الشعب ما بينساش .. لكن إنتم اللى بتنسوا

06 Mar 2018

الشعب ما بينساش .. لكن إنتم اللى بتنسوا !!

—————————————–

كلمة ولازم تتقال .. وبدون أى مقدمات ..

إمبارح خرج علينا كبير المتنطعين يجعر كالعادة ، وهو بيدعم موقف صيقه وزميله فى قبيلة المتنطعين ، اللى روّج أو فبرك موضوع زوجة ضابط الشرطة اللى مش لاقية تاكل .. وطبعاً مايمنعش إنه يرمى كلام بأسلوب غير مباشر إنه حتى لو زميله المتنطع غلط ، فــ مافيش مشكلة يعنى إننا نسامحه لأنه أكيد كانت نيته كويسة وماكانش يقصد !! .. لكن المفاجأة بقى ، إن الجلالة أخدته .. وخرج عن شعوره .. وبدأ يتكلم عن إنه هو والقبيلة بتاعته هم اللى دعموا 30 يونيو ، وإن لولاهم ماكانش ممكن الإخوان يخرجوا من السلطة .. وبعدين دخل كمان فى مرحلة المزايدة على المصريين ، وهو بيخاطب الشعب ويقول “هو إنتوا نسيتوا إحنا عملنا إييه ، وإزاى لعبنا دور مهم جدا فى 30 يونيو ، وإننا كنا على قوائم الإغتيالات ،  وإننا ما إستفدناش حاجة من المهنة دى غير إنه تبقى حياتنا مهددة وغير مستقرة ، .. وإزاى دلوقتى كل الناس بتشتمنا وتخوننا .. ولييه تعملوا فينا كدة … ده إحنا طول عمرنا مع البلد وبنحبها ، وكلنا وطنيين بدون أى إستفادة … وإزاى الشعب نسى كل اللى إحنا عملناه .. ولييه الغل ده كله .. ولييه بتعملوا معانا كدة .. ألخ ألخ ألخ ..

ماشى يا عم الوطنى .. أنا مش هــ أقولك كلامك غلط .. لكن هــ أقولك إنه واضح إن مش الشعب اللى بينسى .. لكن إنت وقبيلتك اللى بتنسوا … عارف بتنسى إييه !!؟ .. خد عندك ..

إنت نسيت وإنت بتدافع عن زميلك المتنطع اللى زيك ، وبتطلب له السماح ، على إعتبار إن دى غلطة وتعدى ..، إن انت واللى زيك لما حد بيغلط غلطة كبيرة أو صغيرة ، وبالذات لما يكون من الشرطة أو من مؤسسات الدولة أو محسوب على الإدارة الحالية بأى شكل من الأشكال .. بتطلع إنت وكل قبيلة الغربان تصرخوا وتجعروا وتمسكوا صاجات ، وتطالبوا بتطبيق القانون ، وإن مافيش حد فوق القانون ، وإن دى بلد المصريين كلهم مش عزبة حد معين .. طب إشمعنى دلوقتى !؟ .. وإلا علشان  الموضع هنا يمسّك و يمس كل قبيلة المتنطعين !؟

إنت نسيت إن إنت واللى زيك من قبيلة المتنطعين كنتم بتلمعوا الإخوان ، وإنت بالذات كنت بتقول إنهم كوادر تدعو للفخر ومافيش زيهم فى مصر .. وبعد 2011 كنتم كلكم بتستضيفوهم فى برامجكم ، وبتقدموهم للناس وبتدعموهم ، وقولتوا عليهم فصيل وطنى وفصيل سياسى ، وطلعتوا كلكم إحتفلتوا لما مرسى فاز !؟

إنت نسيت إن إنت واللى زيك من قبيلة المتنطعين فى 2011 ركبتوا الموجة ، وكلكم قولتوا يلا هيييه نلعب ثورة .. وطلعت سيادتك تهلل وتتباكى وتقول إن الظلم فاق كل الحدود ، وإنكم وكل المصريين كنتم بتتخوذقوا فى الأقسام ، وكان بيطلع (ديـ ….. لفظ خارج لا يقوله إعلامى) .. وإلا انت نسيت !؟

إنت نسيت إن إنت واللى زيك من قبيلة المتنطعين قمتم بتلميع من أسميتموهم ثوار ، وإستضفتوهم فى برامجكم .. وهللتوا لما تم إقتحام مقار أمن الدولة !؟ .. نسيتوا هجومكم الشرس على المجلس العسكرى فى فترة من أحلك الظروف اللى مرت بيها مصر !؟ .. نسيتوا تهليلكم لدستور الإخوان !؟ .. نسيتوا ترويجكم لمقولة حكم العسكر ، لدرجة إن واحد صاحبك طلع وقالها للفريق السيسى وقتها إبّان ترشحه للرئاسة ، واللى خلّى السيسى يقول له مش هــ أسمحلك تقول على جيش مصر عسكر !؟

إنت نسيت إن إنت واللى زيك من قبيلة المتنطعين ، إنكم بدل ما تقفوا مع البلد ، كنتم أكبر المروجين لفكرة فشل الدولة وإنهيارها وإفلاسها ، وترويج الشائعات ، والهجوم على مؤسسات الدولة ، ونشر الإحباط وتهبيط العزائم و رسم صورة مستقبل إسود فى عيون المصريين وتحطيم روحهم المعنوية .. مما دعى الرئيس السيسى إنه يغضب فى أحد خطاباته ويقول ” عايز تبنى البلد معايا أهلا .. مش عايز .. من فضلك أسكت” !؟

طب إنت نسيت إنت واللى زيك من قبيلة المتنطعين ، من كتر ما كنتم بتهاجموا ماتفعله الدولة والحكومة والرئاسة ، وعدم إهتمامكم بالمشروعات ، أو حتى محاولة إلقاء الضوء عليها ، وكأنكم كنتم بتدعموا مبدأ إنه مشروعات فنكوش ..، لما رئيس الدولة طلع مرة وقال لكم ” هــ أشتكيكم للشعب” ؟؟ .. ومرة تانية قال “يابخت عبد الناصر بإعلامه” ؟

إنت نسيت لما إنت واللى زيك من قبيلة المتنطعين .. سيبتم إفتتاح مشروع الأسمرات ، كأول مشروع من نوعه تقوم الدول بتنفيذه على طريق إلغاء العشوائيات ، وماشوفتوش غير السجادة الحمرا .. يا إعلام السجادة الحمرا !!؟

إنت نسيت إن إنت واللى زيك من قبيلة المتنطعين .. كنتم بتهاجموا كل الإجراءات اللى بتقوم بيها الدولة لصالح المواطن الفقير ، ومحاولة عمل توازن فى الأسعار عن طريق المجمعات الإستهلاكية ومنافذ بيع القوات المسلحة .. وغيره وغيره من عمليات إستيراد بعض المنتجات زى لبن الأطفال وبعض الأدوية وبعض السلع .. وكنتم بتعملوا كل ده علشان خاطر رجال الأعمال أصحاب السبوبة الأصليين ، واللى بيدفعولكم كتير أوى علشان تروجوا لهم فى برامجكم ، لأن هم اللى بيدفعوا الإعلانات اللى جزء من فلوسها بيدخل جيوبكم !؟

عرفت بقى إن إنت واللى زيك من قبيلة المتنطعين ، اللى بتنسوا مش الشعب اللى بينسى !!؟؟

عرفت لييه الشعب قرف منكم وكرهكم ، وبقى بيهاجمكم ومش طايق يشوفكم !؟

عرفت إن حتى نسب المشاهدة مابقتش بهدف المتابعة ولا حباً فيكم ، لكن للتعرف على اللى انتم بتقولوه بس علشان يسخروا منكم لأنه ماعادش حد خلاص بيصدقكم !؟

عرفت إن سياسة اللعب على كل الحبال ، خلّتكم تخسروا الجميع ، وإن المؤيد خلاص كشفكم ، والمعارض بقى بيحتقركم ، والعميل أصبح بيستهزأ بيكم .. لأنكم مجموعة من السبوجية والمهيصاتية ومن الأكلين على كل الموائد بدون مبدأ أو إنتماء إلا للمادة والسبوبة

عزيزى كبير مشاهير القبيلة:

ياريت بلاش إرتداء ثوب الطهارة ، واللعب على نغمة إحنا عملنا علشان مصر ، وما إستفدناش حاجة .. لأن أرصدتكم البنكية والعقارية ، داخل وخارج مصر ، هى أكبر شاهد عليكم … ومن جيوب المصريين مش من حد تانى .. ولازم تعرفوا إن المصريين زى ماعملو منكم نجوم .. قادرين يضعوكم فى حجمكم الحقيقى .. أو يلقوا بكم إلى غياهب النسيان ..

عزيزى كبير مشاهير القبيلة:

مصر الجديدة ماعليهاش فواتير لحد .. و مافيش فيها خطوط حمرا .. والإعلامى مش فوق القانون .. ولو غلط يبقى لازم يتعاقب .. و زى ما سيادتك كنت أحد المطالبين والمجعرين والصارخين بمحاسبة شرائح أخرى من المجتمع .. و ده حصل فى خلال السنتين اللى فاتوا .. وإتسجن الوزير ، والمحافظ ، ونائب المحافظ ،  والقاضى ، وضابط الشرطة ، والطبيب ، والوظف الحكومى الكبير فى الوزارات المختلفة ، ورؤساء مجالس شركات .. ألخ ألخ ألخ .. يبقى كمان الإعلامى لما يغلط لازم يتحاسب ! … وعلى فكرة .. القانون هو الوجه الأخر للديموقراطية اللى إنتم بتنادوا بيها ..

وأخيراً وليس بآخر ..

عزيزى المواطن المصرى المحب لوطنه:

إنت بتعمل إعجاز ، وبتسطّر ملحمة تاريخية فى معركة الوعى .. ولولا دورك ووعيك ، ماكنّاش ممكن نشوف اليوم اللى فيه الإعلامى بــ يستجدى عطف المشاهدين على الهواء ، وبيقول لييه بتعملوا فينا كدة !؟ ….

إنتم بجد شعب جبار .. وطول مانتم إيد واحدة ، وطول مانتم الظهير الشعبى الحقيقى للدولة ، طول ما البلد دى هــ تطلع للأمام … وإوعى حد يطلع يزايد عليكم ، و يقول لكم لولانا كان ممكن الحال يبقى غير الحال .. لأن ماحدش له فضل على المصريين بعد ربنا سبحانه وتعالى غير المصريين أنفسهم

إنتم اللى أزحتم الإخوان ..

إنتم اللى بتدعموا جيشكم ..

إنتم اللى بتدعموا توجهات الدولة الحالية

إنتم الظهير الشعبى للدولة ..

وبإيديكم إنتم فقط بعد فضل الله عز وجل .. هــ تحققوا المستحيل

لمتابعة تعليقاتكم