و مقدرش اقول اي تفاصيل تانيه اكتر من كده.
و بدون الخوض في التفاصيل و لكن العسكريين يفهموا كلامي كويس جدا….. فيه كتير من الطيارين المصريين و قائدي القطع البحريه و قائدي المشاه و المدرعات ليهم تكتيكات و مناورات و خطط مسجله باسمهم في العلوم العسكريه و يوجد تكتيكات لم يفعلها الا ضباط مصريين حتي الان …. القصه هنا انه ممكن يعرف ايه السلاح اللى عندك سواء كان شرقي او غربي ….. لكن اللى بيجننهم انهم ميعرفوش لما المنظومات دي تتحط و تشتغل مع بعض حيكون الناتج بتاعها ايه .؟؟؟؟؟ ….. و حتي لو عرف اكيد مش حيعرف عقل المقاتل اللى بيطور فيهم و اللى بيستخدمهم ممكن يطلع ناتج شكله ايه 🙂 🙂 …. و الاهم و اللى يجن اكتر ان الجيش المصري مش بيتكلم و لا بيقول حاجه 🙂 🙂 …. سااااااكت …. و ده ردع في حد ذاته ….. و دي تلخص الكلمه اللى قالها الرئيس السيسي …. الجيش المصري نار …. لا يتلعب بيه و لا يتلعب معاه 🙂 🙂 .
القصه في الجيش المصري انه الجيش الوحيد في العالم اللى حارب بالسلاح الشرقي و حارب بالسلاح الغربي بعد ما هضم عقيدتهما القتاليه…. و عنده خبرات متراكمه كتييييير و فوق ده كمان الجيش المصري ليس مستخدم للسلاح…. و لكن مطور ليه…. بمعني اي سلاح ليه نقط قوه و ضعفه…. فنقاط ضعف السلاح الشرقي بيكملها بالسلاح الغربي و العكس….. و بعدين يضيف ابتكاراته عليه …. فيكون الاداء و الناتج خرافي و باقل التكاليف ….. يعني ممكن تلاقي منظومة دفاع جوي فيها رادار شرقي على صاروخ غربي زايد عليهم ابتكارات مصريه من الخبرات المتراكمه …. ممكن يطلعلك منظومه رخيصة التكاليف و بتدي نتائج اكبر بكتيييييير من منظومات شهيره و غاليه جدا ….. ده بخلاف استثماره و اعتماده على الفرد اللى بيستخدم السلاح زي ما قلنا ….. فالنتائج دائما بتطلع خارج التوقعات و خارج المقاييس العسكريه….. و لو حد فكر يهجم عليه حيبقي داخل الحرب و هو مش عارف اي نقاط الضعف و القوه في السلاح المستخدم فعليا علشان يلعب عليها …… زي اللى حصل في المناوره بدر الكبرى سنة 1996 اللى رعبت اسرائيل و امريكا و اللى اتكلمنا عليها قبل كده …. لكن اللى متابعش ….. خلونا نتكلم عليها بالمره.
في سنة 1996 تم تنفيذ المناورة بدر ، و هي من أكبر المناورات التي تمت في تاريخ القوات المسلحة المصرية و اشترك فيها الجيشين الثاني و الثالث الميداني كاملين مع القوات الجوية و الدفاع الجوي و الوحدات الخاصه و 70 قطعة بحرية … و كان تحاكي صد هجوم محدود من الجبهه الغربيه و الجنوبيه كأي مناوره عاديه ….. و عشان تبقوا عارفين ….. لما الجيش المصري بيعمل مناوره …. دول كتير جدا بتطلب تبعت مراقبين عسكريين و خبراء يحضروا المناورات دي و بيركز اقماره الصناعيه لمراقبة ايه اللى بيحصل لانها بتبقي فعلا فرجه و بيشوفوا ايه الجديد عندنا 🙂 🙂 .
المهم و مع بدىء المناوره و لسبب ما…. و بدون سابق انذار….. جت اوامر عليا مفاجئه حتي لقادة الجيش بتغير الاوامر و شكل المناوره الى صد هجوم كاسح من الشمال الشرقي يعني من اسرائيل…… يعني محدش من القوات او القاده كان مستعد لحجم و شكل المناوره…… وده كان مفاجأة لاسرائيل اللى دب الرعب فيها و ذكرها بمفاجأة حرب اكتوبر …. لان معدلات التنفيذ تخطت معايير العلوم العسكريه و بالذات ازاي جيش بقاله 23 سنه في حالة استرخاء عسكري بعد اخر حرب شامله حاربها يقدر يوصل للمعدلات دي في حجم مناوره بالضخامه دي 🙂 🙂 .
الجيشين الثاني و الثالث نجحوا في الاستنفار و الجاهزية لتنفيذ الاوامر الجديده في ١١ دقيقه فقط….. و تم نقل نصف معدات و قوات الجيش المصري عبر قناة السويس داخل سيناء في ٦ ساعات فقط و هذه المعدلات العالية أدت الى دب الرعب في إسرائيل و تم إستنفار الجيش الاسرائيلي الى الحالة الاولي و تدخلت امريكا للاستفسار و طالبت بعدم تكرار هذا الاستفزاز مرة اخري و كانت أزمة كبيرة ساعتها ، .. و لكن في وقتها كانت الرسالة الى إسرائيل و الرساله وصلت … و أصدر مركز الدراسات العسكريه للبنتاجون اكثر من ١١ دراسه مستفيضة عن هذه المناورة و حتي الأن فهي مجال نقاشات في مراكز الدراسات العسكريه و الاستراتيجيه على مستوي العالم.
و لاول مره العالم يشوف في مناوره بالحجم الضخم و كمية القوات دي الطائره الميج بتطير جنب الاف 16 و الدبابه الابرامز و الإم 60 الامريكيه ماشين جنب الدبابه تي 54 و الدبابه تى 62 الروسيه و مجنزرات النقل الشرقيه و الغربيه و منظومات الدفاع الجوي الشرقيه و الغربيه و المصريه و كله شغال مع بعضه في تناغم رهيب و بيتم استخدامهم بحرفيه شديده جدا .
و على فكره…. الاسم الكودي للجيش المصري في المخابرات الامريكيه هو ” الصخره ” و هم بيعملوله الف حساب لان قوته تكمن في عقيدته القتاليه و الاداريه ….. فهو من افضل جيوش العالم من الناحيه الاداريه …. فهو انجح منظومه موجوده في مصر….. و نجح الجيش انه يطلع نفسه تماما من اعتماده على اي قطاع مدني و اصبح يعتمد على موارده الذاتيه سواء في التمويل او في احتياجاته اليوميه من اكل و شرب و تموين و نقل و خلافه ….. زي كده بنزينات وطنيه اللى اختير اماكنها استراتيجيا لخدمة القوات في اوقات الحروب ….. اما في وقت السلم زي دلوقتي فبتخدم عادي على المدنيين …… و زي مصانع “المكرونه يا مني ” و الاكل اللى امكانياتها تقدر توفر الغذاء لمليون و نص جندي مستدعي احتياطيا وقت الحروب و لكن لاننا في حالة سلم و العدد ده مش مستدعي حاليا فبتستخدم طاقتها في المجال المدني ….. فحسب تقارير البنك الدولي …… مخصصات الجيش في الموازنه لا تتعدي 2% من موازنه الدوله ….. و بيتم تمويل كل اللى اتكلمنا عليه ده من موارده الخاصه و مشاريعه الانتاجيه….. يعني مش بياخد حاجه من حد زي الفاشلين الكذابين و الاغبياء و دلاديل النوشتاء ما بيقولوا ان 40% من الموازنه و الاقتصاد في ايد الجيش ……
يا ترى عرفتوا بقى ليه حيموتوا لاسقاط الجيش …… و ليه حيموتوا لكشف ميزانيه الجيش و التسليح …… و الجيش بيعمل مكرونه يا مني…. و لازم نراقب الميزانيه يا مني ؟؟؟؟
زي كده في احد اللقاءات الشبابيه كنت بتكلم بتفصيل اكترعن الجيش المصري و قدراته و بحكي بالتفصيل عن حرب اكتوبر و مقارنه سريعه بدلوقتي طلعلي شاب كيوت و حبوب و معرفش ليه دايما بنطلوناتهم ساقطه منهم 🙂 (معرفش ايه العلاقه 🙂 🙂 )….. المهم الظاهر الكلام معجبهوش و زعله قوي موضوع ان الجيش المصري جيش قوي….. فوقف وقاطعني و قالي ايه اللى انت بتقوله ده انت بتتكلم عن الجيش المصري و كانك بتقول انه لو مصر حاربت امريكا بكره حتمحيها من الوجود ….. دي امريكا يابا …… 🙂 🙂 ….. انت حتقارن الجيش بتاعنا بامريكا ؟؟؟؟
رديت عليه قلتله…. انا حرد عليك علشان زمايلك تفهم مش عشانك انت….. فعلا المفروض الجيش المصري لا يقارن بامريكا ….. لان القوات المصريه البريه اقوي منها بكتييييييير ….. لكن هما اقوي جويا و بحريا ….. لكن الدنيا مش بتتحسب بالشكل ده …. ازاي ؟؟؟؟؟؟ اقولك
هاتلي حرب واحده بريه دخلتها امريكا و انتصرت فيها 🙂 🙂 …. فيتنام و لبنان و العراق و افغانستان ….. ده حتي الصومال يا راجل …. امريكا دخلت تعتقل محمد فارح عيديد في التسعينات ….. القوات الخاصه الامريكيه اتدبحت هناك و اتعملت عليهم حفله و كانت فضيحه 🙂 🙂 …. اما ميزه التفوق الجوي فده ممكن يتم تحيده تماما و حصلت قبل كده و بالجيش المصري لما تم تحييد احدث الطائرات الامريكيه وقتها اللى كانت بتستخدمها اسرائيل في 73 تماما و اشتغلنا عليهم بالقوات البريه اللى هي بتحسم المعركه بالفعل….. مصر عمرها ما حتحتل بلد تانيه ….. فدائما اللى حـ يحاربنا ….. حـ يحاربنا على ارضنا او في نطاق مجالنا الحيوي ….. فلو عايز يجي يتفضل ….. ثانيا و ده الاهم ….. مفيش جيش شريف في العالم او في التاريخ تم هزيمته و هو يحارب معركه عادله و يدعمه شعبه بجنون زي الشعب المصري ما بيعمل ( طبعا باستثناء ذوي البناطيل الساقطه 🙂 🙂 )
طبعا التفاصيل عن الجيش المصري كتير جدا لكن مش كل حاجه ينفع نتكلم عنها….. لكن الحاجه الاكيده و اللى مفيش اختلاف عليها ان جيش مصر جيش عظيم جدا و شريف جدا و بالفعل قوته من شرفه و لا عزاء للخونه و الحاقدين ….. عاش الجيش المصري العظيم.
اخر حاجه يا ريت اللى مقرأش باقي المقالات يدخل عليهم من اللينكات التاليه لان رؤيتنا للصوره كلها متكامله و لازم تتشاف كلها مع بعض
تحياتي ليكم