الشائعة يؤلفها الحاقد ، وينشرها الأحمق ، ويصدقها الغبى

10 May 2017

الشائعة يؤلفها الحاقد ، وينشرها الأحمق ، ويصدقها الغبى

——————————————————-

عشرات الاكاذيب اللى بيتفنن الكثير من المرضي النفسيين اطلاقها على الوطن باصرار غريب … و بــ تناغم بين اللى بينشر الكذبه  و اللى ينشرها و يخدّم عليها … سواء من صفحات ألكترونية او جرائد او برامج تليفزيونية …. و للاسف ناس كتييييير اصبحت الاكاذيب دى من كتر تكرارها حقائق لا يمكن مناقشاتها.  …. و الامثلة على كده كتيييييررررر ….

فــ بدايةً بكذبه مصر الاولى في العالم في الاصابة بمرض السرطان ..

و مصر رقم اتنين في العالم في التحرش الجنسي ..

و مصر تتذيل قائمه الدول في سرعة الانترنت ..

و مصر الاولى في العالم في ضحايا حوادث الطرق ..

و مرورا باستيلاء داعش على شمال سيناء و أسر آلاف الجنود و رفع علمهم على العريش.

و كذبه الطيار الانجليزى اللى عمل امبليه في الجو بطائرة ركاب إيرباص عشان يتفادى الصواريخ اللى بــ تنضرب عليه من داعش في شرم الشيخ.

حتي آخر افتكاسة وكذبة جديدة ، بتاعة خروج مصر من تصنيف جوده التعليم العالمى …. و هروب بطل مصر الى بلغاريا و حصوله على الميدالية الذهبية باسم بلغاريا بعد لجوؤه اليها و تخليه عن الجنسيه المصرية مرغماً بعد رفض مصر علاجه بعد اصابته.

و مع اننا اتكلمنا كتيييييير عن الموضوع ده قبل كده …. و فندنا أكاذيب كتيييير و بالدليل …. الا اننا مش بنتعلم …. و ناس للاسف بتنشر و هى بــ تتمنى ان يكون كذبهم حقيقي …. مع انهم متأكدين انهم بيكذبوا …. لكن للاسف حقيقة فشلهم بتعميهم و بتخليهم يعيشوا في حاله من الفصام النفسي و الشيزوفرينيا …. بينكروا بيها الواقع …. و بيعيشوا في حالة من الحقد و الكره للبلد و لنفسهم و لكل اللى حواليهم ….. إما علشان يبرر فشله للناس وقدام نفسه .. وإما علشان يثبت انه ناجح و فكره سابق الجميع بسنين ضوئية …. مع انه في الواقع افشل خلق الله في مجتمعه …. و تلاقيه بقاله سنين مش عارف يحل مشكله إصلاح الاسانسير مع اتحاد الملاك في عمارته.

فمثلا تبعاً لموقع الصحة العالمية …. مصر عمرها ما كانت مصنفة في قائمة اكتر خمسين دولة بها اصابة بمرض السرطان.

و نشرنا قبل كده مقالات مفصله بتثبت ان اكثر الدول عنفا و بها انتهاكات جنسية و اغتصاب ضد المرأه و الاطفال …. مش في مصر …. لكن بتتصدر الدراسات دى دول زي السويد و فرنسا و ألمانيا و امريكا …. و مصر مش موجودة أصلا في القوائم السوده دى.

و حتى لما نشروا ان مصر تتذيل قائمه سرعه النت في العالم …. فــ للأسف ماحدش تحرّى عن الخبر ان القائمة دى تتكون من ٣٠ دوله فقط …. يعنى تتذيل قائمة أفضل ٣٠ دولة في العالم و ليست ال ١٩٨ دولة .. وعلى فكرة .. الخبر اتنشر كدة فعلا “مصر تتذيل قائمة أفضل ٣٠ دولة في العالم فى سرعة الإنترنت” … لكن نقول إييه بس … ناس مرضى 🙁

و حتى حوادث الطرق …. فــ مصر لا في أول ١٠ دول …. و لا في اول ٢٠ دولة …. و لا حتى مصنفه على انها من الدول الخطرة …. و اللى مصنف كأثر الدول قتلا لمواطنيها في حوادث الطرق …. الهند و السعودية و قطر و امريكا و نيجيريا و البرازيل 🙂

و للاسف كان كل واحد بينشر الكلام ده …. كان بــ ينشره بغل و حقد غريب ، وكأنه بينكر الواقع و بيبنى واقع موازى يتكون مما يتمناه هو في بلده و وطنه !!!

و نيجى بقى لحديث الساعة …. فــ بعد بدء الدولة اتخاذ اول الخطوات باصلاح منظومة التعليم ببدء تطبيق البروتوكول التعليمي مع اليابان .. بانشاء اول ١٠٠ مدرسة بالنظام اليابانى في العام الحالى و ١٠٠ مدرسه العام القادم كتجربة …. و لتجهيز باقي الكوادر التعليمية لتغطية باقي انحاء الجمهورية في خطه طموحة في اقل من ١٥ عام من الان و بداية تنفيذ وزير التعليم الجديد خطوات فعلية لتغيير المنظومة التعليمية في التنسيق لقبول الجامعات …. قاموا لاحقينه على طول بكذبة واشاعه جديدة …. ان مصر طلعت من التصنيف العالمى لجوده التعليم. …. و ان الوزير اعترف بكده ….. و هات يا هرى …. و نشر طاقات سلبيه و تكسير مجاديف المراكب السايره …. و كأنهم زى المدمنين اللى بيقاوم العلاج بأي طريقه.

 هم كل اللى عملوه بكل تدليس و كذب انهم دمجوا بين  تصنيف التنافسية  و بين تقرير منظمة التعاون الاقتصادي والتنمية اللى مصر مش مشتركه فيها من اصله …. يعنى عمر ما اسم مصر كان في اي تصنيف ليها و اللى بيطلع كل ٣ سنين  …. قامو جابوا أخر تصنيف طلع في ٢٠١٦ و قالّك مصر طلعت من التصنيف….. و كذبوا و قالوا الوزير اكد على الكلام ده ….

حتى موضوع الهربان بتاع المصارعة …. لما نشروا صعبانيات على دموع البطل لما شاف علم بلغاريا بيترفع و كان نفسه يبقي علم مصر …. فــ طلع وزير الرياضة و عرض فواتير علاجه المدفوعة من الدولة …. لغايه شفاؤه التام …. و التحاقه بمعسكر المنتخب التدريبي في بلغاريا …. عشان يهرب هناك و يتنازل عن جسيته بكل وطيان و دناءه ….

ارحموا بلدكم من الاشاعات …. ومن الإستماع للمرضي النفسيين دول …. و اعرف قاعده مهمهة جدا ….. اي حاجه تطلع و تتكرر و تلاقي عليها هرى مكثف …. اعرف انها بلح. 🙂

و رساله الى اخواننا البعدا ….. انتوا مازهقتوش من الكذب !!!!!؟؟ .. لإننا بجد قرفنا من مرضكم النفسي المرتبط بحقد و غل على الوطن.

“عليكم بالصِّدق، فإنَّ الصِّدق يهدي إلى البرِّ، وإنَّ البرَّ يهدي إلى الجنَّة، وما يزال الرَّجل يصدق، ويتحرَّى الصِّدق حتى يُكْتَب عند الله صدِّيقًا. وإيَّاكم والكذب، فإنَّ الكذب يهدي إلى الفُجُور، وإنَّ الفُجُور يهدي إلى النَّار، وما يزال الرَّجل يكذب، ويتحرَّى الكذب حتى يُكْتَب عند الله كذَّابًا ” …. صدق رسول الله صلى الله عليه و سلم

و نقول كمان و تانى و تالت …. مصر مش رقم واحد ولا أحسن دولة فى العالم …. و عندنا مشاكل كتييييير متراكمة …. و هــ نحلها بالارادة و الصبر و العمل …. لكن الأكيد …. اننا مش هــ نحلها بالكذب و الحقد على الوطن …

لمتابعة تعليقاتكم