القوة الناعمة

16 Apr 2021

القوة الناعمة .. !!

——————-

فضلنا إننا ننتظر 3 أيام من رمضان علشان نتأكد إن إختياراتنا فى متابعة فصل من فصول إستعادة تأثير القوة الناعمة المصرية كان إختيار سليم .. ورغم إننا ماكانش عندنا اى شك فى قرارنا .. لكن حبينا نعلق بعد مرور الأيام الأولى من رمضان لما يكون الناس كلها شافت بنفسها وقدرت تحدد متابعتها

بالنسبة لنا .. فــ الإختيار كان محسوم فى 3 مسلسلات هم على الترتيب الإختيار-2 .. وهجمة مرتدة .. والقاهرة كابول … اللى حسموا صراع نسب المشاهدة لصالحهم من أول يوم … وأصبح من الواضح إن المقولة السخيفة اللى كانت بتتقال عن مسلسلات البلطجة والإدمان وقصص السرسجية وفتوات الشوارع والألفاظ البذيئة والصور المسيئة للبلد .. بإن  الجمهور عايز كدة ، أصبح لا محل لها من الإعراب .. وإنه لما بــ يتوجد الفن الهادف والعمل الراقى اللى بيحترم عقلية المشاهد .. وبيحترم فى المقام الأول أدبياتنا وتراثنا وقيم حب البلد والولاء والإنتماء … بنلاقى على طول الناس بتلتف حواليه

الحقيقة إن الباحث ، والمدقق ، والمتابع المتذوق للأعمال الفنية اللى ذكرناهم فى بداية المقال .. هــ يشعر إنهم بيكملوا بعض .. وبيكشفولك حقائق و خبايا كان من المستحيل على المواطن العادى البسيط إنه يقدر يفهمها أو يستوعبها .. و ده شيئ مفهوم و مقدّر .. لأن طبيعة الصراع خلف الكواليس والوجه الخفى للأحداث اللى بتتعلق بمصائر الأمم  .. بتبقى اصعب واعقد من إنه ممكن يتم إستيعابها بسهولة

و بعد مرور عرض 3 حلقات من المسلسلات دى .. وبالذات مسلسل الإختيار .. أعتقد ممكن دلوقتى نفهم ونستوعب أسباب حملة العواء وحالة الصراخ والعويل اللى صاحبت الإعلان عن عرض المسلسلات .. و علشان ندخل فى الموضوع .. فــ إحنا هنقول تعليقنا عن المسلسلات الثلاثة .. و هــ نسيب الحكم فى النهاية لحضراتكم ولأرائكم بعد إكتمال مشاهدة الأعمال

الإختيار2 رجال الظل:-

مسلسل بيتكلم عن نقطة مفصلية فى تاريخ مصر الحديث .. وبيفضح حائط المبكى الإخوانى المعروف بإسم #إعتصام_رابعة .. واللى بــ يحاول الإخوان طول الوقت إنهم يرسخوا من خلاله ، المظلومية الدينية والسياسية ..

المسلسل بيتكلم كمان عن بطولات رجال الظل المصريين .. و بــ يوريك قد إييه فيه ناس بتتعب وبتتحرق ومش بتعيش حياة طبيعية .. وكثير منهم بيدفعوا حياتهم علشان نقدر إحنا نعيش فى أمن وامان .. ومش بيفرق معاهم إذا كنا نعرف أو مانعرفش الدور اللى بيقوموا بيه .. لكن اللى يفرق معاهم بس إن البلد دى تفضل وتكمل وتعيش .. حتى لو ضحوا بعمرهم فى سبيل ده … و طبعا ده يفهمنا لييه كان بــ يتم على مدار سنين محاولة شيطنة الأجهزة الأمنية علشان مانحسش بالدور العظيم اللى بيقوموا بيه

وطبعا مش هــ نتكلم عن السيناريوا والحوار اللى كل جملة فيه بتحمل معناها .. وعارفة رايحة فين .. فى توصيف رائع للأحداث .. و التأكيد على أسس الوطنية ومثل ومبادئ الإنتماء للوطن

طبعا المشاهد الملفتة كتيرة .. لكن من المشاهد اللى لفتت نظرنا .. مشهد الناس وهى وقفة سعيدة فى الشوارع ورافعين علم مصر وبيهتفوا وفرحانين … و هم مش حاسين برجال الظل اللى بيتحركوا بينهم علشان يحموهم ويحموا البلد من أهل الشر وخونة الأوطان من كلاب أهل النار …. والمشهد الثانى مشهد عودة ضابط الأمن الوطنى لبيته ، علشان يلاقى زوجته بتتابع التلفزيون وهو بيذيع حلف اليمين الدستورى للمستشار عدلى منصور .. من غير ماتعرف ولا الناس كلها تعرف حجم المخاطر اللى كانت خلف الكواليس .. ولا المجهود اللى بذله رجال الظل علشان مشاهد كتيرة جدا زى دى تحصل وتخرج للنور .. على طريق الحفاظ على مصر من السقوط.

ولسة المفاجئات مستمرة فى مسلسل الإختيار وهــ يستمر سقوط الأكاذيب اللى بكل اسف لسة ناس كتيرة مصدقينها لحد النهاردة

هجمة مرتدة:-

عمل رائع وقصة واقعية من ملفات المخابرات العامة المصرية .. فى عودة جميلة للنوع ده من الأعمال الدرامية .. بــ تتكلم عن أحداث سبقت فترة الربيع العربى .. وبتقولك إزاى كان الصراع الإستخباراتى شغال .. وإزاى كانت أجهزتنا الأمنية فى قلب الأحداث .. وكانت مخترقة لمايعرف بالمنظمات الحقوقية فى الخارج وكانت عارفة إييه اللى بيتخطط لمصر

و ده يوضحلك حقيقة الصراع .. وإزاى المواخير الحقوقية دى بتشتغل .. واهدافها إييه … وإزاى اللى بيتعاملوا مع المنظمات دى وبــ يتمولوا منها ، بيبقى معظمهم عارف كويس هو بيعمل إييه ضد بلده .. و ده يفسرلك حاجات كتيرة مرت علينا زى ظهور شخصيات مثل وائل غنيم وفرقة 6 إبليس وقدوم البرادعى لمصر وإنشائه ما يعرف بالجمعية الوطنية للتغير .. وإزاى الدولة كانت بتحذر من الناس دى وعرفين نواياهم

المهم إن المسلسل بــ يوريلك الصراع الإستخباراتى خلف الكواليس وإزاى بــ يتم جمع المعلومات ودراستها وتنسيق البازل للوصول للحقيقة الكاملة .. وإنه فيه ناس ممكن تكون حياتها هى الثمن فى نظير الوصول للمعلومة الصحيحة اللى ممكن تحمى البلد وتكشف التأمر عليها … زى ماشوفنا فى مسلسلات رافت الهجان وجمعة الشوان وغيرها من المسلسلات اللى من النوع ده

القاهرة كابول:-

ده بقى العمل اللى نتوقع إنه هــ يبقى مفاجأة الدراما الرمضانية … المسلسل ده بــ يشرح بمنتهى الوضوح أزمة جيل اواخر السبعينات والثمانينات … وحجم التدليس الممنهج اللى تم ممارسته على العقول .. وبيشرحلك ببساطة خالص .. إزاى ممكن طفل عادى .. يتم غرس افكار مغلوطة فى عقله تحت أى ظرف من الظروف .. ويكون نتاجها شخصية مشوهة ممكن تدمر عالم كالم .. أو تبقى شخصية منحرفة فكريا وأخلاقياً

المسلسل ده كمان بــ يفضح حقيقة الفكر اللى إتبنى عليه أساس تكوين الجماعات التكفيرية .. و بــ يوريك اللعبة بتتلعب إزاى ولمصلحة مين .. وإزاى بيكون اصل الولاء والإنتماء لكيانات وشخصيات غير معروفة .. وإنك علشان تحصل على الدعم .. يبقى لازم تبيع نفسك للشيطان حرفياً وتنفذ أى حاجة تتطلب منك .. حتى لو كانت الأهداف اللى من وراء الطلبات دى غير مفهومة.

كمان بنقدر نشوف إن الشخص المنحرف فكرياً مالوش أمان .. وإنه ممكن يغدر بيك فى أى لحظة مهما كنت قريب له .. وإنه بيكرهك من جواه وشايفك على ضلال حتى لو كان بيضحك فى وشك ..

والأهم بقى إنك بتقدر تشوف إنه مافيش فرق بين الشخص البراجماتى فى ثوب دينى والشخص البراجماتى فى ثوب ليبيرالى … الإثنين واحد .. والإثنين مش بيهمهم غير مصلحتهم الشخصية .. حتى لو داسوا فى طريقهم على كل حد و أى حد فى سبيل تحقيق مصلحتهم دى .. حتى لو كان الحد ده هو وطن بأكمله

الخلاصة:-

المسلسلات الثلاثة بيقدمولك تأصيل المشكلة من العمق … وإرتباط المشكلة بأطراف خارجية تدير اللعبة لمصلحتها ، وبإستخدامنا إحنا … والنهاية اللى إنتهت لها الأحداث وصولا لحائط المبكى الإخوانى … وإن إزاى الدولة كانت حاضرة فى كل المشاهد وعندها المعلومة الكاملة

هــ تقوللى طب طالما الدولة كانت عارفة وشايفة .. ماقالتلناش لييه .. ولييه مامنعتش اللى حصل … وبرغم إننا جاوبنا عن السؤال ده من خلال مقالات عديدة خلال السنوات اللى فاتت .. لكن هنجاوب فى جملة واحدة فقط ومختصرة …. وهى إن إمتلاك المعلومة .. جايز يخليك تقدر توقف الأحداث عند نقطة معينة .. لكن لو ماقدرتش تعمل كدة .. و ده ممكن يكون لأسباب كتيرة …. فــ يبقى لازم يكون عندك القدرة على #إدارة_الحلبة .. وتوجيه الأحداث للوجهة اللى تتماشى فى النهاية مع مصلحتك .. و ده اللى قدرت مصر تعمله بإمتياز

مشاهدة ممتعة بإذن الله … و هــ نبقى ننشر لكم خلال رمضان لمحات من المسلسلات الثلاثة وربطها باللى حصل ولسة بيحصل …. مع متابعة لمستجدات الأحداث الحالية المتلاحقة لو تطلب الموضوع نشر مقال لتوضيح الصورة

حفظ الله مصر برئيسها وجيشها وشعبها 🙏

لمتابعة تعليقاتكم