6 Dec 2016
خواطر على الطاير …. الاعلاميين و النصابين
——————————————–
ناس كتير بتستغرب من السوداويه و كبت الامل و تكسير المجاديف اللى و تشويه اي بارقه امل للناس بواسطة مجموعه من النصابين المحترفين …. بيعرف يبيع نفسه و شاطر في النصب على الناس ….. اتعمل منهم نجوم مجتمع و اصحاب قضيه و ملايكه ….. بيسحروا الناس بكلامهم و اللعب على اوجاع الشعوب ….. من عشر سنين كان حلم اكبر واحد فيهم انه يجدد عربيته …. لكن اليوم اقل واحد فيهم عقده بملايين الجنيهات سنويا ده غير عمولات الاعلانات ….. الملايين دي بيدفعها رجال الاعمال اللى مالكين لكل القنوات و وسائل الاعلام المختلفه ….. و اللى بيستردوها من شركات الاعلانات … و اللى هما بيمتلكوها …. و ده للحفاظ على مصالح اعمالهم و ارباحهم اللى بيجنوها من النصب على الناس.
لما تحلل محتوى كل البرامج و المسلسلات و الافلام اللى بيتم محاصره حضرتك بيها … حتلاقيها بتصب في اتجاه واحد … و هو مصلحة رجال الاعمال اللى بيدفعوا للقنوات دي و بيصرفوا عليها …. كلها بترسخ الى تدنية قيمة العمل …. و ان المكسب بس هو من السمسره او خبطة عمر حتنزل عليك من السماء …. و ان البطل و الاسطوره هو البلطجى و المدمن …. و ان اللى بيشتغل عمره ما حينجح … و اللى بيسرق هو اللى بيوصل ….. و اللى بيشتغل حرفه ده مش لاقي ياكل …. و ان الشغل عباره عن بدلة و عربيه و مكتب …… ليرسخ ان كلمة فلاح شتيمه …. و صعيدي يبقي غبي …. و صنايعي يبقي جاهل و اشتغل صنايعي عشان مش لاقي عمل محترم ….. و ان صاحب الحرفه و الصنعه ده غلبان و لازم نعامله من بعيد احسن نتعدي منه ….. ده في الاخر بيؤدى بحضرتك انك تفقد الامل في العمل و الانتاج بحج زي لما الفساد يخلص الاول … و لما الدنيا تبقي نضيفه ابقي افكر و اشتغل ….. و انك تتجه الى العمل المكتبي او الفهلوى في السمسره و البكش ….. وفي الاخر يتحقق المراد لرجال الاعمال ….. العيشه الاستهلاكيه
عشان تفضل تحتقر الصنعه اليدويه و تكره الانتاج و تستعيب تقلع البدله و لا يتقالك يا باشا ….. فتفضل عايش مدمن استهلاك … عايش عيشة مش بتاعتك …. متشعبط في عيشة الاغنياء …. جايب العربيه بالقسط اكبر من دخلك …. و شارى موبايل ب 6 الاف جنيه و انت مرتبك مكملش 2000 جنيه ….
طب مفكرتش ليه الاعلام كله كان محروق و لقيت كل النصابين دول بيهاجموا الدوله بشراسه لما الدوله بدأت تنقل الناس من العشوائيات الى احياء و سكن آدمي بالعفش و الاجهزه … و مره يتريقوا على الموكب و مره السجاده الحمراء !!!! …. لان المشاكل دي هي اللى عايشين بيها عليك و بينصبوا بيها عليك …. هي السبوبه بتاعتهم …. و لما المشاكل دي تنتهي …. حينصبوا عليك بإييه … و يبرروا يسودوها في وشك ازاي …. و ازاي يقدروا يحموا المعلمين اللى بيدفعولهم …. ماهم عبيد للجنيه و الدولار .
امال ليه بيهاجموا الدوله بضراوه لما بدأت الدوله لاول مره تتعامل في ملف فساد القمح و المستلزمات الطبيه و البدء في انشاء مصانع للادويه و البتروكيماويات و الحديد و الصلب و الاسمنت و بدء مجموعه من الاجراءات الفعاله اللى بتتعمل لاول مره لترويض مافيا الاحتكار و مصاصي دماء الشعب … و اللى اتعودوا على لوى ذراع الدوله في الماضي لانهم هم اللى كان في اديهم كل حاجه …. و اتعودوا اذا ماكانش يكسب الواحد منهم 100% و 120% مكسب صافي …. يبقي كده مش بيكسب.
الخلاصه و الرساله اللى عايزينكم تفكروا فيها كويس …. و مع اننا قلنا الكلام ده قبل كده في مقالات مفصله … لكن في الاعاده افاده ….. في الستينات مكانش فيه بيت مصرى مفيهوش مكنة خياطه …. و ده لان الست يا اما كانت بتخيط و تبيع صنعة إديها …. او اضعف الايمان انها كانت بتفصل هدوم الاسره عشان توفر جزء من الميزانيه …. زمان كنا بننتج العربيه و الاتوبيس و القطار و الملابس و الاكل و الشرب و الاجهزه الكهربائيه و غيرها كتير ….
و حنقول كمان …. الدول اللى بدأت تتقدم ، كل الفساد و الظلم و كل ظواهر المجتمع الاستهلاكي اللى عايشينه دلوقتي انتهت لما الشعب اشتغل و اصبح قادر على الانتاج ….. فاصبحت الدوله قادره على تحقيق مطالبه … فتفككت كل مظاهر المشاكل اللى حضرتك بتتحجج بيها
حضرتك لازم تغير من نفسك …. و متخاليش حد ينصب عليك و يكسب من وراك الملايين من معاناتك .