خط الغاز الروسي

 29 Dec 2014

 خط الغاز الروسي

———————-

اصدقاؤنا اصدقاء صفحة كلام في الصميم

 النهارده حنكمل كلامنا زي ما اتفقنا في المقال السابق و زي ما طلب كثير من متابعينا على موضوع روسيا و خط الغاز البديل و الاتفاقيه الروسيه التركيه….

شوفوا بقي ….. اولا لو تلاحظوا اننا استخدمنا نفس صورة مقال قديم لينا اللى كنا نشرناه من اكتر من 5 شهور فاتت مقال (ما بين العدوان الثلاثي 1956 / و الحرب العالميه الثالثه – الجزء الاول ) ….. و ده لهدف حنشرحه لاحقا و اللى ثبت فعلا صحة و جهة نظرنا فيه على قصة الحرب الغربيه على بلاد الشرق بالكامل بهدف الاستحواذ على مصادر الطاقه و تفتيت و هدم الدول دي جميعا من اقصى الشرق الى الشرق الاوسط عن طريق خط الغاز اللى حينقل غاز قطر و شرق البحر المتوسط عبر سوريا الى تركيا ….. ثم الى اوكرانيا عبر اقليم القرم زي ما هو واضح في الخريطه…..

 و ان تركيا دخلت بتقلها لدعم المخطط الغربي ده لان ماسورة الغاز الام اللى حتغذي اوروبا كلها كانت حتبقي عندها … و ده حيديها مكانه اقتصاديه و سياسيه و استراتيجيه هاااائله.

 و ان مصر هي من اوقفت المخطط الغربي ده بتحالف الشعب مع جيشه في 30 يونيو و هي اللى حددت طريقة المواجه و انقذت روسيا و الشرق كله من ويلات المواجهه العسكريه و حولتها الى مواجهه بحرب اقتصاديه و سياسيه و ده اللى أعطي روسيا المساحه الكافيه انها تقوم بالهجوم المضاد و تنهي المخطط ده بالكامل باستيلائها على اقليم القرم بذات نفسه و تخش بصوره فعليه و لكن غير رسمية في شرق اوكرانيا بالكامل.

بس ده كان مواجهة نص المخطط بس 🙂 🙂  … امال ايه النص التاني ؟؟؟؟ …. 🙂 🙂

 لو تلاحظوا في خط ابيض تاني (للاسف محدش سألنا عليه و لا اخد باله منه من المقال السابق 🙂 🙂 ) …. الخط ده جاي من اقصي يمين الخريطه و واصل من وسط اسيا الى تركيا ….. 🙂 🙂 …. طب ايه حكايه الخط ده …. 

 الخط الاولاني اللى واصل لاقليم القرم كان حيكون بديل لخط السيل الشمالي الروسي اللى بيمد شمال اوروبا بالغاز …. و روسيا كانت بتعمل خط جديد اسمه خط السيل الجنوبي لمد الغاز الى جنوب اوروبا الفقير …. و بدات بالفعل في مد انابيب الخط ده و دفعت فيه مليارات …. و المفروض انه كان حيعدي من روسيا الى بحر الشمال في المياه الدوليه الى بلغاريا ثم الى جنوب اوروبا …. يعني كده الصوره اكتملت … ان اوكرانيا هي منفذ الغاز الروسي الى شمال اوروبا الغني … و بلغاريا هي مدخل الغاز الروسي لجنوب اوروبا .

المخطط الامريكي كان بيتمثل في السيطره و الاستيلاء سياسيا على كل من اوكرانيا (عشان توقف نقل الغاز الروسي لشمال اوروبا ) و علي بلغاريا عشان ميكملوش الاتفاقيه الموقعه مع روسيا لمد خط الغاز التاني الى جنوب اوروبا الفقير …. عشان تجهز اوكرانيا لاستقبال خط الغاز البديل اللى حيكون من قطر و شرق المتوسط … و تجهز بلغاريا لاستقبال خط الغاز التاني اللى حيجي من دول وسط اسيا اللى اتكلمنا عليه في اول المقال و اللى مرسوم على الخريطه جاي من اقصي اليمين من وسط اسيا …. 🙂 🙂

 امريكا نجحت فعلا في الاستحواذ السياسي على بلغاريا من فتره …. و اعضاء الحكومه هناك مبيدخلوش الحمام الا لما يستأذنوا امريكا 🙂 🙂  …. اما اوكرانيا … فاعتقد انتم تابعتم اللى حصل و النتيجه اللى وصلت ليها الامور في الثورة الملونه بتاعة الربيع الاوكراني الامريكي  و اللى شرحناه قبل كده في مقال “مصر ما بين الحرب العالميه الثالثه و العدوان الثلاثي الجزء الاول” … 🙂 🙂

 الحاج بوتين بعد 30 يونيو بعد ما كان مزنوق في الواجهه العسكريه الحتميه مع الغرب … بقي عنده اوراق سياسيه تانيه … و لان مصر اجهضت فكره الخط الاولاني من المنبع 🙂 🙂 ….  فدخل كمل و خلص على مشروع خط اوكرانيا لما استولي على اقليم القرم و شرق اوكرانيا ….  طب و الخط التاني ؟؟؟ ….. 🙂 🙂

 امريكا لما شافت اللى حصل في اوكرانيا فحبت تلحق نفسها …. فاصدرت تعليماتها الى بلغاريا انها تعلن رفضها لاستكمال الاتفاقيه الدوليه مع روسيا و دول الاتحاد الاوربي بمرور خط الغاز الروسي “السيل الجنوبي” عبر اراضيها 🙂 🙂 … و ده كان قمة الغباء السياسي سواء من بلغاريا او من امريكا … ازاي ؟؟؟؟ 🙂 🙂

 بلغاريا لبست في الحيط رسمي فهمي نظمي لانها مجبره تدفع لروسيا التكاليف اللى صرفتها على خط انابيب الغاز و مبلغ مماثل كتعويض ….. و احنا هنا بنتكلم على مليارات الدولارات … يعني مش مبلغ صغير … و الاقتصاد البلغاري واقع اساسا و ميتحملش الكلام ده … ادفعي بقي يا امريكا 🙂 🙂

روسيا بمنتهي البراءه اعلنت انها اوقفت تماما العمل في خط السيل الجنوبي للغاز بسبب تصرفات بلغاريا و موقفها عشان متخسرش فلوس تانيه بعد اللى دفعتوا فيه ….. و بكده تم ضرب اسفين محترم ما بين دول الاتحاد الاوروبي … لان بدأت بلاد الجنوب الاوروبي يقولوا طب و احنا مالنا بامريكا …. احنا عايزين الغاز و خلاص …. و لا انتم يا دول الشمال الاوروبي الغني طالما بيوصلكم غاز و متظبطين يبقى نولع احنا 🙂 🙂 ….

 و بدأت بالفعل دول كتير تتفاوض مع روسيا مباشرة لايجاد حلول بديله او الضغط على بلغاريا داخل الاتحاد الاوروبي عشان تفك نفسها من امريكا  ….. و بكده دى تاني منطقة نفوذ لامريكا بعد الشرق الاوسط تنط و تلعب فيها روسيا …  🙂 🙂

طب الحاج بوتين يسكت على كده …. لأ طبع 🙂 🙂  …. و لانه من نفس المدرسه المخابراتيه بتاعة     “حنحل المشكله من جذورها 🙂 🙂 ”    …    قام نازل علي تركيا محور التحالف الغربي للاستيلاء على غاز الشرق و اللى اي مشروع قادم لازم تعدي انابيب الغاز من خلال اراضيها …. و عمل معاهم اتفاقيه جديده سال ليها لعاب الاتراك لانها بصراحه مينفعش تترفض خاااااالص …. 🙂 🙂 …. طب ايه بقي الاتفاقيه دي ؟؟؟

 ايه قصتك يا حاج اردوغان …. انت قالب الدنيا و عامل القصه دي كلها عشان الماسوره الام بتاعة الغاز لاوروبا تعدي من عندك ؟؟ …… طب و لا تزعل يا عم ……. انا حغير طريق خط السيل الجنوبي اللى لغيته اللى كان حيغذي جنوب اوروبا كلها و حـ خليه يعدي من عندك زي ما كنت بتحلم …. و كمان حيبقي فيه مقابل ….. انك تاخد حصة محترمه من الغاز ده باسعار تفضيليه طويلة الاجل … و كمان تركيا هي حتبقي وكيل بيع الغاز او الموزع المعتمد للغاز الروسي لجنوب اوروبا …..  و بكده بوتين ضرب 100 عصفور بحجر واحد 🙂 🙂

 كده الحاج بوتين ضرب اسفين تاني في التحالف الغربي و أخد في صفه تركيا اللى المفروض نقلت مصالحها الاستراتيجيه تجاه روسيا … مش بس كده …. ده كمان المفروض ان تركيا تنسق مع روسيا سياسيا تجاه سوريا لان مينفعش يضربوا في بعض و هما مصالهم الاستراتيجيه مع بعض 🙂 🙂  … لكن في السياسه المواضيع دي بتاخد وقت شويه و اكيد حنشوف تغيير و حلول بتتنفذ على الارض للقضيه السوريه عن طريق روسيا و بمباركة تركيا ……. و طبعا شوفنا الحرقان الامريكي الاوروبي من تركيا بعد الاتفاقيه دي … و طلعت تصريحات لاول مره تنتقد فيها تركيا على مواضيع حقوق الانسان و الديمقراطيه المهدره في تركيا …. ( معرفتكش انا كده 🙂 🙂 🙂 ) …..

 تركيا كده بتلعب على الحبلين … مين حيديها امتيازات اكتر و بتلاعب الغرب … لكن غباء اردوغان كان سيد الموقف … لان الاتفاقيه دي اتفاقيه دوليه و الدوله التركيه هي اللى مضت و حتتنفذ غصب عن اردوغان لو حب يلغيها بعد كده و يرجع لعادته القديمه و يشتغل مع الغرب تاني …. و ده حيبقي ليه تفصيل قادم ان شاء الله لما حنيجي نتكلم عن الوضع التركي.

 تاني حاجه عملتها الاتفاقيه دي هي انها حطت بلغاريا في خانة اليك قدام دول جنوب اوروبا 🙂 🙂  ….. ازاي ؟؟؟ …….. انتي يا بلغاريا زعلانه من روسيا عشان وحشه و عليها عقوبات  …… صح ؟ …… جميل ……. دلوقتي انتي حتتعاملي مع تركيا مش روسيا … يعني ملكيش حجه خاااالص …. يعني قدام دول جنوب اوروبا العداء حيبقي رسمي لامريكا لانهم عارفين انها هي اللى بتحرك بلغاريا و تحركها ده ضد مصالح الدول دي … و بالتدريج حيرجعوا يحنوا الى الحضن الروسي الحنين بتاع زمان ايام الاتحاد السوفيتي لان هنا لغة المصالح هي اللى بتحكم و امريكا عمر ما بيجي من وراها مصلحه و لكن بيجي الخراب المستعجل  🙂 🙂

 طبعا الكلام ده جزء من صورة مواجهة القوي الشرقيه لمخططات الغرب …….. 🙂 🙂  الصوره الاكبر بقي مزيكا ……. ازاي ؟؟؟؟

 حنديكوا مثال صغير …… انهيار الروبل ده حاله وقتيه مش اكتر … و مش حيحصل انهيار للاقتصاد الروسي ابدا ….. و احنا اتكلمنا قبل كده في مقال (ما بين العدوان الثلاثي 1956 / و الحرب العالميه الثالثه – الجزء الثاني ) عن اتفاقيه البريكس … و اللى شرحناها بالتفصيل …. و الخلاصه بتاعتها هي ان القرار خلاص اتخذ ….

 يجب القضاء على القوه الامريكيه الفعليه و هي ارتباط الاقتصاد العالمي بالدولار …. و القتل البطىء للدولار من قبل تحالفات اقتصاديه كبري … تقدر تفصل نفسها بالتدريج عن الدولار و تقدر تستحمل الهزه الاقتصاديه لفكها الارتباط ده لان اي هزه ليه فجائيه للدولار حتكون خراب على الكل … و افتكروا التسابق العالمي لدفع فاتوره انهيار الاقتصاد الامريكي في 2008 لان العالم كله مرتبط بامريكا و عملتها…..

و ده سر فترة السنتين اللى كل الدول الشرقيه بتتكلم عنها و بنلاقيها في كل تصريح و ده التوقع اللى حياخده العالم عشان بس يحط اللبنه الاساسيه لفك التشابك مع الدولار … لان الموضوع مش ساهل و حياخد سنين طويله و ده كنا اتكلمنا عليه في بوست سابق لما نزلنا سؤال عن سر فترة السنتين اللى كل شويه نسمعها في تصريحات المسؤولين.

 و دي الفكره اللى اي حد لما فكر بس مجرد تفكير انه يقرب منها … تم القضاء عليه و علي بلده تماما عشان يكون عبره لغيره … صدام بس فكر فيها و شوفتوا حصل للعراق ايه و حصله ايه …. القذافي بدأ يعملها و كانت نهايته ابشع من صدام ……

 روسيا بقي من سنين مركزه في تخزين الدهب بكميات مهوله كاحتياطي … و بدات بالفعل في حشد التحالفات الدوليه لتنفيذ الفكره دي لانها اتعلمت الدرس انه مينفعش مواجهة الغرب منفردا 🙂 🙂 … و فيه شوية اخبار طايره كده يا ريت تربطوها مع بعض و حتبان ليكم الصوره و اتجاه الشرق رايح على فين 🙂 🙂  :-

  •  اتفاق الصين و روسيا على امداد الصين بالطاقة في صفقه تقدر بـ 400 مليار دولار لكن بالعمله المحليه مش بالدولار.
  •  اتفاق الصين و روسيا على ان يتم التبادل التجاري ما بينهم و اللى بيقدر بمليارات الدولارات سنويا بالعمله المحليه مش بالدولار.
  •  اعلان الصين اقوي قوه اقتصاديه في العالم و صاحبة اكبر احتياطي دولاري نقدي (3.6 تريليون دولار) انها لن تسمح بانهيار اقتصاد روسيا و ستدعمها بكل امكانياتها في ازمتها الحاليه.
  •  الصفعه القويه المفاجئه اللى عطيتها الارجنتين للغرب برفضها التعامل مع البنك الدولي لانقاذها من الافلاس و توقيعها اتفاقيه مع روسيا ان تقوم روسيا بسداد ديونها للغرب على ان تقوم الارجنتين بجدولة الديون دي و سدادها لروسيا بالعملة المحليه مش بالدولار (واخدلي بالك انت الارجنتين دي مكانها فين على الخريطه و روسيا ناطه لامريكا فين ؟ 🙂 🙂 ).
  •  توقيع اتفاقيه تعاون عسكري استراتيجي ما بين الارجنتين و روسيا و دي تبقي تاني دولة بعد البرازيل اللى هي اصلا عضوه في منظمة البريكس اللى شرحناها قبل كده في المقال السابق.
  •  تعاون مصر بوابة العالم العربي و افريقيا مع روسيا و حتتفرجوا على الاتفاقيات اللى حتتوقع كمان كام اسبوع مع الحاج بوتين شكلها ايه و توجهاتها الاقتصاديه رايحه لفين و اللى اكيد حتكون مصالح استراتيجيه و مش مجرد اتفاقيات بروتوكوليه 🙂 🙂  .

 عامة … عشان المقال ميطولش اكتر من كده 🙂 🙂  … حنكمل معاكم انشاء الله في شوية اخبار عالميه تانيه حتكمل لينا الصوره … و سبحان الله … لو تفتكروا في مقال (ما بين العدوان الثلاثي 1956 / و الحرب العالميه الثالثه – الجزء الاول )… قلنالكم في اوله ياريت تحتفظوا بالمقالات دي عشان كمان سنة تبقوا تفتكرونا بالخير …. و كنا راسمين فيه الخط الثاني انه حـ يمر عبر تركيا ….. و فعلا حصل 🙂 🙂

 و مش حـ نمل من التكرار …. سبب نجاحنا او قوتنا هو تماسك الجبهه الداخليه ما بين الشعب و قيادته في وقت الحرب الحاليه … اشتغلوا و انتجوا … ده وقت الشغل الحقيقي و كل واحد يتقى ربنا في بلده و شعبه.

 اخر حاجه يا ريت اي حد مقرأش سلسلة مقالاتنا او عايز اي مقال يبعت لينا في التعليق او على الخاص و حنبعتله لينك المقال و لان عندنا افضل و احسن فانز على الفيسبوك و اكثرهم احتراما …. فـ فيه ناس بعتتلنا بتستأذن انها تعمل شير ….. فاحنا بنحب نقول ليهم ان مشكلتنا في النسخ و نشره باسم الاخرين … لكن الشير اكيد مطلوب و ياريت تساعدونا في عمل شيرعلى اوسع نطاق علشان كلامنا يوصل لاكبر عدد ممكن .

 تحياتنا لاحلي فانز على الفيسبوك

  لمتابعة تعليقاتكم