كلمتين و ردّ غطاهم

28 Aug 2018

كلمتين و ردّ غطاهم

——————–

#ادعم_محمد_صلاح

خد نفس كدة .. و إهدئ شوية .. وإمسك اعصابك .. و حاول ما تشتركش فى الهري الحاصل والدوشة الكبيرة أوى فى قضية اللاعب الدولى المصرى “محمد صلاح” .. مع إتحاد الكرة المصرى ..

كلنا عارفين أو على الأقل نقدر نشوف ونشعر إن إتحاد الكرة المصرى هو منظومة فساد متكاملة بقالها سنين طويلة .. يقوم على إدارتها مجموعة من السبوبجية والمنتفعين … لكن المشكلة الأكبر إن ماحدش يقدر يقيل مجلس الإدارة الحالى .. ولا حتى بقرار رئيس جمهورية .. لييه !؟ .. لأن قوانين الفيفا تمنع أى تدخل من جانب حكومات الدول فى الإتحادات الرياضية الأهلية فى الدول دى .. وبالتالى يوجد شبه حصانة لأفراد الإتحادات دى ، وعلشان كدة بــ يحاربوا عليها ، و بــ يتقاتلوا علشان يكونوا جزء من المنظومة دى .. وأى دولة بــ تتدخل فى سير عمل الإتحادات الأهلية ، بيكون النتيجة هى عقاب صارم من الفيفا بــ وقف النشاط الرياضى فى الدولة دى لمدة لاتقل عن 3 سنوات بشكل مبدئ .. مما يترتب عليه إنهيار المنظومة الرياضية بالكامل داخل هذه الدولة .. وعلشان كدة ، أعضاء هذه الإتحادات بيتعاملوا بمنتهى التعالى والصفاقة والبجاحة ، و اللى تكاد تصل لحد المجاهرة بالفساد ، وإستغلال مناصبهم والتربح منها على طريقة “اللى يقدرلنا على حاجة يعملها” 😏 

طب إييه الحل !!؟؟ … الحل يا سيدى حاجة من إتنين:

إما إنه يتعمل جمعية عمومية من الأندية كلها ويطالبوا بسحب الثقة من مجلس إدارة الإتحاد الحالى ، وتتعمل إنتخابات بوجوه جديدة .. وناس جديدة تدخل فيها ويتم تغيير مجلس الإدارة بالكامل .. و ده مش هــ يحصل .. لأن معظم إدارات الأندية بــ تدار بنفس طريقة إدارة الإتحاد .. وكلها بتبقى تربيطات وتبادل منفعة .. وإلا ماكانش أعضاء مجلس إدارة الإتحاد أصلا وصلوا لمواقعهم دى … وأى تخبيط من دوول او دوول فى بعضهم ، مش هــ يبقى فى مصلحتهم كلهم لأن ساعتها الفضايح هــ تبقى للى مايشترى .. يتفرّج .. وعلشان كدة ده على الأرجح مش هــ يحصل .. !

أو إنه يتم إثبات تهم مالية وإدارية تمس الشرف .. وفى الحالة دى لازم تتبعت كل الأدلة للفيفا يبت فيها .. ولازم تكون ادلة واضحة ماتحتملش الشك .. علشان يبدأ التحرك القضائى .. وللأسف ده برضوا مش ممكن لأن بعض اعضاء المجلس الحالى هم اعضاء فى الفيفا وأعضاء فى الإتحاد الأفريقى “الكاف” .. يعنى قبل مايحصل أى تحرك ضددهم هــ يكون تم إجهاضه أو الطرمخة عليه … وطبعا مش محتاجين نقول إن الفيفا اصلا هى مرتع للفساد ، وإلا ما كنّاش شوفنا وسمعنا وعرفنا كل اللى عرفناه عن ملف تنظيم قطر لكاس العالم 2022 .. وشوفنا إن مراكز كبيرة (بدون ذكر اسماء) كانوا متورطين فى الفساد ده !!

طب يعنى عايز تقول إييه … !!؟؟

عايز اقول إن اللى بيحصل ده بيهز عرش منظومة الفساد الرياضى اللى بقالها سنين ماحدش عارف يقرب لها فى مصر … و هو ده اللى كنا دايما بنأكد عليه قبل كدة .. و ده اللى قاله الرئيس السيسى برضوا فى أحد حواراته .. وهو إن معركة الفساد أصعب من معركة الإرهاب … عامل كدة زى الجسم لما بــ يتمرد على نفسه .. وتبدأ كرات الدم البيضاء تهاجم الخلايا السرطانية اللى جواه .. ياترى متخيلين مدى صعوبة ده .. ومدى المعاناه اللى هــ يعانيها الجسم ده !!

مرة تانية .. اللى بيحصل ده بيهز عرش منظومة الفساد الرياضى فى مصر .. وإشتراكك فى الهري الكتير الحاصل مش هــ يعمل حاجة غير إنه هيزود الهري الحاصل ، واللى ماحدش مستفيد منه غير الإعلام الأسود ، وكل اللى عايزين جنازة ويشبعوا فيها لطم .. وهــ تبقى فرصة ومدخل هــ ينتهزها اللى عايز يهاجم مؤسسات الدولة المصرية .. وفرصة كمان للى عايز يشوه محمد صلاح ويتهمه بتهم مش حقيقية

و حط فى إعتبارك إن محمد صلاح نموذج فريد فى مصر .. واول مرة يبقى عندك لاعب كرة من أفضل 10 لاعبين فى العالم ، و داخل فى منافسة مع عمالقة المشاهير على الكرة الذهبية … وناس كتير جداً يهمها إن النموذج ده يتم تحطيمه ، حتى لو أظهروا عكس كدة ، أو على أقل تقدير يحاولوا يخرجوا عن تركيزه علشان يتشغل عن الكورة بحاجات تانية .. ويبدأ مستواه يتراجع ، لحد ما يتنسى !!

رجاء وليس أمر ..

إبعدوا عن المشاركة فى الهرى ده كله .. وخصوصا إن كمية التويتات والإسكرين شوتس المزيفة والمنتشرة فى كل مكان ، وعن لسان كل الأطراف أكثر من المنطقى .. و ده معناه إن فيه ناس بتنفخ فى النار !!!

إدعموا محمد صلاح .. طالبوا الإتحاد بالإستقالة .. أذكروا الحقائق .. كوّنوا رأى عام ضد الإتحاد .. إتكلموا مع الناس بإيجابية و وعى .. لكن إبعدوا عن المشاركة فى الهرى .. وترقبوا الأحداث فى صمت .. فالقادم مختلف ، وما خلف الكواليس لا يعلمه إلا من هم فى الكواليس .. وفقط 🙂

لمتابعة تعليقاتكم