30 May 2016
لازم نتكلم عن
————
شعووووووور عارم بالفرحة ، وانا بأشوف النهاردة إفتتاح المشروعات الجديدة ومشروعات الإسكان الإقتصادى ، وإحساسى إن مصر مكملة فى طريقها رغم كل الصعوبات والتحديات … لكن شعور السعادة الأكبر ، كان هو إحساسى إن الدولة بترد بشكل عملى على كل المتاجرين بأوجاع الناس وبالغلابة ومحدودى الدخل ، وكأنها بتقول لهم “أنا عملتلهم ده ، إنتم عملتوا إييه !!؟؟” 🙂
حد يصحى حمدين صباحى وخالد يوسف وشلة الكولجية والهتيفة و “كانون التزاهور” و يقول لهم إن مصر هــ تقضى على العشوائيات .. وبتشتغل علشان الغلابة !!
حاجات كتيرة أوى بتحصل فى مصر وللاسف ماحدش بيتكلم عنها .. وكل ده لييه !!؟؟ .. علشان يفضل الشعب المصرى اسير للطاقة السلبية وارض خصبة للشائعات والحديث المستمر عن المستقبل المظلم وثورة الجياع وافلاس مصر وانعدام الأمل … وطبعا كل ده ناهينا عن طقطوقة الزووولم والكمع وتكميم الافواه والموووعتكلات وطغيان النيزااام ، علشان تفضل السبوبة شغالة طول الوقت ويفضل فيه مبرر “للساااورة المصطمرة” =D
وللاسف برضوا احنا متفقين مع كثير من أصدقائنا وكثير جداً من المصريين ان المنظومة الاعلامية فى مصر هى منظومة فاشلة بكل المقاييس ، مابين اعلام خاص مغرض تحركه سياسات وتوجهات اصحاب رؤوس الاموال … وأدواتهم فى ده هم مجموعة من المرتزقة بيطلق عليهم بالخطأ لقب اعلاميين … وبين اعلام حكومى فاشل ومخترق بيرقد فى غرفة الإنعاش وبــ تبذل الدولة محاولات وجهود لاعادته للحياة مرة اخرى ، بس الموضوع هايخد شوية وقت !!
وبالتالى فالدولة مش بتعلن عن نفسها بالشكل الكافى ، ولا عن إنجازاتها فى مجال المشروعات القومية اللى بتخدم خطة التنمية الحقيقية علشان نخرج بالوطن من الكبوة اللى دامت سنوات طويلة … وعلشان كدة الرئيس السيسى قال فى أحد خطاباته “يابخت عبد الناصر بإعلامه” .. أيوة صحيح … يابخته فعلا … لأنه كان بيتحرك ومن خلفه اعلام بيدعمه وبيدعم الدولة وبيتكلم عن كل كبيرة وصغيرة وبالتالى الناس كانت عارفة وصابرة !!
- لازم نتكلم عن:
عدد ضخم من محطات توليد الطاقة الكهربائية منهم محطة كهرباء بنيسويف اللى بتعتبر اكبر محطة توليد كهرباء بيتم إنشائها فى العالم سواء من حيث كمية الطاقة الناتجة واللى بتتخطى حجم الطاقة الناتجة عن السد العالى بالكامل .. أو من حيث سعر الكيلوات اللى بيدخل ضمن نطاق واحدة من ارخص سعر تكلفة على مستوى العالم … واذا كانت التوربينات بتاعة المحطة دى وغيرها من المحطات هى توربينات شركة سيمنز الالمانية فالمحطة بالكامل بكل اجهزتها وميكنة تشغيلها ودورات التبريد فيها هى فخر العقول من الهندسة المصرية ومجهود الايدى العاملة من مختلف المهن وشباب زى الورد بيوصل الليل بالنهار علشان يبنى بلده … والمحطة دى هتدخل نطاق التشغيل النهائى فى ديسمبر القادم !!
- لازم نتكلم عن:
تجربة نقاط الخبز ومنظومة التموين الناجحة بكل المقاييس واللى كان بيتقال عليها فنكوش .. واللى وفرت للمواطن الغلبان اللى تجار الثورات والبشر بيتاجروا به وبألامه حوالى 6 مليار جنيه بيستفيد بيهم النهاردة محدودى الدخل عن طريق توفير سلع غذائية واستهلاكية ماكانتش موجودة قبل كدة …. والجديد بقى النهاردة هو قيام وزير التموين بتطوير مشروع الكروت الذكية بالتعاون مع شركة ميكروسوفت وشركة فيزا العالمية علشان تبقى منظومة تداول السلع والمنتجات تشمل كمان الاجهزة والسلع المعمرة وبأسعار اقل بنسبة تتخطى ال 30% .. يعنى وداعا للغارمين والغارمات !!
المنظومة القديمة اللى تم تنفيذها فى غضون شهور قليلة واللى اثبتت نجاحها ، بالاضافة للتجربة الجديدة ، قام البنك الدولى بدراستها ، و عَرَض المساهمة بجزء من تمويلها ووضعها كنموذج يمكن تطبيقه فى بعض الدول الاخرى …. يعنى اللى بيتكلموا عن التجربة الماليزية واللى اكيد ماتمتش بين يوم وليلة ، .. فاحنا النهاردة بنتكلم عن التجربة المصرية اللى هاتتكلم عن نفسها فى خلال سنوات اقل من عدد اصابع اليد الواحدة …. وعلى رأى اللى قال “بكرة تشوفوا مصر” 🙂
- لازم نتكلم عن:
شبكة طرق وانفاق وكبارى بطول 6000 كيلومتر بتربط مصر كلها وبتسهل عملية تبادل السلع والبضائع بين شرق وغرب مصر وبتربط اطراف مصر وقلبها بمحاور التنمية الجديدة سواء فى منطقة القناة او سيناء او الصحراء الغربية .. واللى بتمهد الطريق لتسهيل دخول المستثمرين الأجانب بقوة للاستثمار فى مصر .. مع الوضع فى الإعتبار إن المعدل اللى تم به الإنتهاء من انشاء شبكات الطرق دى يتخطى كل المعدلات العالمية وبشهادة كبرى شركات الانشاءات على مستوى العالم
- لازم نتكلم عن:
شونات القمح الجديدة اللى تم الانتهاء من بنائها بالتوازى مع مشروع القمح والمليون ونص مليون فدان علشان تستوعب كمية القمح المتوقع إنتاجها بعد اكتمال عملية استصلاح المليون ونصف مليون فدان واللى كمان فيه حلم طموح للوصول بيهم ل 2.5 مليون فدان فى خلال 7 سنين …. وعلشان نفهم حجم الإنجاز ده اييه يكفى اننا نقول لكم ان النهضة الزراعية فى عهد محمد على زودت الرقعة الزراعية بمقدار مليون فدان .. وبعد محمد على وعلى مدار ولايات كل خلفائه ، زادت الرقة الزراعية لمصر كمان مليون فدان …. طب انت النهاردة بتشتغل علشان تعمل قدهم كلهم على بعض فى خلال قد اييييه !!؟؟ 🙂 🙂
- لازم نتكلم عن:
توقيع وزير الاتصالات تحت شعار صنع فى مصر ، عقد اتفاق بين “سيكو المصرية” و”مجموعة ميجان الصينية” فى صورة 5 اتفاقيات لدخول مصر في صناعة الهواتف الذكية بمصنع جديد على مساحة 3000 متر بالمناطق التكنولوجية ببرج العرب والتوسع بصناعة الإلكترونيات وتكنولوجيا المعلومات ،، وتدشين شركة “واحات السيليكون” كشركة مساهمة مصرية لإنشاء وتشغيل المناطق التكنولوجية في ٦ مدن ،،
- لازم نتكلم عن:
سبعة مطارات مصرية جديدة منها ما تم ونها لسة بــ يتم إنشائها فى فترة وجيزة جدا آخرهم مطار غرب القاهرة واللى هايدخل الخدمة فى خلال 3 شهور بالكتير بالاضافة لأعمال تطوير المطارات القديمة زى مطارات اسكندرية والغردقة .. وكل ده بيتم بسرعة وكفائة ومن غير ماحد يسمع عنه !! .. وكل ده بيصب فى مصلحة الرواج الإقتصادى الداخلى المتوقع وحجم التبادل التجارى الخارجى نتيجة زيادة حجم التدفقات الاستثمارية الى مصر
- لازم نتكلم عن:
أهم حاجة فى التجربة المصرية وهى روح التجربة نفسها .. و اللى بتقول انك طالما قررت تبنى وتتقدم ، يبقى إوعى تبص وراك ، أو تلتفت لأى معوقات بتشدك وتحاول تبعدك عن هدفك .. وان كل ما الضغوط بتزيد سواء من الارهاب او من التحديات الدولية او العوائق الداخلية ، كل ما اصرارك بيزيد على النجاح وتحقيق حلمك الكبير 🙂
حاجات كتيييييير أوى لازم نقولها ونوضحها
حاجات كتيييييير أوى لازم تخلينا نبص بتفاؤل للمستقبل اللى جاى
حاجات كتيييييير أوى لازم نتكلم عنها زى مابنتكلم عن السجادة الحمرا وغطا البلاعة المكشوف والرصيف المكسور ومنع حبس الصحفيين … وغيره وغيره وغيره من اللى بيتم التركيز عليه على حساب حقيقة التنمية اللى بتحصل بالفعل فى مصر
كون إنت الإعلام البديل ، وإتكلم عن مصر 🙂