24 Dec 2014
انهيار اسعار البترول — كلمة السر أوبك
—————————————
اصدقاؤنا اصدقاء صفحة كلام في الصميم
زي ما وعدناكم قبل كده … حنبدأ من النهارده مجموعة مقالات في تأصيل بعد الامور و شرح وجهة نظرنا في الوضع العالمي الحالي اللى بيتسم بالتشابك و الغير منطقيه المطلقه.
و بنأكد للمره المليون اننا عمرنا ما نشرنا معلومات او عندنا بنوره مسحوره بنعرف منها الاخبار و لكن زي ما اتعودنا اننا بننشر تحليلات و وجهة نظرنا اللى تحتمل الصح او الخطأ … لكن الحمد لله ان كل تحليلاتنا و توقعاتنا و رؤيتنا السابقه كانت صحيحه و بتتحقق على ارض الواقع. و النهارده حنبدأ نتكلم عن قصة اسعار البترول و السبب فيها و لصالح مين.
بصوا بقي …. الموضوع ده متشابك جدااااا … و صعب شويه و غير منطقي كمان لكن واحده واحده كده حنحاول نشرح ايه القصه .
اتفقنا قبل كده ان سبب المعركه اللى احنا فيها او بالاصح الحرب الغربيه على بلاد الشرق الاوسط و اللى تخططه الى حرب عالميه ضد الشرق كله هو محاولة الاستحواذ على مصادر الطاقة من غاز و بترول.
و قولنا ان الغرب كان عايز يستولي على غاز الخليج و شرق البحر المتوسط و يمده الى اوروبا عبر انابيب غاز عبر سوريا الى تركيا و منها الى اوكرانيا عبر اقليم القرم لصالح قطر و اسرائيل و علي حساب الدول الموجود بها احتياطيات الغاز او الماره بها انابيب الغاز …. و ايضا الاستيلاء على آبار البترول و ده يستلزم اسقاط و تفتيت دول المنطقه بالكامل .
و ان تحالف الشعب المصري مع جيشه في 30 يونيو كان بداية لاسقاط المخطط ده و افساده على الارض و بدأ بالفعل ينحصر تدريجيا على الارض …. لكن اكيد القصة لسه مخلصتش 🙂 🙂 .
طيب ايه بقي قصة اسعار البترول و ايه السبب فيها ؟؟؟؟ …. القصه باختصار و العركه اللى شغاله دلوقتي على تفكيك منظمة اوبك:) 🙂 …. طب يعني ايه الكلام ده ؟؟
بصوا …. سوق البترول الحالي بيتكون من مجموعة منتجين كبار متجمعين مع بعض في منظمة اسمها اوبك … و المنظمه دي هي اللى بتحدد سعر برميل البترول …. ازاي ؟؟؟؟
دول المنظمه بتتفق بينها على حجم الانتاج اللى بيتصدر يوميا حسب الطلب العالمي … و بنظرية العرض و الطلب بيتحدد السعر …. و طبعا كل دوله منهم ليها حصة مقننه و متفق عليها و متقدرش دولة تزود انتاجها غير لما تاخد اذن الدول الاخري و الدوله اللى حيتاخد منها جزء من حصتها في السوق لصالح الدوله اللى عايزه تزود انتاجها ….
يعني زي بالظبط كده سوق الوكاله … المعلمين الكبار متفقين مع بعض على حصة من السوق عشان الاسعار متنهارش … و كل معلم ليه حصته حسب وزنه و حجمه و انتاجه … يعني السعوديه ليها نصيب الاسد لانها اكبر معلم في السوق …. و كلمتها تمشي على التخين 🙂 🙂 … يعني امريكا تتنطط و تعمل اللى هي عايزاه … لكن العقده لو جت في المنشار و السعوديه استخدمت ورقة اوبك … امريكا تجيب المرشدير العظيم لان بتصريح واحد من وزير البترول السعودي …. ممكن يقلب الاسعار و يسبب ازمه اقتصاديه سواء في البورصات العالميه او في النمو العالمي.
امريكا بقي ما دام فشلت حتي الان في الاستحواذ على مصادر الطاقة على الارض بفشل خططها في الشرق الاوسط … يبقي بتحاول تفك الاشكاليه دي بانها تفكك المنظمه دي و سيطرة المعلمين الكبار الاصليين على سوق النفط علشان كلمتها هي اللى تمشي عليهم …. و في نفس الوقت تبقي مسيطرة على السوق و على السياسة….. طب ازاي ؟؟؟
أحاول اخش السوق بالعافيه و احرق الاسعار علشان ازاحم و افكك المنظمه دي و اخد حصة كبيره حاكمه من السوق …. طب ازاي و انا دولة معنديش مصادر تكفي التصدير بالكميات دي …. حتي البترول الصخري اللى بنتجه يا دوب بيكفي احتياجاتي و تكلفة استخراجه غاليه جدا مقارنة بالبترول العادي ؟؟؟؟
امريكا بدات تستخدم نتائج عمليات كلابها السعرانه اللى على الارض في الشرق الاوسط …. و بدأت داعش بالفعل من فتره بعد الاستيلاء على مصافي نفطيه كتير في العراق و سوريا و ليبيا في التصدير الفعلي و بكثافة عبر الاراضي التركيه و السواحل الليبيه لصالح امريكا و اسرائيل …. و تخيل يا مؤمن … ان العراق و ليبيا ايام ما كانت دول و فيها حكومات … مكانتش تعرف تبيع برميل بترول واحد ايام العقوبات خارج نطاق الحدود المسموح بيها في قرارات الامم المتحده …. لكن دلوقتي شوية صيع و همج بيبيعوا آلاف البراميل يوميا و العالم عامل نفسه مش واخد باله 🙂 🙂 و كله بأوامر و لحساب امريكا.
طيب لما يبقي فيه معروض كتييييير عن الطلب يحصل ايه ؟؟؟؟ …. الاسعار تنتهار …. طب وده يسبب ايه ؟؟؟؟ …. حاجه من اتنين …
يا إما دول اوبك يتفاوضوا مع امريكا و يقبلوا بشروطها انها تخش كمصدر كبير و بالحصه اللى هي تفرضها عليهم و بالبترول المسروق كمان 🙂 🙂 … و طبعا لازم يوافقوا و يدعموا اي قرار سياسي امريكي بعد كده و يا ريت تنتهي على كده … دي حتنتهي بتفكيك الدول دي ذات نفسها 🙂 🙂
او ان الدول دي تحمي مصالحها و تواجه الكلام ده و يمنعوهم من الاستحواز على حصه في السوق بالبترول المسروق … طب ازاي ؟؟؟ …
زي بالظبط اللى بيحصل في اي سوق ليه معلمين كبار و بيحاولوا يحموا مصالحهم … قاموا مزودين الانتاج عشان يحرقوا الاسعار زياده علشان ميتهنوش باي مكسب بالبترول المسروق و في نفس الوقت يضغطوا اقتصاديا على شركاتهم اللى بتستخرج البترول الصخري اللى تكلفته عاليه و بدات تخسر بالفعل لان السعر الحالي يكاد يقترب ن تكلفة استخراجه ….
طيب مهو ممكن حد يقول ان امريكا مش خسرانه حاجه …. و في مصلحتها ان الاسعار تنزل سنين قدام …. لان الموضوع ده لو استمر حـ يخاللي عدوتها اللدوده روسيا تنهار و في نفس الوقت العرب مش حيقدروا يصمدوا كتير امام الخساير دي … و كده كده امريكا مش بتخسر في حاجه سرقاها و مش مكلفاها حاجه 🙂 🙂 ….
جميل قوي …. بصوا بقوا ….. الوقت مش في صالح امريكا ابدا … ليه ؟؟؟ …
لان الواضح ان تم اتخاذ القرار لمواجهة الغرب و حسم القصه تماما في تحالف شرقي مادام الموضوع وصل الى ان وجود الشرق نفسه بقي على المحك …. لكن كل دوله بتتصرف حسب مصالحها اولا … ازاي ؟؟؟؟؟
السعوديه بتضخ المزيد في السوق لحرق السعر … و علي المدي القريب انهيار الروبل في مصلحتها عشان تضغط على روسيا عشان تفرض رؤيتها في الحل بتاع سوريا حسب مصالحها … لكن على المدي البعيد بتتعاون مع روسيا و حنعرف ازاي 🙂 🙂 .
الامارات كان تصريح ولي عهدها كان حاسم و ناجز لما صرح موجها كلامه الى امريكا … ” ندعم السعوديه في زيادة الانتاج و نستطيع تحمل الاسعار حتي لو وصلت دون ال 40 دولار …. اوبك خط احمر … كله الا اوبك ” …. اظن التصريح مش محتاج شرح و بيبين القصه كلها 🙂 🙂 .
دول اوبك بدات تتحرك و تم عقد اجتماع في الدوحه بمشاركه روسيا و مصر للدول المصدره للغاز و كان من اهم قراراته هو اتخاذ الخطوات التنفيذيه لربط سعر النفط بالغاز في سلة سعر واحده …. يعني حتلعبلي في سعر البترول حلعبلك في سعر الغاز.
روسيا بدات خطوات هااااايله لانقاذ سعر الروبل و تفكيك التحالف الاوروبي … و ده حنتكلم عنه بالتفصيل في المقال القادم … لكن اهم ما اتخذته هو ايقاف خط السيل الجنوبي و تحويله على تركيا و فصل تركيا عن تحالفها مع اوروبا باتفاقية الغاز بين البلدين (كانت ضربة معلم 🙂 🙂 )…. لانه بكده كمل خطته في القضاء تماما على اي امل لامريكا لتنفيذ خط غاز نابكو اللى كان حيوصل الغاز القطري و شرق المتوسط الى اوروبا عبر تركيا ….. و حتلاقوا الفتره اللى جاية تغير كبير في سياسة تركيا تجاه الشرق الاوسط و بالذات تجاه مصر بسبب التعاون و التقاء المصالح مع روسيا .
و حتي بوتين لما اتسأل علي ان السعوديه متآمره على روسيا لتدمير اقتصادها … كان رده بمنتهي الذكاء ” ان ده مجرد كلام … لا استطيع ان اؤكده او انفيه … انا معنديش معلومات عن الموضوع ده ” …. و ده بيأكد ان فيه شغل كبير في الخلفيه ما بين روسيا و السعوديه.
اهم نقاط المواجهه هي خنق و غلق حنفية البترول المسروق من ليبيا و العراق و سوريا بحل الملفات دي من جذورها في السنتين القادمتين … و ده حنتكلم عنه بالتفصيل لاحقا ….. و كنا اتكلمنا عن التحرك المصري في الملف الليبي مع الجزائر و تشاد و ايطاليا و دول البحر المتوسط بالتفصيل في مقالات سابقه.
و ايضا التحرك المصري و الروسي لدعم الجيش العراقي …. و ده حنتكلم عنه في مقالات قادمه بالتفصيل ….
يا ريت تربطوا ما بين سلسلة مقالاتنا السابقه اللى اتكلمنا فيها من شهور على معركه مصادر الطاقه … و مقال تمدد مصر خارجيا …. و السؤال عن سر السنتين اللى اتفقت دول الشرق علي الفتره دي لانهاء القصه من جذورها خلالها 🙂 🙂 مع المقالات القادمه ….
و في كل مقال قادم حنتكلم عن جزء من الصوره … و شوية شويه حيتجمع البازل و تبان الصوره الكبيره …. اللى حتظهر فيها مصر منوره العالم كله … و صدقوني ….. كلمة ام الدنيا و حتبقي اد الدنيا دي مكنتش كلمة و خلاص …. دي حتبقي حقيقه و فوق ما تتصوروا.