17 Apr 2021
النهاردة فقط … تم نسف مظلومية حائط المبكى الاخوانى المعروف بإعتصام رابعة الارهابى ..
مسلسل الاختيار2 قدر يعمل حلقة توثيقية .. مزج فيها بين الافلام التسجيلية بأحداثها الحقيقية وبين الخط الدرامى للحلقة بأبطال العمل فى مزيج رائع هيفضل ماثل وحاضر الى مالا نهاية فى اذهان وعقول كل المصريين عن حقيقة اللى حصل فى هذه البؤرة الإرهابية…
الحلقة دى وضحت لكل المصريين زيف الادعاءات الاخوانية.. وكشفت كيف يقوم الاخوان بصنع مظلوميتهم المزيفة ..
شوفنا ازاى يبقى الواحد منهم بيضرب رصاص حى وبيقتل ظباط ومجندين … وأول ماتجيله رصاصة تاخد اجله ردا على اللى بيعمله … تلاقيهم بيتباكوا عليه ويقولك الداخلية بتستخدم الرصاص الحى … وشوفنا القناصة متصورين فى لقطات حقيقية … و ده يخلينا نتساءل عن حقيقة القناصة وانتمائتهم اللى قالولنا عليهم واللى كانوا موجودين فى التحرير فى 25 يناير !!
الحلقة فرجت المصريين على افلام تسجيلية حقيقية للممرات الآمنة اللى اتعملت لخروج المعتصمين وبدل ما كان اللى شافها وتداولها فى السوشيال ميديا عشرات الالاف .. فالنهاردة شافها ملايين … وفضحت ازاى كانوا بيقتلوا ناس بريئة بينهم مالهمش ذنب علشان يتاجروا بيهم
شوفنا ازاى القيادات هربت بعد ماشحنوا الأبرياء بشعارات دينية براقة علشان يضمنوا انهم يكونوا الغطاء بتاعهم فى لحظة هروبهم …
واجمل شيء ان الحلقة جابت تسجيل حقيقى لأحمد المغير الاخوانى الهارب وهو بيأكد ان الميدان كان مليان سلاح .. وانه تم إخراجه مع اللى هربوا قبل واثناء الفض.
مرة تانية بنقول ان النهاردة هو اليوم اللى سقطت فيه اكذوبة مظلومية رابعة … وان الاخوان بفكرهم المريض وعقيدتهم الفاسدة .. بيقبعوا هنااااااك ؛ على قمة اقصى درجات الإنح.طا.ط الانسانى … و التط.رف الدين والأخلاقى
الاهم من كل ده .. ان المسلسل وثّق حجم التهديد اللى كان بيشكله الاعتصام ده على استقرار مصر … وان قرار الفض كان قرار شجاع … وكان قرار مدرك لأبعاد خطورة الموقف … و أدينا شوفنا التنسيق اللى كلدانت عليه الخلايا الاخوانية اللى كان هدفهم هز استقرار مصر مش برابعة فقط .. ولكن فى كل الاماكن والمحافظات اللى واجهت اعمال عدوانية بالتزامن مع عملية فض البؤرة الارهابية
بيتهيألى النهاردة فهمنا لييه كانت حالة الصراخ والعويل اللى صاحبت الاعلان عن تصوير المسلسل من البداية وصولا الى عرضه على عشرات الملايين … مش من المصريين فقط ولكن فى كل العالم …
شكرا لكل شخص ساهم ولو بجزء بسيط فى العمل ده وشارك فى فضح الأكاذيب …. ولسة هيفضل مسلسل كشف الأكاذيب مستمر ضمن معركة الوعى اللى بتخوضها الدولة لتحرير فكر و وعى المصريين من سيطرة الفكر المتطرف بشقيه الدينى والليبرالى على العقول.