21 Mar 2016
الدعم السلبى
————-
إنتو مستنيين إييه !!؟؟ .. ماتجيبوا عاليها واطيها .. !!
إحرقوهم بجاز وس…. !!
لازم الجيش يدكهم بالطيران ونخلص .. !
هو دم أولادنا هــ يفضل يروح هدر كدة لحد إمتى !!؟؟
لازم يعملوا إخلاء للشريط الحدودى ويتم تهجير الناس زى ماحصل فى 67 !!
ده أكيد فيه تقصير أمنى ، ولازم الناس تتحاسب !
وزير الداخلية لازم يتشال !!
كل التعليقات اللى فاتت ، واكثر منها كمان هى بعض ما تم التعليق به على أحداث العريش الأخيرة اللى راح فيها بعض من خيرة شباب مصر اللى دفعوا عمرهم عن طيب خاطر فى سبيل إن بلدهم تعيش .. لكن خلونا نقول إن كل التعليقات اللى فاتت دى ، إذا كانت ناتجة عن غضب ، ونابعة من غيرة على الوطن ، وعلى أبنائه .. لكنها أول الطريق إلى جهنم !!!
إحنا كدة بنعمل عملية دعم سلبى للجيش المصرى و للأجهزة الأمنية ، وبنتبع طريقة الدبة اللى قتلت صاحبها ، وبنساعد من غير ما ناخد بالنا كل الزياطين وكذابين الزفة اللى مستنيين أى فرصة علشان يدخلوا يزيّطوا على طريقة “قول حق يراد به باطل” !! ..
هو ماحدش سأل نفسه ، اللى بيحصل فى سيناء ده بيحصل لييه و اشمعنا الشريط الحدودي ده بالذات دونا عن باقي انحاء الجمهوريه !؟؟
هو ماحدش فكر إن المطلوب إنه يبقى فيه ضغط من الجبهة الداخلية على الجيش علشان يتم رد فعل عنيف من الجيش ومبالغ فيه لغرض فى نفس يعقوب !؟
هو ماحدش فكر إن العلوم العسكرية فيها شئ إسمه السناريو والسيناريو البديل ، وإن الأجهزة الأمنية بتلعب لعبة شطرنج وهمية ، وهى بتضع كل السيناريوهات المقترحة والسناريوهات المترتبة عليها لحد المستوى العاشر ، من خلال دراسة شاملة ووافية لكل ردود الأفعال المقترحة !
طب ماحدش فكر ولو للحظة واحدة إييه اللى ممكن يحصل ، وإييه هــ تكون ردود الأفعال لو قام الجيش بــ إبادة الشريط الحدودى بالكامل وطربقه على دماغ كل اللى فيه ، ولييه الجيش إختار الطريق الأصعب وهو إنه يخوض حرب عصابات شديدة القسوة فشل فيها أعتى وأقوى جيوش العالم سواء كان الجيش الأميريكى أو الجيش الروسى ، وبرغم كل الخسائر فى الأرواح ، إلا إن الجيش المصرى نجح فى حصر كل الأعمال التخريبية فى منطقة واحدة لا تتعدى مساحتها 1% من مساحة سيناء بالكامل !!؟؟
لو الجيش فقد أعصابه ، وأباد المنطقة الموبوئة دى بالكامل ، هــ يكون السيناريو البديل هو السيناريو السورى أو الليبى .. أيوة .. ماهو الجيش السورى والليبى عملوا كدة .. شحذوا كل قوتهم ، وتحركوا بكل العدة والعتاد بهدف إبادة الإرهابيين ، وكل كلاب السكك من الإسلامجية والمتعاونين معاهم .. وكانت النتيجة إييييه !!؟؟ … النتيجة إنتفاض حلف الناتو لدعم “السااااورة” الليبية و “السّواااار” المزعومين فى شرق ليبيا ، ووجهوا ضربات قوية ومركزة للجيش الليبى لغاية ما إتفكك … !! ,… وفى سوريا كان دعم قوات التحالف لكل العصابات المسلحة ، وتشكيل رأى عام دولى ضد الجيش السورى الشرعى .. ومش كدة وبس ، لكن ألصقوا به تهم إستخدام أسلحة الدمار الشامل ، وإرتكاب جرائم ضد الإنسانية لحد ما وصلنا للنتيجة اللى شوفناها .. !! ..
ياترى إحنا بقى عايزين أى سيناريو من دوول !!؟؟ …
ومش كدة وبس … لكن تلاقى فى الداخل المصرى ، ناس طالعة تهاجم الجيش ، وتطالب بمحاسبة المسئولين ، وكأن اللى ماتوا دوول ، ماتوا وهم بيلعبوا بولة إستيميشن .. مش ماتوا فى منطقة حدودية خطرة ، تعج بالإرهابيين ، وتم قذفهم بقذيفة هاون ….. و الكلام كان واضح من الاول … و الدولة المصرية أعلنتها بوضوح …. ” الجيش و الشرطه قبلوا التحدي و هــ يموتوا بدل الشعب .. وكأن لسان حالهم “إحنا فاهمين اللعبة ، و هــ نستحملها ….” !
لأ وأخرة المتمة كمان ، يرجع الحاج وائل غنيم تاني من خلال إدارة صفحات مشبوهة على الفيسبوك ، بــ تنتهج نهج الحيادية والموضوعية و دس السم في العسل برغم إن كل توجهاتهم ضد الدولة عشان يجروا رجل الناس مرة تانية ….، وكل اللى بيخدم علي الصفحات اللى زي دي ، هم من لجان الإخوان ، أو اللى مش إخوان بس بيحترمهم .. اللى بيعملوا عليها “traffic” عالي جداً و تلاقيها بتزيد اللايكات فيها بمئات الالاف في أيام معدوده عشان يلمّعوها زي ما لمّعوا صفحة خالد سعيد قبل كدة ، .. وطالعين دلوقتى يتباكوا ، ويمصمصوا شفايفهم ، ويطالبوا بالشفافية ، وأحقية الشعب فى معرفة نوعية الخطط وكفاءة التدريب والتسليح في الكماين، وهل هو مناسب وإلا لأ ؟ وهل كفاية الخطط اللي السلطة العسكرية بتطبقها حاليا، ولا محتاجين نطور أساليب تفكيرنا وخططنا علشان نحمي سيناء؟ … يا سلاااااااااام !!!!
طب مش محتاجين بالمرّة إن أسامة عسكر يكتب لكم كومنت يقول لكم إن تسليحنا فى سينا بــ يبدأ من آلي خفيف إلي نص بوصة ألخ ألخ ألخ …. وإننا في الأكمنة اللي في أماكن كذا كذا تسليحهم بــ يبقى كذا كذا.. و خطتنا فى التعامل مع الهجوم هي كذا كذا !!؟؟
وإلا أقولكم حاجة أحسن .. إحنا نجيب هيئة أركان الجيش المصرى ، ونعمل مؤتمر جماهيرى .. وييجى وزير الدفاع يعلن على الملأ خطط الجيش والتسليح ووسائل التأمين وعدد القوات وأماكن تمركزها وكيفية التمركز .. وياريت اللى عنده فكرة حلوة تساعدنا بالصلاة على النبى يقول لنا عليها يعنى ، و ….. وكدزة 🙂 😉
أصدقاؤنا ..
الغضب مشروع .. والغيرة على الوطن مطلوبة ، ولكن بشرط ألاّ تتحول إلى عملية دعم سلبى تضع المزيد من الأحمال على أكتاف الجيش اللى بيخوض حرب عصابات بشكل يومى، و بــ يتحمل رجال الجيش كل الخطر داخل بؤرة صراع محدودة علشان باقى الوطن يبقى أمن، وعلشان إحنا نخرج ونروح شغلنا ونتفسح فى الساحل وفى المنتجعات السياحية وأولادنا تروح المدارس والنادى .. وكلنا نمارس حياتنا بشكل طبيعى !!
إحذروا أصحاب الدعم السلبى فى الأبواق الإعلامية ..
إحذروا الصفحات المشبوهة التى تتبع أسلوب قول الحق الذى يراد به باطل ..
إحذروا إغفال أليات مخطط ، مالوش همّ غير إنه يحوّل مصر لبؤرة صراع على غرار مايحدث فى كل المنطقة !!!
ألا هل بلّغت .. اللهم فــ إشهد !
ونتمنى أن يتم تشيير الكلام ده على أوسع نطاق !!