21 Jun 2018
كأس العالم ….النفوس المريضة بمرض التفكير بالتمني
——————————————————
من 9 سنين بالتمام و الكمال و في نفس الشهر “يونيو 2009” … اقيمت كاس العالم للقارات و التي اشترك فيها منتخبنا الوطني بعد خسارته من منتخب الجزائر بالجزائر في تصفيات كاس العالم لعام 2010…. و للاسف الكل كان بيتصيد للمنتخب اخطاؤه و كان الاعلام الرياضي عندنا واخد المنتخب غسيل و مكوه و قاعد بيمني نفسه بالفضيحه اللى حتقابل المنتخب في البطوله و خاصة ان كان معانا في مجموعتنا “البرازيل و ايطاليا و امريكا” … طبعا عشان يزايدوا و يطلعوا امراضهم النفسيه على الناس كالعاده.
و على غير المتوقع و اللى اصاب الاعلام الرياضي بالاحباط …. لعب المنتخب الوطني اروع بطولة في تاريخه …. اتغلب من البرازيل 4-3 في مباراه اسطوريه لعبا و أداءاً… و هزم ايطاليا بطل العالم 1-0 …. و اتغلب من امريكا بعد ان طاله العديد من الاصابات لبعض اللاعبين الاساسيين بالاضافة الى الانهيار البدني امام لاعبين امريكا اللى هم عباره عن فريق من الجياد التي لا تتعب…. و لم يصل المنتخب للدور الثاني بفارق هدف واحد عن منتخب امريكا.
ليتلقف الاعلام الرياضي و ضعاف النفوس خبر كاذب نشر في جريده مشبوهه في جنوب افريقيا عن وجود بنات و عاهرات في غرف لاعبي المنتخب و اللى أدي الى سرقه متعلقات اللاعبين …. فيتصيدوا الفرصة لكسر فرحة الجماهير المصرية و اضاعة اي نقطه بيضاء تضاف لتاريخ الرياضة المصرية و يتغنوا بها … و تبارى الاعلاميين باستخدام كل ما يملكون من مهارات و مصداقية عند الجماهير …. سواء الاعلاميين الرياضيين او السياسيين و كذلك الكتاب و الصحفيين في تأكيد الخبر … و اضافة البهارات و التفاصيل الوقحة … و طلعوا يجعروا و يصرخوا و هم بيأكدوا و بيحلفوا ميت يمين ان كان فيه سهر و طبل و زمر و حفلات ماجنة و جنس جماعي في ليلة مباراة امريكا و ان هو ده سبب الهزيمة من منتخب امريكا اللى وصفوها بالفضيحه … مع ان لا كان فيه فضيحة و لا حاجة … و وصل بيهم السفاله ان فيه منهم اللى عرض لعبة لعبة بالتصوير البطىء عشان يؤكد و يقنع الناس ان اللاعيب مش عارف ينط عشان ركبه مش قادرة تشيله….
فينجحوا في ان الجماهير تنسي ما فعله اللاعبون في البطولة … و تنكسر فرحتهم بانجاز المنتخب … و يصاب اللاعبون بالإحباط الشديد … و يهددوا باعتزال اللعب دوليا و يقدم الجهاز الفني استقالته في حينها …. لتظهر الحقيقة بعدها بكام يوم ان كل الاخبار دي كااااذبة … و ان الشرطة هناك تواطئت مع الجريدة حتي تغطي على فضيحة الفندق و الشرطة لدخول لصوص داخل الفندق و سرقة متعلقات فريق يلعب بطولة دوليه على ارضها … فيخرج الاعلاميون بكل برود و بجاحه و يقولوا “Sorry ” … كنا زعلانين من النتيجه و ماكنش قصدنا …. بس طبعا بعد ما كسروا فرحة المصريين ربنا يكسر نفسهم يا قادر يا كريم.
و مرورا بحادث ام درمان الشهير اللى اشتغل الاعلام الواطي على الموضوع ده بتحضير الشعب و كان المنتخب رايح معركة حربية … و يقدروا يقنعوا الناس ان كان فيه مجازر بشرية و ناس اتقطعت و ناس اتدبحت و اتاكلت احياء …. فـ نجحوا في اشعال فتنة بين الشعب المصري و الجزائري …. و يرجع المنتخب و الجماهير بسلامة …. و ماشفناش واحد ايده متعورة و لا مربوطة و لا حد اتقتل و لا اتدبح …. لنفهم بعد ذلك ان الموضوع كان سياسي من جماعات دولية غير شرعيه لتأليب الرأي العام و تحضيره لما شاهدناه و ما قاموا بيه في 2011 .
و طوال الـ 6 سنوات الماضية … لا يوجد حدث سار او انجاز ايجابي … الا و يجب ان يثار عليه لغط و كذب و اشاعات حتي ينصرف الناس عن الحدث نفسه و يصابوا بالكآبه و الحزن و كسرة النفس …. بداية باشاعات حفر قناة السويس و السجادة الحمرا و سيناء اللى تم احتلالها … و غيرها من آلاف الشائعات اللى بينشرها نفس الناس و نفس الاعلاميين و نفس القطيع بتاعهم اللى بيستهدف هدفين … الاول كسر نفس المصريين و هدم عزيمتهم … و الثاني هو عامل نفسي لقطيعهم بإنشاء عالم وهمى موازي يتمنون وجوده و يتمنون احداثه … ثم يصورون لانفسهم ان ما يتمنوه … هو الواقع الذي يعيشوه…. و هو المظلومية اللى بيعيشوا عليها.
و لاننا للأسف مش بنتعلم … او فيه وسطنا ناس منافقة … نفسهم البلد تخرب بس سايقين فيها انهم قلبهم على البلد … يتكرر نفس السيناريو مره اخرى … بنفس الشائعات القذرة.
بدأناها باشاعة سفر 200 عضو من مجلس الشعب على نفقة الدولة …. و هات يا شير و جعير و صريخ و نهيق و رفس و حلفان بالطلاق ان ده واقع و نشر كوميكس بالفوتوشوب على انه خبر حقيقي على لسان نواب انهم بيقولوا للشعب “سافرنا و اضربوا راسكم في الحيط” … و يقوموا بالعويل و البكاء لتسخين الناس على حقوق الغلابة و الناس مش لاقيه تاكل و يلا بقي عشان نعمل الثورة بتاعتنا و انزلوا الشوارع …. و في الاخر يطلع كل ده كذب و ان اللى سافر سافر على حسابه الشخصي و بمبادرات شخصية.
يقوم ييجوا نفس الناس بنفس ذات نفسهم و بكل بجاحة يطلقوا الشائعات مرة اخرى و بنفس الادوات و بنفس الشائعات …. حتي مفيش تجديد بنفس خبر فندق المنتخب و اللعب على وتر البسطاء و الغلابه … ليبدأو في النهيق و الرفس و العويل و الجعير لتأكيد ان شركة الاتصالات المصريه “WE” قامت بتسفير وفد من الفنانين و الراقصات و معاهم ناس “شمال ” بطائره خاصة على نفقة الشركه من اموال الشعب … و نزولهم في نفس فندق المنتخب … و ان فندق المنتخب عامل زي فرح بنت العمدة و كله طبل و زمر و زغط و لغط و ان غرف اللاعبين مفتوحة للجميع و الفندق بقي مليطة….. و فين حقوق الغلبان و الشعب المسكين … و يلا بقي اغضب و ماتفرحش و ياريت تطلع غضبك بقي و تنزل و تتحرك … و على اقل تقدير لو منزلتش … اديني عكننت عليك ….
و عشان يحبك الموضوع … قاموا ناشرين صور قديمة بقالها سنة لفنانين متصورين مع لاعبي المنتخب …. و عشان يسبكوا الموضوع اكتر … قالك اللعيبة اتخانقت مع بعض … و الحضري شتم كوبر و هددهم بالفضايح … و محمد صلاح طلع غرفته و قالهم مش لاعب ماتش السعوديه و مش بيكلم حد و طرد رئيس الاتحاد من غرفته.
و بغض النظر ان الكلام ده كله كذب كالعاده …. لان فيه بيان رسمي نازل من الراعي الرسمي للمنتخب و هو شركة بريسنتيشن بينفي الكلام ده تماما … و اللى حتلاقوه في اول تعليق …. اللى بيقول ان الطائره اللى سافرت على حساب شركة بريزنتيشن … مش شركة الاتصالات … و ان مفيش مخلوق بيعتب باب الفندق غير اللعيبه و الجهاز الفني …. و مفيش صورة واحدة او فيديو او اي دليل على الكذب اللى بيتقال و لكن كلها صور قديمة من مناسبات سابقة …. و حتي محمد صلاح نزل تكذيب على حسابه الرسمي.
الا ان الناس المريضة نفسيا للاسف عاملين زي الكلاب المسعورة … جزء منهم شمتان في بلده .. و الجزء الاخر بيمارس كل الوسائل على انه يكسرك و يحبطك .
و عشان نختصر موضوع كاس العالم عشان المرارة على آخرها الله يرضي عليكم ….. و في كلام و نقط محدده :-
• كاس العالم حدث عالمي بيعتبر متعة للجماهير سواء اللى بتشوفه في البيوت او اللى بتسافر تتفرج عليه … يعني مش عشان تشتم غيرك او تشتم منتخب بلد تاني … ارتقي و استمتع و سيب القاع للى ساكنين فيه.
• تم التعاقد مع كوبر لهدفين تم الاعلان عنهم في وقتها …. ان يصل الى بطولة الامم الافريقية و ينافس عليها و اللى كنا بقالنا 3 دورات متتالية بنخرج من تصفيات المؤهله لها لاول مره في تاريخنا … و الهدف التاني هو الوصول لكاس العالم …. و هو بالفعل حقق الهدفين كاملين … بغض النظر انت راضي عن الاداء او لا … الراجل حقق الى اتطلب منه و اللى فشل كتير غيره انه يحققه.
• و لأن اللى بيدير منظومة الاشاعات اللى بيستهدف بيها حضرتك … قام باقناعك انك حتروح تكسر الدنيا … و اللى عليه قمت حضرتك رفعت سقف طموحتك بشكل غير واقعي ….. عشان لما تقابل الحقيقه تتصدم … يقوم يلعب عليك زي كل مره ….. هو الناس كانت متخيله انك بقالك 28 سنة لم تصل الى كاس العالم … حتروح تغلب منتخبات دائمة المشاركه و ليها تاريخ في البطوله دي … لمجرد انك عندك لاعب عالمي واحد يوحد ربنا … و كمان مصاب و مش في حالته و لم يلمس الكره طوال 3 اسابيع !!!!! … هو احنا حنضحك على بعض ؟؟؟
• مجرد وصولك لكاس العالم ده في حد ذاته انجاز … و كمان عملت ماتش كويس مع اورجواى و روسيا … و دخل فيك 3 اهداف من اخطاء ساذجه لقلة الخبره و هدفت بهدف و لسع عندك مباره اخرى …. اكتسبنا الخبره و نتعلم من اخطاؤنا و نشتغل عليها .
• لاعيبة مصر محترمين اخلاقيا و ملتزمين … عيب اللى بيتقال ده.
• كون كوبر دفاعي و مش هجومي … او عنده مشاكل في اختيار اللعيبه … او في التغيرات … دي امور فنية … يتحاسب عليها بعد البطولة…. و لا تستاهل المحزنة اللى معمولة دي
• استمتع بالبطولة … و اسمتع باحترام كل النقاد و الخبراء العالميين بفريقك … و بمحمد صلاح اللى العالم كله بيتكلم عليه …. و سيب الهري و النكد و الهبل اللى شغال ده لناسه …
• شكرا منتخب مصر … و برافوا لكل اللاعبين …. عملتوا اللى عليكم على قد امكانياتنا و لم تبخلوا بجهد …. ندعمكم و فخورين بيكم.
و اخيرا …. اميتوا الباطل بالسكوت عنه
ملحوظه:-
صورة البوست من الموقع الرسمي للاتحاد الدولي FIFA اللى اختار 9 لاعبين كبار هم من يمثلون كأس العالم 2018 … و المصري محمد صلاح من ضمنهم ….. فخورين بيك يا صلاح .
تحياتنا