باي باي الجزيرة مباشر مصر

23 Dec 2014

باي باي الجزيرة مباشر مصر

——————————-

تعليق سريع عايز أقوله بخصوص غلق قناة الجزيرة مباشر مصر ، ومين كان السبب فى إغلاقها ..

لكن قبل ما اتكلم عايز بس اقول نبذة مختصرة وهى أن فى عام 1967 كان فيه 9 قنوات إذاعية موجهة بتشتغل ضد مصر على غرار الإذاعة الألمانية الموجهة اللى عملتها المخابرات الانجليزية فى الحرب العالمية الثانية ..

الإذاعات الموجهة دى كان الغرض منها ضرب الداخل المصرى وزعزعة ثقة الشعب فى القيادة بتاعته وتكسير التلاحم المجتمعى ، زى ما اتكلمنا قبل كدة وشرحنا فى سلسلة مقالاتنا عن الدعاية السلبية والحرب النفسية ..

وفضلت الإذاعات دى شغالة كويس جداً لغاية لما حصلت نكسة 5 يونيو ، وبعدين جاء بيان التنحى الشهير للرئيس عبد الناصر ، واللى ترتب عليه خروج الناس للشارع تطالب الرئيس بالرجوع ، و خلّى الشعب كله يلتف تانى حوالين قيادته ، ورفض كل عمليات شق الصف اللى فقدت تاثيرها رغم أنها فضلت مستمرة بشراسة لغاية نصر أكتوبر 1973 !! 🙂

وفى العصر الحديث هــ نلاقى إن قناة الجزيرة مباشر مصر كانت جزء من الحملة الإعلامية الموجهة ضد مصر واللى كان لها تأثير سلبى كبير على الوعى المجتمعى المصرى فى زمن نظام مبارك ، واللى بدوره ساعد بكل اللى كان بيعمله على توسيع الفجوة بين الشعب والقيادة واللى كانت هى المدخل لقناة الجزيرة وكل القنوات اللى شبهها !!

لكن اللى حصل بعد 30 يونيو وبعد ما المصريين فهموا اللعبة ، أن الجزيرة مباشر فقدت تاثيرها على جموع المصريين .. وموضوع المظاهرات التليفزيونية والنظام اللى بــ يتهاوى والاينكيلاب اللى بــ يترنح ، خلاص ماعادتش بــ تجيب نتيجة وخصوصاً زى ماشوفنا فى مظاهرات 28 نوفمبر الماضى ، .. وأصبحت القناة مش بتجيب همها ، و ده طبعاً غير ظهورها وكل العاملين فيها بمظهر قمىء بانحيازهم الفج والمستفز للإخوان المجرمين !! .. وبالتالى كان يجب غلقها .. 🙂 🙂

برغم سعادتى الشخصية بهذا الغلق إلا أنى ضد هذه الفرحة المبالغ فيها من البعض .. لأن الجزيرة مباشر ، أولاً وأخيراً هى مجرد قناة إخبارية لم ولن تنال من عظمة مصر ومن إرادة المصريين ..

إن غلق “قناة الجزيرة مباشر مصر” هى مجرد نصر معنوى يثبت للمشككين أن مصر تسير فى خطوات هادئة وثابتة على الطريق الصحيح .. ولكنه نصر لن يكون أبداً فى مستوى حرب فرض الإرادة التى خاضتها مصر ضد الدول الكبرى والتى فازت فيها مصر على كل هذة الدول بكل جدارة 🙂 🙂

أصدقائى .. أصدقاء صفحة كلام فى الصميم ..

اللى قفل “قناة الجزيرة مباشر مصر” مش الرئيس السيسى ولا قطر ولا السعودية ولا الاتفاقات ولا الضغوط _بالرغم من إن كلهم كان لهم دور_ … لكن اللى قفل “الجزيرة مباشر مصر” هو شعب مصر العظيم بوعيه وبساطته وفطرته ، وفهمه لكل اللى بيحصل وبيدور حواليه ، وكمان بتلاحمه والتفافه حول قيادته السياسية والعسكرية ..

الجزيرة مباشر اتقفلت صحيح ، .. لكن قناة الجزيرة نفسها لسة موجودة هى والعديد من القنوات المشابهة .. وأيا كان اللى هيحصل .. وأيا كانت المؤامرات التى ستحاك ضد بلدنا ، .. هيفضل وعى الشعب المصرى هو رمانة الميزان اللى هتوجه الدفة دايما للطريق الصحيح

إستمروا يامصريين … لأن ربنا مش هيحفظ مصر غير بأبنائها المخلصين

تحيا مصر وعاش شعب وجيش مصر

لمتابعة تعليقاتكم