29 Sep 2014
ما بين العدوان الثلاثي 1956 / و الحرب العالميه الثالثه
ما بين كذبة 60 سنة حكم عسكرى و شعار يسقط حكم العسكر- الجزء السادس
—————————————————————————-
أصدقاؤنا الاعزاء….. نستكمل اليوم مجموعة مقالاتنا و زي ما وعدناكم في ترتيب المقالات …. حنبدأ من اليوم قبل التركيز على الوضع الداخلي المصري في تأصيل و محاولة ضبط مصطلحات و امور كثيره منها اكاذيب تم ترديدها طوال سنوات ….. و بدأ الكثير يرددها يا اما عن جهل او حقد او تبعا لمبدأ الاستسهال و ان الزن على الودان امر من السحر ……. و التي للاسف تسببت في النيل من ثوابت وطنيه و أعمت الكثير من الشباب و اصبح للاسف الكثير منهم الكثير مقتنع ان سبب فشله سياسيا و فكريا هو نجاح مؤسسه الجيش وانه عشان يشعر بقيمة نفسه و انه ليس امعه يبقي لازم يكره الجيش و يكره مؤسسات دولته ……
و مع اننا تكلمنا في مقال سابق من شهورعن موضوع المقال (كذبة 60 سنه حكم عسكري) و لكن الموضوع فعلا هام و اعلم جيدا ان مقال اليوم قد لا يعجب البعض و سيكون مؤلم لهم…. و سيصيب البعض الاخر بالهياج العصبي….. و لكنها الحقيقه و التي للاسف يهرب منها الكثير …… او بالاصح لا يريد البعض الاخر الاعتراف بفشله و يريد الاستسهال بالقاء اسباب فشله على نجاح غيره.
و تبعا الى ان بداية حل اي مشكله و إصلاحها يكمن في التوصيف الصحيح للمشكله نفسها…. فسنبدأ في تأصيل مصطلح “60 سنة حكم عسكري” و هي الكذبة اللى بعض الخونه ضحكوا بيها على شباب كتير….. عشان يبعدوا عنهم فكره فشل النخبه السياسيه و جشعهم و انتهازيتهم و يعملوا منهم آلهه من العجوه غير قابلين للنقد و المحاسبه و يخلقوا منهم ابطال اسطوريين و مناضلين كذبا ….. فــ محدش يحاسبهم و لا حتي يحاول الشباب انه يحاسب نفسه او يفكروا فكر صحيح و لايحاولوا يصلحوا من افكارهم السياسيه ….. فيكملوا في فشلهم ….. و كمان يسقطوا فشلهم علي المؤسسه الناجحه اللى شايله البلد ….. ويكرهوها و يحاولوا يسقطوها و عشان تبقي فاشله زيهم.
طب في الاول تعالوا نعرف يعني ايه حكم عسكري….. الحكم العسكري يعني حكومة عسكريه قائدها عسكري …. و وزراؤها عسكريين و قوانينها عسكريه مش مدنيه …… يعني مفيش اصلا دستور مدني ….. زي الوضع اللى موجود في تايلاند او اللى كان موجود في بعض الدول الافريقيه…… يعني انت كمدني ملكش وجود اساسا و ملكش اي حقوق ….. و ممكن اي عسكري يصدر في حق واحد مدني ماشي في الشارع شكله مش عاجبه حكما بالاعدام بدون اي اجراءات تقاضي و ينفذه في الحال بدون اي مسائله.
فـ عشان منرددش كلام زي البغبغانات و خلاص ……. طب تاريخيا هل ده كان موجود في مصر و لا لأ ؟؟؟؟ ….. فالاجابه هي انه كان موجود بشكل جزئي في فترة عشرين سنة فقط ….. طب يعني ايه بشكل جزئي ؟؟؟؟ ….. اقولك ….. من سنة 1952 الى سنة 1972 كان فيه دستور مدني و مجلس نواب مدني و رئيس منتخب (جمال عبد الناصر ) بانتخابات لا شك فيها لان محدش يقدر يقنعني ان في الوقت ده كان فيه حد منافس لجمال عبد الناصر ليس في مصر فقط و لكن على مستوي العالم العربي و افريقيا و اسيا ….. و لكن كانت الحكومات كلها في الوقت ده تتكون من عسكريين.
مصر اتشكلت فيها اول وزاره عسكريه في 7 سبتمبر 52 بعد وزارة على ماهر باشا بقيادة اللواء محمد نجيب…. و مرورا باحد عشر وزارة كان يرأسها عسكريين في عهد عبد الناصر تم تشكيل اول وزارة مدنيه بقيادة د/ عزيز صدقي في 17 يناير 1972 في عهد السادات بعد ثورة التصحيح و التي تم بعدها اطلاق الاحزاب و الحياه المدنيه….. فــ إذا إعتبرنا ان ال 20 سنة دول كانوا حكم عسكري مع ان مصر كان فيها دستور مدني و قوانين مدنيه …… لكن فيه مفارقه عجيبه جدا تبين لنا مدي الشيزوفرينيا الفكريه لمرددي شعار سقوط الحكم العسكري و كارهي الجيش 🙂 🙂 🙂
تخيلوا بقي ان في ظل الـ 11 حكومه عسكريه دي….. مصر بنت السد العالي و مصانع الحديد و الصلب و النحاس و الالومنيوم و مناجم الفوسفات ……. و تم اقرار قوانين الاصلاح الزراعي و قوانين التامينات الاجتماعيه و قوانين العمل و إقرار مجانية التعليم و إنشاء نظام التأمين الصحي لكل افراد الشعب….. و تم انشاء القطاع العام بكل خدماته ….. و دي شعارات العدالة الاجتماعيه اللى فلقونا بيها و صدعونا بيها 🙂 🙂 ….. و كان العصر الذهبي للصانع و الفلاح و الطبقه الوسطي …… و كان أيضا العصر الذهبي للازهر اللى تواجد على الارض في دول العالم كافة سواء شرقا او غربا او في افريقيا …… و قادت مصر و دعمت دول العالم في تحررها من الاستعمار…… و أنشأت مصر حركة عدم الانحياز لمواجهة الدول العظمي سواء الامبرياليه الامريكيه او الشيوعيه السوفيتيه ……
تخيلوا بقي انك طوال السنين اللى فاتت ان كل الحركات الشبابيه و الاحزاب و النخب السياسيه الفاشله بتاعتنا كانت بتتباكي و تصرخ من السياسات و الفساد اللى اهدر كل انجازات الـ 11 حكومه عسكريه اللى حكموا مصر….. يعني تلاقيهم بيتكلموا على تدمير و بيع القطاع العام و محاربة الصناعه و الصانع و الفلاح و تدهور التامين الصحي و الغاء قوانين عديده كانت موجوده لصالح العمال و حتي تحجيم دور الازهر اللى ادي الى تدهور الخطاب الديني 🙂 🙂 .
المفارقه العجيبه ان كل الانجازات و المكاسب الاجتماعيه دي تمت في عصر حكومات عسكريه و في اقصاء تاااااام للتيارات المدنيه و في ظل اعلام موجه …… و ان كل الانجازات دي تم اهدارها في ظل تواجد الاحزاب و النخب المدنيه اللى كانت موجوده لمجرد الوجود لتمارس جشعها و انتهازيتها السياسيه لتحصل على مكاسب شخصيه على حساب متطلبات و احلام الشعب.
و الغريب اني للاسف لما بناقش شباب المفروض انه مثقف الاقيه بيسخن و يقولي بشماته غريبه و كأن مصر دي عدو ليه ان مش مهم كل ده لكن المهم ان النظام المصري كان سبب في النكسه….. فأرد عليه و اقوله ان النكسه دي معركه في حرب و اذا كان النظام اعترف باخطاؤه و لم ينكرها ….. بل اعلن تنحيه بعد العدوان بثلاث ايام فقط ….. و لكن الشعب تمسك به و أصلح اخطاؤه و حارب و انتصر و رجع ارضنا ….. فياريت تتعلم ازاي تتعلم من اخطائك و تنجح زيه….. فيسيبني و يمشي.
و الاغرب ان الاقي واحد تاني بـ يشلني بجهله السياسي لما بيردد زي البغبغان ان السادات و مبارك عشان كانوا عسكريين يبقي ده كان حكم عسكري….. و للاسف ان ده يدل على الجهل السياسي و انعدام حتي الثقافه السياسيه…. لان الكلام ده معناه ان المجلس العسكري كان لازم يوافق على كل قانون كان بيقره مجلس الشعب او قرار بياخدة مجلس الوزراء و ده مكنش بيحصل و لا موجود اصلا ….. القصه بس ببساطه ان النخبه السياسيه و الاحزاب المدنيه مكنش ليها اي وجود او تأثير سياسي فاعل ليه قواعد شعبيه تقدر تفرض فيه وجهة نظرها ….. يعني كانوا تحصيل حاصل و مجرد احزاب كرتونيه لتجميل و ترسيخ وجود النظام القائم.
المشكله اني لما بتناقش معاهم يقوم يرمي في وشي “تابوه” اني بطبل لعودة الحكم العسكري مره تانيه….. و ده تاني بيؤكد الفشل الفكري السياسي بتاعهم لان حتي المؤسسه العسكريه مش عايزه تحكم و لا عايزه من اصله تخش في السياسه و تتعامل مع طبقة سياسيين فاشلين و فاسدين و انتهازيين ….. و حتي مش عايزه تتعامل مع اي جهه مدنيه حتي في اكلها و شربها ….. لانها لا تحتمل التعامل مع الفشل الاداري المدني.
و لما بلاقي حد يقولي ازاي بقي لينا تاثير و الانتخابات كانت بتتزور و القبضه الامنيه كانت بتمنع تحركات الاحزاب في الشوارع و تواصلها بالناس ؟؟؟ 🙂 🙂 …. لا و النبي 🙂 🙂 ….. ده بقي على اساس ان فعلا كان ليك تاثير علي الشارع و الشرطه مانعاه 🙂 🙂 …. و لا مثلا الجحافل الشعبيه و قواعدك على الارض كانت بتسد عين الشمس 🙂 🙂 …… امال الاخوان كانوا منتشرين ازاي و ليه الامن مكنش بيمنعهم 🙂 🙂 ….. يا حبيبي اعترف ان فعلا ملكش وزن في الشارع و لا قيمه و محدش بيصدقك بسببك انت و بسبب نخبتك و ابطالك المناضلين اللى من ورق .
و اذا كان حد بيقول ان سبب الفشل ده مش من النخبه و لكن من الشعب نفسه بسبب الجهل و الفقر و التجريف السياسي لعشرات السنين و المشاكل الاقتصاديه حرد عليه و اقوله….. ان قبل ثورة 1952 كان نسبة الاميه و الجهل اضعاف النسبه الان و ان الفقر في مصر كان يتعدي الـ 90% لدرجة ان بعد الثوره …… دشن عبد الناصر مشروع مارشال اجتماعي اقتصادي للقضاء على ظاهرة الحفاه في الشوارع و القري المصريه لان 90% من الشعب المصري اياميها كان فقير لدرجة انه كان بيمشي حافي ….. و مع ذلك و في ظل الظروف دي كان يوجد في مصر شخصيات و نخبه وطنيه على حق ….. و ليهم مشروعهم الوطني اللى واصل للناس و ملتفه حواليه …… زي مصطفي النحاس و طلعت حرب و مصطفي كامل و عبود باشا و غيرهم من العشرات اللى ضوفر رجلهم برقبة اكبر اسم من نخبتنا الحاليه الفاشله.
و الاغرب انه تلاقيهم مقتنعين ان البلد مليانه كفاءات سياسيه و مش واخده فرصتها كان دافنها مبارك و نظامه 🙂 🙂 ….. أموت انا بقي و اعرف هما فين ؟؟؟؟ 🙂 🙂 ….. اذا كان اكبر الاسماء اللى صدعونا بيها و كانوا عاملين منهم ابطال و مناضلين كبار واحد ساب البلد و هرب بعد ما وصل للحكم و بقي نائب رئيس و الحكومه بالكامل مشكله من حزبه السياسي في ادق وقت تواجهه مصر و التاني لما فكر يخش انتخابات حره نزيهه يعرف بيها وزنه و حجمه الحقيقي الفعلي في الشارع بعيدا عن غوغائيه الخطب و الصوت العالي ….. جمع التوكيلات بتاعته بملحق و طلع في النتيجه الثالث بعد الاصوات الباطله ….. و كلهم كانت اختياراتهم للشعب و تقديراتهم السياسيه خاطئه من اول يوم في 25 يناير ….. فدعموا رحيل نظام مبارك بدون تحضير البديل المناسب مما ادي الى دخول البلد في فوضي سياسيه و امنيه و تم تدمير الاقتصاد المصري و كانوا سيتسببون في اسقاط الدولة المصريه تماما مثل ليبيا و سوريا و اليمن … ثم دعموا عاصري اللمون لتمكين الاخوان في الحكم.
و العجيب و اللى يثبتلك ان الواحد منهم فعلا جااااااااهل سياسيا و مثقف على ما تفرج 🙂 🙂 ……. انك تلاقي الواحد منهم بيتكلم بمنتهي الثقه و يقولك بكل فخر انا يساري ….. او تبع الاشتراكيين الثوريين ….. و في نفس الوقت كان بينزل يدعم الاخوان المسلمين في الانتخابات و كان بينزل يدعم مرسي العياط للوصول للحكم !!!!!!! ….. ازاي بس يا جدعان ……. او يقولك انا ناصري بس ضد وصول شخصيه بخلفيه عسكريه للحكم ……. ده بقي في علم السياسه زي بالظبط لما تطلع صافيناز و هيفاء وهبي تقول انها تدعم حزب النور و نشر الفكر الوهابي في مصر 🙂 🙂 ….. مهو جهل بعيد عنك و شيزوفرينيا سياسيه فكريه 🙂 🙂 ….. ده لينين او عبد الناصر نفسهم لو كانوا عايشين كانوا انتحروا لما شافوكم 🙂 🙂 .
استقيموا يرحمكم الله….. لازم نعترف ان سبب الفساد و المشاكل اللى كنا عايشينها مش النظام اللى كان الموجود لانهم مكنوش ملايكه …. لان المال السايب يعلم السرقه …… و انتم و نخبتكم المدنيه اللى سيبتوهم يعملوا اللى هم عايزينه في مقابل جشعكم و انتهازيتكم السياسيه على حساب الشعب …… الشعب كان بيتسرق فلوسه و احلامه بسبب فشلكم انتم و انتهازيتكم انتم و فسادكم انتم….. فانتم لم تنجحوا في تجربه واحده اوملف واحد يوحد ربنا في حياتكم …… فلم تنجحوا في اصلاح اي منظومه سواء صحة او تعليم او طرق او اي شىء ….. لم نسمع عن حل واحد قابل للتطبيق على الارض لاي مشكله او مشروع وطني له رؤيه محدده يصدقها الناس و يلتفوا حولها و يدعموكم فيها ….. صارحوا انفسكم ….. انتم تريديون الكراسي فقط و قبل اي شىء ….. اخذتم فرصتكم لثلاث سنوت و و لم نأخذ منكم غير الجعير و الصوت العالي و الشتيمه و السباب و قلة الادب و التطاول على كل مقومات الدوله و الدعوه لهدمها ….. و النتيجه واضحه جدا ليكم …… و وزنكم في الشارع واضح…… وزنكم و قيمتكم صفر ….. فـ مش معقول كل الناس غلط و انتم بس اللى صح !!!!! ….. اكيد انتم اللى غلط
يا ريت بقي محدش يسقط فشله على المؤسسه الوحيده الناجحه في البلد و سيبوها في حالها …… انجح انت بس الاول و قدم البديل المدني الناجح و القادر على قيادة البلد و اللى له وزن و قدر في الشارع أو اعمل حزب سياسي واحد ان شالله فيه 5 الاف واحد بس و بعدين ابقي اتكلم ….. أما جيش الوطن فهو شرفه و حمايته و مصدر فخر ليه …… و عمري ما شفت مواطن في اي دولة بيكره جيش بلده بالشكل ده ….. المشكله فيكم انتم ….. فـ صلحوا نفسكم الاول .
انا عارف ان المقال مش حـ يعجب ناس كتير و حيكون صادم للبعض ….. لكن للاسف هي دي الحقيقه …. و يا ريت الناس تفوق و تشوف مصلحة بلدها فين ….. و اللى مش حيفوق و يشتغل لصالح البلد ….. اخرته حتبقي في مستشفيات الامراض العقليه …. لان مفيش حد حيستناه و ياخد بايده ….. القطار المصري طلع من المحطه و مش حنسمح لحد انه يعطله تاني ……. تحياتي ليكم